ಪಾಟ್ನಾ: ಜನ ಸುರಾಜ್ ಪಕ್ಷದ ಸ್ಥಾಪಕ ಪ್ರಶಾಂತ್ ಕಿಶೋರ್ ಅವರು ಪಾಟ್ನಾ ಹೊರವಲಯದಲ್ಲಿರುವ ಆಶ್ರಮಕ್ಕೆ ಸ್ಥಳಾಂತರವಾಗಿರುವುದಾಗಿ ತಿಳಿಸಿದ್ದು, ಮುಂದಿನ ಬಿಹಾರ ವಿಧಾನಸಭಾ ಚುನಾವಣೆಯವರೆಗೆ ಅಲ್ಲಿಂದಲೇ ತಮ್ಮ ಪಕ್ಷದ ರಾಜಕೀಯ ಚಟುವಟಿಕೆಗಳನ್ನು ಮುಂದುವರಿಸುವುದಾಗಿ ಹೇಳಿದ್ದಾರೆ. ಆಶ್ರಮ
ಮೇ 20ರಂದು ದರ್ಭಂಗಾದಲ್ಲಿ ಮಾಧ್ಯಮ ಪ್ರತಿನಿಧಿಗಳೊಂದಿಗೆ ಮಾತನಾಡಿದ ಅವರು, ಮಂಗಳವಾರ ರಾತ್ರಿ ಪಾಟ್ನಾದಲ್ಲಿದ್ದ ತಮ್ಮ ವಾಸಸ್ಥಳವನ್ನು ತೊರೆದಿರುವುದಾಗಿ ಹೇಳಿದರು. ಆಶ್ರಮ
“ನಾನು ವಾಸಿಸುತ್ತಿದ್ದ ಪಾಟ್ನಾದ ಮನೆಯಿಂದ ಕಳೆದ ರಾತ್ರಿ ಹೊರಬಂದಿದ್ದೇನೆ. ಐಐಟಿ-ಪಾಟ್ನಾ ಸಮೀಪದಲ್ಲಿರುವ ‘ಬಿಹಾರ ನವ ನಿರ್ಮಾಣ ಆಶ್ರಮ’ ಮುಂದಿನ ವಿಧಾನಸಭಾ ಚುನಾವಣೆಯವರೆಗೆ ನನ್ನ ನಿವಾಸವಾಗಿರುತ್ತದೆ. ಆಗ ಜನ ಸುರಾಜ್ ಪಕ್ಷವು ಪ್ರಭಾವ ಬೀರುವ ನಿರೀಕ್ಷೆಯಿದೆ,” ಎಂದು ಅವರು ಹೇಳಿದರು.
ಇದನ್ನೂ ಓದಿ: ಎಥನಾಲ್ ಮಿಶ್ರಿತ ಇಂಧನಕ್ಕೆ ಹೊಸ ಮಾನದಂಡ: E30 ದತ್ತ ಮುಂದುವರಿದ ಕೇಂದ್ರ ಸರ್ಕಾರ
ಐ-ಪ್ಯಾಕ್ ಸಹ ಸಂಸ್ಥಾಪಕರಾಗಿದ್ದ ಕಿಶೋರ್ ಅವರು ರಾಜಕೀಯ ಸಲಹೆಗಾರಿಕೆಯ ವೃತ್ತಿಯನ್ನು ತೊರೆದು 2024ರಲ್ಲಿ ಜನ ಸುರಾಜ್ ಪಕ್ಷವನ್ನು ಸ್ಥಾಪಿಸಿದ್ದರು. ಇದುವರೆಗೆ ಅವರು ಪಾಟ್ನಾ ವಿಮಾನ ನಿಲ್ದಾಣದ ಸಮೀಪದಲ್ಲಿರುವ ‘ಶೇಖ್ಪುರಾ ಹೌಸ್’ನಿಂದ ಕಾರ್ಯನಿರ್ವಹಿಸುತ್ತಿದ್ದರು. ಈ ಮನೆ ಪಕ್ಷದ ರಾಷ್ಟ್ರೀಯ ಅಧ್ಯಕ್ಷ ಹಾಗೂ ಮಾಜಿ ಬಿಜೆಪಿ ಸಂಸದ ಉದಯ್ ಸಿಂಗ್ ಕುಟುಂಬದ ಸ್ವತ್ತು.
ಉದಯ್ ಸಿಂಗ್ ಪ್ರಮುಖ ರಾಜಕೀಯ ಕುಟುಂಬಕ್ಕೆ ಸೇರಿದವರು. ಅವರ ಅಣ್ಣ ಎನ್.ಕೆ. ಸಿಂಗ್ ಮಾಜಿ ರಾಜ್ಯಸಭಾ ಸಂಸದರಾಗಿದ್ದು, 15ನೇ ಹಣಕಾಸು ಆಯೋಗದ ಮಾಜಿ ಅಧ್ಯಕ್ಷರಾಗಿದ್ದರು. ಅವರ ತಾಯಿ ಮಧುರಿ ಸಿಂಗ್ ಕಾಂಗ್ರೆಸ್ನ ಹಿರಿಯ ನಾಯಕಿಯಾಗಿದ್ದರು.
ಹಿಂದಿನ ಜೇಡಿಯು ಉಪಾಧ್ಯಕ್ಷರಾಗಿದ್ದ ಕಿಶೋರ್ ಅವರು ಮಾಜಿ ಮುಖ್ಯಮಂತ್ರಿ ನಿತೀಶ್ ಕುಮಾರ್ ವಿರುದ್ಧ ತೀವ್ರ ವಾಗ್ದಾಳಿ ನಡೆಸಿದರು. ಇತ್ತೀಚೆಗೆ ಅವರು ಮುಖ್ಯಮಂತ್ರಿ ಸ್ಥಾನ ತೊರೆದು ರಾಜ್ಯಸಭೆಗೆ ತೆರಳಿರುವುದನ್ನು ಉಲ್ಲೇಖಿಸಿದರು.
“ಚುನಾವಣೆಯ ನಂತರ ಮುಖ್ಯಮಂತ್ರಿ ಸ್ಥಾನಕ್ಕೇರಿದವರು ಆರ್ಥಿಕ ಸಂಕಷ್ಟದಿಂದ ಉಂಟಾದ ವಲಸೆಯನ್ನು ತಡೆಯಲು ವಿಫಲರಾದರು. ಬದಲಾಗಿ, ತಮ್ಮ ಮಗನಿಗೆ ರಾಜಕೀಯ ನೆಲೆ ಸಿಗುವಂತೆ ಮಾಡಿ, ತಾವು ಸ್ವತಃ ವಲಸೆ ಹೋಗಿದ್ದಾರೆ,” ಎಂದು ಅವರು ಆರೋಪಿಸಿದರು.
ಬಿಹಾರದ ಮತದಾರರು ಜಾತಿ, ಧರ್ಮ ಅಥವಾ ಹಣದ ಆಮಿಷಕ್ಕೆ ಒಳಗಾಗದೆ ತಮ್ಮ ಮಕ್ಕಳ ಭವಿಷ್ಯವನ್ನು ಗಮನದಲ್ಲಿಟ್ಟುಕೊಂಡು ಮತ ಚಲಾಯಿಸಬೇಕು ಎಂದು ಅವರು ಮನವಿ ಮಾಡಿದರು.
“ಮತದಾರರು ನರೇಂದ್ರ ಮೋದಿ, ನಿತೀಶ್ ಕುಮಾರ್ ಅಥವಾ ಲಾಲು ಪ್ರಸಾದ್ ಯಾದವ್ ಅವರಂತಹ ನಾಯಕರ ಪ್ರಭಾವಕ್ಕೆ ಒಳಗಾಗಬಾರದು. ₹10,000ಗಾಗಿ ಮತ ಮಾರಿಕೊಳ್ಳಬಾರದು,” ಎಂದು ಹೇಳಿದರು.
ಇದು ವಿಧಾನಸಭಾ ಚುನಾವಣೆಗೆ ಮುನ್ನ ಆರಂಭಿಸಲಾದ ‘ಮುಖ್ಯಮಂತ್ರಿ ಮಹಿಳಾ ಉದ್ಯೋಗ ಯೋಜನೆ’ಗೆ ಸಂಬಂಧಿಸಿದ ಟೀಕೆಯಾಗಿ ಕಾಣಲಾಗಿದೆ. ಈ ಯೋಜನೆಯಡಿ 1.5 ಕೋಟಿ ಮಹಿಳೆಯರಿಗೆ ತಲಾ ₹10,000 ನೀಡಲಾಗಿದೆ.
ಪಶ್ಚಿಮ ಏಷ್ಯಾದ ಪರಿಸ್ಥಿತಿಯಿಂದ ಆರ್ಥಿಕ ಸವಾಲುಗಳು ಎದುರಾಗಬಹುದು ಎಂದು ಎಚ್ಚರಿಸಿದ ಕಿಶೋರ್, ಇಂಧನದ ಬೆಲೆ ಏರಿಕೆ ಮತ್ತು ರಸಗೊಬ್ಬರ ಕೊರತೆ ಉಂಟಾಗುವ ಸಾಧ್ಯತೆ ಇದೆ ಎಂದು ಹೇಳಿದರು.
“ಪೆಟ್ರೋಲ್ ಮತ್ತು ಡೀಸೆಲ್ ಬೆಲೆ ಲೀಟರ್ಗೆ ₹10ರವರೆಗೆ ಏರಬಹುದು. ರಸಗೊಬ್ಬರ ಸಮಸ್ಯೆ ಗಂಭೀರವಾಗಬಹುದು,” ಎಂದು ಹೇಳಿದರು.
ಮುಖ್ಯಮಂತ್ರಿ ಸಮ್ರಾಟ್ ಚೌಧರಿ ಅವರ ಖರ್ಚುಶೈಲಿಯನ್ನೂ ಟೀಕಿಸಿದ ಕಿಶೋರ್, ಬಿಹಾರ ಬಡ ರಾಜ್ಯವಾಗಿದ್ದರೂ ಮುಖ್ಯಮಂತ್ರಿ 25 ಏಕರ್ ಪ್ರದೇಶದಲ್ಲಿರುವ ನಿವಾಸದಲ್ಲಿ ವಾಸಿಸುತ್ತಿದ್ದಾರೆ ಎಂದು ಆರೋಪಿಸಿದರು.
“ಅಂತಹ ದೊಡ್ಡ ನಿವಾಸವನ್ನು ನಿರ್ವಹಿಸಲು ಎಷ್ಟು ವೆಚ್ಚವಾಗಬಹುದು ಎಂದು ಕಲ್ಪಿಸಿ. ಈಗ ಉಪ ಮುಖ್ಯಮಂತ್ರಿ ಆಗಿದ್ದಾಗ ಬಳಸಿದ ಮನೆಯನ್ನು ಮುಖ್ಯಮಂತ್ರಿ ನಿವಾಸಕ್ಕೆ ಸೇರಿಸಲು ಯೋಚಿಸುತ್ತಿದ್ದಾರೆ ಎಂಬ ಮಾಹಿತಿ ಇದೆ,” ಎಂದು ಅವರು ಆರೋಪಿಸಿದರು.
ಇದನ್ನೂ ನೋಡಿ: ದಲಿತ ಕುಟುಂಬಗಳ ಜಮೀನಿಗೆ ಅರಣ್ಯ ಇಲಾಖೆ ಕಣ್ಣು? ಕಾಂಪೌಂಡ್ ವಾಲ್ ನಿರ್ಮಾಣ ತಡೆದ ರೈತ ಸಂಘ Janashakthi Media
