ನವದೆಹಲಿ: 2026ರ ಜುಲೈ 20ರಂದು ನವದೆಹಲಿಯಲ್ಲಿ ನಡೆದ ‘ಸಂಸದ್ ಚಾಲೋ’ ಮೆರವಣಿಗೆಯ ಸಂದರ್ಭದಲ್ಲಿ ಶಾಂತಿಯುತ ಪ್ರತಿಭಟನಾಕಾರರ ವಿರುದ್ಧ ಪೆಲೆಟ್ ಗನ್ ಹಾಗೂ ವಿದ್ಯುತ್ ಶಾಕ್ ಆಯುಧಗಳನ್ನು ಬಳಸಲಾಗಿದೆ ಎಂಬ ವರದಿಗಳನ್ನು ರಾಷ್ಟ್ರೀಯ ಅಂಗವೈಕಲ್ಯ ಹಕ್ಕುಗಳ ವೇದಿಕೆ (NPRD) ಸೇರಿದಂತೆ 57 ಸಂಘಟನೆಗಳು ಮತ್ತು ವ್ಯಕ್ತಿಗಳು ಜಂಟಿ ಹೇಳಿಕೆಯಲ್ಲಿ ಖಂಡಿಸಿದ್ದಾರೆ.
ಶಾಶ್ವತ ಅಂಗವೈಕಲ್ಯಕ್ಕೆ ಕಾರಣವಾಗಬಲ್ಲ ಆಯುಧಗಳ ಬಳಕೆ ನಾಗರಿಕರ ಹಕ್ಕು ಮತ್ತು ಗೌರವದ ಮೇಲಿನ ಗಂಭೀರ ಉಲ್ಲಂಘನೆ ಎಂದು ಹೇಳಿರುವ ಈ ಹೇಳಿಕೆ, ಶಾಂತಿಯುತ ಪ್ರತಿಭಟನಕಾರರ ವಿರುದ್ಧ ಬಲಪ್ರಯೋಗವನ್ನು ತಕ್ಷಣ ನಿಲ್ಲಿಸುವಂತೆ ಸರ್ಕಾರವನ್ನು ಒತ್ತಾಯಿಸಿದೆ.
ಮಾಧ್ಯಮ ವರದಿಗಳ ಪ್ರಕಾರ, ಹಲವಾರು ಪ್ರತಿಭಟನಾಕಾರರು ಗಂಭೀರವಾಗಿ ಗಾಯಗೊಂಡಿದ್ದಾರೆ. 25 ವರ್ಷದ ಶೇಖ್ ಇರ್ಷಾದ್ ಮನ್ಸ್ಸೋರಿ ಅವರಿಗೆ ಎದೆ, ಕುತ್ತಿಗೆ ಹಾಗೂ ಮುಖಕ್ಕೆ ಅನೇಕ ಪೆಲೆಟ್ ಗಾಯಗಳಾಗಿದ್ದು, ಅವರು ಲೇಡಿ ಹಾರ್ಡಿಂಜ್ ವೈದ್ಯಕೀಯ ಕಾಲೇಜು ಮತ್ತು ಆಸ್ಪತ್ರೆಯಲ್ಲಿ ಚಿಕಿತ್ಸೆ ಪಡೆಯುತ್ತಿದ್ದಾರೆ. ಜಂತರ್ ಮಂತರ್ನಲ್ಲಿ ತ್ರಿವರ್ಣ ಧ್ವಜ ಹಿಡಿದು ಪ್ರತಿಭಟಿಸುತ್ತಿದ್ದ 19 ವರ್ಷದ ಸಾಹಿಲ್ ಲೋಚಾಬ್ ಅವರ ದೃಷ್ಟಿಯನ್ನು ಉಳಿಸಲು ದೆಹಲಿಯ ಏಮ್ಸ್ ವೈದ್ಯರು ಹೋರಾಡುತ್ತಿದ್ದಾರೆ. ದಾಳಿ ಕ್ರಮದ ವೇಳೆ ವಿದ್ಯುತ್ ಶಾಕ್ ಬ್ಯಾಟನ್ಗಳನ್ನು ಬಳಸಲಾಗಿದೆ ಎಂಬ ಆರೋಪಗಳೂ ಹೊರಬಂದಿವೆ.
ಇದನ್ನೂ ಓದಿ: ಪ್ರಧಾನ್ ರಾಜೀನಾಮೆ ಬಳಿಕ ಶಿಕ್ಷಣ ಸಚಿವರಾಗಿ ಪ್ರಹ್ಲಾದ್ ಜೋಶಿ ನೇಮಕ
ಈ ಆಯುಧಗಳ ಬಳಕೆ ವಿಶೇಷವಾಗಿ ಆತಂಕಕಾರಿ ಎಂದು ಹೇಳಿರುವ ಸಂಘಟನೆಗಳು, ಇವು ಮರಳಿ ಸರಿಪಡಿಸಲಾಗದ ಮತ್ತು ಜೀವನವನ್ನೇ ಬದಲಿಸುವ ಗಾಯಗಳನ್ನುಂಟುಮಾಡುತ್ತವೆ ಎಂದು ಉಲ್ಲೇಖಿಸಿವೆ. ಪೆಲೆಟ್ ಗನ್ಗಳು ಹಿಂದೆಯೂ ಶಾಶ್ವತ ದೃಷ್ಟಿಹೀನತೆಗೆ ಕಾರಣವಾಗಿವೆ; ವಿದ್ಯುತ್ ಶಾಕ್ ಆಯುಧಗಳು ನರವೈಜ್ಞಾನಿಕ ಮತ್ತು ಹೃದಯ ಸಂಬಂಧಿ ತೊಂದರೆಗಳು, ತೀವ್ರ ಮಾನಸಿಕ ಆಘಾತ, ಮೂಳೆ ಮುರಿತಗಳು ಹಾಗೂ ಬಿದ್ದ ಪರಿಣಾಮ ಬೆನ್ನುಹುರಿ ಗಾಯಗಳಿಗೆ ಕಾರಣವಾಗಬಹುದು ಎಂದು ಹೇಳಿದೆ. ಶಾಶ್ವತ ಅಂಗವೈಕಲ್ಯಕ್ಕೆ ಕಾರಣವಾಗಬಲ್ಲ ಆಯುಧಗಳಿಗೆ ನಾಗರಿಕ ಪ್ರತಿಭಟನೆಗಳ ಪೊಲೀಸ್ ಕಾರ್ಯಾಚರಣೆಯಲ್ಲಿ ಯಾವುದೇ ಸ್ಥಾನವಿಲ್ಲ ಎಂದು ಹೇಳಿಕೆಯಲ್ಲಿ ವಾದಿಸಲಾಗಿದೆ.
ಪ್ರತಿಭಟನೆಯಲ್ಲಿ ಭಾಗವಹಿಸಿದ ಅಂಗವೈಕಲ್ಯ ಹೊಂದಿದವರ ಮೇಲೆ ಬಲಪ್ರಯೋಗ ನಡೆದಿರುವುದರ ಮೇಲೂ ಸಹಿ ಹಾಕಿದವರು ಆತಂಕ ವ್ಯಕ್ತಪಡಿಸಿದ್ದಾರೆ. ಅಂಗವೈಕಲ್ಯ ಹೊಂದಿದವರ ಸುರಕ್ಷತೆ, ಗೌರವ ಮತ್ತು ಸಮಾನ ರಕ್ಷಣೆಯನ್ನು ಖಚಿತಪಡಿಸುವುದು ರಾಜ್ಯದ ಹೆಚ್ಚಿದ ಜವಾಬ್ದಾರಿಯಾಗಿದ್ದು, ಅವರು ಶಾಂತಿಯುತ ಪ್ರತಿಭಟನೆಯ ತಮ್ಮ ಸಂವಿಧಾನಬದ್ಧ ಹಕ್ಕನ್ನು ಬಳಸುವಾಗ ಹಿಂಸೆಗೆ ಒಳಪಡಿಸಬಾರದು ಎಂದು ಹೇಳಿದ್ದಾರೆ.
ಅಂಗವೈಕಲ್ಯ ಹಕ್ಕುಗಳ ಸಂಘಟನೆಗಳು ಪೆಲೆಟ್ ಗನ್ಗಳ ವಿರುದ್ಧ ದೀರ್ಘಕಾಲದಿಂದ ವ್ಯಕ್ತಪಡಿಸುತ್ತಿರುವ ವಿರೋಧವನ್ನು ಉಲ್ಲೇಖಿಸಿದ ಹೇಳಿಕೆ, ಜಮ್ಮು ಮತ್ತು ಕಾಶ್ಮೀರದಲ್ಲಿ ಅವುಗಳ ಬಳಕೆಯಿಂದ ನೂರಾರು ನಾಗರಿಕರು ಶಾಶ್ವತ ದೃಷ್ಟಿಹಾನಿಗೆ ಒಳಗಾಗಿದ್ದರು ಎಂದು ನೆನಪಿಸಿದೆ. ನಾಗರಿಕರ ವಿರುದ್ಧ ಇಂತಹ ಆಯುಧಗಳ ನಿರಂತರ ಬಳಕೆ ಮತ್ತು ವಿದ್ಯುತ್ ಶಾಕ್ ಬ್ಯಾಟನ್ಗಳ ವರದಿಗಳು ಮರಳಿ ಹಾನಿ ಉಂಟುಮಾಡುವ ವಿಧಾನಗಳನ್ನು ತ್ಯಜಿಸಲು ವಿಫಲವಾದುದನ್ನು ತೋರಿಸುತ್ತವೆ ಎಂದು ಹೇಳಿದೆ.
“ಪೆಲೆಟ್ನಿಂದ ಉಂಟಾಗುವ ಪ್ರತಿಯೊಂದು ಅಂಧತ್ವ ಪ್ರಕರಣ ಮತ್ತು ತಪ್ಪಿಸಬಹುದಾದ ಪ್ರತಿಯೊಂದು ಶಾಶ್ವತ ಅಂಗವೈಕಲ್ಯ ಕೇವಲ ಗಾಯವಲ್ಲ; ಅದು ರಾಜ್ಯವೇ ಸೃಷ್ಟಿಸಿದ ಅಂಗವೈಕಲ್ಯ,” ಎಂದು ಹೇಳಿಕೆಯಲ್ಲಿ ಹೇಳಲಾಗಿದೆ. ಅಂಗವೈಕಲ್ಯ ಹೊಂದಿದವರ ಹಕ್ಕು, ಗೌರವ ಮತ್ತು ಒಳಗೊಳ್ಳುವಿಕೆಯ ಪರವಾಗಿ ಇರುವ ಸರ್ಕಾರವು, ಅಂಗವೈಕಲ್ಯವನ್ನು ಸೃಷ್ಟಿಸುವುದೇ ನಿಶ್ಚಿತ ಫಲಿತಾಂಶವಾಗಿರುವ ಆಯುಧಗಳನ್ನು ಒಂದೇ ಸಮಯದಲ್ಲಿ ಬಳಸಲು ಸಾಧ್ಯವಿಲ್ಲ ಎಂದು ಅದು ವಾದಿಸಿದೆ. ಇಂತಹ ಕ್ರಮಗಳು 2016ರ ವಿಕಲಚೇತನರ ಹಕ್ಕುಗಳ ಕಾಯ್ದೆ, ವಿಕಲಚೇತನರ ಹಕ್ಕುಗಳ ಕುರಿತಾದ ವಿಶ್ವಸಂಸ್ಥೆಯ ಒಪ್ಪಂದ ಮತ್ತು ಜೀವ, ಸಮಾನತೆ ಹಾಗೂ ಗೌರವದ ಸಂವಿಧಾನಾತ್ಮಕ ಭರವಸೆಗಳಿಗೆ ಮೂಲಭೂತವಾಗಿ ವಿರುದ್ಧವಾಗಿವೆ ಎಂದು ಹೇಳಲಾಗಿದೆ.
ಸಹಿ ಹಾಕಿದವರು, ಪೊಲೀಸ್ ಮತ್ತು ಅರೆಸೇನಾ ಪಡೆಗಳು ಪೆಲೆಟ್ ಗನ್ಗಳು, ವಿದ್ಯುತ್ ಶಾಕ್ ಬ್ಯಾಟನ್ಗಳು ಹಾಗೂ ಶಾಶ್ವತ ಅಂಗವೈಕಲ್ಯಕ್ಕೆ ಕಾರಣವಾಗಬಲ್ಲ ಇತರೆ ಎಲ್ಲ ಆಯುಧಗಳ ಬಳಕೆಯನ್ನು ತಕ್ಷಣ ನಿಷೇಧಿಸಬೇಕು; 2026ರ ಜುಲೈ 20ರ ಪೊಲೀಸ್ ಕ್ರಮದ ಕುರಿತು, ವಿಶೇಷವಾಗಿ ಪೆಲೆಟ್ ಗನ್ ಮತ್ತು ವಿದ್ಯುತ್ ಶಾಕ್ ಬ್ಯಾಟನ್ಗಳ ಬಳಕೆಯ ಬಗ್ಗೆ, ಸ್ವತಂತ್ರ ನ್ಯಾಯಾಂಗ ತನಿಖೆ ಆರಂಭಿಸಬೇಕು; ಇಂತಹ ಆಯುಧಗಳನ್ನು ನಿಯೋಜಿಸಿದ ಎಲ್ಲ ಸಿಬ್ಬಂದಿಯನ್ನು ಗುರುತಿಸಿ, ಅವರ ವಿರುದ್ಧ ಕ್ರಮ ಕೈಗೊಳ್ಳಬೇಕು ಮತ್ತು ಅನುಮತಿ ನೀಡಿದವರನ್ನೂ ಒಳಗೊಂಡಂತೆ ಸಂಪೂರ್ಣ ಆಜ್ಞಾ ಸರಪಳಿಯ ಹೊಣೆಗಾರಿಕೆಯನ್ನು ನಿಗದಿಪಡಿಸಬೇಕು; ಜೊತೆಗೆ ಗಾಯಗೊಂಡ ಪ್ರತಿಯೊಬ್ಬರಿಗೂ ಉಚಿತ ವೈದ್ಯಕೀಯ ಚಿಕಿತ್ಸೆ, ಪುನರ್ವಸತಿ, ಮಾನಸಿಕ-ಸಾಮಾಜಿಕ ಬೆಂಬಲ ಮತ್ತು ಸಮರ್ಪಕ ಪರಿಹಾರ ನೀಡಬೇಕು ಎಂದು ಆಗ್ರಹಿಸಿದ್ದಾರೆ.
ಶಾಸಕರು, ವಿದ್ಯಾರ್ಥಿಗಳು ಮತ್ತು ಯುವಜನರು ಎತ್ತಿರುವ ನ್ಯಾಯಸಮ್ಮತ ಬೇಡಿಕೆಗಳಿಗೆ ಸಂವಾದ ಮತ್ತು ಪರಾಮರ್ಶೆಯ ಮೂಲಕ ಉತ್ತರ ನೀಡಬೇಕು; ಬಲಪ್ರಯೋಗದಿಂದಲ್ಲ ಎಂದು ಹೇಳಿಕೆ ಸರ್ಕಾರವನ್ನು ಆಗ್ರಹಿಸಿದೆ. ಅಕ್ರಮ ಬಂಧಿತರನ್ನು ತಕ್ಷಣ ಬಿಡುಗಡೆ ಮಾಡಬೇಕು ಮತ್ತು ದಮನಕಾರಿ ಕ್ರಮಗಳನ್ನು ನಿಲ್ಲಿಸಬೇಕು ಎಂದು ಕೂಡ ಅದು ಒತ್ತಾಯಿಸಿದೆ.
ಇದನ್ನೂ ನೋಡಿ: ಯುವಜನತೆ ಪ್ರತಿಭಟನೆ: ಜೆನ್ ಜಿಫಿಕೇಶನ್ Janashakthi Media
