ನವದೆಹಲಿ: 2026ರ ಮುಷ್ಕರ ಅಲೆ ಪ್ರಮುಖ ಪೂರೈಕೆದಾರ ಕಂಪನಿಗಳಲ್ಲಿ ವ್ಯಾಪಕವಾಗಿ ಹರಡಿತು. ಆದರೆ, ಹಲವು ಕಾರಣಗಳಿಂದ ಸಂಬಂಧಿತ ಸಹಾಯಕ ಪೂರೈಕೆದಾರ ಕಂಪನಿಗಳೂ ಈ ಹೋರಾಟದ ಪ್ರಭಾವಕ್ಕೆ ಒಳಗಾದವು.
ಮೊದಲನೆಯದಾಗಿ, ಸರಬರಾಜು ಸರಪಳಿ ವ್ಯತ್ಯಯಗೊಂಡಿತು. ಎರಡನೆಯದಾಗಿ, ಈ ಕಾರ್ಖಾನೆಗಳಲ್ಲಿನ ಕಾರ್ಮಿಕರ ಕೆಲಸದ ಪರಿಸ್ಥಿತಿಗಳು ಸಾಮಾನ್ಯವಾಗಿ ದೊಡ್ಡ ಪೂರೈಕೆದಾರ ಕಂಪನಿಗಳಿಗಿಂತಲೂ ಕೆಟ್ಟದಾಗಿದ್ದವು. ಮೂರನೆಯದಾಗಿ, ಪ್ರಮುಖ ಕಾರ್ಖಾನೆಗಳಲ್ಲಿ ನಡೆದ ಹೋರಾಟಗಳು ಸಹಾಯಕ ಘಟಕಗಳ ಕಾರ್ಮಿಕರಿಗೂ ಪ್ರೇರಣೆಯಾದವು.
ಈ ಹಿನ್ನೆಲೆಯಲ್ಲಿ, ಉತ್ತರಾಖಂಡ ರಾಜ್ಯ ಮೂಲಸೌಕರ್ಯ ಮತ್ತು ಕೈಗಾರಿಕಾ ಅಭಿವೃದ್ಧಿ ನಿಗಮ (SIDCUL) ಸೆಕ್ಟರ್ 9, ಪಂತನಗರದಲ್ಲಿರುವ SBR ಆಟೋ ಕಾಂಪೊನೆಂಟ್ಸ್ ಕಂಪನಿಯ ಪ್ರಕರಣವನ್ನು ಅಧ್ಯಯನ ಮಾಡಲಾಗಿದೆ. ಇದು ಪ್ರಮುಖ ವಾಹನ ತಯಾರಿಕಾ ಗುಂಪುಗಳಿಗೆ ಸಂಬಂಧಿಸಿದ ಸಹಾಯಕ ಪೂರೈಕೆದಾರ ಸಂಸ್ಥೆಯಾಗಿದೆ. ವಿಶೇಷವಾಗಿ ಯುನೋ ಮಿಂಡಾ ಗ್ರೂಪ್ಗೆ ಸಂಬಂಧಿಸಿದ ಈ ಕಂಪನಿ, ಮನೇಸರ್ನಲ್ಲಿ ಕೇಂದ್ರ ಕಚೇರಿ ಹೊಂದಿದ್ದು, ಅಲ್ಯೂಮಿನಿಯಂ ಕಾಸ್ಟಿಂಗ್ ಮತ್ತು ಬ್ರೇಕ್ ಲೀವರ್, ವಾಹನ ಪೈಪ್ಗಳು ಹಾಗೂ ಡೈ-ಕಾಸ್ಟ್ ಭಾಗಗಳ ತಯಾರಿಕೆಯಲ್ಲಿ ಪರಿಣತಿ ಹೊಂದಿದೆ.
ಇದನ್ನೂ ಓದಿ: ಸಿಜೆಪಿ ಪ್ರತಿಭಟನೆ: ಸೋನಂ ವಾಂಗ್ಚುಕ್ ಉಪವಾಸ; 11ನೇ ದಿನ 7 ಕಿಲೋ ತೂಕ ಕುಸಿತ
ಅಂತರ ಕಾರ್ಖಾನೆ ಕಾರ್ಮಿಕ ಏಕತೆ SBRಗೂ ತಲುಪಿತು
2026ಕ್ಕೂ ಮೊದಲು SBR ಆಟೋ ಕಾಂಪೊನೆಂಟ್ಸ್ನಲ್ಲಿ ಕಾರ್ಮಿಕ ಅಶಾಂತಿಯ ಯಾವುದೇ ದಾಖಲೆ ಇರಲಿಲ್ಲ. ಗುಣಮಟ್ಟ ನಿಯಂತ್ರಣ ಮತ್ತು CNC/VMC ಯಂತ್ರ ಕಾರ್ಯಾಚರಣೆಗಳಂತಹ ವಿಶೇಷ ಕೆಲಸಗಳಿಗೆ ಮಾತ್ರ ಕಂಪನಿಯಲ್ಲಿ ನೇರ ಉದ್ಯೋಗಿಗಳಿದ್ದರು. ಸಾಮಾನ್ಯ ಕಾರ್ಖಾನೆ ಕಾರ್ಯಗಳನ್ನು ಹೊರಗುತ್ತಿಗೆ ಕಾರ್ಮಿಕರಿಂದ ನಿರ್ವಹಿಸಲಾಗುತ್ತಿತ್ತು.
ಕಂಪನಿಯಲ್ಲಿ ಸುಮಾರು 200 ಉದ್ಯೋಗಿಗಳಿದ್ದು, ಇವರಲ್ಲಿ ಶೇ.20ಕ್ಕಿಂತ ಕಡಿಮೆ ಮಂದಿ ಮಾತ್ರ ನೇರ ಉದ್ಯೋಗಿಗಳಾಗಿದ್ದರು. ಆರೋಗ್ಯ, ಸುರಕ್ಷತೆ ಮತ್ತು ಪರಿಸರ (HSE) ನೀತಿಗಳ ಕಟ್ಟುನಿಟ್ಟಿನ ಅನುಷ್ಠಾನದಿಂದ ಕೆಲಸದ ಅಪಘಾತಗಳು ಕಡಿಮೆ ಇದ್ದವು. ಸಾಮಾನ್ಯವಾಗಿ ಕಾಸ್ಟಿಂಗ್ ಕಾರ್ಖಾನೆಗಳಲ್ಲಿ ಕಾರ್ಮಿಕ ಅಸಮಾಧಾನಕ್ಕೆ ಅಪಘಾತಗಳು ಪ್ರಮುಖ ಕಾರಣವಾಗುತ್ತವೆ.
ಆದರೆ, 2026ರಲ್ಲಿ SBR ಆಟೋ ಕಾಂಪೊನೆಂಟ್ಸ್ ಮೇಲೆ ಉಂಟಾದ ಕಾರ್ಮಿಕ ಚಳವಳಿಯು SIDCUL ಕೈಗಾರಿಕಾ ವಲಯದಲ್ಲಿ ನಡೆದ ಪ್ರಾದೇಶಿಕ “ಅಂತರ ಕಾರ್ಖಾನೆ ಏಕತೆ” ಚಳವಳಿಯ ಪರಿಣಾಮವಾಗಿತ್ತು.
ಸಮೀಪದ ದೊಡ್ಡ ಕಾರ್ಖಾನೆಗಳಲ್ಲಿ ನಡೆಯುತ್ತಿದ್ದ ವೇತನ ಹೆಚ್ಚಳದ ಮಾತುಕತೆಗಳಿಗೆ ಅನುಗುಣವಾಗಿ ವೇತನ ಹೆಚ್ಚಿಸಬೇಕೆಂದು SBRನ ಗುತ್ತಿಗೆ ಕಾರ್ಮಿಕರು ನಿರ್ವಹಣೆಯನ್ನು ಒತ್ತಾಯಿಸಿದರು.
SBR ಕಾರ್ಮಿಕರು ಸ್ಥಳೀಯ ಗ್ರಾಮಗಳು ಮತ್ತು ಕೈಗಾರಿಕಾ ಸಮುದಾಯದೊಂದಿಗೆ ನಿಕಟ ಸಂಪರ್ಕ ಹೊಂದಿದ್ದರು. ವಿ-ಗಾರ್ಡ್ ಗ್ರಾಹಕ ಉತ್ಪನ್ನಗಳು ಮತ್ತು ಬಜಾಜ್ ಮೋಟಾರ್ಸ್ನಂತಹ ಪ್ರಮುಖ ಘಟಕಗಳಲ್ಲಿ ನಡೆದ ಹಿಂಸಾತ್ಮಕ ಘಟನೆಗಳು ವ್ಯಾಪಕ ಸಹಾನುಭೂತಿ ಪ್ರತಿಭಟನೆಗಳಿಗೆ ಕಾರಣವಾದವು.
SBR ಕಾರ್ಮಿಕರು ಗಾಯಗೊಂಡ ಕಾರ್ಮಿಕರಿಗೆ ಬೆಂಬಲ ಸೂಚಿಸಲು ತಾತ್ಕಾಲಿಕವಾಗಿ ಶಿಫ್ಟ್ ಬಹಿಷ್ಕರಿಸಿದರು ಅಥವಾ ಕಾರ್ಖಾನೆ ಗೇಟ್ ಬಳಿ ಧರಣಿಯಲ್ಲಿ ಭಾಗವಹಿಸಿದರು. SBR ಆಟೋ ಕಾಂಪೊನೆಂಟ್ಸ್ನಲ್ಲಿನ ಈ ಕಾರ್ಮಿಕ ಹೋರಾಟ ವೇಗವಾಗಿ ಆರಂಭಗೊಂಡು ಅಲ್ಪಾವಧಿಯಲ್ಲೇ ಅಂತ್ಯಗೊಂಡಿತು.
ಮೂರು ದಿನಗಳ ಸಹಾನುಭೂತಿ ಮುಷ್ಕರ
ಏಪ್ರಿಲ್ 14ರಂದು ಪಂತನಗರದ ಬಜಾಜ್ ಮೋಟಾರ್ಸ್ನಲ್ಲಿ ನಡೆದ ಕಾರ್ಮಿಕ ಸಾವು ಆಕ್ರೋಶಭರಿತ ಪ್ರತಿಭಟನೆಗೆ ಕಾರಣವಾಯಿತು.
ಏಪ್ರಿಲ್ 19ರಂದು ಸಮೀಪದ ಯಾಜಕಿ ಇಂಡಿಯಾ, ಬಡ್ವೆ ಮತ್ತು ಬೆಲ್ರೈಸ್ ಘಟಕಗಳ ಗುತ್ತಿಗೆ ಕಾರ್ಮಿಕರು ₹21,000 ಕನಿಷ್ಠ ಮಾಸಿಕ ವೇತನದ ಬೇಡಿಕೆಯಿಂದ ಅಧಿಕೃತವಾಗಿ ಮುಷ್ಕರ ಆರಂಭಿಸಿದರು.
ಏಪ್ರಿಲ್ 24ರಂದು ವಿ-ಗಾರ್ಡ್ ಕಾರ್ಮಿಕರೂ ಹೋರಾಟಕ್ಕೆ ಸೇರಿದರು. ಇದಕ್ಕೆ ಪ್ರತಿಯಾಗಿ ಜಿಲ್ಲಾಡಳಿತ ಕಾರ್ಮಿಕರ ಮೇಲೆ ಲಾಠಿ ಚಾರ್ಜ್ ನಡೆಸಿ, ಕಾರ್ಖಾನೆ ಗೇಟ್ಗಳ ಬಳಿ ಧರಣಿ ನಡೆಸುವುದನ್ನು ನಿಷೇಧಿಸಿತು.
ವಿ-ಗಾರ್ಡ್ ಗೇಟ್ ಬಳಿ ನಡೆದ ಪೊಲೀಸ್ ಕ್ರಮದ ಸುದ್ದಿ ಸೆಕ್ಟರ್ 9ರ ಕಾರ್ಮಿಕರು ಮತ್ತು ಸ್ಥಳೀಯ ಗ್ರಾಮ ಸಮುದಾಯಗಳ ನಡುವೆ ವೇಗವಾಗಿ ಹರಡಿತು.
ನಿರ್ವಹಣೆಗೆ ಯಾವುದೇ ಅಧಿಕೃತ ಮನವಿ ಸಲ್ಲಿಸಲಾಗಿರಲಿಲ್ಲ. ಆದರೆ, ಕಾರ್ಮಿಕರ ಸಮಿತಿಯು ಏಪ್ರಿಲ್ 25ರೊಳಗೆ ವೇತನ ಹೆಚ್ಚಳ ಮತ್ತು ಸುರಕ್ಷತಾ ಸಮಸ್ಯೆ ಪರಿಹರಿಸದಿದ್ದರೆ ಕೆಲಸ ಬಹಿಷ್ಕರಿಸುವುದಾಗಿ HR ವಿಭಾಗಕ್ಕೆ ಮೌಖಿಕವಾಗಿ ತಿಳಿಸಿತು.
ದೊಡ್ಡ ಎಲೆಕ್ಟ್ರಾನಿಕ್ ಅಸೆಂಬ್ಲಿ ಘಟಕಗಳಲ್ಲಿ ಹಲವು ವಾರಗಳ ಸ್ಥಗಿತ ಉಂಟಾದಂತೆ SBRನಲ್ಲಿ ಪರಿಸ್ಥಿತಿ ಮುಂದುವರಿಯಲಿಲ್ಲ. ಸ್ಥಳೀಯ HR ಮತ್ತು ನಿರ್ವಹಣೆ ತಕ್ಷಣ ಮಧ್ಯಪ್ರವೇಶಿಸಿ, ಕಾರ್ಮಿಕ ಪ್ರತಿನಿಧಿಗಳು ಮತ್ತು ಗುತ್ತಿಗೆದಾರರೊಂದಿಗೆ ಮಾತುಕತೆ ನಡೆಸಿ ಸಂಘರ್ಷವನ್ನು ತಪ್ಪಿಸಿತು.
ದ್ವಿಪಕ್ಷೀಯ ಒಪ್ಪಂದ
ಮುಖ್ಯ ಬೇಡಿಕೆ ತಿಂಗಳಿಗೆ ₹21,000 ಕನಿಷ್ಠ ವೇತನವಾಗಿತ್ತು. ನಿರ್ವಹಣೆ ಈ ಬೇಡಿಕೆಯನ್ನು ನೇರವಾಗಿ ಒಪ್ಪದಿದ್ದರೂ, ಉತ್ತರಾಖಂಡ ಸರ್ಕಾರ ಘೋಷಿಸಿದ ಪರಿಷ್ಕೃತ ಕನಿಷ್ಠ ವೇತನ ದರಗಳನ್ನು ಜಾರಿಗೆ ಒಪ್ಪಿತು. ಜೊತೆಗೆ, ಮಾಸಿಕ ನಿಗದಿತ ಹಾಜರಾತಿ ಭತ್ಯೆ ಮತ್ತು ಕಾರ್ಯಕ್ಷಮತೆ ಆಧಾರಿತ ಪ್ರೋತ್ಸಾಹ ಧನವನ್ನು ಹೆಚ್ಚಿಸಲು ಒಪ್ಪಿಕೊಂಡಿತು.
ಇದರಿಂದ ದೀರ್ಘಾವಧಿಯ ಮೂಲ ವೇತನ ರಚನೆಯಲ್ಲಿ ಕಾನೂನು ಬದಲಾವಣೆ ಮಾಡದೆ, ಗುತ್ತಿಗೆ ಕಾರ್ಮಿಕರ ಕೈಗೆ ಸಿಗುವ ವೇತನವು ಮುಷ್ಕರದ ಬೇಡಿಕೆಯ ಸಮೀಪಕ್ಕೆ ಏರಿತು.
ಸರಾಸರಿ ಕಾರ್ಮಿಕರೊಬ್ಬರ ಮುಷ್ಕರಪೂರ್ವ ಮತ್ತು ಮುಷ್ಕರೋತ್ತರ ‘ಕೈಗೆ ಸಿಗುವ ವೇತನ’ (take-home pay) ಹಾಗೂ ಅದರ ಅಂಶಗಳ ತುಲನೆಯನ್ನು ಕೆಳಗೆ ನೀಡಲಾಗಿದೆ:
ಮುಷ್ಕರಕ್ಕೂ ಮುನ್ನ, ಕಾಸ್ಟಿಂಗ್ ಫರ್ನೇಸ್ಗಳ ಬಳಿ ಹೆಚ್ಚುವರಿ ಸಮಯ ಕೆಲಸ ಮಾಡಿದರೂ ಸರಿಯಾದ ವೇತನ ಸಿಗುತ್ತಿಲ್ಲ ಅಥವಾ ದಾಖಲಾಗುತ್ತಿಲ್ಲ ಎಂಬ ಆರೋಪಗಳು ಕಾರ್ಮಿಕರಿಂದ ಕೇಳಿಬರುತ್ತಿದ್ದವು.
ಮುಷ್ಕರದ ನಂತರದ ಒಪ್ಪಂದದಲ್ಲಿ ಸ್ವಯಂಚಾಲಿತ ಪಂಚ್-ಕಾರ್ಡ್ ವ್ಯವಸ್ಥೆ ಜಾರಿಗೆ ತರಲಾಯಿತು. ಇದರಿಂದ ಸಾಮಾನ್ಯ 8 ಗಂಟೆಗಳ ಕೆಲಸದ ಅವಧಿಯ ನಂತರ ಮಾಡಿದ ಕೆಲಸವನ್ನು ಕಾನೂನು ಪ್ರಕಾರದ ದ್ವಿಗುಣ ಓವರ್ಟೈಮ್ ದರದಲ್ಲಿ ಲೆಕ್ಕಹಾಕುವುದು ಖಚಿತವಾಯಿತು.
ಸುರಕ್ಷತಾ ಸುಧಾರಣೆ ಮತ್ತು ಉತ್ಪಾದನೆ ಪುನರಾರಂಭ
ಅಲ್ಯೂಮಿನಿಯಂ ಹೈ-ಪ್ರೆಶರ್ ಡೈ-ಕಾಸ್ಟಿಂಗ್ (HPDC) ಕೆಲಸದ ಅಪಾಯಕಾರಿ ಸ್ವಭಾವವನ್ನು ಗಮನಿಸಿ, ಫರ್ನೇಸ್ಗಳ ಬಳಿ ಕೆಲಸ ಮಾಡುವ ಕಾರ್ಮಿಕರಿಗೆ ಉತ್ತಮ ಗುಣಮಟ್ಟದ ಶಾಖ ನಿರೋಧಕ ವೈಯಕ್ತಿಕ ಸುರಕ್ಷತಾ ಉಪಕರಣಗಳು (PPE), ಸುರಕ್ಷತಾ ಕೈಗವಸುಗಳು ಮತ್ತು ಇತರ ರಕ್ಷಣಾ ಸಾಮಗ್ರಿಗಳನ್ನು ಒದಗಿಸಲು ನಿರ್ವಹಣೆ ಒಪ್ಪಿಕೊಂಡಿತು.
ಕಾರ್ಖಾನೆಯೊಳಗೆ ಉತ್ತಮ ತಂಪು ಮತ್ತು ಗಾಳಿಯ ವ್ಯವಸ್ಥೆ ಅಳವಡಿಸುವುದು, ಶುದ್ಧ ಕುಡಿಯುವ ನೀರು ಮತ್ತು ಶಿಫ್ಟ್ ಬದಲಾವಣೆಯ ಸಮಯದಲ್ಲಿ ಸಹಾಯಧನದ ತಿಂಡಿ ಸೌಲಭ್ಯ ಒದಗಿಸುವುದಕ್ಕೂ ಒಪ್ಪಂದದಲ್ಲಿ ಅವಕಾಶ ಕಲ್ಪಿಸಲಾಯಿತು.
ಮುಷ್ಕರ ಹಿಂಪಡೆಯುವ ಅಂತಿಮ ಅಡ್ಡಿಯನ್ನು ನಿವಾರಿಸಲು, ಏಪ್ರಿಲ್ 25ರಿಂದ 27ರವರೆಗೆ ನಡೆದ ಸಹಾನುಭೂತಿ ಮುಷ್ಕರದಲ್ಲಿ ಕೆಲಸಕ್ಕೆ ಗೈರಾಗಿದ್ದ ಗುತ್ತಿಗೆ ಕಾರ್ಮಿಕರ ವಿರುದ್ಧ ಯಾವುದೇ ವೇತನ ಕಡಿತ, ಶಿಸ್ತು ಕ್ರಮ ಅಥವಾ ಗುತ್ತಿಗೆ ರದ್ದು ಮಾಡುವ ಕ್ರಮ ಕೈಗೊಳ್ಳುವುದಿಲ್ಲ ಎಂದು SBR ನಿರ್ವಹಣೆ ಭರವಸೆ ನೀಡಿತು.
ಈ ಮೂರು ದಿನಗಳ ಅವಧಿಗೆ ಮಾತ್ರ “ಕೆಲಸ ಇಲ್ಲದಿದ್ದರೆ ವೇತನ ಇಲ್ಲ” ನಿಯಮದಿಂದ ವಿನಾಯಿತಿ ನೀಡಲಾಯಿತು.
SBR ಘಟಕದಲ್ಲಿನ ಮುಷ್ಕರವನ್ನು ಏಪ್ರಿಲ್ 29, 2026ರಂದು ಅಧಿಕೃತವಾಗಿ ಹಿಂಪಡೆಯಲಾಯಿತು. ಕೆಲವೇ ದಿನಗಳಲ್ಲಿ ಕಾರ್ಖಾನೆ ಮತ್ತೆ ಪೂರ್ಣ ಪ್ರಮಾಣದ ಉತ್ಪಾದನೆಗೆ ಮರಳಿತು.
SBR ಆಟೋ ಕಾಂಪೊನೆಂಟ್ಸ್ನ ಈ ಹೋರಾಟವು ಸಣ್ಣ ಕಾರ್ಖಾನೆಯ ಕಾರ್ಮಿಕರು ಸಮಯಕ್ಕೆ ಸರಿಯಾದ ಸರಬರಾಜು ವ್ಯವಸ್ಥೆಯ ಮೇಲೆ ಉಂಟಾಗುವ ಒತ್ತಡವನ್ನು ಬಳಸಿಕೊಂಡು ವೇತನ ಮತ್ತು ಕೆಲಸದ ಪರಿಸ್ಥಿತಿಗಳಲ್ಲಿ ಮಹತ್ವದ ಸುಧಾರಣೆ ಸಾಧಿಸಿದ ವಿಶಿಷ್ಟ ಉದಾಹರಣೆಯಾಗಿದೆ.
ಇದನ್ನೂ ನೋಡಿ: SIR ಕರ್ತವ್ಯದಲ್ಲಿ ಮತ್ತೊಂದು ಆಘಾತ! ಬಿಎಲ್ಒಗೆ ಜಾತಿ ನಿಂದನೆ; ಎಫ್ಐಆರ್ ದಾಖಲು Janashakthi Media
