ತ್ರಿಪುರಾ: ತ್ರಿಪುರಾ ಬುಡಕಟ್ಟು ಪ್ರದೇಶಗಳ ಸ್ವಾಯತ್ತ ಜಿಲ್ಲಾ ಪರಿಷತ್ (ಎಡಿಸಿ) ಚುನಾವಣೆಯ ವೇಳಾಪಟ್ಟಿ ಅಧಿಕೃತವಾಗಿ ಪ್ರಕಟವಾಗುವ ಮುನ್ನವೇ ಎಡಪಕ್ಷಗಳ ಮೈತ್ರಿಯಾದ ಲೆಫ್ಟ್ ಫ್ರಂಟ್ ಮಾರ್ಚ್ 9ರಂದು ತನ್ನ ಅಭ್ಯರ್ಥಿಗಳ ಪಟ್ಟಿಯನ್ನು ಪ್ರಕಟಿಸಿದೆ. ಧರ್ಮನಗರ ವಿಧಾನಸಭಾ ಕ್ಷೇತ್ರದ ಉಪಚುನಾವಣೆಯಿಗೂ ಅಭ್ಯರ್ಥಿಗಳನ್ನು ಘೋಷಿಸಲಾಗಿದೆ. ತ್ರಿಪುರಾ
ಅಗರ್ತಲಾದ ದಶರಥ್ ದೇವ್ ಸ್ಮೃತಿ ಭವನದಲ್ಲಿ ನಡೆದ ಪತ್ರಿಕಾಗೋಷ್ಠಿಯಲ್ಲಿ ತ್ರಿಪುರಾ ಲೆಫ್ಟ್ ಫ್ರಂಟ್ ಸಮಿತಿಯ ಸಂಯೋಜಕ ಮನಿಕ್ ಡೇ ಪಟ್ಟಿಯನ್ನು ಪ್ರಕಟಿಸಿದರು. ಈ ವೇಳೆ ಸಿಪಿಐ(ಎಂ) ತ್ರಿಪುರಾ ರಾಜ್ಯ ಸಮಿತಿ ಕಾರ್ಯದರ್ಶಿ ಜಿತೇಂದ್ರ ಚೌಧರಿ, ಸಿಪಿಐ ರಾಜ್ಯ ಕಾರ್ಯದರ್ಶಿ ಮಿಲನ್ ಬೈದ್ಯ ಮತ್ತು ಆರ್ಎಸ್ಪಿ ರಾಜ್ಯ ಕಾರ್ಯದರ್ಶಿ ದೀಪಕ್ ದೇವ್ ಉಪಸ್ಥಿತರಿದ್ದರು.
ಎಡಪಕ್ಷಗಳ ನಾಯಕರು ಎಡಿಸಿ ಪ್ರದೇಶಗಳ ಮತ್ತು ಧರ್ಮನಗರ ಕ್ಷೇತ್ರದ ಮತದಾರರನ್ನು ಧೈರ್ಯವಾಗಿ ಮುಂದೆ ಬಂದು ಮತದಾನ ಹಕ್ಕು ಚಲಾಯಿಸಲು ಕರೆ ನೀಡಿದರು. ರಾಜ್ಯದಲ್ಲಿ ಉಂಟಾಗಿರುವ ‘ಅರಾಜಕತೆ’ ವಿರುದ್ಧ ಹೋರಾಟ ಬಲಪಡಿಸಿ, ಪ್ರಜಾಪ್ರಭುತ್ವವನ್ನು ಪುನಃಸ್ಥಾಪಿಸಿ ಜನರ ಹಕ್ಕುಗಳನ್ನು ಮರುಸ್ಥಾಪಿಸಲು ಮತದಾರರು ಕೈಜೋಡಿಸಬೇಕು ಎಂದು ಮನವಿ ಮಾಡಿದರು.
ಇದನ್ನೂ ಓದಿ: ನೇಮಕಾತಿ ಅಕ್ರಮಗಳ ಪ್ರಕರಣ: ಆರ್. ಡಿ. ಪಾಟೀಲ್ಗೆ ಜಾಮೀನು ನೀಡಲು ಹೈಕೋರ್ಟ್ ನಕಾರ
ಪತ್ರಿಕಾಗೋಷ್ಠಿಯಲ್ಲಿ ಮಾತನಾಡಿದ ಮನಿಕ್ ಡೇ, ಎಡಿಸಿ ಸ್ಥಾಪನೆಯೇ ಎಡಪಕ್ಷಗಳ ಹೋರಾಟ ಮತ್ತು ಜನಆಂದೋಲನಗಳ ಫಲವಾಗಿದೆ ಎಂದು ಹೇಳಿದರು. ಬಿಜೆಪಿ ಹಾಗೂ ಟಿಪ್ರಾ ಮೊಥಾ ಪಕ್ಷಗಳು ಸೇರಿಕೊಂಡಿರುವ ಮೈತ್ರಿ ಸರ್ಕಾರ ರಾಜ್ಯದಲ್ಲಿ ಅಶಾಂತಿ ಮತ್ತು ಅವ್ಯವಸ್ಥೆಯ ವಾತಾವರಣ ನಿರ್ಮಿಸಿದೆ ಎಂದು ಅವರು ಆರೋಪಿಸಿದರು.
ಅಭಿವೃದ್ಧಿ ನಿಧಿಗಳ ದುರುಪಯೋಗ ಹಾಗೂ ಭ್ರಷ್ಟಾಚಾರ ನಡೆಯುತ್ತಿದೆ ಎಂದು ಆರೋಪಿಸಿದ ಅವರು, ಎಡಿಸಿ ನೌಕರರಿಗೆ ಸಮಯಕ್ಕೆ ವೇತನ ಸಿಗುತ್ತಿಲ್ಲ ಮತ್ತು ನಿವೃತ್ತ ನೌಕರರಿಗೆ ಪಿಂಚಣಿ ಹಾಗೂ ಇತರೆ ಸೌಲಭ್ಯಗಳು ದೊರೆಯುತ್ತಿಲ್ಲ ಎಂದು ಹೇಳಿದರು. ಎಡಿಸಿ ಆಡಳಿತದ ವಿರುದ್ಧ ಸಾರ್ವಜನಿಕ ಅಸಮಾಧಾನ ಮತ್ತು ಪ್ರತಿಭಟನೆಗಳು ಹೆಚ್ಚುತ್ತಿರುವುದನ್ನೂ ಅವರು ಉಲ್ಲೇಖಿಸಿದರು.
“ಎಡಪಕ್ಷಗಳು ಎಡಿಸಿ ಆಡಳಿತ ನಡೆಸಿದ ಸಂದರ್ಭದಲ್ಲಿ ಆದಿವಾಸಿ ಪ್ರದೇಶಗಳ ಸಮಗ್ರ ಅಭಿವೃದ್ಧಿಯನ್ನು ಗಮನದಲ್ಲಿಟ್ಟುಕೊಂಡು ಕೆಲಸ ಮಾಡಲಾಗುತ್ತಿತ್ತು. ಆದರೆ ಇತರೆ ಶಕ್ತಿಗಳು ಆಡಳಿತ ನಡೆಸಿದಾಗ ಅಶಾಂತಿ ಉಂಟಾಗುತ್ತದೆ. ಈಗ ಟಿಪ್ರಾ ಮೊಥಾ ಆಡಳಿತದಲ್ಲಿಯೂ ಇದೇ ಪರಿಸ್ಥಿತಿ ಕಾಣಿಸುತ್ತಿದೆ” ಎಂದು ಡೇ ಹೇಳಿದರು.
ಹಿಂದಿನ ಎಡಿಸಿ ಚುನಾವಣೆಯ ವೇಳೆ ನೀಡಿದ ಭರವಸೆಗಳನ್ನು ಟಿಪ್ರಾ ಮೊಥಾ ಈಡೇರಿಸಲು ವಿಫಲವಾಗಿದೆ ಎಂದು ಅವರು ಆರೋಪಿಸಿದರು. ಎಡಿಸಿ ಪ್ರದೇಶಗಳಲ್ಲಿ ಶಿಕ್ಷಣ ಮತ್ತು ಆರೋಗ್ಯ ವ್ಯವಸ್ಥೆಗಳು ಕುಸಿದಿದ್ದು, ರಸ್ತೆಗಳ ಸ್ಥಿತಿ ಹದಗೆಟ್ಟಿದೆ ಎಂದು ಹೇಳಿದರು.
ರಾಜ್ಯ ಸರ್ಕಾರ ಹಾಗೂ ಎಡಿಸಿ ಆಡಳಿತ ಅನೇಕ ಶಾಲೆಗಳನ್ನು ಮುಚ್ಚಿರುವುದರಿಂದ ಶಿಕ್ಷಣ ವ್ಯವಸ್ಥೆ ನಾಶದ ಅಂಚಿಗೆ ತಲುಪಿದೆ ಎಂದು ಡೇ ಆರೋಪಿಸಿದರು. ಹಸಿವು, ಉಪವಾಸದಿಂದ ಸಾವುಗಳು ಮತ್ತು ಕುಟುಂಬಗಳು ಮಕ್ಕಳನ್ನು ಮಾರಾಟ ಮಾಡುವಂತಹ ಘಟನೆಗಳ ಉಲ್ಲೇಖ ಮಾಡುತ್ತಾ, ರಾಜ್ಯದ ಜನತೆಗೆ ವಿಶ್ವಾಸಾರ್ಹ ಶಕ್ತಿಯೆಂದರೆ ಲೆಫ್ಟ್ ಫ್ರಂಟ್ ಮಾತ್ರ ಎಂದು ಹೇಳಿದರು.
ಸಿಪಿಐ(ಎಂ) ರಾಜ್ಯ ಕಾರ್ಯದರ್ಶಿ ಜಿತೇಂದ್ರ ಚೌಧರಿ ಮಾತನಾಡಿ, ಎಡಿಸಿ ಚುನಾವಣೆಗೆ ಮುನ್ನ ಆಡಳಿತಾರೂಢ ಪಕ್ಷಕ್ಕೆ ಬೆಂಬಲ ಪಡೆಯಲು ಮುಖ್ಯಮಂತ್ರಿ ಸರ್ಕಾರದ ಹಣವನ್ನು ಬಳಸಿ ನೂಲು, ಹಾಸಿಗೆ, ನೀರಿನ ಡ್ರಮ್ ಸೇರಿದಂತೆ ವಿವಿಧ ವಸ್ತುಗಳನ್ನು ವಿತರಿಸುತ್ತಿದ್ದಾರೆ ಎಂದು ಆರೋಪಿಸಿದರು. ಟಿಪ್ರಾ ಮೊಥಾ ಪಕ್ಷವೂ ಇದೇ ರೀತಿಯ ಕ್ರಮ ಕೈಗೊಂಡಿದೆ ಎಂದು ಹೇಳಿದರು.
ಎರಡೂ ಪಕ್ಷಗಳು ಎಡಿಸಿ ಚುನಾವಣೆಯಲ್ಲಿ 28 ಸ್ಥಾನಗಳನ್ನೂ ಗೆಲ್ಲುತ್ತೇವೆ ಎಂದು ಹೇಳುತ್ತಿರುವುದನ್ನು ಉಲ್ಲೇಖಿಸಿದ ಅವರು, ಮತದಾರರು ಹೊಸ ಆಮಿಷಗಳಿಗೆ ಒಳಗಾಗಬಾರದು ಎಂದು ಮನವಿ ಮಾಡಿದರು.
ಕಳೆದ ಎಂಟು ವರ್ಷಗಳಲ್ಲಿ ಧರ್ಮನಗರದಲ್ಲಿ ಹಿಂಸಾಚಾರ ಹೆಚ್ಚಾಗಿದೆ. ವಿರೋಧ ಪಕ್ಷಗಳ ಕಚೇರಿಗಳ ಮೇಲೆ ದಾಳಿ ನಡೆದಿದ್ದು, ನೌಕರರ ಸಂಘಗಳ ಕಚೇರಿಗಳನ್ನು ಬಲವಂತವಾಗಿ ಕಬಳಿಸಲಾಗಿದೆ ಎಂದು ಚೌಧರಿ ಆರೋಪಿಸಿದರು. ಸಿಪಿಐ(ಎಂ) ನಾಯಕ ಹಾಗೂ ಲೆಫ್ಟ್ ಫ್ರಂಟ್ ಅಭ್ಯರ್ಥಿ ಅಮಿತಾಭ್ ದತ್ತಾ ಮೇಲೆ ನಾಲ್ಕು ಬಾರಿ ದಾಳಿ ನಡೆದಿದ್ದು, ಅವರು ಅಲ್ಪ ಅಂತರದಲ್ಲಿ ಪಾರಾಗಿದ್ದಾರೆ ಎಂದರು.
“ಧರ್ಮನಗರವನ್ನು ಅಧಿನಾಯಕಶಾಹಿ ಮತ್ತು ಫ್ಯಾಸಿಸ್ಟ್ ವಿಧಾನಗಳಿಂದ ಅಧಿಕಾರ ಉಳಿಸಿಕೊಳ್ಳುವ ಪ್ರಯೋಗಾಲಯವನ್ನಾಗಿ ಬಳಸಲಾಗುತ್ತಿದೆ. ಅಲ್ಲಿನ ಜನರನ್ನು ಈ ಪರಿಸ್ಥಿತಿಯಿಂದ ಮುಕ್ತಗೊಳಿಸಲು ಲೆಫ್ಟ್ ಫ್ರಂಟ್ ಬದ್ಧವಾಗಿದೆ” ಎಂದು ಚೌಧರಿ ಹೇಳಿದರು.
ಮುಂದಿನ ಚುನಾವಣೆಗಳನ್ನು ಲೆಫ್ಟ್ ಫ್ರಂಟ್ ತೀವ್ರವಾಗಿ ಎದುರಿಸಲಿದೆ. ಎಡಿಸಿ ಪ್ರದೇಶಗಳು ಮತ್ತು ಧರ್ಮನಗರದ ಜನರು ಪ್ರಜಾಪ್ರಭುತ್ವ ಮತ್ತು ಅಭಿವೃದ್ಧಿಯನ್ನು ಪುನಃಸ್ಥಾಪಿಸಲು ತಮ್ಮ ಪ್ರಯತ್ನಗಳಿಗೆ ಬೆಂಬಲ ನೀಡುತ್ತಾರೆ ಎಂಬ ವಿಶ್ವಾಸವಿದೆ ಎಂದು ನಾಯಕರು ಹೇಳಿದರು.
ಇದನ್ನೂ ನೋಡಿ: Karnataka Legislative Assembly Live – Day 04 | ವಿಧಾನಸಭೆ ಬಜೆಟ್ ಅಧಿವೇಶನದ ನೇರಪ್ರಸಾರ
