ಕರಾಕಾಸ್: ವೆನೆಜುವೆಲಾದ ರಾಜಧಾನಿ ಕರಾಕಾಸ್‌ನಲ್ಲಿ ಜೂನ್‌ 24ರಂದು ಸಂಭವಿಸಿದ ಭಾರೀ ಜೋಡಿ ಭೂಕಂಪನದಿಂದ 22 ಮಹಡಿಗಳ ಎತ್ತರದ ವಸತಿ ಕಟ್ಟಡ ಕುಸಿದಿದ್ದು, ನಗರದಲ್ಲಿ ಭೀತಿಯ ವಾತಾವರಣ ನಿರ್ಮಾಣವಾಗಿದೆ. ಕುಸಿದ ಕಟ್ಟಡದ ಅವಶೇಷಗಳಡಿ ಸಿಲುಕಿರುವವರಿಗಾಗಿ ರಕ್ಷಣಾ ಕಾರ್ಯಾಚರಣೆ ತೀವ್ರಗೊಳಿಸಲಾಗಿದೆ.
“ಅಂತೋನಿಯೊ, ಇದು ನಿನ್ನ ತಾಯಿ… ನಾನು ಇಲ್ಲೇ ಇದ್ದೇನೆ,” ಎಂದು ಒಬ್ಬ ತಾಯಿ ಅವಶೇಷಗಳ ಮಧ್ಯೆ ಕಿರುಚುತ್ತಿದ್ದ ದೃಶ್ಯ ಮನಕಲಕುವಂತಿತ್ತು. ಆದರೆ ಪ್ರತಿಕ್ರಿಯೆ ಮಾತ್ರ ಮೌನವಾಗಿತ್ತು ಎಂದು ಸ್ಥಳೀಯರು ತಿಳಿಸಿದ್ದಾರೆ.
ಸ್ಥಳೀಯರು ಹಾಗೂ ಸ್ವಯಂಸೇವಕರು ಫ್ಲ್ಯಾಶ್‌ಲೈಟ್‌ಗಳ ಸಹಾಯದಿಂದ ಅವಶೇಷಗಳ ನಡುವೆ ಶೋಧ ಕಾರ್ಯ ನಡೆಸುತ್ತಿದ್ದರೂ, ಪ್ರಾಥಮಿಕ ಹಂತದಲ್ಲಿ ಕೇವಲ ಒಬ್ಬ ಪೊಲೀಸ್ ಅಧಿಕಾರಿಯಷ್ಟೇ ಸ್ಥಳದಲ್ಲಿದ್ದರಿಂದ ರಕ್ಷಣಾ ಕಾರ್ಯ ವಿಳಂಬವಾಯಿತು.
ಇದನ್ನೂ ಓದಿ: ವೆನೆಜುವೆಲಾದಲ್ಲಿ ಭೀಕರ ಭೂಕಂಪ : ಕಟ್ಟಡಗಳು ಕುಸಿತ, ಸಾವಿರಾರು ಸಾವು-ನೋವಿನ ಆತಂಕ
ಮಧ್ಯಮ ಮತ್ತು ಶ್ರೀಮಂತ ವರ್ಗದ ನಿವಾಸ ಪ್ರದೇಶವಾದ ಲಾಸ್ ಪಾಲೋಸ್ ಗ್ರಾಂಡೆಸ್‌ನಲ್ಲಿ ಈ ದುರಂತ ಸಂಭವಿಸಿದೆ. ಸಾಮಾನ್ಯವಾಗಿ ಕಾಫೆ, ರೆಸ್ಟೋರೆಂಟ್‌ಗಳಿಂದ ಗಿಜಿಗುಡುತ್ತಿದ್ದ ಪ್ರದೇಶ ಈಗ ಧ್ವಂಸಾವಶೇಷವಾಗಿ ಮಾರ್ಪಟ್ಟಿದೆ.
ಸ್ಥಳೀಯ ಅಧಿಕಾರಿಗಳ ಪ್ರಕಾರ, ಸ್ಥಳೀಯ ಸಮಯ ಸಂಜೆ ಸುಮಾರು 6 ಗಂಟೆಗೆ (ಭಾರತೀಯ ಸಮಯ ರಾತ್ರಿ 10 ಗಂಟೆ) 7.2 ಮತ್ತು 7.5 ತೀವ್ರತೆಯ ಎರಡು ಭೂಕಂಪನಗಳು ಕ್ರಮವಾಗಿ ಸಂಭವಿಸಿವೆ. ಇದರಿಂದ ಕರಾಕಾಸ್ ನಗರದಲ್ಲಿ ಅನೇಕ ಕಟ್ಟಡಗಳು ಕುಸಿದು, ನಿವಾಸಿಗಳು ಭೀತಿಯಿಂದ ಬೀದಿಗೆ ಓಡಿದ್ದಾರೆ.
ಉಪಾಧ್ಯಕ್ಷೆ ಡೆಲ್ಸಿ ರೊಡ್ರಿಗಸ್ ತಿಳಿಸಿದ್ದಾರೆ ಪ್ರಕಾರ, 20ಕ್ಕೂ ಹೆಚ್ಚು ಆಫ್ಟರ್‌ಶಾಕ್‌ಗಳು ಸಂಭವಿಸಿವೆ. ಗೃಹ ಸಚಿವ ದಿಯೋಸ್ದಾಡೋ ಕಬೆಲೊ ಪ್ರಕಾರ, ಟ್ರುಜಿಲ್ಲೊ, ಕರಾಬೋಬೊ, ಮಿರಾಂಡಾ ಮತ್ತು ಲಾ ಗುಯೈರಾ ರಾಜ್ಯಗಳು ಹೆಚ್ಚು ಹಾನಿಗೊಳಗಾಗಿವೆ.
ಇದುವರೆಗೆ ಯಾವುದೇ ಅಧಿಕೃತ ಸಾವಿನ ಸಂಖ್ಯೆ ದೃಢಪಡಿಸಿಲ್ಲ. ಆದರೆ ಗಾಯಾಳುಗಳ ಬಗ್ಗೆ ಮಾಹಿತಿ ಸಂಗ್ರಹಿಸಲಾಗುತ್ತಿದೆ ಎಂದು ಅಧಿಕಾರಿಗಳು ತಿಳಿಸಿದ್ದಾರೆ.
ಭೂಕಂಪನದ ವೇಳೆ ಕಟ್ಟಡಗಳಿಂದ ಹೊರಬಂದ ಜನರು ಭೀತಿಯ ಕ್ಷಣಗಳನ್ನು ವಿವರಿಸಿದ್ದಾರೆ. “ಸೋಪಾನಗಳು ಬಿರುಕು ಬಿಟ್ಟವು, ಗೋಡೆಗಳು ಒಡೆದವು, ಮೇಲ್ಚಾವಣಿಯಿಂದ ವಸ್ತುಗಳು ಬಿದ್ದವು,” ಎಂದು 54 ವರ್ಷದ ಬ್ಯಾಂಕ್ ಉದ್ಯೋಗಿ ಒಡಾಲಿಸ್ ಎಸ್ಕಲೋನಾ ಹೇಳಿದ್ದಾರೆ.
ಇದೇ ವೇಳೆ 52 ವರ್ಷದ ಝೆನಿಯಾ ಗೊನ್ಸಾಲೆಜ್ ಅವರು, ಜನರು ಎಸ್ಕಲೇಟರ್ ಮೂಲಕ ಕೆಳಗೆ ಇಳಿಯಲು ಪ್ರಯತ್ನಿಸುತ್ತಿದ್ದ ದೃಶ್ಯ ಭಯಾನಕವಾಗಿತ್ತು ಎಂದು ಹೇಳಿದ್ದಾರೆ.
ನಗರದ ಹಲವು ಭಾಗಗಳಲ್ಲಿ ಕಟ್ಟಡಗಳು ಹಾನಿಗೊಳಗಾಗಿದ್ದು, ಸರ್ಕಾರ ತುರ್ತು ಪರಿಸ್ಥಿತಿ ಘೋಷಿಸಿದೆ. ಪ್ರಮುಖ ವಿಮಾನ ನಿಲ್ದಾಣವನ್ನು ತಾತ್ಕಾಲಿಕವಾಗಿ ಮುಚ್ಚಲಾಗಿದೆ ಎಂದು ತಿಳಿಸಲಾಗಿದೆ.
ವೆನೆಜುವೆಲಾದ ಭೂಕಂಪನದ ನಂತರ ಜಪಾನ್‌ನ ಉತ್ತರ ಭಾಗದಲ್ಲಿಯೂ ಮತ್ತೊಂದು ಭೂಕಂಪನ ಸಂಭವಿಸಿದ್ದು, ಅಲ್ಲಿ ಯಾವುದೇ ಹಾನಿ ಅಥವಾ ಸಾವಿನ ವರದಿಯಾಗಿಲ್ಲ ಎಂದು ಅಧಿಕಾರಿಗಳು ತಿಳಿಸಿದ್ದಾರೆ.
ಇದನ್ನೂ ನೋಡಿ: “ಟಾಟಾ ಕಂಪನಿಗೆ ವಿದ್ಯುತ್, ಜನತೆಗೆ ಕಾದಿದೆ ಆಪತ್ತು? | ವಿದ್ಯುತ್ ಖಾಸಗೀಕರಣ ವಿರುದ್ಧ ಸಮಾವೇಶ” Janashakthi Media
