ವಯನಾಡ್: ಅನಕ್ಕಂಪೊಯಿಲ್ – ಕಲ್ಲಾಡಿ ಸುರಂಗ ರಸ್ತೆ ಯೋಜನೆಯ ವಯನಾಡ್ ಭಾಗದಲ್ಲಿ ಸಂಭವಿಸಿದ ಭೀಕರ ಭೂಕುಸಿತದ ಸ್ಥಳದಲ್ಲಿ ಜುಲೈ 7ರಂದೂ ಬಹು ಏಜೆನ್ಸಿಗಳ ಸಂಯುಕ್ತ ರಕ್ಷಣಾ ಕಾರ್ಯಾಚರಣೆ ಮುಂದುವರಿದಿದ್ದು, ಮೃತರ ಸಂಖ್ಯೆ ನಾಲ್ಕಕ್ಕೆ ಏರಿಕೆಯಾಗಿದೆ. ಇನ್ನೂ ನಾಲ್ವರು ಅವಶೇಷಗಳಡಿ ಸಿಲುಕಿರುವ ಭೀತಿ ವ್ಯಕ್ತವಾಗಿದೆ. ವಯನಾಡ್
ನಿರಂತರ ಮಳೆ ಹಾಗೂ ಅಸ್ಥಿರ ಭೂಭಾಗದ ನಡುವೆ ರಕ್ಷಣಾ ತಂಡಗಳು ಸಮಯದ ವಿರುದ್ಧ ಪೈಪೋಟಿ ನಡೆಸುತ್ತಿದ್ದು, ಗಾಯಗೊಂಡ 10 ಮಂದಿಗೆ ಎರಡು ಆಸ್ಪತ್ರೆಗಳಲ್ಲಿ ಚಿಕಿತ್ಸೆ ನೀಡಲಾಗುತ್ತಿದೆ.
ಭೂಕುಸಿತದಿಂದ ನಿರ್ಮಾಣ ಸ್ಥಳದ ಭಾಗಗಳು ಸಂಪೂರ್ಣವಾಗಿ ನಾಶವಾಗಿದ್ದು, ಸಮೀಪದ ಚರ್ಚ್ ಮತ್ತು ಮನೆ ಕೊಚ್ಚಿಹೋಗಿವೆ. ಸಂಪರ್ಕ ಸೇತುವೆಯೂ ಮಣ್ಣಿನಡಿ ಮುಳುಗಿದ ಪರಿಣಾಮ ರಕ್ಷಣಾ ಕಾರ್ಯಕ್ಕೆ ಅಡ್ಡಿಯಾಗಿದೆ.
ಇದನ್ನೂ ಓದಿ: ರಾಮಜನ್ಮಭೂಮಿ ಟ್ರಸ್ಟನ್ನು ಆರ್ಟಿಐ ಕಾಯ್ದೆಯ ಅಡಿಗೆ ತನ್ನಿ – ಗೃಹಮಂತ್ರಿಗಳಿಗೆ ಸಿಪಿಐ(ಎಂ) ಸಂಸದ ಜಾನ್ ಬ್ರಿಟ್ಟಾಸ್ ಪತ್ರ
ಮನೆ ನಿವಾಸಿಗಳು ಮೆಕ್ಕಾ ಯಾತ್ರೆಗೆ ತೆರಳಿದ್ದರಿಂದ ಮನೆ ಬೀಗ ಹಾಕಲಾಗಿದ್ದು, ಚರ್ಚ್ ಖಾಲಿಯಾಗಿದ್ದ ಕಾರಣ ದೊಡ್ಡ ದುರಂತ ತಪ್ಪಿದೆಯೆಂದು ಅಧಿಕಾರಿಗಳು ತಿಳಿಸಿದ್ದಾರೆ.
ಸೇತುವೆ ಮಣ್ಣಿನಡಿ ಹೂಣಾಗಿರುವ ಹಿನ್ನೆಲೆಯಲ್ಲಿ, ರಕ್ಷಣಾ ತಂಡಗಳು ಎರಡು ಎಕ್ಸ್ಕವೇಟರ್ಗಳ ಸಹಾಯದಿಂದ ಮಣ್ಣು ತೆರವುಗೊಳಿಸಿ ಪ್ರವೇಶ ಮಾರ್ಗ ಪುನಃಸ್ಥಾಪಿಸಲು ಪ್ರಯತ್ನಿಸುತ್ತಿವೆ.
ಮೀನಾಕ್ಷಿ ಸೇತುವೆ ಸಮೀಪ ನಡೆದ ಈ ಘಟನೆಗೆ ನಿರಂತರ ಭಾರಿ ಮಳೆಯೇ ಕಾರಣವೆಂದು ಪ್ರಾಥಮಿಕ ವರದಿ ಸೂಚಿಸಿದೆ. ನಿರ್ಮಾಣ ಸ್ಥಳದಲ್ಲಿ ಸಂಗ್ರಹಿಸಿದ್ದ ಮಣ್ಣು ಗುಡ್ಡಗಳು ಕುಸಿದು, ಕಾರ್ಮಿಕರು, ವಾಹನಗಳು ಹಾಗೂ ಕಾರ್ಯ ಪ್ರದೇಶವನ್ನು ಮಣ್ಣಿನಡಿ ಹೂಣಾಗಿಸಿವೆ.
ಮೆಪ್ಪಾಡಿ ಪ್ರದೇಶದಲ್ಲಿ ಕಳೆದ 24 ಗಂಟೆಗಳಲ್ಲಿ 226 ಮಿಮೀ ಮಳೆಯಾದ ಪರಿಣಾಮ, ಈಗಾಗಲೇ ತೇವಗೊಂಡಿದ್ದ ಪರ್ವತ ಪ್ರದೇಶ ಇನ್ನಷ್ಟು ಅಸ್ಥಿರಗೊಂಡಿದೆ.
ಈ ಪ್ರದೇಶ ಪ್ರವಾಸಿಗರಿಗೂ ಪ್ರಸಿದ್ಧವಾಗಿದ್ದು, ಘಟನೆ ವೇಳೆ ಹಲವಾರು ಖಾಸಗಿ ವಾಹನಗಳು ಹಾಗೂ ಕಾರ್ಮಿಕರನ್ನು ಸಾಗಿಸಲು ಬಳಸುತ್ತಿದ್ದ ಬಸ್ಗಳು ಅಲ್ಲೇ ನಿಲ್ಲಿಸಲಾಗಿದ್ದವು. ಇದರಿಂದ ಇನ್ನಷ್ಟು ಮಂದಿ ಅವಶೇಷಗಳಡಿ ಸಿಲುಕಿರುವ ಸಾಧ್ಯತೆ ವ್ಯಕ್ತವಾಗಿದೆ.
ಕೇರಳ ರಾಜ್ಯ ವಿಪತ್ತು ನಿರ್ವಹಣಾ ಪ್ರಾಧಿಕಾರದಲ್ಲಿ ತುರ್ತು ಸಭೆ ನಡೆಸಿದ ಮುಖ್ಯಮಂತ್ರಿ ವಿ.ಡಿ. ಸತೀಶನ್ ಅವರು, ಕಠಿಣ ಪರಿಸ್ಥಿತಿಗಳ ನಡುವೆಯೂ ರಕ್ಷಣಾ ಕಾರ್ಯ ಮುಂದುವರಿದಿದೆ ಎಂದು ತಿಳಿಸಿದ್ದಾರೆ.
ನಿರ್ಮಾಣ ಕಂಪನಿಗೆ ಸ್ಥಳದಲ್ಲಿದ್ದ ಮಣ್ಣು ಗುಡ್ಡಗಳನ್ನು ತೆರವುಗೊಳಿಸಲು ಸರ್ಕಾರ ಹಲವು ಬಾರಿ ಸೂಚನೆ ನೀಡಿದ್ದು, ಜೂನ್ 20ರಂದು ಅಧಿಕೃತ ಆದೇಶವನ್ನೂ ಹೊರಡಿಸಲಾಗಿತ್ತು. ಆದರೆ ಕಂಪನಿ ಆ ಸೂಚನೆಗಳನ್ನು ಪಾಲಿಸಿಲ್ಲವೆಂಬ ಆರೋಪ ಕೇಳಿಬಂದಿದೆ.
ರಾಜಸ್ವ ಸಚಿವ ಎ.ಪಿ. ಅನಿಲ್ ಕುಮಾರ್ ಹಾಗೂ ಕೃಷಿ ಸಚಿವ ಟಿ. ಸಿದ್ದೀಕ್ ಅವರಿಗೆ ಸ್ಥಳಕ್ಕೆ ತೆರಳಿ ರಕ್ಷಣಾ ಕಾರ್ಯವನ್ನು ಮೇಲ್ವಿಚಾರಣೆ ಮಾಡುವಂತೆ ಮುಖ್ಯಮಂತ್ರಿಗಳು ಸೂಚಿಸಿದ್ದಾರೆ.
ಸ್ಥಳಕ್ಕೆ ತೆರಳುವ ಮುನ್ನ ಮಾತನಾಡಿದ ಸಚಿವ ಸಿದ್ದೀಕ್, “ಇದು ಪ್ರಕೃತಿ ವಿಕೋಪವಲ್ಲ, ಮಾನವ ನಿರ್ಮಿತ ದುರಂತ” ಎಂದು ಆರೋಪಿಸಿದರು. ಸುರಂಗ ಕಾಮಗಾರಿಯ ವೇಳೆ ಮಣ್ಣು ವೈಜ್ಞಾನಿಕ ವಿಧಾನದಲ್ಲಿ ಸಂಗ್ರಹಿಸದೆ ಇರುವುದು ಕಾರಣವೆಂದು ಅವರು ಹೇಳಿದ್ದಾರೆ.
ವಯನಾಡ್ ಸಂಸದ ಪ್ರಿಯಾಂಕಾ ಗಾಂಧಿ ವಾದ್ರಾ ದುರಂತದ ಬಗ್ಗೆ ಸಂತಾಪ ಸೂಚಿಸಿ, ರಕ್ಷಣಾ ಕಾರ್ಯಾಚರಣೆಗೆ ಎಲ್ಲಾ ಸಾಧ್ಯ ಪ್ರಯತ್ನಗಳನ್ನು ಕೈಗೊಳ್ಳಲಾಗುತ್ತಿದೆ ಎಂದು ಹೇಳಿದ್ದಾರೆ.
ರಾಜ್ಯ ಸರ್ಕಾರ, ಜಿಲ್ಲಾಡಳಿತ, ಪೊಲೀಸ್, ಎನ್ಡಿಆರ್ಎಫ್, ಎಸ್ಡಿಆರ್ಎಫ್ ಹಾಗೂ ಸಿವಿಲ್ ಡಿಫೆನ್ಸ್ ಸೇರಿದಂತೆ ಹಲವು ಸಂಸ್ಥೆಗಳು ಸಮನ್ವಯದಿಂದ ಕಾರ್ಯನಿರ್ವಹಿಸುತ್ತಿವೆ ಎಂದು ಅವರು ತಿಳಿಸಿದ್ದಾರೆ.
ಮಳೆ ಮುಂದುವರಿದಿರುವುದು ಹಾಗೂ ಅವಶೇಷಗಳ ತೆರವು ಇನ್ನೂ ಬಾಕಿ ಇರುವುದರಿಂದ, ಬದುಕುಳಿದವರಿಗಾಗಿ ರಕ್ಷಣಾ ಸಿಬ್ಬಂದಿ ನಿರಂತರವಾಗಿ ಶ್ರಮಿಸುತ್ತಿದ್ದಾರೆ.
ಇದನ್ನೂ ನೋಡಿ: ಬೀದಿಬದಿ ವ್ಯಾಪಾರಿಗಳನ್ನು ಒಕ್ಕಲೆಬ್ಬಿಸುತ್ತಿರುವ ಜಿಬಿಎ? ಬದುಕಿನ ಹಕ್ಕಿಗಾಗಿ ಫ್ರೀಡಂ ಪಾರ್ಕ್ನಲ್ಲಿ ಹೋರಾಟ!
