ಕೋಲ್ಕತ್ತ: ಹರಿಯಾಣದ ಗುರುಗ್ರಾಮದಲ್ಲಿರುವ ಐಷಾರಾಮಿ ಫ್ಲ್ಯಾಟ್‌ನಲ್ಲಿ ಪಶ್ಚಿಮ ಬಂಗಾಳ ಮೂಲದ ಮಹಿಳೆಯನ್ನು ಸುಮಾರು ಎರಡು ವರ್ಷಗಳ ಕಾಲ ಅಕ್ರಮವಾಗಿ ಬಂಧಿಸಿ, ಪ್ರತಿದಿನ 16 ಗಂಟೆಗಳ ಕಾಲ ಬಲವಂತವಾಗಿ ಗೃಹಕಾರ್ಯ ಮಾಡಿಸಿ, ದೈಹಿಕ ಹಿಂಸೆ ನೀಡಲಾಗುತ್ತಿದ್ದ ಅಮಾನುಷ ಘಟನೆ ಬೆಳಕಿಗೆ ಬಂದಿದೆ. ಜೂನ್ 12ರಂದು ಪೊಲೀಸರು ಮತ್ತು ಸಂಬಂಧಿತ ಅಧಿಕಾರಿಗಳ ಸಂಯುಕ್ತ ಕಾರ್ಯಾಚರಣೆಯಲ್ಲಿ ಮಹಿಳೆಯನ್ನು ರಕ್ಷಿಸಲಾಗಿದೆ.
ಬೀರ್ಭೂಮ್ ಜಿಲ್ಲೆಯ ನಿವಾಸಿಯಾದ 39 ವರ್ಷದ ಭಾದು ಮಂಡಿ ರಕ್ಷಿಸಲ್ಪಟ್ಟ ಸಂತ್ರಸ್ತೆ. ಪಶ್ಚಿಮ ಬಂಗಾಳ ಮತ್ತು ಹರಿಯಾಣದ ಅಧಿಕಾರಿಗಳು, ಪೊಲೀಸ್ ಇಲಾಖೆ ಹಾಗೂ ನಾಗರಿಕ ಸಮಾಜ ಸಂಘಟನೆಗಳು ಜಂಟಿಯಾಗಿ ನಡೆಸಿದ ಕಾರ್ಯಾಚರಣೆಯಿಂದ ಆಕೆಯನ್ನು ಸುರಕ್ಷಿತವಾಗಿ ಹೊರತೆಗೆದಿದ್ದಾರೆ. ಹಿಂಸೆ
ಪೊಲೀಸರ ಪ್ರಕಾರ, ₹40,000 ಮುಂಗಡ ಹಣ ನೀಡಿ ಆಕೆಯನ್ನು ಗೃಹಕಾರ್ಮಿಕಳಾಗಿ ಕರೆತರಲಾಗಿತ್ತು. ಆದರೆ ಬಳಿಕ ಆಕೆಯನ್ನು ದಿನಕ್ಕೆ 16 ಗಂಟೆಗಳಿಗಿಂತ ಹೆಚ್ಚು ಕಾಲ ವಿಶ್ರಾಂತಿಯಿಲ್ಲದೆ ಕೆಲಸ ಮಾಡಿಸಲು ಬಲವಂತ ಮಾಡಲಾಗುತ್ತಿತ್ತು. ಅಲ್ಲದೆ ಆಕೆಯ ಮೇಲೆ ನಿರಂತರವಾಗಿ ದೈಹಿಕ ದೌರ್ಜನ್ಯವೂ ನಡೆಯುತ್ತಿತ್ತು.
ಇದನ್ನೂ ಓದಿ: ರಾಹುಲ್ ಗಾಂಧಿ ಹೇಳಿಕೆಗೆ CPI(M) ಪ್ರತಿಕ್ರಿಯೆ – “ಅಪ್ಪಿಕೊಳ್ಳುವ ವಿಚಾರವಲ್ಲ, ED ಕ್ರಮಗಳ ಬಗ್ಗೆ ಪ್ರಶ್ನೆ”
ಇನ್ನೂ, ಆ ಫ್ಲ್ಯಾಟ್ ಅತ್ಯಾಧುನಿಕ ಡಿಜಿಟಲ್ ಭದ್ರತಾ ವ್ಯವಸ್ಥೆ ಹೊಂದಿದ್ದರಿಂದ ಆಕೆಗೆ ಹೊರ ಜಗತ್ತಿನೊಂದಿಗೆ ಯಾವುದೇ ಸಂಪರ್ಕ ಸಾಧಿಸಲು ಸಾಧ್ಯವಾಗಿರಲಿಲ್ಲ. ಕುಟುಂಬದವರೊಂದಿಗೆ ಮಾತನಾಡುವುದಕ್ಕೂ ಅವಕಾಶ ನೀಡಲಾಗಿರಲಿಲ್ಲ ಮತ್ತು ಆಕೆಯನ್ನು ಫ್ಲ್ಯಾಟ್‌ನ ಹೊರಗೆ ಹೋಗಲು ಕಟ್ಟುನಿಟ್ಟಾಗಿ ತಡೆಹಿಡಿಯಲಾಗುತ್ತಿತ್ತು.
ಈ ಘಟನೆ ಕಳೆದ ಮಾರ್ಚ್‌ನಲ್ಲಿ ಬೆಳಕಿಗೆ ಬಂದಿದೆ. ಸಂತ್ರಸ್ತೆಯ ಸಹೋದರಿ ಲಕ್ಷ್ಮಿ ತುಡು ಅವರು ಪಶ್ಚಿಮ ಬಂಗಾಳದ ಅಧಿಕಾರಿಗಳನ್ನು ಸಂಪರ್ಕಿಸಿ ನೆರವು ಕೋರಿದ ಬಳಿಕ ಪ್ರಕರಣಕ್ಕೆ ತಿರುವು ಸಿಕ್ಕಿತು.
ಇತ್ತೀಚೆಗೆ ಫ್ಲ್ಯಾಟ್‌ನಲ್ಲಿ ನಡೆದ ದುರಸ್ತಿ ವೇಳೆ ಬಂದ ವ್ಯಕ್ತಿಯೊಬ್ಬರ ಸಹಾಯದಿಂದ ಭಾದು ಮಂಡಿ ತಮ್ಮ ಕುಟುಂಬಕ್ಕೆ ಕರೆ ಮಾಡಿ, ತಾನು ಅನುಭವಿಸುತ್ತಿದ್ದ ಹಿಂಸೆಯನ್ನು ವಿವರಿಸಿ ರಕ್ಷಣೆ ಕೋರಿ ಅಳಲು ತೋಡಿಕೊಂಡಿದ್ದರು.
ಈ ಮಾಹಿತಿಯ ಆಧಾರದಲ್ಲಿ ಕುಟುಂಬಸ್ಥರು ‘ನಾರಿ ಓ ಶಿಶು ಕಲ್ಯಾಣ ಕೇಂದ್ರ’ ಎಂಬ ಸ್ವಯಂಸೇವಾ ಸಂಸ್ಥೆಯನ್ನು ಸಂಪರ್ಕಿಸಿದರು. ಬಳಿಕ ಸರ್ಕಾರದ ಸಂಸ್ಥೆಗಳು ಮತ್ತು ಹರಿಯಾಣ ಪೊಲೀಸರು ಸೂಕ್ತ ಸಮಯದಲ್ಲಿ ದಾಳಿ ನಡೆಸಿ ಮಹಿಳೆಯನ್ನು ರಕ್ಷಿಸಿದರು.
