ಮಂಗಳೂರು: ಕರ್ನಾಟಕದಲ್ಲಿ ನಡೆಯುತ್ತಿರುವ ಮತದಾರರ ಪಟ್ಟಿಯ ವಿಶೇಷ ತೀವ್ರ ಪರಿಷ್ಕರಣೆ (ಎಸ್ಐಆರ್) ಪ್ರಕ್ರಿಯೆಯಲ್ಲಿ ಬದುಕಿರುವ 61 ವರ್ಷದ ವ್ಯಕ್ತಿಯೊಬ್ಬರನ್ನು ‘ಮೃತ’ ಎಂದು ಗುರುತಿಸಿರುವ ಘಟನೆ ಬೆಳಕಿಗೆ ಬಂದಿದೆ. ಮಂಗಳೂರಿನ ಬಿಜೈ ನಿವಾಸಿ ಡೊನಾಲ್ಡ್ ಜೋಸೆಫ್ ರೆಗೊ ಅವರ ಹೆಸರು ಆಗಸ್ಟ್ 24ರಂದು ಪ್ರಕಟವಾದ ಕರಡು ಮತದಾರರ ಪಟ್ಟಿಯಿಂದ ಕಾಣೆಯಾಗಿದ್ದು, ಬಳಿಕ ಅವರನ್ನು ‘ಗೈರು, ಸ್ಥಳಾಂತರಗೊಂಡ, ದ್ವಂದ್ವ, ಮೃತ ಮತ್ತು ಇತರೆ’ (ಎಎಸ್ಡಿಡಿಒ) ಪಟ್ಟಿಯಲ್ಲಿನ ‘ಮೃತ’ ವಿಭಾಗದಲ್ಲಿ ಸೇರಿಸಿರುವುದು ಗೊತ್ತಾಗಿದೆ. ಜೀವಂತ
ಮಂಗಳೂರು ನಗರ ದಕ್ಷಿಣ ವಿಧಾನಸಭಾ ಕ್ಷೇತ್ರದ ಮತದಾರರಾಗಿರುವ ರೆಗೊ, ತಾವು ಜೀವಂತವಾಗಿರುವಾಗ ಯಾವುದೇ ದಾಖಲೆ ಅಥವಾ ಮರಣ ಪ್ರಮಾಣಪತ್ರವಿಲ್ಲದೆ ತಮ್ಮನ್ನು ಮೃತ ಎಂದು ಹೇಗೆ ಗುರುತಿಸಲಾಗಿದೆ ಎಂದು ಪ್ರಶ್ನಿಸಿದ್ದಾರೆ. ಮತದಾರರನ್ನು ಮೃತರೆಂದು ಘೋಷಿಸಲು ಮರಣ ಪ್ರಮಾಣಪತ್ರದ ಅಗತ್ಯವಿದೆ. ಹಾಗಿದ್ದರೆ ತಮ್ಮ ಮರಣ ಪ್ರಮಾಣಪತ್ರವನ್ನು ಯಾರು ನೀಡಿದ್ದಾರೆ ಎಂದು ಅವರು ಪ್ರಶ್ನಿಸಿದ್ದಾರೆ.
ತಮ್ಮ ಹೆಸರು ಮತದಾರರ ಪಟ್ಟಿಯಿಂದ ಕಾಣೆಯಾಗಿರುವುದು ತಿಳಿದ ಬಳಿಕ ರೆಗೊ ಅವರು ಬೂತ್ ಮಟ್ಟದ ಅಧಿಕಾರಿ (ಬಿಎಲ್ಒ) ಹಾಗೂ ಸಹಾಯಕ ಮತದಾರರ ನೋಂದಣಿ ಅಧಿಕಾರಿ (ಎಇಆರ್ಒ) ಅವರನ್ನು ಹಲವು ಬಾರಿ ಸಂಪರ್ಕಿಸಿ ಹೆಸರು ಮರುಸೇರ್ಪಡೆಗೆ ಮನವಿ ಮಾಡಿದ್ದಾರೆ.
ಆದರೆ, ತಪ್ಪಿನ ಹೊಣೆಗಾರಿಕೆಯ ಬಗ್ಗೆ ಅಧಿಕಾರಿಗಳ ನಡುವೆ ಪರಸ್ಪರ ಆರೋಪ ಕೇಳಿಬಂದಿದೆ ಎಂದು ರೆಗೊ ತಿಳಿಸಿದ್ದಾರೆ. ಎಇಆರ್ಒ ಅವರು ಬಿಎಲ್ಒ ಕಡೆಗೆ ಬೆರಳು ತೋರಿಸಿದರೆ, ಬಿಎಲ್ಒ ಅವರು ಎಸ್ಐಆರ್ ಮೊಬೈಲ್ ಅಪ್ಲಿಕೇಷನ್ನಲ್ಲಿ ಮಾಹಿತಿ ಅಪ್ಲೋಡ್ ಮಾಡಿದ ದತ್ತಾಂಶ ನಮೂದು ನಿರ್ವಾಹಕರತ್ತ ಹೊಣೆ ಹೊರಿಸಿದ್ದಾರೆ ಎಂದು ಅವರು ಆರೋಪಿಸಿದ್ದಾರೆ.
ಇದನ್ನೂ ಓದಿ : ಜಾಲ್ನಾದಲ್ಲಿ ದಲಿತ ಯುವಕನಿಗೆ ಹಲ್ಲೆ: ಬಲವಂತವಾಗಿ ಗೋಮಯ ತಿನ್ನಿಸಿದ ಬಜರಂಗದಳದ ಕಾರ್ಯಕರ್ತರು
ರೆಗೊ ಅವರ ಪ್ರಕಾರ, ಬಿಎಲ್ಒ ತಮ್ಮ ಗಣತಿ ನಮೂನೆಯನ್ನು ಪಡೆದು ದತ್ತಾಂಶ ನಮೂದಿಗಾಗಿ ಕಳುಹಿಸಿದ್ದರು. ಆದರೆ, ನಮೂದಾದ ಮಾಹಿತಿಯು ಮೂಲ ದಾಖಲೆಗಳಿಗೆ ಹೊಂದಿಕೆಯಾಗಿದೆಯೇ ಎಂಬುದನ್ನು ಪರಿಶೀಲಿಸದೆ ಅನುಮೋದಿಸಲಾಗಿದೆ. ಅಪ್ಲಿಕೇಷನ್ನಲ್ಲಿ ತಮ್ಮನ್ನು ‘ಮೃತ’ ಎಂದು ತೋರಿಸಿದ್ದರೆ, ಮರಣ ಪ್ರಮಾಣಪತ್ರ ಸಲ್ಲಿಕೆಯಾಗಿದೆಯೇ ಎಂಬುದನ್ನು ಬಿಎಲ್ಒ ಪರಿಶೀಲಿಸಬೇಕಿತ್ತು ಎಂದು ಅವರು ಹೇಳಿದ್ದಾರೆ.
ತಮ್ಮ ಹೆಸರನ್ನು ಮತದಾರರ ಪಟ್ಟಿಗೆ ಮರುಸೇರ್ಪಡೆಗೊಳಿಸುವಂತೆ ರೆಗೊ ಚುನಾವಣಾ ಆಯೋಗಕ್ಕೆ ಆನ್ಲೈನ್ ಮೂಲಕ ದೂರು ಸಲ್ಲಿಸಿದ್ದಾರೆ. ಅಧಿಕಾರಿಗಳ ಸಲಹೆಯಂತೆ ಅಗತ್ಯ ದಾಖಲೆಗಳೊಂದಿಗೆ ಫಾರಂ–6ನ್ನೂ ಸಲ್ಲಿಸಿದ್ದಾರೆ.
ಈ ಕುರಿತು ದಕ್ಷಿಣ ಕನ್ನಡ ಹೆಚ್ಚುವರಿ ಜಿಲ್ಲಾಧಿಕಾರಿ ರಾಜು ಕೆ. ಪ್ರತಿಕ್ರಿಯಿಸಿ, ಅರ್ಹರಾಗಿರುವ ಜೀವಂತ ಮತದಾರರ ಹೆಸರನ್ನು ಅಗತ್ಯ ದಾಖಲೆಗಳನ್ನು ಸಲ್ಲಿಸುವ ಮೂಲಕ ಫಾರಂ–6ರ ಆಧಾರದ ಮೇಲೆ ಮತದಾರರ ಪಟ್ಟಿಗೆ ಸೇರಿಸಲು ಅವಕಾಶವಿದೆ ಎಂದು ತಿಳಿಸಿದ್ದಾರೆ.
ಎಸ್ಐಆರ್ ಪ್ರಕ್ರಿಯೆಯಲ್ಲಿ ತಪ್ಪಾಗಿ ಹೆಸರು ಕೈಬಿಡುವ ಅಥವಾ ತಪ್ಪು ವರ್ಗಕ್ಕೆ ಸೇರಿಸುವ ಘಟನೆಗಳು ಮತದಾರರ ಹಕ್ಕಿನ ಕುರಿತು ಆತಂಕ ಮೂಡಿಸಿವೆ. ಕರಡು ಪಟ್ಟಿಯಲ್ಲಿ ಹೆಸರು ಕಾಣದ ಅರ್ಹ ಮತದಾರರು ನಿಗದಿತ ಅವಧಿಯಲ್ಲಿ ತಮ್ಮ ಹಕ್ಕು ಮಂಡಿಸಿ ಹೆಸರು ಮರುಸೇರ್ಪಡೆಗೆ ಅವಕಾಶವಿರುವುದರಿಂದ, ದಾಖಲೆಗಳನ್ನು ಪರಿಶೀಲಿಸಿಕೊಂಡು ಅಗತ್ಯ ಅರ್ಜಿ ಸಲ್ಲಿಸುವುದು ಮುಖ್ಯವಾಗಿದೆ.
ಇದನ್ನೂ ನೋಡಿ : ಸಾಮೂಹಿಕ ಮತ ಕಗ್ಗೊಲೆ ನಡೆಸುತ್ತಿರುವ SIR ವಿರುದ್ಧ ಚುನಾವಣಾ ಆಯೋಗ ಚಲೋ ನೇರಪ್ರಸಾರ
