ಬೆಂಗಳೂರು: ಗ್ರಾಹಕರ ಆರೋಗ್ಯ ಮತ್ತು ಆಹಾರ ಸುರಕ್ಷತೆಯ ದೃಷ್ಟಿಯಿಂದ ಕರ್ನಾಟಕ ಸರ್ಕಾರವು ಅನಲಾಗ್ ಅಥವಾ ಡೈರಿ ಅಲ್ಲದ ಪನೀರ್ನ ತಯಾರಿಕೆ, ಸಂಸ್ಕರಣೆ, ಪ್ಯಾಕಿಂಗ್, ಸಂಗ್ರಹಣೆ, ಸಾಗಣೆ, ವಿತರಣೆ ಹಾಗೂ ಮಾರಾಟಕ್ಕೆ ರಾಜ್ಯಾದ್ಯಂತ ಒಂದು ವರ್ಷದ ಅವಧಿಗೆ ನಿಷೇಧ ಹೇರಿದೆ. ಆಹಾರ ಸುರಕ್ಷತೆ ಮತ್ತು ಔಷಧ ಆಡಳಿತ ಇಲಾಖೆಯ ಆಹಾರ ಸುರಕ್ಷತಾ ವಿಭಾಗವು ಆಗಸ್ಟ್ 17ರಂದು ಈ ಕುರಿತು ಆದೇಶ ಹೊರಡಿಸಿದೆ. ಪನೀರ್
ಹಾಲಿನ ಕೊಬ್ಬು ಅಥವಾ ಹಾಲಿನ ಘನವಸ್ತುಗಳನ್ನು ಸಂಪೂರ್ಣವಾಗಿ ಅಥವಾ ಭಾಗಶಃ ಸಸ್ಯಜನ್ಯ ಎಣ್ಣೆ, ಸಸ್ಯಜನ್ಯ ಕೊಬ್ಬು ಅಥವಾ ಇತರ ಡೈರಿ ಅಲ್ಲದ ಪದಾರ್ಥಗಳಿಂದ ಬದಲಿಸಿ ಪನೀರ್ನಂತೆ ತಯಾರಿಸುವ ಉತ್ಪನ್ನಗಳನ್ನು ‘ಅನಲಾಗ್/ಡೈರಿ ಅಲ್ಲದ ಪನೀರ್’ ಎಂದು ಪರಿಗಣಿಸಲಾಗುತ್ತದೆ. ಇಂತಹ ಉತ್ಪನ್ನಗಳನ್ನು ‘ಪನೀರ್’ ಎಂಬ ಹೆಸರಿನಲ್ಲಿ ಪ್ರದರ್ಶಿಸುವುದು, ಪೂರೈಸುವುದು ಅಥವಾ ಮಾರಾಟ ಮಾಡುವುದನ್ನೂ ಆದೇಶ ನಿಷೇಧಿಸಿದೆ.
ಆಹಾರ ಸುರಕ್ಷತೆ ಮತ್ತು ಗುಣಮಟ್ಟ ನಿಯಮಗಳ ಪ್ರಕಾರ ಪನೀರ್ ಒಂದು ಮಾನದಂಡೀಕೃತ ಹಾಲಿನ ಉತ್ಪನ್ನವಾಗಿದೆ. ಆಹಾರ ಸುರಕ್ಷತೆ ಮತ್ತು ಗುಣಮಟ್ಟ ನಿಯಮಾವಳಿಗಳ ನಿಯಮ 2.1.16ರ ಪ್ರಕಾರ, ಅನುಮತಿಸಲಾದ ಆಮ್ಲೀಯ ಪದಾರ್ಥಗಳ ಮೂಲಕ ಹಾಲನ್ನು ಅವಕ್ಷೇಪಿಸಿ, ನಂತರ ಬಿಸಿ ಮಾಡುವ ಮೂಲಕ ಪನೀರ್ ತಯಾರಿಸಲಾಗುತ್ತದೆ. ಪನೀರ್ನಲ್ಲಿ ಹಾಲಿನ ಕೊಬ್ಬು ಪ್ರಮುಖ ಅಂಶವಾಗಿದ್ದು, ಅದರ ಬದಲಿಗೆ ಅಥವಾ ಅದರೊಂದಿಗೆ ಸಸ್ಯಜನ್ಯ ಎಣ್ಣೆ, ಸಸ್ಯಜನ್ಯ ಕೊಬ್ಬು ಅಥವಾ ಇತರ ಡೈರಿ ಅಲ್ಲದ ಕೊಬ್ಬನ್ನು ಬಳಸಲು ಅವಕಾಶವಿಲ್ಲ ಎಂದು ಇಲಾಖೆ ಸ್ಪಷ್ಟಪಡಿಸಿದೆ.
ಗ್ರಾಹಕರನ್ನು ದಾರಿ ತಪ್ಪಿಸುವ ಸಾಧ್ಯತೆ
‘ಡೈರಿ ಕ್ಷೇತ್ರದ ಅನಲಾಗ್ ಉತ್ಪನ್ನ’ಗಳ ವರ್ಗಕ್ಕೆ ಪ್ರತ್ಯೇಕ ಗುಣಮಟ್ಟದ ಮಾನದಂಡಗಳು ಸ್ಪಷ್ಟವಾಗಿ ನಿಗದಿಯಾಗದಿರುವುದು ಇಂತಹ ಉತ್ಪನ್ನಗಳ ಮೇಲಿನ ನಿಯಂತ್ರಣಕ್ಕೆ ತೊಂದರೆಯಾಗುತ್ತಿದೆ ಎಂದು ಆಹಾರ ಸುರಕ್ಷತಾ ಇಲಾಖೆ ತಿಳಿಸಿದೆ. ಅಲ್ಲದೆ, ಅನಲಾಗ್ ಉತ್ಪನ್ನಗಳನ್ನು ನೈಜ ಪನೀರ್ ಎಂದು ಮಾರಾಟ ಮಾಡುವುದರಿಂದ ಗ್ರಾಹಕರು ಉತ್ಪನ್ನದ ಸ್ವರೂಪ ಮತ್ತು ಅದರಲ್ಲಿರುವ ಪದಾರ್ಥಗಳ ಕುರಿತು ತಪ್ಪು ಕಲ್ಪನೆಗೆ ಒಳಗಾಗುವ ಸಾಧ್ಯತೆಯಿದೆ ಎಂದು ಇಲಾಖೆ ಆತಂಕ ವ್ಯಕ್ತಪಡಿಸಿದೆ.
ನೈಜ ಪನೀರ್ ಮತ್ತು ಅನಲಾಗ್ ಉತ್ಪನ್ನಗಳ ನಡುವಿನ ವ್ಯತ್ಯಾಸವನ್ನು ಗ್ರಾಹಕರು ಸ್ವತಃ ಗುರುತಿಸುವುದು ಸುಲಭವಲ್ಲ. ಅದರಲ್ಲೂ ಉತ್ಪನ್ನವನ್ನು ‘ಪನೀರ್’ ಎಂಬ ಹೆಸರಿನಲ್ಲೇ ಮಾರುಕಟ್ಟೆ ಮಾಡಿದರೆ ಗ್ರಾಹಕರನ್ನು ದಾರಿ ತಪ್ಪಿಸುವ ಸಾಧ್ಯತೆ ಹೆಚ್ಚುತ್ತದೆ. ಇಂತಹ ಉತ್ಪನ್ನವನ್ನು ಪನೀರ್ ಎಂದು ಪ್ರತಿನಿಧಿಸುವುದು ತಪ್ಪು ಲೇಬಲಿಂಗ್ ಅಥವಾ ತಪ್ಪು ಮಾಹಿತಿ ನೀಡುವ ಕ್ರಮವಾಗಬಹುದು ಎಂದು ಇಲಾಖೆ ಹೇಳಿದೆ.
ಡೈರಿ ಅಲ್ಲದ ಪದಾರ್ಥಗಳು ಅಥವಾ ಬದಲಿಯಾಗಿ ಬಳಸಿರುವ ಹಾಲಿನ ಅಂಶಗಳ ಕುರಿತು ಅನ್ವಯವಾಗುವ ಲೇಬಲಿಂಗ್ ನಿಯಮಗಳಂತೆ ಸೂಕ್ತ ಘೋಷಣೆಗಳನ್ನು ಮಾಡುವುದು ಕಡ್ಡಾಯವಾಗಿದೆ ಎಂದು ಇಲಾಖೆ ತಿಳಿಸಿದೆ.
ಇದನ್ನೂ ಓದಿ : ವೈಜ್ಞಾನಿಕ ಮನೋಭಾವನೆ ಹಾಗೂ ಬಹುಮುಖಿ ವ್ಯಕ್ತಿತ್ವ ರೂಪಿಸಿಕೊಳ್ಳಲು ಪುಸ್ತಕ ಓದು ಅತ್ಯಗತ್ಯ: ಎಚ್.ಟಿ. ಗುರುರಾಜು
ಎಲ್ಲಾ ಡೈರಿ ಅಲ್ಲದ ಉತ್ಪನ್ನಗಳಿಗೂ ನಿಷೇಧವಲ್ಲ
ಈ ನಿಷೇಧವು ಡೈರಿ ಅಲ್ಲದ ಪದಾರ್ಥಗಳನ್ನು ಒಳಗೊಂಡಿರುವ ಎಲ್ಲಾ ಆಹಾರ ಉತ್ಪನ್ನಗಳಿಗೆ ಅನ್ವಯಿಸುವುದಿಲ್ಲ ಎಂದು ಸರ್ಕಾರ ಸ್ಪಷ್ಟಪಡಿಸಿದೆ. ಆಹಾರ ಸುರಕ್ಷತೆ ಮತ್ತು ಗುಣಮಟ್ಟ ಪ್ರಾಧಿಕಾರದಿಂದ ಪ್ರತ್ಯೇಕ ಗುಣಮಟ್ಟದ ಮಾನದಂಡಗಳನ್ನು ನಿಗದಿಪಡಿಸದ ಹಾಗೂ ಯಾವುದೇ ಮಾನದಂಡೀಕೃತ ಆಹಾರ ಉತ್ಪನ್ನದ ವ್ಯಾಪ್ತಿಗೆ ಬರದ ಡೈರಿ ಅನಲಾಗ್ ಉತ್ಪನ್ನಗಳಿಗೆ ಮಾತ್ರ ಈ ನಿಷೇಧ ಅನ್ವಯಿಸುತ್ತದೆ.
ಸ್ವಂತ ಗುಣಮಟ್ಟದ ಮಾನದಂಡಗಳನ್ನು ಹೊಂದಿರುವ ಫ್ರೋಜನ್ ಡೆಸರ್ಟ್ಗಳು, ಸಂಸ್ಕರಿತ ಚೀಸ್ ಹಾಗೂ ಮಿಶ್ರ ಕೊಬ್ಬಿನ ಸ್ಪ್ರೆಡ್ಗಳು ಈ ನಿಷೇಧದ ವ್ಯಾಪ್ತಿಗೆ ಬರುವುದಿಲ್ಲ. ಇವುಗಳಿಗೆ ಪ್ರತ್ಯೇಕ ಆಹಾರ ಮಾನದಂಡಗಳು ಇರುವುದರಿಂದ ಅವುಗಳನ್ನು ಈ ಆದೇಶದಿಂದ ಹೊರಗಿಡಲಾಗಿದೆ.
ಹೋಟೆಲ್, ರೆಸ್ಟೋರೆಂಟ್ಗಳಿಗೂ ಅನ್ವಯ
ನಿಷೇಧವು ಕೇವಲ ಮಾರುಕಟ್ಟೆಯಲ್ಲಿ ಪನೀರ್ ಮಾರಾಟಕ್ಕೆ ಮಾತ್ರ ಸೀಮಿತವಾಗಿಲ್ಲ. ಆಹಾರ ವ್ಯಾಪಾರ ನಡೆಸುವವರು ಅನಲಾಗ್ ಅಥವಾ ಡೈರಿ ಅಲ್ಲದ ಪನೀರ್ ಅನ್ನು ಆಹಾರ ತಯಾರಿಕೆಯಲ್ಲಿ ಬಳಸುವುದು, ಸಂಗ್ರಹಿಸುವುದು, ಪೂರೈಸುವುದು ಅಥವಾ ಮಾರಾಟ ಮಾಡುವುದನ್ನೂ ಸರ್ಕಾರ ನಿಷೇಧಿಸಿದೆ. ಹೀಗಾಗಿ ಹೋಟೆಲ್, ರೆಸ್ಟೋರೆಂಟ್, ಕ್ಯಾಟರಿಂಗ್ ಸಂಸ್ಥೆಗಳು ಹಾಗೂ ಇತರ ಆಹಾರ ಉತ್ಪಾದನಾ ಘಟಕಗಳು ಇಂತಹ ಪನೀರ್ ಅನ್ನು ಯಾವುದೇ ಆಹಾರ ಪದಾರ್ಥದ ತಯಾರಿಕೆಯಲ್ಲಿ ಬಳಸುವಂತಿಲ್ಲ.
ಈ ಮೂಲಕ ಅನಲಾಗ್ ಪನೀರ್ನ ತಯಾರಿಕೆಯಿಂದ ಆರಂಭಿಸಿ ಸಂಸ್ಕರಣೆ, ಪ್ಯಾಕಿಂಗ್, ಸಂಗ್ರಹಣೆ, ಸಾಗಣೆ, ಸಗಟು ಮತ್ತು ಚಿಲ್ಲರೆ ಮಾರಾಟ ಸೇರಿದಂತೆ ಸಂಪೂರ್ಣ ಪೂರೈಕೆ ಸರಪಳಿಯ ಮೇಲೆಯೇ ಒಂದು ವರ್ಷದ ನಿಷೇಧ ಜಾರಿಯಾಗಲಿದೆ.
ಆಹಾರ ಸುರಕ್ಷತಾ ನಿಯಮಗಳ ಪರಿಣಾಮಕಾರಿ ಅನುಷ್ಠಾನಕ್ಕಾಗಿ ರಾಜ್ಯಾದ್ಯಂತ ಕ್ರಮ ಕೈಗೊಳ್ಳಲಾಗುವುದು ಎಂದು ಇಲಾಖೆ ತಿಳಿಸಿದ್ದು, ಆಹಾರ ವ್ಯಾಪಾರಿಗಳು ಆದೇಶವನ್ನು ಕಟ್ಟುನಿಟ್ಟಾಗಿ ಪಾಲಿಸುವಂತೆ ಸೂಚಿಸಿದೆ. ಗ್ರಾಹಕರು ಕೂಡ ‘ಪನೀರ್’ ಹೆಸರಿನಲ್ಲಿ ಮಾರಾಟವಾಗುವ ಉತ್ಪನ್ನಗಳ ಬಗ್ಗೆ ಎಚ್ಚರಿಕೆ ವಹಿಸುವಂತೆ ಇಲಾಖೆ ಸಲಹೆ ನೀಡಿದೆ.
ಈ ಕ್ರಮದ ಮುಖ್ಯ ಉದ್ದೇಶ ಗ್ರಾಹಕರಿಗೆ ನಿಗದಿತ ಆಹಾರ ಗುಣಮಟ್ಟಕ್ಕೆ ಅನುಗುಣವಾದ ನೈಜ ಉತ್ಪನ್ನಗಳು ದೊರೆಯುವಂತೆ ನೋಡಿಕೊಳ್ಳುವುದು ಹಾಗೂ ಡೈರಿ ಅಲ್ಲದ ಪದಾರ್ಥಗಳನ್ನು ಬಳಸಿ ತಯಾರಿಸಿದ ಪನೀರ್ನಂತಹ ಉತ್ಪನ್ನಗಳಿಂದ ಗ್ರಾಹಕರು ದಾರಿ ತಪ್ಪದಂತೆ ತಡೆಯುವುದಾಗಿದೆ.
ಇದನ್ನೂ ನೋಡಿ : ಇಸ್ರೋ ವಿಜ್ಞಾನಿಗಳ ರಾಜೀನಾಮೆ: ಭವಿಷ್ಯದ ಬಾಹ್ಯಾಕಾಶ ಕನಸುಗಳಿಗೆ ಎಚ್ಚರಿಕೆಯ ಗಂಟೆ? Janashakthi Media
