- ವಿಜಯ ಶಿಖರವೇರಿದ ಡಾ. ರಾಜೇಶ್‌ ಗೌಡ
– ಜೆಡಿಎಸ್ ನೆರವಿಗೆ ಬರದ ಅನುಕಂಪ ಕ್ಷೇತ್ರ ಕಳೆದುಕೊಂಡು ಮೂರನೇ ಕುಸಿದ ಜೆಡಿಎಸ್
ಶಿರಾ: ಎಲ್ಲರ ನಿರೀಕ್ಷೆ ಮೀರಿ ತುಮಕೂರಿನ ಶಿರಾ ಕ್ಷೇತ್ರಕ್ಕೆ ನಡೆದ ಉಪಚುನಾವಣೆಯಲ್ಲಿ ಬಿಜೆಪಿ ಗೆಲುವಿನ ನಗೆ ಬೀರಿದೆ. ಈ ಮೂಲಕ ಇದೇ ಮೊದಲ ಬಾರಿಗೆ ಈ ಕ್ಷೇತ್ರದಲ್ಲಿ ‘ಕಮಲ’ ಅರಳಿದೆ.
ಅನುಕಂಪದ ಮತಗಳನ್ನು ನೆಚ್ಚಿಕೊಳ್ಳುವ ಜೆಡಿಎಸ್‌ನ ಕಾರ್ಯತಂತ್ರ ಫಲಿಸಿಲ್ಲ. ಹೀಗಾಗಿ ತನ್ನದೇ ಕೈಯಲ್ಲಿದ್ದ ಕ್ಷೇತ್ರವನ್ನು ಅದು ಕಳೆದುಕೊಂಡಿದೆ. ಇನ್ನೊಂದು ಕಡೆ ಕ್ಷೇತ್ರದಲ್ಲಿ ಎರಡು ಬಾರಿ ಜಯ ಸಾಧಿಸಿದ್ದ ಮಾಜಿ ಸಚಿವ ಟಿ.ಬಿ. ಜಯಚಂದ್ರ ಅವರನ್ನು ಕಣಕ್ಕಿಳಿಸಿಯೂ ಕಾಂಗ್ರೆಸ್ ಒಂದು ಕಾಲದ ತನ್ನ ಭದ್ರ ಕೋಟೆಯಲ್ಲಿಯೇ ಸೋಲು ಕಂಡಿದೆ. ಎಲ್ಲರಿಗಿಂತ ಮುಂಚೆ ಅಭ್ಯರ್ಥಿ ಘೋಷಿಸಿ ಚುನಾವಣಾ ತಯಾರಿಗೆ ಇಳಿದಿದ್ದ ‘ಕೈ’ನ ಪ್ರಯತ್ನವೂ ಫಲ ಕೊಟ್ಟಿಲ್ಲ.
ಮಂಗಳವಾರ ಬೆಳಿಗ್ಗೆ ಮತ ಎಣಿಕೆ ಆರಂಭವಾಗುತ್ತಿದ್ದಂತೆಯೇ ಶಿರಾ ಕ್ಷೇತ್ರದಲ್ಲಿ ಬಿಜೆಪಿ ಮುನ್ನಡೆ ಕಾಯ್ದುಕೊಂಡಿತ್ತು. ಆದರೆ ಒಂದು ಹಂತದಲ್ಲಿ ಮುನ್ನಡೆ ಕುಸಿದು ಕಾಂಗ್ರೆಸ್ ಅಭ್ಯರ್ಥಿ ಟಿ.ಬಿ. ಜಯಚಂದ್ರ ಬಿಜೆಪಿ ಅಭ್ಯರ್ಥಿ ಡಾ. ರಾಜೇಶ್‌ ಗೌಡ ಅವರಿಗೆ ತೀವ್ರ ಪೈಪೋಟಿ ನೀಡಿದ್ದರು. ಇದರಿಂದ ಶಿರಾ ಫಲಿತಾಂಶ ತೀವ್ರ ಕುತೂಹಲ ಕೆರಳಿಸಿತ್ತು.
ಆದರೆ ನಂತರ ಮತ್ತೆ ಮುನ್ನಡೆ ಪ್ರಮಾಣ ಏರಿಕೆಯಾಗುತ್ತಲೇ ಸಾಗಿತು. ಇದರಿಂದ ರಾಜೇಶ್‌ ಗೌಡ ಗೆಲುವು ನಿಚ್ಚಳವಾಯಿತು. ಮತ ಎಣಿಕೆಯ ಅಂತ್ಯಕ್ಕೆ ಬಿಜೆಪಿ ಅಭ್ಯರ್ಥಿ 12,949 ಮತಗಳಿಂದ ಜಯಸಾಧಿಸಿದರು.
ಬಿಜೆಪಿ ಅಭ್ಯರ್ಥಿ ರಾಜೇಶ್‌ ಗೌಡ 74,522 ಮತಗಳನ್ನು ಪಡೆದುಕೊಂಡರೆ, ಕಾಂಗ್ರೆಸ್ ಅಭ್ಯರ್ಥಿ ಟಿಬಿ ಜಯಚಂದ್ರ 61,573 ಮತಗಳನ್ನು ಪಡೆದುಕೊಂಡು ಸೋಲೊಪ್ಪಿಕೊಂಡರು. ಇನ್ನು ಜೆಡಿಎಸ್ ಅಭ್ಯರ್ಥಿ ಅಮ್ಮಾಜಮ್ಮ ಕೇವಲ 35,982 ಮತಗಳನ್ನು ಪಡೆದು ಮೂರನೇ ಸ್ಥಾನಕ್ಕೆ ತೃಪ್ತಿಪಟ್ಟುಕೊಂಡರು.
