ದೇವಿ ಸ್ತೋತ್ರ ಪಠಿಸುತ್ತ ಕುಳಿತಿದ್ದ ಮಹಿಳೆಯ ಕತ್ತಿನಿಂದ ಸರ ಕಿತ್ತೆಳೆದು ಓಡಿದ ಸರಗಳ್ಳ

ಯಾರಿವನು ಅನ್ನೋನು (@memesmaadonu) ಖಾತೆಯಲ್ಲಿ ನಿನ್ನೆ (ಅಕ್ಟೋಬರ್‌ 14) ಶೇರ್ ಆಗಿರುವ ವಿಡಿಯೋದಲ್ಲಿ ಮಹಿಳೆಯರು ದೇವಿ ಸ್ತೋತ್ರ ಪಠಿಸುತ್ತಿರುವ ದೃಶ್ಯ ಇದೆ. 23 ಸೆಕೆಂಡ್‌ ವಿಡಿಯೋ ಶುರುವಾಗಿ ಕೆಲವು ಸೆಕೆಂಡ್‌ಗಳಾಗುತ್ತಿದ್ದಂತೆ ಕಿಟಕಿ ಬದಿಗೆ ಕುಳಿತ ಮಹಿಳೆ ಜೋರಾಗಿ ಕಿರುಚುವುದು ಕೇಳಿದೆ. ಕೂಡಲೇ ಕ್ಯಾಮೆರಾ ಅತ್ತ ತಿರುಗಿದಾಗ ಆ ಮಹಿಳೆ ತನ್ನ ಕತ್ತು ಹಿಡಿದುಕೊಂಡು, ಅಯ್ಯೋ ಮಾಲೆ ಹೋಯ್ತು, ಕಳ್ಳ ಎಗರಿಸಿಕೊಂಡು ಹೋದ ಎಂದು ಗೋಳಾಡುತ್ತಿರುವ ದೃಶ್ಯ ಕಂಡುಬಂದಿದೆ. ಕೂಡಲೆ ಅಲ್ಲಿದ್ದ ಮಹಿಳೆಯರೆಲ್ಲ ಎದ್ದು ನಿಂತು ಕಳ್ಳನನ್ನು ಹಿಡೀರಿ ಎಂದು ಕೂಗುವುದು ಕೇಳಿಬಂದಿದೆ.

ಇದನ್ನೂ ಓದಿ: ಜಾತಿ ಪ್ರಮಾಣ ಪತ್ರದ ಬಗೆಗಿನ ಗೊಂದಲ ನಿವಾರಣೆಗೆ ಸಿಎಂ ಸೂಚನೆ

ಈ ವಿಡಿಯೋವನ್ನು ಶೇರ್ ಮಾಡಿ. ಸರಗಳ್ಳರ ಬಗ್ಗೆ ಎಚ್ಚರದಿಂದ ಇರುವಂತೆ ನಿಮ್ಮ ಮನೆಯ ಸದಸ್ಯರಲ್ಲಿ ಜಾಗೃತಿ ಮೂಡಿಸಿ ಎಂಬ ಸಾಲನ್ನು ಸೇರಿಸಲಾಗಿದೆ. ಈ ವಿಡಿಯೋವನ್ನು ಈಗಾಗಲೆ 2 ಲಕ್ಷದಷ್ಟು ಜನ ನೋಡಿದ್ದಾರೆ. ಅನೇಕರು ಕಾಮೆಂಟ್ ಮಾಡಿದ್ದಾರೆ. ಇಂಡಿಯಾ ಟುಡೇ ವರದಿ ಪ್ರಕಾರ ಈ ಘಟನೆ ಮಹಾಲಕ್ಷ್ಮೀ ಲೇಔಟ್‌, ನಂದಿನಿ ಬಡಾವಣೆ ಸಮೀಪದ ಶಂಕರನಗರದಲ್ಲಿ ನಡೆದಿದೆ. ಪೊಲೀಸರು ಕೇಸ್ ದಾಖಲಿಸಿದ್ದು ತನಿಖೆ ನಡೆಸಿದ್ದಾರೆ.

ಸೋಷಿಯಲ್ ಮೀಡಿಯಾದಲ್ಲಿ ಜನಸ್ಪಂದನೆ ಹೀಗಿದೆ

ಬೆಂಗಳೂರಿನಲ್ಲಿ ಸರಗಳ್ಳತನ ದೊಡ್ಡ ಸಮಸ್ಯೆಯಾಗಿದ್ದು, ಮಹಿಳೆಯರು ನಿರ್ಭೀತರಾಗಿ ನಡೆದಾಡುವುದು, ಒಂದೆಡೆ ಕೂರುವುದು ಕೂಡ ಸಾಧ್ಯವಾಗದ ಸ್ಥಿತಿ ನಿರ್ಮಾಣವಾಗಿದೆ ಎಂದು ಹಲವರು ಆಕ್ರೋಶ ವ್ಯಕ್ತಪಡಿಸಿದ್ದಾರೆ.