ಬೆಂಗಳೂರು: ಕರ್ನಾಟಕದಲ್ಲಿ ನಡೆಯುತ್ತಿರುವ ವಿಶೇಷ ತೀವ್ರ ಮತದಾರರ ಪಟ್ಟಿ ಪರಿಷ್ಕರಣೆ ಪ್ರಕ್ರಿಯೆಯ ಮೊದಲ ಹಂತ ಪೂರ್ಣಗೊಂಡಿದ್ದು, ಆಗಸ್ಟ್ 24ರಂದು ಪ್ರಕಟವಾಗಲಿರುವ ಕರಡು ಮತದಾರರ ಪಟ್ಟಿಯಲ್ಲಿ 4,46,35,899 ಮತದಾರರು ಸ್ಥಾನ ಪಡೆಯಲಿದ್ದಾರೆ. ಕರ್ನಾಟಕ
ಮನೆಮನೆ ಸಮೀಕ್ಷೆ ಹಾಗೂ ಅರ್ಜಿಗಳ ಡಿಜಿಟಲೀಕರಣದ ಮೊದಲ ಹಂತ ಆಗಸ್ಟ್ 17ರಂದು ಮುಕ್ತಾಯಗೊಂಡಿದೆ. ಇದರ ಬೆನ್ನಲ್ಲೇ ಗೈರು, ಸ್ಥಳಾಂತರಗೊಂಡ, ಮೃತಪಟ್ಟ, ನಕಲಿ ಹಾಗೂ ಇತರ ಕಾರಣಗಳಡಿ ಗುರುತಿಸಲಾಗಿದ್ದ ಮತದಾರರ ಸಂಖ್ಯೆಯಲ್ಲಿ ಮತ್ತಷ್ಟು ಇಳಿಕೆಯಾಗಿದೆ.
ಮುಖ್ಯ ಚುನಾವಣಾಧಿಕಾರಿ ಕಚೇರಿಯ ಮಾಹಿತಿಯಂತೆ, ಆಗಸ್ಟ್ 18ರಂದು ರಾಜ್ಯದಲ್ಲಿ 1,07,96,415 ಮತದಾರರು ಎಎಸ್ಡಿಡಿಒ ಪಟ್ಟಿಯಲ್ಲಿ ಇದ್ದರು. ಆಗಸ್ಟ್ 17ರ ಸಂಜೆ 7 ಗಂಟೆಗೆ ಈ ಸಂಖ್ಯೆ 1,08,31,945ರಷ್ಟಿತ್ತು. ಅಂತಿಮವಾಗಿ 35,530 ಮತದಾರರ ಸಂಖ್ಯೆಯಲ್ಲಿ ಇಳಿಕೆಯಾಗಿದೆ.
ಹಿಂದಿನ ಹಂತದಲ್ಲಿ ಕರಡು ಮತದಾರರ ಪಟ್ಟಿಗೆ ಸೇರಲಿರುವ ಮತದಾರರ ಸಂಖ್ಯೆ 5,54,32,314 ಎಂದು ಅಂದಾಜಿಸಲಾಗಿತ್ತು. ಇದೀಗ ಎಎಸ್ಡಿಡಿಒ ಪಟ್ಟಿಯಲ್ಲಿರುವವರನ್ನು ಹೊರತುಪಡಿಸಿದ ಬಳಿಕ ಕರಡು ಪಟ್ಟಿಗೆ ಸೇರುವ ಮತದಾರರ ಸಂಖ್ಯೆ 4.46 ಕೋಟಿಗೆ ಇಳಿದಿದೆ.
ಅಧಿಕಾರಿಗಳ ಪ್ರಕಾರ, ಹಲವು ಅರ್ಜಿಗಳು ಬೂತ್ ಮಟ್ಟದ ಅಧಿಕಾರಿಗಳಿಂದ ಪರಿಶೀಲನೆಗೆ ಬಾಕಿ ಇದ್ದದ್ದು ಹಾಗೂ ಕೊನೆಯ ಕ್ಷಣದಲ್ಲಿ ಮತದಾರರು ತಮ್ಮ ವಿವರಗಳನ್ನು ಸಲ್ಲಿಸಿ ತಿದ್ದುಪಡಿ ಮಾಡಿಸಿಕೊಂಡಿರುವುದು ಸಂಖ್ಯೆಯಲ್ಲಿ ಬದಲಾವಣೆಗೆ ಕಾರಣವಾಗಿದೆ.
ಮುಖ್ಯ ಚುನಾವಣಾಧಿಕಾರಿ ವಿ. ಅನ್ಬುಕುಮಾರ್ ಅವರು ಆಗಸ್ಟ್ 17ರಂದು ಅಂತಿಮ ಎಎಸ್ಡಿಡಿಒ ಪಟ್ಟಿಯನ್ನು ಸಿದ್ಧಪಡಿಸಿ ಸ್ಥಗಿತಗೊಳಿಸಲಾಗಿದೆ ಎಂದು ತಿಳಿಸಿದ್ದಾರೆ. ಇನ್ನು ಪಟ್ಟಿಯಲ್ಲಿ ಮತ್ತಷ್ಟು ಬದಲಾವಣೆ ಅಥವಾ ಹಿಂಪಡೆಯುವಿಕೆ ಇರುವುದಿಲ್ಲ. ಆಗಸ್ಟ್ 24ರಂದು ಕರಡು ಮತದಾರರ ಪಟ್ಟಿ ಪ್ರಕಟವಾಗಲಿದೆ. ಆಗಸ್ಟ್ 5ರಿಂದ 17ರವರೆಗೆ 2.41 ಲಕ್ಷಕ್ಕೂ ಹೆಚ್ಚು ಬದಲಾವಣೆ ಅರ್ಜಿಗಳು ಸಲ್ಲಿಕೆಯಾಗಿವೆ. ಕರ್ನಾಟಕ
ಇದನ್ನೂ ಓದಿ : ಎರಡು ಕೋಟಿ ಜನರು ಮತಹಕ್ಕು ವಾಪಸ್ ಕೇಳುವ ಪರಿಸ್ಥಿತಿ ಯಾಕೆ?: ಪ್ರಕಾಶ್ ರಾಜ್
ಯಾವ ಕಾರಣಕ್ಕೆ ಎಷ್ಟು ಮತದಾರರು?
- ಗೈರು/ಪತ್ತೆಯಾಗದವರು: 15,17,056 — ಶೇ.2.74
- ಶಾಶ್ವತವಾಗಿ ಸ್ಥಳಾಂತರಗೊಂಡವರು: 65,45,721 — ಶೇ.11.81
- ಮೃತರು: 16,39,871 — ಶೇ.2.96
- ನಕಲಿ ಮತದಾರರು: 7,09,875 — ಶೇ.1.28
- ಇತರೆ/ಅರ್ಜಿ ಸಲ್ಲಿಸಲು ನಿರಾಕರಿಸಿದವರು: 3,83,892 — ಶೇ.0.69
ಬೆಂಗಳೂರು ವ್ಯಾಪ್ತಿಯಲ್ಲಿ ಎಎಸ್ಡಿಡಿಒ ವರ್ಗಕ್ಕೆ ಸೇರಿದ ಮತದಾರರ ಪ್ರಮಾಣ ಶೇ.43.42ರಷ್ಟಿದೆ. ನಾಲ್ಕು ಬೆಂಗಳೂರು ಜಿಲ್ಲೆಗಳಲ್ಲಿ ಒಟ್ಟು 1,03,88,363 ಮತದಾರರಿದ್ದು, ಅವರ ಪೈಕಿ 46,88,744 ಮಂದಿ ಎಎಸ್ಡಿಡಿಒ ಪಟ್ಟಿಯಲ್ಲಿದ್ದಾರೆ.
ಇನ್ನು ಹೊಸ ಮತದಾರರ ನೋಂದಣಿಗಾಗಿ 4,34,235 ಫಾರ್ಮ್-6 ಅರ್ಜಿಗಳು ಸಲ್ಲಿಕೆಯಾಗಿದ್ದು, ಮತದಾರರ ವಿವರಗಳ ತಿದ್ದುಪಡಿಗಾಗಿ 8,72,673 ಫಾರ್ಮ್-8 ಅರ್ಜಿಗಳು ಆಗಸ್ಟ್ 18ರವರೆಗೆ ಸಲ್ಲಿಕೆಯಾಗಿವೆ.
ಅಂತಿಮ ಎಎಸ್ಡಿಡಿಒ ಪಟ್ಟಿಯನ್ನು ನೋಂದಾಯಿತ ರಾಜಕೀಯ ಪಕ್ಷಗಳಿಗೆ ನೀಡಲಾಗಿದ್ದು, ಚುನಾವಣಾ ಆಯೋಗದ ವೆಬ್ಸೈಟ್ ಹಾಗೂ ಚುನಾವಣಾ ಮತ್ತು ಪಂಚಾಯಿತಿ ಕಚೇರಿಗಳಲ್ಲೂ ಸಾರ್ವಜನಿಕರ ಪರಿಶೀಲನೆಗೆ ಲಭ್ಯವಾಗುವಂತೆ ಮಾಡಲಾಗಿದೆ.
ಇದನ್ನೂ ನೋಡಿ : ಮೋದಿಯವರ ಕೆಂಪುಕೋಟೆ ಭಾಷಣ: ಘನತೆಯೂ ಇಲ್ಲ, ವಿಶ್ವಾಸಾರ್ಹತೆಯೂ ಇಲ್ಲ… Janashakthi Media
