ಜೈಲ್ ಭರೋ ಸತ್ಯಾಗ್ರಹ’ ಎಚ್ಚರಿಕೆ: ಆಗಸ್ಟ್ 17ರ ಮಾತುಕತೆಗೆ ಆಹ್ವಾನ
ಕುರಕ್ಷೇತ್ರ: ಸೆಂಟರ್ ಆಫ್ ಇಂಡಿಯನ್ ಟ್ರೇಡ್ ಯೂನಿಯನ್ಸ್ (CITU) ಗೆ ಸಂಯೋಜಿತವಾಗಿರುವ ಹರಿಯಾಣ ಮಿಡ್ಡೇ ಮೀಲ್ ವರ್ಕರ್ಸ್ ಯೂನಿಯನ್ ಆಗಸ್ಟ್ 5ರಂದು ಕುರಕ್ಷೇತ್ರದಲ್ಲಿ ಭಾರೀ ಪ್ರತಿಭಟನೆ ರ್ಯಾಲಿಯನ್ನು ಆಯೋಜಿಸಿತು. ರಾಜ್ಯದ ವಿವಿಧ ಭಾಗಗಳಿಂದ ಸಾವಿರಾರು ಕಾರ್ಮಿಕರು ಮುಖ್ಯಮಂತ್ರಿಗಳ ಕ್ಷೇತ್ರದಲ್ಲೇ ಸೇರಿ, ವೇತನ ಹೆಚ್ಚಳ, ಉದ್ಯೋಗ ಭದ್ರತೆ ಮತ್ತು ಉತ್ತಮ ಸೇವಾ ಷರತ್ತುಗಳಿಗಾಗಿ ಆಗ್ರಹಿಸಿದರು. ಈ ಭಾರೀ ಸಮೂಹೀಕರಣದಿಂದ ಸರ್ಕಾರ ಆಗಸ್ಟ್ 17ರಂದು ಯೂನಿಯನ್ ಪ್ರತಿನಿಧಿಗಳೊಂದಿಗೆ ಮಾತುಕತೆ ನಡೆಸಲು ಆಹ್ವಾನ ನೀಡುವಂತಾಯಿತು.
ರಾಷ್ಟ್ರೀಯ ಶಿಕ್ಷಣ ನೀತಿ (NEP) 2020 ಜಾರಿ, ಶಾಲೆಗಳ ವಿಲೀನ ಹಾಗೂ ಚಿರಾಗ್ ಯೋಜನೆಯ ಮೂಲಕ ಹರಿಯಾಣ ಸರ್ಕಾರ ಸಾರ್ವಜನಿಕ ಶಿಕ್ಷಣ ವ್ಯವಸ್ಥೆಯನ್ನು ದುರ್ಬಲಗೊಳಿಸುತ್ತಿದೆ ಎಂದು ಯೂನಿಯನ್ ಆರೋಪಿಸಿದೆ. ಇದರಿಂದ ಈಗಾಗಲೇ ಸಾವಿರಾರು ಮಿಡ್ಡೇ ಮೀಲ್ ಕಾರ್ಮಿಕರು ಉದ್ಯೋಗ ಕಳೆದುಕೊಂಡಿದ್ದಾರೆ ಎಂದು ತಿಳಿಸಿದೆ.
ಪ್ರತಿಭಟನಾಕಾರರು ತಮ್ಮ ಮಾಸಿಕ ಗೌರವಧನವನ್ನು ಜೀವನ ವೆಚ್ಚ ಏರಿಕೆಗೆ ಅನುಗುಣವಾಗಿ ₹26,000ಕ್ಕೆ ಹೆಚ್ಚಿಸಬೇಕು, ಕನಿಷ್ಠ ₹15,220 ಖಚಿತಪಡಿಸಬೇಕು, ಪ್ರಸ್ತುತ 10 ತಿಂಗಳ ಬದಲು ವರ್ಷಪೂರ್ತಿ 12 ತಿಂಗಳ ವೇತನ ನೀಡಬೇಕು, ನಿವೃತ್ತಿ ವೇಳೆ ಕನಿಷ್ಠ ₹2 ಲಕ್ಷ ಲಾಭ ನೀಡಬೇಕು ಎಂದು ಆಗ್ರಹಿಸಿದರು. ಜೊತೆಗೆ, ಹೆಚ್ಚುವರಿ ಸ್ವಚ್ಛತೆ ಮತ್ತು ನಿರ್ವಹಣಾ ಕೆಲಸಗಳನ್ನು ಸಮರ್ಪಕ ಭತ್ಯೆಯಿಲ್ಲದೆ ನೀಡುವ ಪದ್ಧತಿಯನ್ನು ನಿಲ್ಲಿಸಬೇಕು ಎಂದು ಒತ್ತಾಯಿಸಿದರು.
ಇದನ್ನೂ ಓದಿ: ‘ಫ್ರೀಡಮ್ ಫ್ರಂ ವೇಸ್ಟ್’ ವೇಗಕ್ಕೆ ಮಂತ್ರಿ ತಾಕೀತು: ಸ್ವಚ್ಛತೆಗೆ ನಿರ್ಲಕ್ಷ್ಯ ಮಾಡಿದ ಇಲಾಖೆಗಳಿಗೆ ನೋಟಿಸ್
ಈ ರ್ಯಾಲಿಯನ್ನು CITU, ಸರ್ವ್ ಕರಮಚಾರಿ ಸಂಘ, ಶಿಕ್ಷಕರ ಸಂಘಟನೆಗಳು, ಅಂಗನವಾಡಿ ಮತ್ತು ಆಶಾ ಕಾರ್ಮಿಕರ ಸಂಘಟನೆಗಳ ನಾಯಕರು ಉದ್ದೇಶಿಸಿ ಮಾತನಾಡಿದರು. ಸರ್ಕಾರದ ಕಾರ್ಮಿಕ ಹಾಗೂ ಖಾಸಗೀಕರಣ ನೀತಿಗಳನ್ನು ಟೀಕಿಸಿದ ಅವರು, ಶಾಶ್ವತ ಕೆಲಸಗಳಿಗೆ ಶಾಶ್ವತ ನೇಮಕಾತಿ ನೀಡಬೇಕು ಮತ್ತು ಕನಿಷ್ಠ ₹30,000 ಮಾಸಿಕ ವೇತನ ಖಚಿತಪಡಿಸಬೇಕು ಎಂದು ಆಗ್ರಹಿಸಿದರು.
ರ್ಯಾಲಿಯ ಬಳಿಕ ಸಾವಿರಾರು ಕಾರ್ಮಿಕರು ನ್ಯೂ ಗ್ರೇನ್ ಮಾರ್ಕೆಟ್ನಿಂದ ಕುರಕ್ಷೇತ್ರದ ಮಿನಿ ಕಾರ್ಯಾಲಯದವರೆಗೆ ಮೆರವಣಿಗೆ ನಡೆಸಿ ದೀರ್ಘಕಾಲದ ಪ್ರತಿಭಟನೆ ನಡೆಸಿದರು. ಜಿಲ್ಲಾ ಉಪ ಆಯುಕ್ತರು ಮತ್ತು ಮುಖ್ಯಮಂತ್ರಿಗಳ ಕಚೇರಿ ನಡುವೆ ನಡೆದ ಚರ್ಚೆಗಳ ನಂತರ, ಹರಿಯಾಣ ಸರ್ಕಾರ ಆಗಸ್ಟ್ 17ರಂದು ಚಂಡೀಗಢದಲ್ಲಿ ಮುಖ್ಯಮಂತ್ರಿ ನಯಬ್ ಸಿಂಗ್ ಸೈನಿ ಹಾಗೂ ಹಿರಿಯ ಅಧಿಕಾರಿಗಳೊಂದಿಗೆ ಮಾತುಕತೆಗೆ ಯೂನಿಯನ್ನ್ನು ಆಹ್ವಾನಿಸಬೇಕಾಯಿತು.
ಯೂನಿಯನ್ ಆಗಸ್ಟ್ 10ರಂದು ಎಲ್ಲಾ ಜಿಲ್ಲೆಗಳಲ್ಲಿ ‘ಜೈಲ್ ಭರೋ ಸತ್ಯಾಗ್ರಹ’ ಪ್ರತಿಭಟನೆಗಳನ್ನು ಕೇಂದ್ರ ಕಾರ್ಮಿಕ ಸಂಘಟನೆಗಳು ಮತ್ತು ಸಂಯುಕ್ತ ಕಿಸಾನ್ ಮೋರ್ಚಾ ಜೊತೆಗೂಡಿ ಆಯೋಜಿಸುವುದಾಗಿ ಘೋಷಿಸಿದೆ.
ಇದೇ ವೇಳೆ, ಆಗಸ್ಟ್ 17ರ ಮಾತುಕತೆಗಳು ವೇತನ, ಉದ್ಯೋಗ ಭದ್ರತೆ ಹಾಗೂ ಇತರ ಬೇಡಿಕೆಗಳ ಕುರಿತು ತೃಪ್ತಿಕರ ಪರಿಹಾರ ನೀಡದಿದ್ದರೆ, ರಾಜ್ಯಾದ್ಯಂತ ಹೋರಾಟವನ್ನು ತೀವ್ರಗೊಳಿಸಿ ಅಕ್ಟೋಬರ್ 6ರಂದು ದೆಹಲಿಯ ಸಂಸತ್ತಿನತ್ತ ಮೆರವಣಿಗೆ ನಡೆಸುವುದಾಗಿ ಯೂನಿಯನ್ ಎಚ್ಚರಿಕೆ ನೀಡಿದೆ.
ಇದನ್ನೂ ನೋಡಿ: ‘ಪ್ರತಿ ಐವರಲ್ಲಿ ಒಬ್ಬ ಮತದಾರ ಪಟ್ಟಿಯಿಂದ ಹೊರಗೆ’ : SIR ವಿರುದ್ಧ ಗಂಭೀರ ಆರೋಪ Janashakthi Media
