17 ನೇ ಬ್ರಿಕ್ಸ್ ಶೃಂಗಸಭೆಯು 2025ರ ಜುಲೈ ನಲ್ಲಿ ಬ್ರೆಜಿಲ್ ನ ರಿಯೊ ಡಿ ಜನೈರೊದಲ್ಲಿ ನಡೆಯಿತು. ಬ್ರಿಕ್ಸ್ ದೇಶಗಳು ಡಾಲರ್ ಮತ್ತು ಕರೆನ್ಸಿ ವಿನಿಮಯ ವ್ಯವಸ್ಥೆಗಳ ಬದಲಿಗೆ, ತಮ್ಮದೇ ಆದ ಕರೆನ್ಸಿಗಳಲ್ಲಿ ವ್ಯಾಪಾರ ಮಾಡುವ ಬಗ್ಗೆ ಚರ್ಚಿಸಿವೆ. ಅಂತರರಾಷ್ಟ್ರೀಯ ವ್ಯಾಪಾರದಲ್ಲಿ ಗಡಿಯಾಚೆಗಿನ ಪಾವತಿಗಳನ್ನು ಸುಗಮಗೊಳಿಸಲು ಗುಂಪು ಯೋಜಿಸಿದೆ. ಇದರಿಂದ ಟ್ರಂಪ್ ಭಯಭೀತರಾಗಿದ್ದಾರೆ. ಟ್ರಂಪ್
–ಪ್ರಕಾಶ್ ಕಾರಟ್
–ಕನ್ನಡಕ್ಕೆ: ಸಿ. ಸಿದ್ದಯ್ಯ
17 ನೇ ಬ್ರಿಕ್ಸ್ ಶೃಂಗಸಭೆಯು 2025ರ ಜುಲೈ 6-7 ರಂದು ಬ್ರೆಜಿಲ್ ನ ರಿಯೊ ಡಿ ಜನೈರೊದಲ್ಲಿ (Rio de Janeiro) ನಡೆಯಿತು. ಬ್ರಿಕ್ಸ್ ಹನ್ನೊಂದು ಹೊಸ ಸದಸ್ಯ ರಾಷ್ಟ್ರಗಳಿಗೆ ವಿಸ್ತರಿಸಿದ ನಂತರ ನಡೆದ ಮೊದಲ ಶೃಂಗಸಭೆ ಇದು. ಶೃಂಗಸಭೆಯ ನಂತರ, ಅಮೆರಿಕ ಅಧ್ಯಕ್ಷ ಟ್ರಂಪ್ ಬ್ರಿಕ್ಸ್ ಗೆ ಸೇರುವ ದೇಶಗಳ ಮೇಲೆ ಶೇ. 10 ರಷ್ಟು ಸುಂಕ ವಿಧಿಸುವುದಾಗಿ ಬೆದರಿಕೆ ಹಾಕಿದರು. ಇದಕ್ಕೂ ಮೊದಲು, ಬ್ರಿಕ್ಸ್ ದೇಶಗಳ ಮೇಲೆ ಶೇ. 100 ರಷ್ಟು ಸುಂಕ ವಿಧಿಸುವುದಾಗಿ ಬೆದರಿಕೆ ಹಾಕಿದ್ದರು, ಬ್ರಿಕ್ಸ್ ದೇಶಗಳು ಯುಎಸ್ ಡಾಲರ್ ನ ಪ್ರಾಬಲ್ಯವನ್ನು ನಾಶಮಾಡಲು ಮತ್ತು ಅಮೆರಿಕವನ್ನು ದುರ್ಬಲಗೊಳಿಸಲು ಬಯಸುತ್ತವೆ ಎಂದು ಹೇಳಿದ್ದರು. ಬ್ರಿಕ್ಸ್ ಬಗ್ಗೆ ಟ್ರಂಪ್ ಇಷ್ಟೊಂದು ಭಯಭೀತರಾಗಿದ್ದಾರೇಕೆ? ಕೋಪಗೊಂಡಿದ್ದಾರೇಕೆ? ಟ್ರಂಪ್
ಬ್ರಿಕ್ಸ್ ನ ಇತಿಹಾಸ ಮತ್ತು ಅಭಿವೃದ್ಧಿ
ಬ್ರಿಕ್ಸ್ ಅನ್ನು ನಾಲ್ಕು ಸದಸ್ಯರೊಂದಿಗೆ 2009ರಲ್ಲಿ ಸ್ಥಾಪಿಸಲಾಯಿತು. ಒಂದು ವರ್ಷದ ನಂತರ, ದಕ್ಷಿಣ ಆಫ್ರಿಕಾ ಐದನೇ ಸದಸ್ಯ ರಾಷ್ಟ್ರವಾಗಿ ಸೇರಿಕೊಂಡಿತು. ಇದು ಮೂಲತಃ ಬ್ರೆಜಿಲ್, ರಷ್ಯಾ, ಭಾರತ, ಚೀನಾ ಮತ್ತು ದಕ್ಷಿಣ ಆಫ್ರಿಕಾದ ಐದು ರಾಷ್ಟ್ರಗಳ ಗುಂಪಾಗಿತ್ತು. ಈ ಗುಂಪನ್ನು ಜಾಗತಿಕ ದಕ್ಷಿಣದ ಹಿತಾಸಕ್ತಿಗಳು ಮತ್ತು ಆಕಾಂಕ್ಷೆಗಳನ್ನು ಪ್ರತಿಬಿಂಬಿಸುವ ವೇದಿಕೆಯನ್ನಾಗಿ ನೋಡಲಾಯಿತು.
ಇದನ್ನೂ ಓದಿ: ಪಿಯುಸಿ ಮೌಲ್ಯಮಾಪಕರಿಗೆ 4 ತಿಂಗಳಿನಿಂದ ಸಂಭಾವನೆ ವಿಳಂಬ; ಅಸಮಾಧಾನ
ಈ ಐದು ದೇಶಗಳು ವಿಶ್ವದ ಜನಸಂಖ್ಯೆಯ 40 ಪ್ರತಿಶತ ಮತ್ತು ವಿಶ್ವದ ಆರ್ಥಿಕತೆಯ ಕಾಲು ಭಾಗವನ್ನು ಹೊಂದಿವೆ. 2024ರಲ್ಲಿ ದಕ್ಷಿಣ ಆಫ್ರಿಕಾದಲ್ಲಿ ನಡೆದ 16ನೇ ಬ್ರಿಕ್ಸ್ ಶೃಂಗಸಭೆಯಲ್ಲಿ, ಈಜಿಪ್ಟ್, ಇಥಿಯೋಪಿಯಾ, ಇರಾನ್, ಸೌದಿ ಅರೇಬಿಯಾ, ಯುನೈಟೆಡ್ ಅರಬ್ ಎಮಿರೇಟ್ಸ್ (UAE) ಮತ್ತು ಇಂಡೋನೇಷ್ಯಾ ಎಂಬ ಆರು ದೇಶಗಳನ್ನು ಗುಂಪಿನ ಸದಸ್ಯರನ್ನಾಗಿ ಸೇರಿಸಲು ನಿರ್ಧರಿಸಲಾಯಿತು. ಪ್ರಸ್ತುತ, ಹನ್ನೊಂದು ಬ್ರಿಕ್ಸ್ ದೇಶಗಳು ವಿಶ್ವದ ಜನಸಂಖ್ಯೆಯ 49.5 ಪ್ರತಿಶತ, ವಿಶ್ವದ GDP ಯ 40 ಪ್ರತಿಶತ ಮತ್ತು ವಿಶ್ವ ವ್ಯಾಪಾರದ 26 ಪ್ರತಿಶತವನ್ನು ಹೊಂದಿವೆ.
ಬ್ರಿಕ್ಸ್ ನ ಸ್ವರೂಪ ಮತ್ತು ಉದ್ದೇಶ
ಬ್ರಿಕ್ಸ್ ಒಂದು ಬಣ ಅಥವಾ ಮೈತ್ರಿಕೂಟವಲ್ಲ. ಇದು ದಕ್ಷಿಣ ದೇಶಗಳ ಗುಂಪಾಗಿದ್ದು (ರಷ್ಯಾವನ್ನು ಹೊರತುಪಡಿಸಿ) ಬಹುಪಕ್ಷೀಯ ಸಂಸ್ಥೆಗಳು, ವ್ಯಾಪಾರ, ಆರ್ಥಿಕ ಸಹಕಾರ, ಹವಾಮಾನ ಬದಲಾವಣೆ ಮತ್ತು ತಂತ್ರಜ್ಞಾನದ ಕುರಿತು ಸಾಮಾನ್ಯ ಸ್ಥಾನಗಳನ್ನು ತಲುಪಲು ಪ್ರಯತ್ನಿಸುತ್ತದೆ. ಅದೇ ಸಮಯದಲ್ಲಿ, ಅಂತರರಾಷ್ಟ್ರೀಯ ಹಣಕಾಸು ನಿಧಿ (IMF) ಮತ್ತು ವಿಶ್ವಬ್ಯಾಂಕ್ ನಂತಹ ಸಂಸ್ಥೆಗಳ ಮೇಲೆ ಹಾಗೂ ವ್ಯಾಪಾರ ಮತ್ತು ಹಣಕಾಸು ಕಾರ್ಯವಿಧಾನಗಳ ಮೇಲೆ, ಜಿ-7 ಮತ್ತು ಪಾಶ್ಚಿಮಾತ್ಯ ಸಾಮ್ರಾಜ್ಯಶಾಹಿಗಳ ಪ್ರಾಬಲ್ಯವನ್ನು ಪ್ರಶ್ನಿಸುವ ಸಾಮರ್ಥ್ಯವನ್ನು ಈ ಗುಂಪು ಹೊಂದಿದೆ. 2008ರಲ್ಲಿ ಜಾಗತಿಕ ಆರ್ಥಿಕ ಬಿಕ್ಕಟ್ಟಿನ ನಂತರ ಬ್ರಿಕ್ಸ್ ರಚನೆಯಾಯಿತು. ಅದೇ ರೀತಿ, ಜಿ-7 (ಕೆನಡಾ, ಫ್ರಾನ್ಸ್, ಜರ್ಮನಿ, ಇಟಲಿ, ಜಪಾನ್, ಯುನೈಟೆಡ್ ಕಿಂಗ್ಡಮ್ ಮತ್ತು ಯುನೈಟೆಡ್ ಸ್ಟೇಟ್ಸ್) ನೆರಳಿನಿಂದ ಜಿ-20 ಹೊರಬರಲು ವಿಫಲವಾಯಿತು. ಇದು ಬ್ರಿಕ್ಸ್ ನ ಪ್ರಾಮುಖ್ಯತೆಯನ್ನು ಮತ್ತಷ್ಟು ಹೆಚ್ಚಿಸಿತು.
ರಿಯೊ ಘೋಷಣೆ ಮತ್ತು ಜಾಗತಿಕ ದಕ್ಷಿಣದ ನಿಲುವು
ಬ್ರಿಕ್ಸ್ ನ ಪ್ರಸ್ತುತ ಬ್ರೆಜಿಲ್ ಶೃಂಗಸಭೆಯ ಘೋಷಣೆಯು, ಇರಾನ್ ಮತ್ತು ಗಾಜಾದಲ್ಲಿನ ಆಕ್ರಮಣ ಕ್ರಮಗಳ ಕುರಿತು ದಕ್ಷಿಣದ ದೇಶಗಳ ನಿಲುವನ್ನು ಸ್ಪಷ್ಟವಾಗಿ ಪ್ರತಿಬಿಂಬಿಸುತ್ತದೆ. ಇರಾನಿನ ಸಾರ್ವಭೌಮತ್ವ ಮತ್ತು ಪರಮಾಣು ತಾಣಗಳ ಮೇಲಿನ ದಾಳಿಗಳು, ಹಾಗೆಯೇ ಗಾಜಾ ಮೇಲಿನ ಇಸ್ರೇಲ್ ದಾಳಿಗಳು ಮತ್ತು ಆಹಾರ ಮತ್ತು ಮಾನವೀಯ ನೆರವಿನ ಮೇಲಿನ ನಿರ್ಬಂಧವನ್ನು ಸಮ್ಮೇಳನವು ಬಲವಾಗಿ ಖಂಡಿಸಿತು. ಏಕಪಕ್ಷೀಯ ಅಮೆರಿಕದ ಸುಂಕಗಳು ಮತ್ತು ಸುಂಕ ರಹಿತ ಕ್ರಮಗಳ ಹೆಚ್ಚಳದ ಬಗ್ಗೆ ಘೋಷಣೆಯು ಗಂಭೀರ ಕಳವಳವನ್ನು ವ್ಯಕ್ತಪಡಿಸಿತು, ಯುನೈಟೆಡ್ ಸ್ಟೇಟ್ಸ್ ಅನ್ನು ಹೆಸರಿಸಿ ಹೇಳಲಿಲ್ಲ. ಅದೇ ರೀತಿ, ಅಂತರರಾಷ್ಟ್ರೀಯ ಹಣಕಾಸು ನಿಧಿ ಮತ್ತು ವಿಶ್ವಬ್ಯಾಂಕಿನಲ್ಲಿ ದಕ್ಷಿಣದ ಪ್ರಮುಖ ದೇಶಗಳಿಗೆ ಹೆಚ್ಚಿನ ಮತದಾನದ ಅಧಿಕಾರ ಮತ್ತು ಯುಎನ್ ಭದ್ರತಾ ಮಂಡಳಿ (United Nations Security Council)ಯಲ್ಲಿ ಬ್ರೆಜಿಲ್ ಮತ್ತು ಭಾರತಕ್ಕೆ ಪ್ರಾತಿನಿಧ್ಯಕ್ಕಾಗಿ ದೀರ್ಘಕಾಲದ ಬೇಡಿಕೆಯನ್ನು ಅದು ಪುನರುಚ್ಚರಿಸಿತು.
ಡಾಲರ್ ಪ್ರಾಬಲ್ಯದ ವಿರುದ್ಧ ಕ್ರಮಗಳು
ಅಂತರರಾಷ್ಟ್ರೀಯ ವ್ಯಾಪಾರಕ್ಕಾಗಿ ಡಾಲರ್ ಮೇಲಿನ ಅವಲಂಬನೆಯನ್ನು ಕಡಿಮೆ ಮಾಡಲು ಮತ್ತು ಬಹುಪಕ್ಷೀಯ ಹಣಕಾಸು ಸಂಸ್ಥೆಗಳ ಮೇಲೆ ಅಮೆರಿಕ ಮತ್ತು G-7 ಪ್ರಾಬಲ್ಯವನ್ನು ದುರ್ಬಲಗೊಳಿಸಲು ಬ್ರಿಕ್ಸ್ ದೇಶಗಳು ಕೈಗೊಂಡಿರುವ ಕ್ರಮಗಳಿಂದ ಟ್ರಂಪ್ ಕೋಪಗೊಂಡಿದ್ದಾರೆ. ಕೆಲವು ದೇಶಗಳ ವಿರುದ್ಧ ಅಮೆರಿಕ ಆರ್ಥಿಕ ನಿರ್ಬಂಧಗಳನ್ನು ಹೆಚ್ಚಿಸಿ, ಅಂತರರಾಷ್ಟ್ರೀಯ ಹಣಕಾಸು ಮತ್ತು ಬ್ಯಾಂಕಿಂಗ್ ಸಂಸ್ಥೆಗಳಿಂದ ಅವುಗಳನ್ನು ಹೊರಹಾಕಿರುವುದರಿಂದ, ಹೆಚ್ಚಿನ ದೇಶಗಳು ಪರ್ಯಾಯ ಕ್ರಮಗಳ ಮೂಲಕ ತಮ್ಮ ಹಿತಾಸಕ್ತಿಗಳನ್ನು ರಕ್ಷಿಸಲು ಪ್ರಯತ್ನಿಸುತ್ತಿವೆ.
ಬ್ರಿಕ್ಸ್ ದೇಶಗಳು ಡಾಲರ್ ಮತ್ತು ಕರೆನ್ಸಿ ವಿನಿಮಯ ವ್ಯವಸ್ಥೆಗಳ ಬದಲಿಗೆ, ತಮ್ಮದೇ ಆದ ಕರೆನ್ಸಿಗಳಲ್ಲಿ ವ್ಯಾಪಾರ ಮಾಡುವ ಬಗ್ಗೆ ಚರ್ಚಿಸಿವೆ. ಅಂತರರಾಷ್ಟ್ರೀಯ ವ್ಯಾಪಾರದಲ್ಲಿ ಗಡಿಯಾಚೆಗಿನ ಪಾವತಿಗಳನ್ನು ಸುಗಮಗೊಳಿಸಲು ಗುಂಪು ಯೋಜಿಸಿದೆ. ಬ್ರೆಜಿಲ್ ಶೃಂಗಸಭೆಯ ಘೋಷಣೆಯು ತಮ್ಮ ದೇಶಗಳ ಹಣಕಾಸು ಮಂತ್ರಿಗಳು ಮತ್ತು ಕೇಂದ್ರ ಬ್ಯಾಂಕ್ ಗವರ್ನರ್ ಗಳನ್ನು “ಗಡಿಯಾಚೆಗಿನ ಪಾವತಿಗಳ ಕುರಿತು ಬ್ರಿಕ್ಸ್ ಉಪಕ್ರಮವನ್ನು ಚರ್ಚಿಸುವುದನ್ನು ಮುಂದುವರಿಸಲು ಮತ್ತು ಬ್ರಿಕ್ಸ್ ಪಾವತಿ ವ್ಯವಸ್ಥೆಗಳ ನಡುವೆ ಹೆಚ್ಚಿನ ಪರಸ್ಪರ ಕಾರ್ಯಸಾಧ್ಯತೆಯ ಸಾಧ್ಯತೆಗಳ ಕುರಿತು ಚರ್ಚೆಗಳನ್ನು ಬೆಂಬಲಿಸಲು ಸಂಭಾವ್ಯ ಮಾರ್ಗಗಳನ್ನು ಗುರುತಿಸುವಲ್ಲಿ ಬ್ರಿಕ್ಸ್ ಪಾವತಿ ಕಾರ್ಯಪಡೆ (ಬಿಪಿಟಿಎಫ್) ಮಾಡಿದ ಪ್ರಗತಿಯನ್ನು ಒಪ್ಪಿಕೊಳ್ಳಲು” ಕರೆ ನೀಡಿತು. ಡಾಲರ್ ಅನ್ನು ಬದಲಿಸಲು ಹೊಸ ಕರೆನ್ಸಿಯನ್ನು ರಚಿಸುವ ಯಾವುದೇ ಘೋಷಿತ ಗುರಿ ಇಲ್ಲದಿದ್ದರೂ, ಟ್ರಂಪ್ ಆಡಳಿತವು ಡಾಲರ್ ಮೇಲಿನ ಅವಲಂಬನೆಯನ್ನು ಕಡಿಮೆ ಮಾಡಲು ಸೀಮಿತ ಕ್ರಮಗಳ ಬಗ್ಗೆ ಎಚ್ಚರಿಕೆ ನೀಡುತ್ತಿದೆ.
ಪರ್ಯಾಯ ಸಂಸ್ಥೆಗಳ ಅಭಿವೃದ್ಧಿ
ಸಾಮ್ರಾಜ್ಯಶಾಹಿ ಪ್ರಾಬಲ್ಯ ಹೊಂದಿರುವ ಸಂಸ್ಥೆಗಳನ್ನು ಬದಲಾಯಿಸಲು ಬ್ರಿಕ್ಸ್ ಕೆಲವು ಸಂಸ್ಥೆಗಳನ್ನು ಸ್ಥಾಪಿಸುವಲ್ಲಿ ಕ್ರಮೇಣ ಪ್ರಗತಿ ಸಾಧಿಸುತ್ತಿದೆ. ಇದು ನ್ಯೂ ಡೆವಲಪ್ಮೆಂಟ್ ಬ್ಯಾಂಕ್ (ಎನ್ಡಿಬಿ) ಪ್ರಕರಣದಲ್ಲಿ ಸ್ಪಷ್ಟವಾಗಿದೆ. ಈ ಬ್ಯಾಂಕ್ ಅನ್ನು 2015 ರಲ್ಲಿ 100 ಬಿಲಿಯನ್ ಡಾಲ್ ಬಂಡವಾಳದೊಂದಿಗೆ ಸ್ಥಾಪಿಸಲಾಯಿತು ಮತ್ತು ಚೀನಾದ ಶಾಂಘೈನಲ್ಲಿ ಪ್ರಧಾನ ಕಚೇರಿಯನ್ನು ಹೊಂದಿದೆ.
ಸಾಲ ಮರುಪಾವತಿಸಲು ಸಾಲಗಳನ್ನು ಒದಗಿಸುವ ಬದಲು, ಮೂಲಸೌಕರ್ಯ ಯೋಜನೆಗಳಿಗೆ ಸಾಲಗಳನ್ನು ಒದಗಿಸಲು ಬ್ಯಾಂಕ್ ಪ್ರಯತ್ನಿಸುತ್ತದೆ. ಇದು ಬ್ರಿಕ್ಸ್ ಸದಸ್ಯ ರಾಷ್ಟ್ರಗಳು ಮತ್ತು ಜಾಗತಿಕ ದಕ್ಷಿಣದ ದೇಶಗಳಲ್ಲಿ 98 ಮೂಲಸೌಕರ್ಯ ಯೋಜನೆಗಳಿಗೆ ಸುಮಾರು 36 ಬಿಲಿಯನ್ ಡಾಲರ್ ಒದಗಿಸಿದೆ. ಈ ಬ್ಯಾಂಕ್ ಅನ್ನು ಪ್ರಸ್ತುತ ಮಾಜಿ ಬ್ರೆಜಿಲ್ ಅಧ್ಯಕ್ಷೆ ದಿಲ್ಮಾ ರೂಸೆಫ್ ನೇತೃತ್ವ ವಹಿಸಿದ್ದಾರೆ. ಈ ಬ್ಯಾಂಕಿನ ಜೊತೆಗೆ, ಬ್ರಿಕ್ಸ್ ದೇಶಗಳ ಕೇಂದ್ರ ಬ್ಯಾಂಕುಗಳ ನಡುವಿನ ಸಾಮಾನ್ಯ ನಿಧಿಯಾದ ಕಾಂಟಿಜೆಂಟ್ ರಿಸರ್ವ್ ಅರೇಂಜ್ಮೆಂಟ್ (ಸಿಆರ್ಎ) ಸಹ ಇದೆ. ಇದು ಆರ್ಥಿಕ ಬಿಕ್ಕಟ್ಟಿನ ಸಂದರ್ಭದಲ್ಲಿ ಸದಸ್ಯ ರಾಷ್ಟ್ರಗಳಿಗೆ ಬೆಂಬಲವನ್ನು ನೀಡುತ್ತದೆ.
ಟೀಕೆಗಳಿಗೆ ಪ್ರತಿಕ್ರಿಯಿಸುವುದು
ಬ್ರಿಕ್ಸ್ ಅನ್ನು ಅಪ್ರಸ್ತುತ ಎಂದು ಕೆಲವು ಎಡಪಂಥೀಯ ವಿಮರ್ಶಕರು ತಳ್ಳಿಹಾಕುತ್ತಾರೆ, ಏಕೆಂದರೆ ಅದು ಸ್ಥಿರವಾದ ಸಾಮ್ರಾಜ್ಯಶಾಹಿ ವಿರೋಧಿ ಕಾರ್ಯಸೂಚಿಯನ್ನು ಹೊಂದಿಲ್ಲ. ಈ ಟೀಕೆ ತಪ್ಪು. ಬ್ರಿಕ್ಸ್ ಸಾಮ್ರಾಜ್ಯಶಾಹಿ ವಿರೋಧಿ ವೇದಿಕೆಯಲ್ಲ. ದಕ್ಷಿಣದ ದೇಶಗಳ ನಿಲುವನ್ನು ಸಂಸ್ಥೆ ಸ್ಪಷ್ಟವಾಗಿ ವ್ಯಕ್ತಪಡಿಸುವವರೆಗೆ ಮತ್ತು ಅವರ ಅಭಿವೃದ್ಧಿ ಅಗತ್ಯಗಳು ಮತ್ತು ಆಕಾಂಕ್ಷೆಗಳನ್ನು ಪೂರೈಸುವ ಸಾಮಾನ್ಯ ಪ್ರಯತ್ನಗಳನ್ನು ಅನುಸರಿಸುವವರೆಗೆ, ಅದು ಬಹು-ಧ್ರುವೀಯತೆಯನ್ನು ಬಲಪಡಿಸುವ ಉದ್ದೇಶವನ್ನು ಪೂರೈಸುತ್ತದೆ.
ಬ್ರಿಕ್ಸ್ ತನ್ನ ಉದ್ದೇಶ ಮತ್ತು ಏಕತೆ ಎರಡರಲ್ಲೂ ಬೆಳೆದಂತೆ, ಅದು ಅಮೆರಿಕ ನೇತೃತ್ವದ ಸಾಮ್ರಾಜ್ಯಶಾಹಿ ಪ್ರಾಬಲ್ಯ ಮತ್ತು ಅಭಿವೃದ್ಧಿಶೀಲ ರಾಷ್ಟ್ರಗಳ ನಡುವಿನ ವಿರೋಧಾಭಾಸದ ಅಭಿವ್ಯಕ್ತಿಯಾಗಿರುತ್ತದೆ. ಭಾರತ ಸೇರಿದಂತೆ ಅನೇಕ ಬ್ರಿಕ್ಸ್ ಸದಸ್ಯರು ಅಮೆರಿಕದೊಂದಿಗೆ ಕಾರ್ಯತಂತ್ರದ ಮತ್ತು ಆರ್ಥಿಕ ಸಂಬಂಧಗಳನ್ನು ಹೊಂದಿದ್ದಾರೆ. ಅದೇ ಸಮಯದಲ್ಲಿ, ದಕ್ಷಿಣದ ಈ ದೇಶಗಳು ಬಹುಧ್ರುವೀಯ ಜಗತ್ತಿನಲ್ಲಿ ವಸ್ತುನಿಷ್ಠ ಪಾತ್ರವನ್ನು ವಹಿಸುತ್ತವೆ. ಇದು ಅವರ ಸ್ವಂತ ರಾಷ್ಟ್ರೀಯ ಹಿತಾಸಕ್ತಿಗಳನ್ನು ಉತ್ತಮವಾಗಿ ಪೂರೈಸುತ್ತದೆ. ಅಂತಹ ದೇಶಗಳು ಯುಎಸ್ ಸಾಮ್ರಾಜ್ಯಶಾಹಿಯೊಂದಿಗೆ ಹೊಂದಿಕೊಂಡಿದ್ದರೂ, ಬ್ರಿಕ್ಸ್ ಗುಂಪಿನಲ್ಲಿ ಸದಸ್ಯತ್ವವು ಅವರಿಗೆ ನಿರ್ದಿಷ್ಟ ಮಟ್ಟದ ಕಾರ್ಯತಂತ್ರದ ಸ್ವಾಯತ್ತತೆಯನ್ನು ಕಾಪಾಡಿಕೊಳ್ಳಲು ಹೆಚ್ಚಿನ ಅವಕಾಶಗಳನ್ನು ನೀಡುತ್ತದೆ.
ಟ್ರಂಪ್ ಅವರ ಆಕ್ರಮಣಶೀಲತೆ ಮತ್ತು ಬ್ರಿಕ್ಸ್ ನ ಉದಯ
ಟ್ರಂಪ್ ನೇತೃತ್ವದ ಆಡಳಿತವು ವ್ಯಾಪಾರ ಸೇರಿದಂತೆ ಎಲ್ಲಾ ವಲಯಗಳಲ್ಲಿ ಅನಿಯಂತ್ರಿತ ಮತ್ತು ಆಕ್ರಮಣಕಾರಿ ಕ್ರಮಗಳನ್ನು ಅನುಸರಿಸುತ್ತಿದೆ. ಇದು ಜಾಗತಿಕ ದಕ್ಷಿಣದ ದೇಶಗಳ ಮೇಲೆ ತೀವ್ರ ಪರಿಣಾಮ ಬೀರುತ್ತಿದೆ. ಅಮೆರಿಕದ ವ್ಯಾಪಾರ ಯುದ್ಧವು ಕೆನಡಾ, ಯುರೋಪಿಯನ್ ಒಕ್ಕೂಟ, ಜಪಾನ್ ಮತ್ತು ದಕ್ಷಿಣ ಕೊರಿಯಾದಂತಹ ತನ್ನ ಆಪ್ತ ಮಿತ್ರರಾಷ್ಟ್ರಗಳನ್ನೂ ಬಿಟ್ಟಿಲ್ಲ.
ಇದು ಅಮೆರಿಕ ನೇತೃತ್ವದ ಸಾಮ್ರಾಜ್ಯಶಾಹಿ ಮೈತ್ರಿಕೂಟವನ್ನು ದುರ್ಬಲಗೊಳಿಸುತ್ತಿದ್ದರೆ, ಮತ್ತೊಂದೆಡೆ, ಜಾಗತಿಕ ದಕ್ಷಿಣದ ದೇಶಗಳಿಗೆ ನಿಜವಾದ ವೇದಿಕೆಯಾಗಿ ಬ್ರಿಕ್ಸ್ ನ ಆಕರ್ಷಣೆ ಹೆಚ್ಚುತ್ತಿದೆ. ಈಗ ಹೆಚ್ಚು ಹೆಚ್ಚು ದೇಶಗಳು ಬ್ರಿಕ್ಸ್ ಗೆ ಸೇರಲು ಆಸಕ್ತಿ ಹೊಂದಿವೆ. ಪ್ರಸ್ತುತ ಬ್ರೆಜಿಲ್ ಶೃಂಗಸಭೆಯು ‘ಪಾಲುದಾರ ರಾಷ್ಟ್ರಗಳು’ ಎಂಬ ಹೊಸ ವರ್ಗವನ್ನು ಪರಿಚಯಿಸಿದೆ. ಈ ಶೃಂಗಸಭೆಯಲ್ಲಿ, ಬೆಲಾರಸ್, ಬೊಲಿವಿಯಾ, ಕ್ಯೂಬಾ, ಕಝಾಕಿಸ್ತಾನ್, ಮಲೇಷ್ಯಾ, ಥೈಲ್ಯಾಂಡ್, ಉಗಾಂಡಾ ಮತ್ತು ಉಜ್ಬೇಕಿಸ್ತಾನ್ ಈ ಎಂಟು ದೇಶಗಳಿಗೆ ಈ ಪಾಲುದಾರ ಸ್ಥಾನಮಾನವನ್ನು ನೀಡಲಾಗಿದೆ. ಈ ನಾವೀನ್ಯತೆಯಿಂದ, ಜಾಗತಿಕ ದಕ್ಷಿಣದ ಅನೇಕ ದೇಶಗಳು ಬ್ರಿಕ್ಸ್ ಗೆ ಸೇರಿಕೊಂಡಿವೆ.
ಬ್ರೆಜಿಲ್ ನೇತೃತ್ವದ ಹೊಸ ಉಪಕ್ರಮಗಳು
ಬ್ರಿಕ್ಸ್ ಅಧ್ಯಕ್ಷತೆಯು ಒಂದು ವರ್ಷದ ಅವಧಿಗೆ ಇರುತ್ತದೆ. ಈ ವರ್ಷ ಬ್ರೆಜಿಲ್ ಅಧ್ಯಕ್ಷತೆ ವಹಿಸಿತ್ತು. ಅಧ್ಯಕ್ಷ ಲೂಲಾ ಅವರ ನೇತೃತ್ವದಲ್ಲಿ ಕೆಲವು ಗಮನಾರ್ಹ ಕ್ರಮಗಳನ್ನು ತೆಗೆದುಕೊಳ್ಳಲಾಗಿದೆ. ಮುಂಬರುವ UN ಹವಾಮಾನ ಬದಲಾವಣೆ ಸಮ್ಮೇಳನದಲ್ಲಿ (COP30) ಬ್ರಿಕ್ಸ್ ದೇಶಗಳು ಜಂಟಿ ಕ್ರಮಕ್ಕಾಗಿ ಹೊಸ ಚೌಕಟ್ಟನ್ನು ಪರಿಚಯಿಸಿವೆ. ಇದು ಬ್ರಿಕ್ಸ್ ಗುಂಪಿನ ಏಕತೆಯನ್ನು ಪ್ರತಿಬಿಂಬಿಸುತ್ತದೆ.
ತಂತ್ರಜ್ಞಾನದ ವಿಷಯದಲ್ಲಿ, ಘೋಷಣೆಯು ಕೃತಕ ಬುದ್ಧಿಮತ್ತೆಯ (AI) ಆಡಳಿತದ ಕುರಿತು ಹೆಚ್ಚು ಸಮಗ್ರ ಜಾಗತಿಕ ಚರ್ಚೆಯನ್ನು ಬೆಂಬಲಿಸಿತು. ಈ ಚರ್ಚೆಗಳು ದಕ್ಷಿಣದ ಕಡಿಮೆ ಪ್ರಾತಿನಿಧ್ಯ ಹೊಂದಿರುವ ದೇಶಗಳ ಕಳವಳಗಳನ್ನು ಹೆಚ್ಚಾಗಿ ಪ್ರತಿಬಿಂಬಿಸುತ್ತವೆ. ಇನ್ನೊಂದು, ಬಹುಪಕ್ಷೀಯ ಖಾತರಿಗಳ ಉಪಕ್ರಮದ ಪ್ರಸ್ತಾಪ. ಇದು ಹೂಡಿಕೆ ಖಾತರಿಗಳನ್ನು ಒದಗಿಸುವ ಮೂಲಕ ಮತ್ತು ಅಪಾಯವನ್ನು ಕಡಿಮೆ ಮಾಡುವ ಮೂಲಕ ದಕ್ಷಿಣದಲ್ಲಿ ಮೂಲಸೌಕರ್ಯ ಮತ್ತು ಅಭಿವೃದ್ಧಿಯಲ್ಲಿ ಹೂಡಿಕೆಯನ್ನು ಸುಗಮಗೊಳಿಸುತ್ತದೆ.
ಭಾರತದ ಬ್ರಿಕ್ಸ್ ನಾಯಕತ್ವ ಮತ್ತು ಸವಾಲುಗಳು
2026ರ ಅಧ್ಯಕ್ಷತೆ ಭಾರತದ್ದಾಗಿದೆ. ಮೋದಿ ಅವರು ಶೃಂಗಸಭೆಯ ಥೀಮ್ ಅನ್ನು “ಸುಸ್ಥಿರತೆಗಾಗಿ ಸಹಯೋಗ, ಸ್ಥಿತಿಸ್ಥಾಪಕತ್ವ ಮತ್ತು ನಾವೀನ್ಯತೆ” ಎಂದು ಘೋಷಿಸಿದ್ದಾರೆ. ಜಾಗತಿಕ ದಕ್ಷಿಣದ ಧ್ವನಿಯಾಗಿ ತನ್ನನ್ನು ತಾನು ಬಿಂಬಿಸಿಕೊಳ್ಳುತ್ತಿದ್ದರೂ, ಮೋದಿ ಸರ್ಕಾರದ ವಿದೇಶಾಂಗ ಮತ್ತು ಕಾರ್ಯತಂತ್ರದ ನೀತಿಗಳು ಅಮೆರಿಕ ಮತ್ತು ಇಸ್ರೇಲ್ ಪರವಾಗಿವೆ. ಎಲ್ಲಾ ಬಹುಪಕ್ಷೀಯ ಸಂಸ್ಥೆಗಳಲ್ಲಿ ಭಯೋತ್ಪಾದನೆಯನ್ನು ಪ್ರಾಥಮಿಕ ಚರ್ಚಾ ಕೇಂದ್ರವನ್ನಾಗಿ ಮಾಡುವುದು ಇದರ ಪ್ರಸ್ತುತ ಗಮನವಾಗಿದೆ.
ಈ ಪಾಕಿಸ್ತಾನ ಕೇಂದ್ರಿತ ವಿಧಾನದ ಆಧಾರವು ಇಡೀ ಜಾಗತಿಕ ದಕ್ಷಿಣದ ಕಳವಳಗಳಿಗೆ ಹೊಂದಿಕೆಯಾಗುವುದಿಲ್ಲ. ಅಮೆರಿಕ ನೇತೃತ್ವದ ಕ್ವಾಡ್ ಸಂಘಟನೆಯಲ್ಲಿ ತನ್ನ ಪಾತ್ರವನ್ನು ಬಲಪಡಿಸಲು ಮೋದಿ ಸರ್ಕಾರ ಉತ್ಸುಕವಾಗಿದೆ. ಇದರ ಹೊರತಾಗಿಯೂ, ಟ್ರಂಪ್ ಅವರ ಕ್ರಮಗಳಿಂದ ಭಾರತವೂ ಪ್ರಭಾವಿತವಾಗಿದೆ. ಟ್ರಂಪ್ ಅವರ ಆಕ್ರಮಣಕಾರಿ ಬೇಡಿಕೆಗಳೊಂದಿಗೆ ರಾಜಿ ಮಾಡಿಕೊಳ್ಳಲು ಅದು ಎಷ್ಟೇ ಪ್ರಯತ್ನಿಸಿದರೂ, ಮೋದಿ ಸರ್ಕಾರವು ಟ್ರಂಪ್ ಅವರ ದಾಳಿಗೆ ಒಳಗಾಗುತ್ತದೆ.
ಬ್ರಿಕ್ಸ್ ನ ಭವಿಷ್ಯ ಮತ್ತು ಭಾರತದ ಪಾತ್ರ
ಬಹುಪಕ್ಷೀಯತೆಯನ್ನು ಉತ್ತೇಜಿಸುವುದು ಭಾರತ ಸರ್ಕಾರದ ಅಧಿಕೃತ ನಿಲುವು. ಇತ್ತೀಚಿನ ದಿನಗಳಲ್ಲಿ, ಭಾರತ ಮತ್ತು ಚೀನಾ ಗಡಿ ಉದ್ವಿಗ್ನತೆಯನ್ನು ಕಡಿಮೆ ಮಾಡಲು ಮತ್ತು ಆರ್ಥಿಕ ಮತ್ತು ಪ್ರಯಾಣ ಸಂಬಂಧಗಳನ್ನು ಪುನಃಸ್ಥಾಪಿಸುವ ಪ್ರಕ್ರಿಯೆಯನ್ನು ಪುನರಾರಂಭಿಸಲು ಜಂಟಿ ಕ್ರಮಗಳನ್ನು ತೆಗೆದುಕೊಂಡಿವೆ. ಇದು ಬ್ರಿಕ್ಸ್ ನೊಳಗೆ ಸಹಕಾರವನ್ನು ಸುಗಮಗೊಳಿಸಲು ಇರುವ ಅಡೆತಡೆಗಳನ್ನು ತೆಗೆದುಹಾಕಲು ಸಹಾಯ ಮಾಡುತ್ತದೆ. ದಕ್ಷಿಣದ ಸಾಮೂಹಿಕ ಹಿತಾಸಕ್ತಿಗಳನ್ನು ಉತ್ತೇಜಿಸುವ ಕಾರ್ಯಕ್ರಮವನ್ನು ಅನುಸರಿಸಲು ಮತ್ತು ಬ್ರಿಕ್ಸ್ ಪ್ರಾರಂಭಿಸಿದ ಪರ್ಯಾಯ ನೀತಿಗಳು ಮತ್ತು ಕಾರ್ಯವಿಧಾನಗಳನ್ನು ದುರ್ಬಲಗೊಳಿಸುವ ಎಲ್ಲಾ ಪ್ರಯತ್ನಗಳನ್ನು ತಡೆಯಲು ಮೋದಿ ಸರ್ಕಾರವು ಬ್ರಿಕ್ಸ್ ಅಧ್ಯಕ್ಷತೆಯನ್ನು ಬಳಸಿಕೊಳ್ಳುತ್ತದೆ ಎಂದು ಆಶಿಸಲಾಗಿದೆ.
ಇದನ್ನೂ ನೋಡಿ: ಧರ್ಮಸ್ಥಳದಲ್ಲಿ ಹೂತಿಟ್ಟ ಶವಗಳ ಬಗ್ಗೆ ಮಾತನಾಡುವುದು ತಪ್ಪೆ? ಯಾಕೆ ಅಪಪ್ರಚಾರ ಮಾಡ್ತೀರಿ? Janashakthi Media
