ಬೆಂಗಳೂರು: ಭಾರತೀಯ ವಿಜ್ಞಾನ ಸಂಸ್ಥೆಯ (ಐಐಎಸ್ಸಿ) ಸಂಶೋಧಕರು ಅಭಿವೃದ್ಧಿಪಡಿಸಿರುವ ಪರಿಸರ ಸ್ನೇಹಿ ಜೈವಿಕ ಫೋಮ್ ಇದೀಗ ಪ್ರಯೋಗಾಲಯದ ಹಂತದಿಂದ ವಾಣಿಜ್ಯ ಉತ್ಪನ್ನದತ್ತ ಹೆಜ್ಜೆ ಇಟ್ಟಿದೆ. ಶೀತ ಸರಪಳಿ ಹಾಗೂ ತಾಪಮಾನ ನಿಯಂತ್ರಿತ ಸಾಗಣೆಯಲ್ಲಿ ಬಳಸುವ ಪ್ಯಾಕೇಜಿಂಗ್ಗೆ ಈ ಹೊಸ ಫೋಮ್ನ್ನು ಬಳಸುವ ಕಾರ್ಯ ಆರಂಭವಾಗಿದೆ. ಐಐಎಸ್ಸಿ
ಪ್ರೊ. ಸೂರ್ಯಸಾರಥಿ ಬೋಸ್ ಮತ್ತು ಪ್ರೊ. ಸುಬೋಧ್ ಕುಮಾರ್ ನೇತೃತ್ವದ ತಂಡ ಅಭಿವೃದ್ಧಿಪಡಿಸಿರುವ ಈ ಫೋಮ್, ಸಾಮಾನ್ಯವಾಗಿ ಬಳಕೆಯಲ್ಲಿರುವ ಪಾಲಿಯುರೇಥೇನ್ ಫೋಮ್ಗೆ ಪರ್ಯಾಯವಾಗುವ ಉದ್ದೇಶ ಹೊಂದಿದೆ. ಪಾಲಿಯುರೇಥೇನ್ ಫೋಮ್ನ್ನು ಬಳಕೆಯ ನಂತರ ಮರುಬಳಕೆ ಮಾಡುವುದು ಕಷ್ಟವಾಗಿರುವ ಹಿನ್ನೆಲೆಯಲ್ಲಿ, ಪರಿಸರದ ಮೇಲೆ ಕಡಿಮೆ ಹೊರೆ ಬೀರುವ ವಸ್ತುವಿನ ಅಭಿವೃದ್ಧಿಗೆ ಸಂಶೋಧಕರು ಒತ್ತು ನೀಡಿದ್ದಾರೆ.
ಈ ಜೈವಿಕ ಫೋಮ್ ತಯಾರಿಕೆಯಲ್ಲಿ ತಿನ್ನಲು ಯೋಗ್ಯವಲ್ಲದ ಎಣ್ಣೆಗಳಿಂದ ಪಡೆದ ಎಪಾಕ್ಸಿಡೈಸ್ಡ್ ಕೊಬ್ಬಿನ ಆಮ್ಲಗಳು ಹಾಗೂ ಚಹಾ ಎಲೆಗಳಿಂದ ಪಡೆಯಲಾದ ಪಾಲಿಫಿನಾಲ್ ಆಧಾರಿತ ವಸ್ತುಗಳನ್ನು ಬಳಸಲಾಗಿದೆ. ವಸ್ತುವಿನ ರಾಸಾಯನಿಕ ರಚನೆಯಲ್ಲೇ ಮರುಸಂಸ್ಕರಣೆ ಸಾಧ್ಯವಾಗುವ ಗುಣವನ್ನು ಅಳವಡಿಸಲಾಗಿದೆ. ಹೀಗಾಗಿ ಬಳಕೆಯ ಬಳಿಕ ಕೇವಲ ತ್ಯಾಜ್ಯವಾಗಿ ತಳ್ಳಿಹಾಕುವ ಬದಲು ಅದನ್ನು ಮರುಸಂಸ್ಕರಿಸುವ ಸಾಧ್ಯತೆಯಿದೆ.
ಈ ತಂತ್ರಜ್ಞಾನದಲ್ಲಿ ಅಬ್ಸಲ್ಯೂಟ್ ಕೋಲ್ಡ್ ಎಲ್ಎಲ್ಪಿ ಸಂಸ್ಥೆ ಆಸಕ್ತಿ ತೋರಿದ್ದು, ಶೀತ ಸರಪಳಿ ಮತ್ತು ತಾಪಮಾನ ನಿಯಂತ್ರಿತ ಸಾಗಣೆ ಕ್ಷೇತ್ರದಲ್ಲಿ ಇದರ ಬಳಕೆಗೆ ಮುಂದಾಗಿದೆ. ಔಷಧಿಗಳು ಸೇರಿದಂತೆ ತಾಪಮಾನಕ್ಕೆ ಸೂಕ್ಷ್ಮವಾಗಿರುವ ಉತ್ಪನ್ನಗಳ ಸಾಗಣೆಯಲ್ಲಿ ಇಂತಹ ಪ್ಯಾಕೇಜಿಂಗ್ ಪ್ರಮುಖವಾಗಬಹುದು. ಹಗುರವಾಗಿರುವುದರ ಜೊತೆಗೆ ಸಾಗಣೆ ಸಂದರ್ಭದಲ್ಲಿ ಉತ್ಪನ್ನಗಳನ್ನು ರಕ್ಷಿಸುವಷ್ಟು ಬಲಿಷ್ಠವಾಗಿರುವುದು ಈ ಕ್ಷೇತ್ರದ ಪ್ರಮುಖ ಅಗತ್ಯವಾಗಿದೆ. ಐಐಎಸ್ಸಿ
ಇದನ್ನೂ ಓದಿ : ಜಾಲ್ನಾದಲ್ಲಿ ದಲಿತ ಯುವಕನಿಗೆ ಹಲ್ಲೆ: ಬಲವಂತವಾಗಿ ಗೋಮಯ ತಿನ್ನಿಸಿದ ಬಜರಂಗದಳದ ಕಾರ್ಯಕರ್ತರು
ಐಐಎಸ್ಸಿಯ ಈ ಆವಿಷ್ಕಾರ ಪ್ರಯೋಗಾಲಯದಲ್ಲೇ ಉಳಿಯದೆ ಉದ್ಯಮದತ್ತ ಸಾಗಲು ಟೈಮ್ಸ್ ಆಫ್ ಇಂಡಿಯಾದಲ್ಲಿ 2024ರ ನವೆಂಬರ್ನಲ್ಲಿ ಪ್ರಕಟವಾದ ವರದಿಯೂ ಕಾರಣವಾಗಿದೆ ಎಂದು ಪ್ರೊ. ಬೋಸ್ ತಿಳಿಸಿದ್ದಾರೆ. ಆ ವರದಿಯನ್ನು ಗಮನಿಸಿದ ಅಬ್ಸಲ್ಯೂಟ್ ಕೋಲ್ಡ್ ಸಂಸ್ಥೆಯ ಪ್ರತಿನಿಧಿಗಳು ಸಂಶೋಧಕರನ್ನು ಸಂಪರ್ಕಿಸಿ ತಂತ್ರಜ್ಞಾನವನ್ನು ವಾಣಿಜ್ಯ ಬಳಕೆಗೆ ತರುವ ಆಸಕ್ತಿ ವ್ಯಕ್ತಪಡಿಸಿದ್ದರು.
ಸಂಶೋಧನೆಯಿಂದ ವಾಣಿಜ್ಯ ಉತ್ಪಾದನೆಯ ಹಂತಕ್ಕೆ ಸಾಗುವ ಪ್ರಕ್ರಿಯೆಯಲ್ಲಿ ಫೋಮ್ನ ಸೂತ್ರ, ಉತ್ಪಾದನಾ ವಿಧಾನ ಮತ್ತು ಉತ್ಪನ್ನ ವಿನ್ಯಾಸದಲ್ಲಿ ಕೆಲವು ಬದಲಾವಣೆಗಳ ಅಗತ್ಯವಿರಬಹುದು. ದೊಡ್ಡ ಪ್ರಮಾಣದಲ್ಲಿ ಉತ್ಪಾದನೆ ನಡೆಸಿದರೂ ಅದರ ಉಷ್ಣ ನಿರೋಧಕತೆ, ಬಲ ಮತ್ತು ಬಾಳಿಕೆ ಉಳಿಯುತ್ತದೆಯೇ ಎಂಬುದು ಮುಂದಿನ ಪ್ರಮುಖ ಪರೀಕ್ಷೆಯಾಗಿದೆ.
ಶೀತ ಸರಪಳಿ ಕ್ಷೇತ್ರದಲ್ಲಿ ನೈಜ ಬಳಕೆಯ ವೇಳೆ ಈ ಫೋಮ್ ನೀಡುವ ಫಲಿತಾಂಶದ ಮೇಲೆ ಅದರ ಭವಿಷ್ಯದ ವಾಣಿಜ್ಯ ಯಶಸ್ಸು ನಿರ್ಧಾರವಾಗಲಿದೆ. ಪ್ಲಾಸ್ಟಿಕ್ ಆಧಾರಿತ ಫೋಮ್ಗಳಿಗೆ ಹೆಚ್ಚು ಪರಿಸರ ಸ್ನೇಹಿ ಪರ್ಯಾಯ ರೂಪಿಸುವ ಪ್ರಯತ್ನದಲ್ಲಿ ಐಐಎಸ್ಸಿಯ ಈ ಬೆಳವಣಿಗೆ ಮಹತ್ವದ ಹೆಜ್ಜೆಯಾಗಿದೆ. ಐಐಎಸ್ಸಿ
ಇದನ್ನೂ ನೋಡಿ : ಪ್ರಕಾಶ್ ರಾಜ್ ಕಾರ್ಯಕ್ರಮಕ್ಕೆ ಅಡ್ಡಿ: ‘ಗೋ ಬ್ಯಾಕ್’ ಘೋಷಣೆ, ಮತೀಯವಾದಿಗಳ ಕೆಟ್ಟ ನಡೆ Janashakthi Media
