ಉದಯಪುರ: ಸಿಪಿಐ(ಎಂ) ನೇತೃತ್ವದಲ್ಲಿ ನಡೆಯುತ್ತಿರುವ ‘ಜನ ಆಕ್ರೋಶ ಜಾಥಾ’ದ ದ್ವಿತೀಯ ಹಂತವು ಇದೀಗ ಉದಯಪುರ ವಿಭಾಗದಲ್ಲಿ ಸಾಗುತ್ತಿದ್ದು, ಅರಣ್ಯ ಹಕ್ಕುಗಳ ಕಾಯ್ದೆ (Forest Rights Act – FRA) ಅನುಷ್ಠಾನವನ್ನು ಪ್ರಮುಖ ವಿಚಾರವಾಗಿ ಮುಂದಿಟ್ಟಿದೆ. ಕಾಯ್ದೆ
ಮಾರ್ಚ್ 12ರಂದು ಆರಂಭವಾದ ಈ ಜಾಥಾದಲ್ಲಿ ಪ್ರದೇಶದ ವಿವಿಧ ಆದಿವಾಸಿ ಸಮುದಾಯಗಳಿಂದ ಭಾರೀ ಸಂಖ್ಯೆಯಲ್ಲಿ ಜನರು ಭಾಗವಹಿಸಿದ್ದಾರೆ. ಅರಣ್ಯ, ಭೂಮಿ ಮತ್ತು ಜೀವನೋಪಾಯದ ಮೇಲಿನ ತಮ್ಮ ಕಾನೂನುಬದ್ಧ ಹಕ್ಕುಗಳನ್ನು ನಿರಾಕರಿಸಲಾಗುತ್ತಿದೆ ಎಂಬ ಆತಂಕವನ್ನು ಅವರು ವ್ಯಕ್ತಪಡಿಸಿದ್ದಾರೆ. ಜಾಥಾ ಸಂದರ್ಭದಲ್ಲಿ ಸಾಯ್ರಾ ತಹಸೀಲ್ದಾರ್ ಕಚೇರಿಯನ್ನು ಜನರು ಮುತ್ತಿಗೆ ಹಾಕಿ, ಭೂಪತ್ರ ನೀಡುವುದು ಹಾಗೂ ಎಫ್ಆರ್ಎ ನಿಯಮಗಳನ್ನು ಜಾರಿಗೆ ತರುವಂತೆ ಆಗ್ರಹಿಸಿ ಮನವಿ ಸಲ್ಲಿಸಿದರು.
ಸಿಪಿಐ(ಎಂ) ಹಿರಿಯ ನಾಯಕಿ ಹಾಗೂ ಮಾಜಿ ರಾಜ್ಯಸಭಾ ಸದಸ್ಯೆ ಬ್ರಿಂದಾ ಕಾರಟ್ ಅವರ ನೇತೃತ್ವದಲ್ಲಿ ನಡೆಯುತ್ತಿರುವ ಈ ಜಾಥಾ, ಮಾರ್ಚ್ 24ರಂದು ನಡೆಯಲಿರುವ “ದೆಹಲಿ ಚಲೋ” ಕಾರ್ಯಕ್ರಮಕ್ಕಾಗಿ ಜನರನ್ನು ಸಂಘಟಿಸುತ್ತಿದೆ. ಜಾಥಾದ ಮಾರ್ಗದಲ್ಲಿನ ಸಭೆಗಳು ಮತ್ತು ಪ್ರತಿಭಟನೆಗಳ ಮೂಲಕ ಆದಿವಾಸಿಗಳು ಹಾಗೂ ಅರಣ್ಯವಾಸಿಗಳ ದೀರ್ಘಕಾಲದ ಹೋರಾಟದ ಫಲವಾಗಿ ಜಾರಿಗೆ ಬಂದ ಎಫ್ಆರ್ಎ ಕಾಯ್ದೆಯನ್ನು ಬಿಜೆಪಿ ನೇತೃತ್ವದ ‘ಡಬಲ್ ಎಂಜಿನ್ ಸರ್ಕಾರ’ ವ್ಯವಸ್ಥಿತವಾಗಿ ದುರ್ಬಲಗೊಳಿಸುತ್ತಿದೆ ಎಂದು ಆರೋಪಿಸಲಾಗಿದೆ.
ಇದನ್ನೂ ಓದಿ: ಒಳಮೀಸಲಾತಿ ಗೊಂದಲ ಮಾರ್ಚ್ 28ಕ್ಕೆ ಬಗೆಹರಿಯುವ ಸಾಧ್ಯತೆ: ಗೃಹ ಸಚಿವ ಜಿ. ಪರಮೇಶ್ವರ್ ಭರವಸೆ
ಉದಯಪುರದ ಆದಿವಾಸಿ ಪ್ರದೇಶಗಳಾದ ಗೊಗುಂಡಾ ಮತ್ತು ಸಾಯ್ರಾ ಭಾಗಗಳಲ್ಲಿ ನಡೆದ ಸಭೆಗಳಲ್ಲಿ ಮಾತನಾಡಿದ ಬ್ರಿಂದಾ ಕಾರಟ್, ಆದಿವಾಸಿಗಳ ‘ಜಲ್, ಜಂಗಲ್, ಜಮೀನ್’ (ನೀರು, ಅರಣ್ಯ, ಭೂಮಿ) ಮೇಲಿನ ಹಕ್ಕುಗಳು ತೀವ್ರ ಹಾನಿಗೊಳಗಾಗುತ್ತಿವೆ ಎಂದು ಹೇಳಿದರು. ಬಿಜೆಪಿ ಸರ್ಕಾರದ ನೀತಿಗಳು ನೈಸರ್ಗಿಕ ಸಂಪನ್ಮೂಲಗಳನ್ನು ದೊಡ್ಡ ಕಾರ್ಪೊರೇಟ್ ಸಂಸ್ಥೆಗಳ ಕೈಗೆ ಒಪ್ಪಿಸುವಂತಿವೆ ಎಂದು ಅವರು ಟೀಕಿಸಿದರು.
“ಆದಿವಾಸಿಗಳ ನೀರು, ಅರಣ್ಯ ಮತ್ತು ಭೂಮಿಯ ಮೇಲಿನ ಹಕ್ಕುಗಳನ್ನು ಬಿಜೆಪಿ ‘ಡಬಲ್ ಎಂಜಿನ್ ಸರ್ಕಾರ’ ಗೌತಮ್ ಅದಾನಿ ಮತ್ತು ಮುಕೇಶ್ ಅಂಬಾನಿ ಸೇರಿದಂತೆ ದೊಡ್ಡ ಕಾರ್ಪೊರೇಟ್ ಗುಂಪುಗಳಿಗೆ ಒಪ್ಪಿಸುತ್ತಿದೆ,” ಎಂದು ಅವರು ಆರೋಪಿಸಿದರು.
ಗೊಗುಂಡಾ ಪ್ರದೇಶದ ಗ್ರಾಮಗಳ ಸ್ಥಿತಿಯನ್ನು ಉಲ್ಲೇಖಿಸಿದ ಅವರು, ಹಲವಾರು ಗ್ರಾಮಗಳಲ್ಲಿ ಮೂಲಭೂತ ಸೌಕರ್ಯಗಳೇ ಇಲ್ಲ ಎಂದು ಹೇಳಿದರು.
“ಅನೇಕ ಗ್ರಾಮಗಳಲ್ಲಿ ಕುಡಿಯುವ ನೀರು, ವಿದ್ಯುತ್, ರಸ್ತೆ, ಶಾಲೆ, ಆಸ್ಪತ್ರೆ ಹಾಗೂ ಉದ್ಯೋಗಾವಕಾಶಗಳ ಕೊರತೆ ಇದೆ. ಇಂತಹ ಪರಿಸ್ಥಿತಿಯಲ್ಲಿ ದೇಶವನ್ನು ‘ವಿಶ್ವಗುರು’ ಎಂದು ಹೇಳುವುದು ಜನರ ಗಾಯದ ಮೇಲೆ ಉಪ್ಪು ಹಚ್ಚಿದಂತಾಗಿದೆ,” ಎಂದು ಅವರು ಹೇಳಿದರು.
ಅರಣ್ಯ ಹಕ್ಕುಗಳ ಕಾಯ್ದೆಯ ನಿಯಮಗಳನ್ನು ಜಾರಿಗೆ ತರದಿರುವುದು ಅರಣ್ಯವಾಸಿಗಳ ಸಂಕಷ್ಟವನ್ನು ಮತ್ತಷ್ಟು ಹೆಚ್ಚಿಸಿದೆ ಎಂದು ಅವರು ಹೇಳಿದರು. ಕಾಯ್ದೆಯ ಸೆಕ್ಷನ್ 3(2) ಪ್ರಕಾರ ಅರಣ್ಯ ಪ್ರದೇಶಗಳಲ್ಲಿ ರಸ್ತೆ ಸೇರಿದಂತೆ ಮೂಲಸೌಕರ್ಯ ನಿರ್ಮಿಸಲು ಅವಕಾಶವಿದ್ದರೂ, ಅರಣ್ಯ ನಿಯಮಗಳನ್ನು ನೆಪವಿಟ್ಟು ಸರ್ಕಾರ ಅನೇಕ ಬಾರಿ ಅನುಮತಿ ನೀಡುವುದಿಲ್ಲ ಎಂದು ಆರೋಪಿಸಿದರು.
“ಇದು ಯಾವ ರೀತಿಯ ನ್ಯಾಯ? ನಾವು ಈ ದೇಶದ ನಾಗರಿಕರಲ್ಲವೇ?” ಎಂದು ಅವರು ಪ್ರಶ್ನಿಸಿದರು.
ಸಿಪಿಐ(ಎಂ) ರಾಜ್ಯ ಕಾರ್ಯದರ್ಶಿ ಕಿಶನ್ ಪರಿಕ್ ಮಾತನಾಡಿ, ಬಿಜೆಪಿ ಸರ್ಕಾರದ ಜನವಿರೋಧಿ ನೀತಿಗಳ ವಿರುದ್ಧ ಹೋರಾಟವನ್ನು ಮತ್ತಷ್ಟು ತೀವ್ರಗೊಳಿಸಲು ಜನರನ್ನು ಕರೆ ನೀಡಿದರು. ರೈತರು, ಕಾರ್ಮಿಕರು, ಮಹಿಳೆಯರು, ವಿದ್ಯಾರ್ಥಿಗಳು ಮತ್ತು ಯುವಕರು ರಾಜ್ಯದಾದ್ಯಂತ ಜನ ಆಕ್ರೋಶ ಜಾಥಾದಲ್ಲಿ ಉತ್ಸಾಹದಿಂದ ಭಾಗವಹಿಸಿದ್ದಾರೆ ಎಂದು ಅವರು ಹೇಳಿದರು.
ಡಿಎಸ್ಎಂಎಂ (ದಲಿತ ಶೋಷಣ ಮುಕ್ತಿ ಮಂಚ್) ನಾಯಕ ದುಲೀಚಂದ್ ಮೀನಾ ಮಾತನಾಡಿ, ಬಿಜೆಪಿ–ಆರ್ಎಸ್ಎಸ್ ಆದಿವಾಸಿಗಳನ್ನು ಅವರ ಭೂಮಿಯಿಂದ ವಂಚಿಸಿ ನೈಸರ್ಗಿಕ ಸಂಪನ್ಮೂಲಗಳನ್ನು ಕಾರ್ಪೊರೇಟ್ ಸಂಸ್ಥೆಗಳ ಕೈಗೆ ಒಪ್ಪಿಸಲು ಪ್ರಯತ್ನಿಸುತ್ತಿದೆ ಎಂದು ಆರೋಪಿಸಿದರು.
“ಆದಿವಾಸಿಗಳು ತಮ್ಮ ಅರಣ್ಯ ಭೂಮಿಯನ್ನು ಉಳಿಸಿಕೊಳ್ಳಲು ಹೋರಾಡುತ್ತಿದ್ದಾರೆ. ಆದರೆ ಸರ್ಕಾರ ನೈಸರ್ಗಿಕ ಸಂಪನ್ಮೂಲಗಳನ್ನು ದೊಡ್ಡ ಕಂಪನಿಗಳಿಗೆ ನೀಡುತ್ತಿದೆ,” ಎಂದು ಅವರು ಹೇಳಿದರು. ಜೊತೆಗೆ ಮನರೇಗಾ ಯೋಜನೆ ದುರ್ಬಲಗೊಂಡಿರುವುದರಿಂದ ಅರಣ್ಯ ಉತ್ಪನ್ನಗಳ ಮೇಲೆ ಅವಲಂಬಿತವಾಗಿರುವ ಆದಿವಾಸಿಗಳ ಜೀವನೋಪಾಯಕ್ಕೂ ದೊಡ್ಡ ಹೊಡೆತ ಬಿದ್ದಿದೆ ಎಂದು ಹೇಳಿದರು.
ಸಿಪಿಐ(ಎಂ) ಉದಯಪುರ ಜಿಲ್ಲಾ ಕಾರ್ಯದರ್ಶಿ ರಾಜೇಶ್ ಸಿಂಗ್ವಿ ಮಾತನಾಡಿ, ಗೊಗುಂಡಾ ಮತ್ತು ಸಾಯ್ರಾ ತಹಸೀಲ್ಗಳಲ್ಲಿ ಅರಣ್ಯ ಹಕ್ಕುಗಳ ಜಾರಿಗೆ ಪಕ್ಷ ನಿರಂತರ ಹೋರಾಟ ನಡೆಸಿದೆ ಎಂದು ಹೇಳಿದರು.
“ಕೆಂಪು ಧ್ವಜದ ನೇತೃತ್ವದಲ್ಲಿ ಬೀದಿಯಿಂದ ಸಂಸತ್ತಿನವರೆಗೂ ನಾವು ಅರಣ್ಯ ಹಕ್ಕುಗಳು ಮತ್ತು ಭೂಪತ್ರಗಳಿಗಾಗಿ ಹೋರಾಡಿದ್ದೇವೆ,” ಎಂದು ಅವರು ಹೇಳಿದರು.
ಇದಲ್ಲದೆ, ಆದಿವಾಸಿಗಳನ್ನು ಪ್ರತಿನಿಧಿಸುತ್ತೇವೆ ಎಂದು ಹೇಳಿಕೊಳ್ಳುವ ಹೊಸ ರಾಜಕೀಯ ಪಕ್ಷಗಳಾದ ಭಾರತೀಯ ಟ್ರೈಬಲ್ ಪಾರ್ಟಿ (BTP) ಮತ್ತು ಭಾರತ ಆದಿವಾಸಿ ಪಾರ್ಟಿ (BAP) ನೈಜ ಸಮಸ್ಯೆಗಳನ್ನು ಎತ್ತಿಕೊಳ್ಳಲು ವಿಫಲವಾಗಿವೆ ಎಂದು ಅವರು ಟೀಕಿಸಿದರು.
ಸಾಯ್ರಾ ಪ್ರದೇಶ ಕಾರ್ಯದರ್ಶಿ ಶ್ರವಣ್ ಕುಮಾರ್ ಮಾತನಾಡಿ, ಅರಣ್ಯ ಹಕ್ಕುಗಳನ್ನು ನಿರಾಕರಿಸಿರುವುದು ಸ್ಥಳೀಯರ ದಿನನಿತ್ಯದ ಬದುಕಿನ ಮೇಲೆ ಗಂಭೀರ ಪರಿಣಾಮ ಬೀರಿದೆ ಎಂದು ಹೇಳಿದರು.
“ಜನರಿಗೆ ಅರಣ್ಯದಿಂದ ಕಡ್ಡಿ ಕೂಡ ಸಂಗ್ರಹಿಸಲು ಅವಕಾಶ ಇಲ್ಲ. ಶಿಕ್ಷಣ ಮತ್ತು ಉದ್ಯೋಗ ಸೌಲಭ್ಯಗಳ ಕೊರತೆ ಇದೆ. ಕುಡಿಯುವ ನೀರಿಗಾಗಿ ಸಹ ಜನರು ದೂರದೂರಿಗೆ ತೆರಳಬೇಕಾದ ಪರಿಸ್ಥಿತಿ ಇದೆ,” ಎಂದು ಅವರು ಹೇಳಿದರು.
ಜಾಥಾ ವೇಳೆ ಸಾಯ್ರಾ ತಹಸೀಲಿನ ಕೋವಿಯಾ, ಬಗ್ಗಾ, ಬೋಖಡಾ, ಬಗಾಡ್ ಮತ್ತು ಕಾಂಬಾ ಸೇರಿದಂತೆ ಹಲವು ಗ್ರಾಮಗಳಲ್ಲಿ ಸಭೆಗಳು ನಡೆದವು. ಅರಣ್ಯ ಹಕ್ಕುಗಳು, ಉದ್ಯೋಗ ಮತ್ತು ಮೂಲಭೂತ ಸೌಲಭ್ಯಗಳ ಕೊರತೆ ಕುರಿತಾಗಿ ಗ್ರಾಮಸ್ಥರು ತಮ್ಮ ಸಮಸ್ಯೆಗಳನ್ನು ಮುಂದಿಟ್ಟರು.
ಉದಯಪುರ ವಿಭಾಗದ ಆದಿವಾಸಿ ಪ್ರದೇಶಗಳ ಮೂಲಕ ಜನ ಆಕ್ರೋಶ ಜಾಥಾ ಮುಂದುವರಿಯುತ್ತಿದ್ದು, ಮಾರ್ಚ್ 24ರಂದು ನಡೆಯಲಿರುವ ದೆಹಲಿ ಚಲೋ ಕಾರ್ಯಕ್ರಮದ ಹಿನ್ನೆಲೆಯಲ್ಲಿ ಅರಣ್ಯ ಹಕ್ಕುಗಳ ಕಾಯ್ದೆಯ ಸಂಪೂರ್ಣ ಅನುಷ್ಠಾನವೇ ಈ ಹೋರಾಟದ ಪ್ರಮುಖ ಬೇಡಿಕೆಯಾಗಿದೆ.
ಇದನ್ನೂ ನೋಡಿ: ಸಾಹಿತ್ಯ ಓದಿಗೆ ವಿಮರ್ಶಾತ್ಮಕ ದೃಷ್ಟಿ ಅಗತ್ಯ – ಬಂಜಗೆರೆ ಜಯಪ್ರಕಾಶ Janashakthi Media
