ಬಂಕುರಾ: ವಿಶೇಷ ತೀವ್ರ ಮತದಾರರ ಪಟ್ಟಿ ಪರಿಷ್ಕರಣೆ (ಎಸ್ಐಆರ್) ವೇಳೆ ಮತದಾರರ ಪಟ್ಟಿಯಿಂದ ಹೆಸರು ಕೈಬಿಟ್ಟಿರುವ ಪ್ರಕರಣವೊಂದು ಪಶ್ಚಿಮ ಬಂಗಾಳದ ಬಂಕುರಾ ಜಿಲ್ಲೆಯಲ್ಲಿ ಆತಂಕಕ್ಕೆ ಕಾರಣವಾಗಿದೆ. ತನ್ನ ಹೆಸರು ಮರು ಸೇರ್ಪಡೆಗೊಳಿಸುವಂತೆ ಟ್ರಿಬ್ಯುನಲ್ಗೆ ಅರ್ಜಿ ಸಲ್ಲಿಸಿದ್ದರೂ ಪ್ರಕರಣ ಇನ್ನೂ ಬಾಕಿಯಿರುವಾಗಲೇ ಪೊಲೀಸರು ಮನೆಗೆ ಬಂದು ಎರಡು ದಿನಗಳ ಬಳಿಕ ಕರೆದೊಯ್ಯುವುದಾಗಿ ಹೇಳಿದ್ದಾರೆ ಎಂಬ ಆರೋಪ ಕೇಳಿಬಂದಿದೆ. ಎಸ್ಐಆರ್
ಬಂಕುರಾ–1 ಬ್ಲಾಕ್ನ ಆಚುರಿ ಪ್ರದೇಶದ ಉತ್ತರ ಬನಕಟಾ ಗ್ರಾಮದ ಗೃಹಿಣಿ ಮಹ್ಸಿನಾ ಖಾತೂನ್ ಅವರ ಕುಟುಂಬ ಈ ಬೆಳವಣಿಗೆಯಿಂದ ತೀವ್ರ ಆತಂಕಕ್ಕೊಳಗಾಗಿದೆ. ಪೊಲೀಸ್ ಭೇಟಿ ಬಳಿಕ ಕುಟುಂಬದ ಸದಸ್ಯರು ಭಯದ ವಾತಾವರಣದಲ್ಲಿ ದಿನ ಕಳೆಯುತ್ತಿದ್ದು, ಊಟವನ್ನೂ ಸರಿಯಾಗಿ ಮಾಡಲಾಗುತ್ತಿಲ್ಲ ಎಂದು ತಿಳಿದು ಬಂದಿದೆ.
ಮಹ್ಸಿನಾ ಖಾತೂನ್ ಅವರ ಜನನ, ವಿದ್ಯಾಭ್ಯಾಸ ಹಾಗೂ ವಿವಾಹ ಸೇರಿದಂತೆ ಜೀವನದ ಬಹುತೇಕ ಎಲ್ಲವೂ ಬಂಕುರಾ–1 ಬ್ಲಾಕ್ನ ಆಚುರಿ ಪ್ರದೇಶದಲ್ಲೇ ನಡೆದಿದೆ. ಈ ಹಿಂದೆ ಹಲವು ಬಾರಿ ಮತ ಚಲಾಯಿಸಿದ್ದರೂ, ಎಸ್ಐಆರ್ ಪರಿಷ್ಕರಣೆಯ ವೇಳೆ ಅವರ ಹೆಸರು ಮತದಾರರ ಪಟ್ಟಿಯಿಂದ ಕೈಬಿಡಲಾಗಿದೆ.
ಹೆಸರು ಮರು ಸೇರ್ಪಡೆಗಾಗಿ ಅಗತ್ಯ ದಾಖಲೆಗಳನ್ನು ಸಲ್ಲಿಸುವ ಪ್ರಕ್ರಿಯೆಯಲ್ಲೂ ಅವರು ಭಾಗವಹಿಸಿದ್ದರು. ತೀವ್ರ ಬಿಸಿಲಿನ ನಡುವೆಯೂ ವಿಚಾರಣೆಗೆ ಹಾಜರಾಗಿ ತಮ್ಮ ಹಾಗೂ ಕುಟುಂಬದ ವಿವರಗಳನ್ನು ಅಧಿಕಾರಿಗಳಿಗೆ ಸಲ್ಲಿಸಿದ್ದರು. ಆದರೂ ಅಂತಿಮ ಮತದಾರರ ಪಟ್ಟಿಯಲ್ಲಿ ಹೆಸರು ಕಾಣಿಸಿಲ್ಲ ಎಂದು ಅವರು ಹೇಳಿದ್ದಾರೆ.
ಮತದಾನದ ಹಕ್ಕು ಮರಳಿ ಪಡೆಯಲು ಚುನಾವಣಾ ಪ್ರಕ್ರಿಯೆಯಡಿ ಅವರು ಟ್ರಿಬ್ಯುನಲ್ಗೆ ಅರ್ಜಿ ಸಲ್ಲಿಸಿದ್ದಾರೆ. ಏಪ್ರಿಲ್ 6ರಂದು ಬಂಕುರಾ ಜಿಲ್ಲಾಧಿಕಾರಿ ಕಚೇರಿಯಲ್ಲಿ ಅರ್ಜಿ ಸಲ್ಲಿಸಲಾಗಿದ್ದು, ಜೂನ್ 3ರಂದು ವಿಚಾರಣೆ ನಡೆದಿತ್ತು. ಆದರೆ ಅರ್ಜಿ ಇನ್ನೂ ‘ಬಾಕಿ’ ಎಂದು ದಾಖಲಿಸಲಾಗಿದೆ.
ಈ ನಡುವೆ ಪೊಲೀಸ್ ಸಿಬ್ಬಂದಿ ಮನೆಗೆ ಬಂದಿರುವುದು ಕುಟುಂಬದಲ್ಲಿ ಮತ್ತಷ್ಟು ಆತಂಕಕ್ಕೆ ಕಾರಣವಾಗಿದೆ. ಎಸ್ಐಆರ್
ಇದನ್ನೂ ಓದಿ : ಒಳಚರಂಡಿ ನೀರಿನಲ್ಲೇ ಅಪಾಯ: ಜನರ ಆರೋಗ್ಯಕ್ಕೆ ಕಂಟಕವಾಗುತ್ತಿರುವ ಮಲಿನ ನೀರು
‘ಎರಡು ದಿನ ಬಿಟ್ಟು ಕರೆದೊಯ್ಯುತ್ತೇವೆ’
ಗುರುವಾರ ಮಧ್ಯಾಹ್ನ ಬಂಕುರಾ ಠಾಣೆಯ ಪೊಲೀಸರು ಮನೆಗೆ ಬಂದಿದ್ದರು ಎಂದು ಮಹ್ಸಿನಾ ತಿಳಿಸಿದ್ದಾರೆ.
ತಮ್ಮ ಹೆಸರು ಮತದಾರರ ಪಟ್ಟಿಯಲ್ಲಿ ಇಲ್ಲದಿರುವ ಬಗ್ಗೆ ಪೊಲೀಸರು ಪ್ರಶ್ನಿಸಿದ್ದು, ಕುಟುಂಬದವರು ಹಲವು ದಾಖಲೆಗಳನ್ನು ತೋರಿಸಿದರೂ ಅವುಗಳನ್ನು ಪರಿಗಣಿಸಲಿಲ್ಲ ಎಂದು ಅವರು ಆರೋಪಿಸಿದ್ದಾರೆ. ಮಕ್ಕಳನ್ನು ಗಮನದಲ್ಲಿಟ್ಟುಕೊಂಡು ಆ ದಿನ ಯಾವುದೇ ಕ್ರಮ ಕೈಗೊಳ್ಳುವುದಿಲ್ಲ, ಆದರೆ ಎರಡು ದಿನಗಳ ಬಳಿಕ ಬಂದು ಕರೆದೊಯ್ಯುವುದಾಗಿ ಪೊಲೀಸರು ಹೇಳಿದ್ದರು ಎಂದು ಮಹ್ಸಿನಾ ತಿಳಿಸಿದ್ದಾರೆ.
ಇದಾದ ಬಳಿಕ ಕುಟುಂಬದ ಸದಸ್ಯರು ತೀವ್ರ ಭಯದಲ್ಲಿದ್ದು, ಮನೆಯ ವಾತಾವರಣವೇ ಬದಲಾಗಿದೆ ಎಂದು ವರದಿ ಹೇಳಿದೆ.
‘ನನ್ನ ತಾಯಿ, ಪತಿಯ ಹೆಸರು ಪಟ್ಟಿಯಲ್ಲಿದೆ’
ತಮ್ಮ ಹೆಸರು ಹಿಂದೆ ಮತದಾರರ ಪಟ್ಟಿಯಲ್ಲಿದ್ದುದಾಗಿ ಮಹ್ಸಿನಾ ಹೇಳಿದ್ದಾರೆ. ಬಂಕುರಾ ವಿಧಾನಸಭಾ ಕ್ಷೇತ್ರದ ನಿರ್ದಿಷ್ಟ ಮತಗಟ್ಟೆ ಭಾಗದಲ್ಲಿ ತಮ್ಮ ಹೆಸರು ದಾಖಲಾಗಿತ್ತು. ಎಸ್ಐಆರ್ ಪ್ರಕ್ರಿಯೆಯಲ್ಲಿ ತಾಯಿ ಹಾಗೂ ಪತಿಯ ವಿವರಗಳನ್ನು ನೀಡಿದ್ದಾರೆ ಎಂದು ಅವರು ತಿಳಿಸಿದ್ದಾರೆ.
ಅವರ ತಾಯಿ ಮೆಹರುನ್ ಬಿಬಿ ಅವರ ಹೆಸರು ಮತದಾರರ ಪಟ್ಟಿಯಲ್ಲಿ ಮುಂದುವರಿದಿದೆ. ಅವರ ಇನ್ನಿಬ್ಬರು ಪುತ್ರಿಯರ ಹೆಸರುಗಳೂ ಪಟ್ಟಿಯಲ್ಲಿ ದಾಖಲಾಗಿದ್ದು, ಮಹ್ಸಿನಾ ಅವರ ಹೆಸರನ್ನು ಮಾತ್ರ ಏಕೆ ಕೈಬಿಡಲಾಗಿದೆ ಎಂಬುದು ಅರ್ಥವಾಗುತ್ತಿಲ್ಲ ಎಂದು ಅವರು ಪ್ರಶ್ನಿಸಿದ್ದಾರೆ.
ಮಹ್ಸಿನಾ ಅವರ ಪತಿ ಜಸಿಮುದ್ದೀನ್ ಮಿದ್ಯಾ ಅವರ ಹೆಸರೂ ಮತದಾರರ ಪಟ್ಟಿಯಲ್ಲಿದೆ. ಅವರು ಒಡಿಶಾದಲ್ಲಿ ಬ್ರೆಡ್ ಮಾರಾಟ ಮಾಡುವ ಕೆಲಸ ಮಾಡುತ್ತಿದ್ದು, ಅಲ್ಲಿಂದ ಕಳುಹಿಸುವ ಹಣದಿಂದ ಕುಟುಂಬ ನಿರ್ವಹಣೆ ನಡೆಯುತ್ತಿದೆ. ದಂಪತಿಗೆ ಇಬ್ಬರು ಹೆಣ್ಣುಮಕ್ಕಳಿದ್ದಾರೆ. ಎಸ್ಐಆರ್
ಗ್ರಾಮಸ್ಥರಿಂದ ಪ್ರತಿಭಟನೆ
ಘಟನೆಗೆ ಸಂಬಂಧಿಸಿದಂತೆ ಶುಕ್ರವಾರ ಬಾದುಲಾರಾ ಗ್ರಾಮದ ಸ್ಥಳೀಯರು ಸಭೆ ನಡೆಸಿ ಆಕ್ರೋಶ ವ್ಯಕ್ತಪಡಿಸಿದ್ದಾರೆ. ಮಹ್ಸಿನಾ ಅವರು ಹುಟ್ಟಿನಿಂದಲೂ ಇದೇ ಪ್ರದೇಶದಲ್ಲಿ ವಾಸಿಸುತ್ತಿದ್ದು, ಸ್ಥಳೀಯರಿಗೆ ಅವರ ಕುಟುಂಬದ ಪರಿಚಯವಿದೆ. ಹೀಗಿರುವಾಗ ಮತದಾರರ ಪಟ್ಟಿಯಿಂದ ಅವರ ಹೆಸರು ಕೈಬಿಟ್ಟಿರುವುದು ಹಾಗೂ ಅದರ ಬಳಿಕ ಉಂಟಾಗಿರುವ ಬೆಳವಣಿಗೆ ಆತಂಕಕಾರಿ ಎಂದು ಗ್ರಾಮಸ್ಥರು ಹೇಳಿದ್ದಾರೆ.
ಸಮಸ್ಯೆಯನ್ನು ತಕ್ಷಣ ಪರಿಹರಿಸಬೇಕು ಮತ್ತು ಅರ್ಜಿ ಬಾಕಿಯಿರುವ ಸಂದರ್ಭದಲ್ಲಿ ಕುಟುಂಬಕ್ಕೆ ಆತಂಕ ಉಂಟಾಗದಂತೆ ಕ್ರಮ ಕೈಗೊಳ್ಳಬೇಕು ಎಂದು ಅವರು ಒತ್ತಾಯಿಸಿದ್ದಾರೆ.
ಈ ಕುರಿತು ಬಂಕುರಾ ಠಾಣೆಯ ಐಸಿ ರಜತ್ ಚೌಧುರಿ ಪ್ರತಿಕ್ರಿಯಿಸಿ, ಮಹ್ಸಿನಾ ಖಾತೂನ್ ಅವರ ಸಮಸ್ಯೆಯನ್ನು ಅವರೇ ಬಗೆಹರಿಸಿಕೊಳ್ಳಬೇಕು. ಬ್ಲಾಕ್ ಆಡಳಿತವನ್ನು ಸಂಪರ್ಕಿಸಿ ದಾಖಲೆಗಳ ವಿಚಾರವನ್ನು ಸರಿಪಡಿಸಿಕೊಳ್ಳಬೇಕು. ಪೊಲೀಸರಿಗೆ ಈ ವಿಚಾರದಲ್ಲಿ ಯಾವುದೇ ಪಾತ್ರವಿಲ್ಲ ಎಂದು ತಿಳಿಸಿದ್ದಾರೆ.
ಆದರೆ, ಮತದಾರರ ಪಟ್ಟಿಯಲ್ಲಿ ಹೆಸರು ಕೈಬಿಟ್ಟಿರುವುದನ್ನು ಪ್ರಶ್ನಿಸಿ ಸಲ್ಲಿಸಿರುವ ಅರ್ಜಿಯೇ ಇನ್ನೂ ಬಾಕಿಯಿರುವಾಗ ಕುಟುಂಬದ ಮೇಲೆ ಪೊಲೀಸ್ ಕ್ರಮದ ಭೀತಿ ಏಕೆ ಎದುರಾಗಿದೆ ಎಂಬ ಪ್ರಶ್ನೆ ಸ್ಥಳೀಯರಲ್ಲಿ ಮೂಡಿದೆ.
ಮತದಾನದ ಹಕ್ಕಿನ ಕುರಿತು ಸಲ್ಲಿಸಿರುವ ಅರ್ಜಿ ಇತ್ಯರ್ಥವಾಗುವ ಮೊದಲೇ ಉಂಟಾಗಿರುವ ಈ ಬೆಳವಣಿಗೆ, ಎಸ್ಐಆರ್ ಪ್ರಕ್ರಿಯೆಯಲ್ಲಿ ಹೆಸರು ಕೈಬಿಟ್ಟಿರುವ ಸಾಮಾನ್ಯ ಮತದಾರರ ಮುಂದಿನ ಕಾನೂನು ಮತ್ತು ಆಡಳಿತಾತ್ಮಕ ಮಾರ್ಗವೇನು ಎಂಬ ಪ್ರಶ್ನೆಯನ್ನು ಮತ್ತೊಮ್ಮೆ ಮುನ್ನೆಲೆಗೆ ತಂದಿದೆ. ಎಸ್ಐಆರ್
ಇದನ್ನೂ ನೋಡಿ : ತೀವ್ರ ಬಲಪಂಥೀಯವಾದಿ ಸ್ವತಂತ್ರ ಭಾರದ್ವಾಜ್ ಬಹಿರಂಗಗೊಳಿಸಿದ ಘೋರ ವಾಸ್ತವಗಳೇನು? Janashakthi Media
