ಕೋಲ್ಕತ್ತಾ: ಪಶ್ಚಿಮ ಬಂಗಾಳ ಸರ್ಕಾರ ಕೋಲ್ಕತ್ತದ ಸುಹ್ರಾವರ್ಡಿ ಅವೆನ್ಯೂ ರಸ್ತೆಯನ್ನು ಗೋಪಾಲ್ ಮುಖರ್ಜಿ ರಸ್ತೆಯೆಂದು ಮರುನಾಮಕರಣ ಮಾಡಿರುವುದು ಹೊಸ ವಿವಾದಕ್ಕೆ ಕಾರಣವಾಗಿದೆ.
ರಸ್ತೆ ಮೂಲತಃ ಪ್ರಸಿದ್ಧ ವೈದ್ಯ, ಶಿಕ್ಷಣ ತಜ್ಞ ಹಾಗೂ ಕಲ್ಕತ್ತಾ ವಿಶ್ವವಿದ್ಯಾಲಯದ ಮೊದಲ ಮುಸ್ಲಿಂ ಕುಲಪತಿಯಾಗಿದ್ದ ಹಸನ್ ಸುಹ್ರಾವರ್ಡಿ ಅವರ ಹೆಸರನ್ನು ಹೊಂದಿದ್ದರೂ, ಅದನ್ನು 1946ರ ಕೋಲ್ಕತ್ತ ಗಲಭೆಗಳಿಗೆ ಸಂಬಂಧಿಸಿದ ಹುಸೇನ್ ಶಹೀದ್ ಸುಹ್ರಾವರ್ಡಿ ಅವರ ಹೆಸರಿನ ರಸ್ತೆ ಎಂದು ತಪ್ಪಾಗಿ ಅರ್ಥೈಸಲಾಗಿದೆ ಎಂಬ ಆರೋಪ ಕೇಳಿಬಂದಿದೆ.
ರಸ್ತೆಯ ಮರುನಾಮಕರಣವನ್ನು ಸ್ವಾಗತಿಸಿರುವ ಪಶ್ಚಿಮ ಬಂಗಾಳ ಮುಖ್ಯಮಂತ್ರಿ ಸುವೇಂದು ಅಧಿಕಾರಿ, ಇದು “ಐತಿಹಾಸಿಕ ತಪ್ಪಿನ ತಿದ್ದುಪಡಿ” ಎಂದು ಹೇಳಿದ್ದಾರೆ. ಆದರೆ ಇತಿಹಾಸಕಾರರು ಮತ್ತು ವಿರೋಧ ಪಕ್ಷದ ನಾಯಕರು, ರಸ್ತೆ ವಾಸ್ತವವಾಗಿ ಹಸನ್ ಸುಹ್ರಾವರ್ಡಿ ಅವರ ಹೆಸರಿನದ್ದಾಗಿದ್ದು, 1946ರ ಕೋಲ್ಕತ್ತಾ ಹತ್ಯಾಕಾಂಡಕ್ಕೆ ಹೊಣೆಗಾರರೆಂದು ಟೀಕೆಗೆ ಗುರಿಯಾಗಿರುವ ಹುಸೇನ್ ಶಹೀದ್ ಸುಹ್ರಾವರ್ಡಿ ಅವರ ಹೆಸರಿನದ್ದಲ್ಲ ಎಂದು ವಾದಿಸಿದ್ದಾರೆ.
ಇದನ್ನೂ ಓದಿ: ನೀಟ್ ಪೇಪರ್ ಲೀಕ್ ವಿರುದ್ಧ ಪ್ರತಿಭಟನೆ: ಜಂತರ್ ಮಂತರ್‌ನಲ್ಲಿ ಸಿಜೆಪಿ ಧರಣಿ ಮುಂದುವರಿಕೆ
ನ್ಯಾಷನಲ್ ಹೆರಾಲ್ಡ್ ವರದಿ ಪ್ರಕಾರ, ಕೋಲ್ಕತ್ತಾ ಮಹಾನಗರ ಪಾಲಿಕೆ ಮತ್ತು ಮುಖ್ಯಮಂತ್ರಿ ಇಬ್ಬರೂ ರಸ್ತೆಯ ಐತಿಹಾಸಿಕ ಹಿನ್ನೆಲೆಯನ್ನು ಸರಿಯಾಗಿ ಪರಿಶೀಲಿಸದೆ ನಿರ್ಧಾರ ಕೈಗೊಂಡಿದ್ದಾರೆ ಎಂಬ ಆರೋಪ ಕೇಳಿಬಂದಿದೆ. ಹಸನ್ ಸುಹ್ರಾವರ್ಡಿ ಅವರು ಖ್ಯಾತ ವೈದ್ಯರು ಮತ್ತು ಶಿಕ್ಷಣತಜ್ಞರಾಗಿದ್ದರೆ, ಹುಸೇನ್ ಶಹೀದ್ ಸುಹ್ರಾವರ್ಡಿ ಅವರು ಅವಿಭಜಿತ ಬಂಗಾಳದ ಕೊನೆಯ ಪ್ರಧಾನಮಂತ್ರಿಯಾಗಿದ್ದು, ನಂತರ ಪಾಕಿಸ್ತಾನದ ಪ್ರಧಾನಮಂತ್ರಿಯಾಗಿದ್ದರು.
ಇದೇ ವೇಳೆ, ಗೋಪಾಲ್ ಮುಖರ್ಜಿ (ಗೋಪಾಲ್ ಪಾಠಾ) ಅವರ ಹೆಸರಿನಲ್ಲಿ ರಸ್ತೆ ಮರುನಾಮಕರಣ ಮಾಡಿರುವುದೂ ವಿವಾದಕ್ಕೆ ಕಾರಣವಾಗಿದೆ. ಕೆಲ ಇತಿಹಾಸಕಾರರ ಪ್ರಕಾರ ಅವರು 1946ರ ಕೋಲ್ಕತ್ತಾ ಗಲಭೆಗಳ ಸಂದರ್ಭದಲ್ಲಿ ಪ್ರಭಾವಿ ಗುಂಪಿನ ನಾಯಕನಾಗಿದ್ದು, ಅವರನ್ನು ಗೌರವಿಸುವ ನಿರ್ಧಾರದ ವಿರುದ್ಧವೂ ಟೀಕೆಗಳು ವ್ಯಕ್ತವಾಗಿವೆ.
ರಸ್ತೆ ಮರುನಾಮಕರಣದ ಈ ನಿರ್ಧಾರ ಪಶ್ಚಿಮ ಬಂಗಾಳದಲ್ಲಿ ಇತಿಹಾಸ, ರಾಜಕೀಯ ಮತ್ತು ಸಮುದಾಯ ಸಂಬಂಧಗಳ ಕುರಿತ ಹೊಸ ಚರ್ಚೆಗೆ ಕಾರಣವಾಗಿದೆ.
ಇದನ್ನೂ ನೋಡಿ: “ಟಾಟಾ ಕಂಪನಿಗೆ ವಿದ್ಯುತ್, ಜನತೆಗೆ ಕಾದಿದೆ ಆಪತ್ತು? | ವಿದ್ಯುತ್ ಖಾಸಗೀಕರಣ ವಿರುದ್ಧ ಸಮಾವೇಶ” Janashakthi Media
