ಜುಲೈ 31ರಿಂದ ಆಕ್ಷೇಪಣೆ ಅವಧಿ ಆರಂಭ: ಅಕ್ಟೋಬರ್ 3ಕ್ಕೆ ಅಂತಿಮ ಪಟ್ಟಿ
ಚಂಡೀಗಢ: ಹರಿಯಾಣದ ಎಲ್ಲಾ 90 ವಿಧಾನಸಭಾ ಕ್ಷೇತ್ರಗಳಿಗೆ ಸಂಬಂಧಿಸಿದ ಕರಡು ಮತದಾರರ ಪಟ್ಟಿಯನ್ನು ವಿಶೇಷ ತೀವ್ರ ಪರಿಶೀಲನೆ (SIR) ಅಭಿಯಾನದ ಮೊದಲ ಹಂತ ಪೂರ್ಣಗೊಂಡ ಬಳಿಕ ಪ್ರಕಟಿಸಲಾಗಿದೆ ಎಂದು ಭಾರತ ಚುನಾವಣಾ ಆಯೋಗ (ECI) ಜುಲೈ ತಿಳಿಸಿದೆ. ಹರಿಯಾಣ
ಅಧಿಕೃತ ಪ್ರಕಟಣೆಯ ಪ್ರಕಾರ, ಈ ಅಭಿಯಾನದ ವೇಳೆ 20,629 ಬೂತ್ ಮಟ್ಟದ ಅಧಿಕಾರಿಗಳು (BLOಗಳು) ರಾಜ್ಯದ 2.06 ಕೋಟಿಗೂ ಹೆಚ್ಚು ಮತದಾರರಿಗೆ ಗಣನೆ ಫಾರ್ಮ್ಗಳನ್ನು ಹಂಚಿಕೆ ಮಾಡಿದ್ದಾರೆ.
ಜುಲೈ 24ರ ವೇಳೆಗೆ, ರಾಜ್ಯದ ಒಟ್ಟು 2,06,55,929 ಮತದಾರರಲ್ಲಿ 1,72,72,627 ಮಂದಿ ತಮ್ಮ ವಿವರಗಳನ್ನು ಸಲ್ಲಿಸಿದ್ದು, ಇದನ್ನು ಚುನಾವಣಾ ಆಯೋಗವು “ಭಾರಿ ಸ್ಪಂದನೆ” ಎಂದು ವಿವರಿಸಿದೆ.
ಇದನ್ನೂ ಓದಿ: ‘ವಿಕ್ಟಿಂ ಕಾರ್ಡ್ ಆಡುತ್ತಿದ್ದಾರೆ ಮೋದಿ’: ಕ್ಷಮೆ ಕೇಳಬೇಕು – ಜೈರಾಮ್ ರಮೇಶ್ ಆಗ್ರಹ
ಈ ಪರಿಶೀಲನಾ ಅಭಿಯಾನದ ವೇಳೆ 24.13 ಲಕ್ಷ ಮತದಾರರು ಶಾಶ್ವತವಾಗಿ ಸ್ಥಳಾಂತರಗೊಂಡವರು, ಗೈರುಹಾಜರಾಗಿರುವವರು ಅಥವಾ ಇತರ ವರ್ಗಗಳಿಗೆ ಸೇರಿದವರು ಎಂದು ಪತ್ತೆಯಾಗಿದೆ. 7.66 ಲಕ್ಷ ಮಂದಿ ಮೃತಪಟ್ಟಿರುವುದಾಗಿ ಗುರುತಿಸಲ್ಪಟ್ಟರೆ, 2.04 ಲಕ್ಷ ಮಂದಿ ಬಹುಸ್ಥಳಗಳಲ್ಲಿ ನೋಂದಾಯಿತರಾಗಿರುವುದು ಕಂಡುಬಂದಿದೆ.
ಚುನಾವಣಾ ಆಯೋಗದ ಪ್ರಕಾರ, ಕರಡು ಪಟ್ಟಿಯಿಂದ ಹೊರಗುಳಿದಿರುವ ನಿಜವಾದ ಮತದಾರರು ಜುಲೈ 31ರಿಂದ ಆಗಸ್ಟ್ 30ರವರೆಗೆ ನಡೆಯುವ “ದಾವೆ ಮತ್ತು ಆಕ್ಷೇಪಣೆ” ಅವಧಿಯಲ್ಲಿ Form-6 ಹಾಗೂ ಅಗತ್ಯ ಘೋಷಣಾ ಪತ್ರವನ್ನು ಸಲ್ಲಿಸಿ ತಮ್ಮ ಹೆಸರು ಸೇರಿಸಿಕೊಳ್ಳಬಹುದು. ಒಂದಕ್ಕಿಂತ ಹೆಚ್ಚು ಸ್ಥಳಗಳಲ್ಲಿ ನೋಂದಾಯಿತರಾಗಿರುವವರ ಹೆಸರು ಒಂದೇ ಸ್ಥಳದಲ್ಲಿ ಮಾತ್ರ ಉಳಿಸಲಾಗುತ್ತದೆ.
ಈ ದಾವೆ-ಆಕ್ಷೇಪಣೆಗಳ ಪರಿಶೀಲನೆ ಸೆಪ್ಟೆಂಬರ್ 28ರವರೆಗೆ ಮುಂದುವರಿಯಲಿದ್ದು, ಅಂತಿಮ ಮತದಾರರ ಪಟ್ಟಿಯನ್ನು ಅಕ್ಟೋಬರ್ 3ರಂದು ಪ್ರಕಟಿಸಲಾಗುತ್ತದೆ.
ಈ SIR ಅಭಿಯಾನವನ್ನು ಅರ್ಹ ಮತದಾರರ ಸಂಪೂರ್ಣ ಒಳಗೊಳ್ಳುವಿಕೆ, ಗರಿಷ್ಠ ಭಾಗವಹಿಸುವಿಕೆ ಹಾಗೂ ಪ್ರತಿ ಹಂತದಲ್ಲೂ ಪಾರದರ್ಶಕತೆಯನ್ನು ಖಚಿತಪಡಿಸಲು ನಡೆಸಲಾಗಿದೆ ಎಂದು ಪ್ರಕಟಣೆ ತಿಳಿಸಿದೆ.
ಹರಿಯಾಣದ 23 ಜಿಲ್ಲೆಗಳ ಜಿಲ್ಲಾ ಚುನಾವಣಾಧಿಕಾರಿಗಳು (DEOಗಳು), 90 ಚುನಾವಣಾ ನೋಂದಣಿ ಅಧಿಕಾರಿಗಳು (EROಗಳು), 1,594 ಸಹಾಯಕ ಅಧಿಕಾರಿಗಳು (AEROಗಳು), 2,244 ಬೂತ್ ಮೇಲ್ವಿಚಾರಕರು ಹಾಗೂ 20,629 ಬೂತ್ ಮಟ್ಟದ ಅಧಿಕಾರಿಗಳು ಸಮನ್ವಯದಿಂದ ಕಾರ್ಯನಿರ್ವಹಿಸಿರುವುದರಿಂದ ಗಣನೆ ಹಂತ ಯಶಸ್ವಿಯಾಗಿ ಪೂರ್ಣಗೊಂಡಿದೆ. ಈ ಕಾರ್ಯಕ್ಕೆ ಸ್ವಯಂಸೇವಕರ ಸಹಕಾರವೂ ಲಭ್ಯವಿತ್ತು.
ರಾಜಕೀಯ ಪಕ್ಷಗಳ ಪ್ರತಿನಿಧಿಗಳು ಕೂಡ ಈ ಅಭಿಯಾನದಲ್ಲಿ ಭಾಗವಹಿಸಿದ್ದು, ಪಕ್ಷಗಳು ಒಟ್ಟು 36,998 ಬೂತ್ ಮಟ್ಟದ ಏಜೆಂಟ್ಗಳನ್ನು (BLAಗಳು) ನೇಮಿಸಿದ್ದವು.
ಶುಕ್ರವಾರ, ಹರಿಯಾಣದ ಮುಖ್ಯ ಚುನಾವಣಾಧಿಕಾರಿಗಳ ಕಚೇರಿಯಲ್ಲಿ ರಾಷ್ಟ್ರೀಯ ಹಾಗೂ ರಾಜ್ಯ ಮಟ್ಟದ ರಾಜಕೀಯ ಪಕ್ಷಗಳ ಪ್ರತಿನಿಧಿಗಳೊಂದಿಗೆ ಸಭೆ ನಡೆಸಿ, ದಾವೆ ಮತ್ತು ಆಕ್ಷೇಪಣೆ ಪ್ರಕ್ರಿಯೆಯ ವೇಳಾಪಟ್ಟಿ ವಿವರಿಸಲಾಯಿತು ಮತ್ತು ಕರಡು ಮತದಾರರ ಪಟ್ಟಿಯ ಪ್ರತಿಗಳನ್ನು ವಿತರಿಸಲಾಯಿತು.
ಜನರಲ್ಲಿ ಹೆಚ್ಚಿನ ಜಾಗೃತಿ ಮೂಡಿಸಲು ಮುಖ್ಯ ಚುನಾವಣಾಧಿಕಾರಿ, ಜಿಲ್ಲಾ ಅಧಿಕಾರಿಗಳು ಹಾಗೂ ಚುನಾವಣಾ ನೋಂದಣಿ ಅಧಿಕಾರಿಗಳು ಜಾಗೃತಿ ಅಭಿಯಾನಗಳನ್ನು ನಡೆಸಿದರು. ರಾಜಕೀಯ ಪಕ್ಷಗಳೊಂದಿಗೆ ಸಭೆಗಳನ್ನು ನಡೆಸಿ ಪ್ರಕ್ರಿಯೆ ಕುರಿತು ವಿವರಿಸಿ, SIR ಅಭಿಯಾನದ ಪ್ರಗತಿ ಬಗ್ಗೆ ನಿಯಮಿತ ಮಾಹಿತಿ ಹಂಚಿಕೊಳ್ಳಲಾಯಿತು.
BLOಗಳು ಮನೆಮನೆಗೆ ತೆರಳಿ ಗಣನೆ ಫಾರ್ಮ್ಗಳನ್ನು ಹಂಚಿಕೆ ಮಾಡಿದ್ದು, ಅವುಗಳನ್ನು ಸಂಗ್ರಹಿಸಲು ಕನಿಷ್ಠ ಮೂರು ಬಾರಿ ಭೇಟಿ ನೀಡಿದ್ದಾರೆ. BLAಗಳು ಕೂಡ ಯಾವುದೇ ಅರ್ಹ ಮತದಾರರು ಹೊರಗುಳಿಯದಂತೆ ಸಹಕರಿಸಿದ್ದಾರೆ.
‘ಗೈರುಹಾಜರು’, ‘ಸ್ಥಳಾಂತರ’, ‘ಮೃತ’ ಮತ್ತು ‘ಡುಪ್ಲಿಕೇಟ್’ ಎಂದು ವರ್ಗೀಕರಿಸಲಾದ ಮತದಾರರನ್ನು ಪರಿಶೀಲಿಸಲು BLOಗಳು ಬೂತ್ ಮಟ್ಟದಲ್ಲಿ ಸಭೆಗಳನ್ನು ನಡೆಸಿದರು.
ಪ್ರಕಟಣೆಯ ಪ್ರಕಾರ, ಯಾವುದೇ ವ್ಯಕ್ತಿಯ ಹೆಸರನ್ನು ಕರಡು ಮತದಾರರ ಪಟ್ಟಿಯಿಂದ ತೆಗೆದುಹಾಕುವ ಮೊದಲು, ಸಂಬಂಧಿತ ಅಧಿಕಾರಿಗಳು ನೋಟಿಸ್ ನೀಡಬೇಕು, ವಿಚಾರಣೆ ನಡೆಸಬೇಕು ಮತ್ತು ಆ ವ್ಯಕ್ತಿಗೆ ಸಮರ್ಪಕವಾಗಿ ವಾದಿಸಲು ಅವಕಾಶ ನೀಡಬೇಕು.
ಪ್ರತಿ ಪ್ರಕರಣದಲ್ಲೂ ಚುನಾವಣಾ ನೋಂದಣಿ ಅಧಿಕಾರಿ ಅಥವಾ ಸಹಾಯಕ ಅಧಿಕಾರಿ ಸಮರ್ಪಕ ಕಾರಣಗಳನ್ನು ದಾಖಲಿಸಿದ ಆದೇಶ (speaking order) ನೀಡಿದ ನಂತರವೇ ಹೆಸರು ತೆಗೆದುಹಾಕಲು ಅವಕಾಶವಿದೆ ಎಂದು ತಿಳಿಸಲಾಗಿದೆ.
ಇದನ್ನೂ ನೋಡಿ: “ಮುತ್ತು ಬಂದಿದೆ ಕೇರಿಗೆ” — ಕನಕದಾಸರ ಕುರಿತ ನೃತ್ಯ ರೂಪಕ Janashakthi Media
