ವೈಟ್‌ಫೀಲ್ಡ್‌ನಲ್ಲಿ 42 ವರ್ಷದ ಬಿ. ಮಂಜುನಾಥ್‌ ಹತ್ಯೆ; ಮೂವರು ತಿಂಗಳ ಬಾಡಿಗೆ ಬಾಕಿ ಹಿನ್ನೆಲೆ ಶಂಕೆ, ಆರೋಪಿಗಳಿಗಾಗಿ ಪೊಲೀಸರ ಶೋಧ
ಬೆಂಗಳೂರು: ಬಾಡಿಗೆ ಹಣ ಪಾವತಿಸದ ವಿಚಾರವಾಗಿ ಉಂಟಾದ ವಿವಾದ ವಕೀಲರೊಬ್ಬರ ಕೊಲೆಯಲ್ಲಿ ಅಂತ್ಯಗೊಂಡಿರುವ ಘಟನೆ ಬೆಂಗಳೂರಿನ ವೈಟ್‌ಫೀಲ್ಡ್‌ ಪೊಲೀಸ್‌ ಠಾಣಾ ವ್ಯಾಪ್ತಿಯ ಪಟ್ಟಂದೂರು ಅಗ್ರಹಾರದಲ್ಲಿ ನಡೆದಿದೆ. 42 ವರ್ಷದ ವಕೀಲ ಬಿ. ಮಂಜುನಾಥ್‌ ಅವರನ್ನು ಭಾನುವಾರ ತಡರಾತ್ರಿ ಗುಂಡಿಕ್ಕಿ ಹತ್ಯೆ ಮಾಡಲಾಗಿದೆ. ಬಾಡಿಗೆ ಪಾವತಿಸದ ಹಿನ್ನೆಲೆಯಲ್ಲಿ ಬಾಡಿಗೆದಾರರೊಂದಿಗೆ ಉಂಟಾದ ಜಗಳವೇ ಕೊಲೆಗೆ ಕಾರಣವಾಗಿರಬಹುದು ಎಂದು ಪೊಲೀಸರು ಶಂಕಿಸಿದ್ದಾರೆ. ಬಾಡಿಗೆ
ಬಿಹಾರ ಮೂಲದ ಪಂಕಜ್‌ ದುಬೆ ಮತ್ತು ಅಮಿತ್‌ ಕುಮಾರ್ ದುಬೆ ಎಂಬ ಇಬ್ಬರು ಆರೋಪಿಗಳು ಮಂಜುನಾಥ್‌ ಅವರ ಮನೆಯ ಹಿಂಭಾಗದ ಕೊಠಡಿಯಲ್ಲಿ ಸುಮಾರು ಒಂದೂವರೆ ವರ್ಷದಿಂದ ವಾಸವಿದ್ದರು. ಇಬ್ಬರೂ ಆನ್‌ಲೈನ್‌ ವಿತರಣಾ ಸಂಸ್ಥೆಗಳಲ್ಲಿ ಕೆಲಸ ಮಾಡುತ್ತಿದ್ದರು. ಕಳೆದ ಮೂರು ತಿಂಗಳಿನಿಂದ ಬಾಡಿಗೆ ಪಾವತಿಸಿರಲಿಲ್ಲ ಎನ್ನಲಾಗಿದೆ. ಈ ವಿಚಾರವಾಗಿ ಭಾನುವಾರ ರಾತ್ರಿ ಮಂಜುನಾಥ್‌ ಅವರು ಬಾಡಿಗೆದಾರರನ್ನು ಪ್ರಶ್ನಿಸಿದ್ದು, ಮಾತಿನ ಚಕಮಕಿ ನಡೆದಿತ್ತು ಎಂದು ಕುಟುಂಬದವರು ಪೊಲೀಸರಿಗೆ ನೀಡಿರುವ ದೂರಿನಲ್ಲಿ ತಿಳಿಸಿದ್ದಾರೆ.
ಹಣ ಕೊಡುವ ನೆಪದಲ್ಲಿ ಬಂದು ಗುಂಡಿನ ದಾಳಿ
ಕುಟುಂಬದವರು ನೀಡಿರುವ ಮಾಹಿತಿಯ ಪ್ರಕಾರ, ಭಾನುವಾರ ರಾತ್ರಿ ಸುಮಾರು 10.30ರ ವೇಳೆಗೆ ಬಾಡಿಗೆ ಹಣದ ವಿಚಾರವಾಗಿ ಮಾತುಕತೆ ನಡೆದಿತ್ತು. ಬಳಿಕ ಹಣ ತಂದುಕೊಡುವುದಾಗಿ ಹೇಳಿ ಆರೋಪಿಗಳು ಅಲ್ಲಿಂದ ತೆರಳಿದ್ದರು. ರಾತ್ರಿ ಸುಮಾರು 11.45ರ ವೇಳೆಗೆ ಅವರಲ್ಲಿ ಒಬ್ಬ ಮಂಜುನಾಥ್‌ ಅವರನ್ನು ಮತ್ತೆ ಸಂಪರ್ಕಿಸಿ, ಹಣ ತಂದಿರುವುದಾಗಿ ತಿಳಿಸಿದ್ದಾನೆ.
ಮಂಜುನಾಥ್‌ ಅವರ ಬಳಿ ಬಂದ ಆರೋಪಿಗಳಲ್ಲಿ ಒಬ್ಬ ಬಾಡಿಗೆ ಹಣವನ್ನು ನೀಡಿದ್ದಾನೆ. ಮಂಜುನಾಥ್‌ ಹಣವನ್ನು ಎಣಿಸುತ್ತಿದ್ದಾಗ ಮತ್ತೊಬ್ಬ ಆರೋಪಿ ಹಿಂದಿನಿಂದ ಬಂದು ಅವರ ತಲೆಗೆ ಗುಂಡು ಹಾರಿಸಿದ್ದಾನೆ ಎಂದು ಸಂಬಂಧಿಕ ಅಕ್ಷಯ್‌ ತಿಳಿಸಿದ್ದಾರೆ. ಗುಂಡೇಟಿನಿಂದ ಗಂಭೀರವಾಗಿ ಗಾಯಗೊಂಡ ಮಂಜುನಾಥ್‌ ಅವರನ್ನು ಆಸ್ಪತ್ರೆಗೆ ಕರೆದೊಯ್ಯಲಾಯಿತಾದರೂ, ವೈದ್ಯರು ಮೃತಪಟ್ಟಿರುವುದಾಗಿ ಘೋಷಿಸಿದರು. ಬಾಡಿಗೆ
ಮೂರು ಗುಂಡೇಟು ತಗುಲಿರುವ ಮಾಹಿತಿ
ದಿ ನ್ಯೂ ಇಂಡಿಯನ್‌ ಎಕ್ಸ್‌ಪ್ರೆಸ್‌ ವರದಿಯ ಪ್ರಕಾರ, ಮಂಜುನಾಥ್‌ ಅವರಿಗೆ ಹಣೆಯ ಭಾಗದಲ್ಲಿ ಒಂದು ಹಾಗೂ ಎದೆಯ ಭಾಗದಲ್ಲಿ ಎರಡು ಗುಂಡೇಟುಗಳು ತಗುಲಿದ್ದವು. ಗುಂಡಿನ ದಾಳಿಯ ಬಳಿಕ ಆರೋಪಿಗಳು ಪ್ರತ್ಯೇಕ ದ್ವಿಚಕ್ರ ವಾಹನಗಳಲ್ಲಿ ಪರಾರಿಯಾಗಿದ್ದಾರೆ ಎಂದು ಪೊಲೀಸರು ತಿಳಿಸಿದ್ದಾರೆ.
ವೈಟ್‌ಫೀಲ್ಡ್‌ ವಿಭಾಗದ ಉಪ ಪೊಲೀಸ್‌ ಆಯುಕ್ತ ಸೈದುಲು ಅದಾವತ್‌ ಅವರ ನೇತೃತ್ವದಲ್ಲಿ ಆರೋಪಿಗಳ ಪತ್ತೆಗೆ ಶೋಧ ಕಾರ್ಯ ನಡೆಯುತ್ತಿದೆ. ಘಟನೆ ನಡೆದ ಸ್ಥಳಕ್ಕೆ ವಿಧಿವಿಜ್ಞಾನ ತಜ್ಞರು ಮತ್ತು ಶ್ವಾನದಳ ಭೇಟಿ ನೀಡಿ ಪರಿಶೀಲನೆ ನಡೆಸಿದ್ದಾರೆ. ಮನೆಯಲ್ಲಿರುವ ಸಿಸಿಟಿವಿ ದೃಶ್ಯಾವಳಿಗಳನ್ನೂ ಪೊಲೀಸರು ಪರಿಶೀಲಿಸಲಿದ್ದಾರೆ. ಬಾಡಿಗೆ
ಇದನ್ನೂ ಓದಿ : ರೈತರ ಸಮಸ್ಯೆ ಪರಿಹಾರಕ್ಕೆ ಸರ್ವಪಕ್ಷ ನಿಯೋಗ: ಕೇಂದ್ರದ ಮುಂದೆ ರಾಜ್ಯದ ಬೇಡಿಕೆ ಮಂಡಿಸಲಿರುವ ಡಿ.ಕೆ. ಶಿವಕುಮಾರ್
ಅಕ್ರಮ ಪಿಸ್ತೂಲ್‌ ಎಲ್ಲಿಂದ ಬಂತು?
ಕೊಲೆಗೆ ಬಳಸಿರುವ ಪಿಸ್ತೂಲ್‌ನ ಮೂಲದ ಬಗ್ಗೆಯೂ ಪೊಲೀಸರು ತನಿಖೆ ನಡೆಸುತ್ತಿದ್ದಾರೆ. ಅಕ್ರಮ ಶಸ್ತ್ರಾಸ್ತ್ರ ಆರೋಪಿಗಳ ಕೈಗೆ ಹೇಗೆ ತಲುಪಿತು, ಅದನ್ನು ಯಾರು ಒದಗಿಸಿದರು ಹಾಗೂ ಆರೋಪಿಗಳಿಗೆ ಬೇರೆ ಯಾರಾದರೂ ಸಹಾಯ ಮಾಡಿದ್ದಾರೆಯೇ ಎಂಬ ಆಯಾಮಗಳಲ್ಲಿ ತನಿಖೆ ಮುಂದುವರಿದಿದೆ.
ಮಂಜುನಾಥ್‌ ಅವರ ಕುಟುಂಬದವರು ಹಲವು ಮನೆಗಳು ಮತ್ತು ಕಾರ್ಮಿಕರ ವಸತಿ ಕೊಠಡಿಗಳನ್ನು ಬಾಡಿಗೆಗೆ ನೀಡುತ್ತಿದ್ದರು. ಬಾಡಿಗೆ ವಸೂಲಾತಿಯನ್ನು ಸಾಮಾನ್ಯವಾಗಿ ಮತ್ತೊಬ್ಬ ವ್ಯಕ್ತಿ ನಿರ್ವಹಿಸುತ್ತಿದ್ದರೂ, ಅವರು ಊರಿಗೆ ತೆರಳಿದ್ದ ಹಿನ್ನೆಲೆಯಲ್ಲಿ ಮಂಜುನಾಥ್‌ ಸ್ವತಃ ಬಾಡಿಗೆ ಹಣದ ವಿಚಾರದಲ್ಲಿ ಮಧ್ಯಪ್ರವೇಶಿಸಿದ್ದರು ಎಂದು ಕುಟುಂಬದವರು ತಿಳಿಸಿದ್ದಾರೆ. ಬಾಡಿಗೆ ವಿವಾದವೇ ಕೊಲೆಗೆ ಕಾರಣ ಎಂಬುದು ಪೊಲೀಸರ ಪ್ರಾಥಮಿಕ ಶಂಕೆಯಾಗಿದ್ದು, ಆಸ್ತಿ ವಿವಾದ ಅಥವಾ ವೈಯಕ್ತಿಕ ದ್ವೇಷದ ಸಾಧ್ಯತೆಯನ್ನೂ ತನಿಖಾಧಿಕಾರಿಗಳು ಪರಿಶೀಲಿಸುತ್ತಿದ್ದಾರೆ. ಬಾಡಿಗೆ
ತ್ವರಿತ ತನಿಖೆಗೆ ವಕೀಲರ ಸಂಘದ ಒತ್ತಾಯ
ವಕೀಲರ ಹತ್ಯೆಯನ್ನು ಖಂಡಿಸಿರುವ ಬೆಂಗಳೂರು ವಕೀಲರ ಸಂಘದ ಅಧ್ಯಕ್ಷ ಸುಬ್ಬಾ ರೆಡ್ಡಿ ನೇತೃತ್ವದ ಪ್ರತಿನಿಧಿಗಳು ಪೊಲೀಸ್‌ ಆಯುಕ್ತ ಸೀಮಂತ್‌ ಕುಮಾರ್ ಸಿಂಗ್‌ ಅವರನ್ನು ಭೇಟಿ ಮಾಡಿ ತ್ವರಿತ ತನಿಖೆಗೆ ಒತ್ತಾಯಿಸಿದ್ದಾರೆ. ಹೊರರಾಜ್ಯಗಳಿಂದ ಕಾರ್ಮಿಕರನ್ನು ನೇಮಿಸಿಕೊಳ್ಳುವ ಖಾಸಗಿ ಸಂಸ್ಥೆಗಳು ಹಾಗೂ ಅವರಿಗೆ ವಸತಿ ಒದಗಿಸುವ ಮನೆ ಮಾಲೀಕರಿಗೆ ಸೂಕ್ತ ಮಾರ್ಗಸೂಚಿಗಳ ಅಗತ್ಯದ ಬಗ್ಗೆಯೂ ಚರ್ಚಿಸಲಾಗಿದೆ.
ಮಂಜುನಾಥ್‌ ಅವರು ಪತ್ನಿ ಮತ್ತು ಇಬ್ಬರು ಅಪ್ರಾಪ್ತ ಮಕ್ಕಳನ್ನು ಅಗಲಿದ್ದಾರೆ. ಬಾಡಿಗೆ ಹಣದ ವಿವಾದದಲ್ಲಿ ನಡೆದಿರುವ ಈ ಹತ್ಯೆ ಸ್ಥಳೀಯರಲ್ಲಿ ಆತಂಕ ಮೂಡಿಸಿದ್ದು, ಆರೋಪಿಗಳ ಬಂಧನ ಹಾಗೂ ಕೊಲೆಯ ಹಿಂದಿನ ನಿಖರ ಕಾರಣದ ಪತ್ತೆಗೆ ಪೊಲೀಸರು ತನಿಖೆ ಮುಂದುವರಿಸಿದ್ದಾರೆ. ಬಾಡಿಗೆ
ಇದನ್ನೂ ನೋಡಿ : ಹವಾಮಾನ ಬಿಕ್ಕಟ್ಟು ಎಂದರೆ ಮನಸ್ಸಿನ ಬಿಕ್ಕಟ್ಟೂ ಹೌದು! Janashakthi Media
