UPI ಮೂಲಕ ಹಣ ವಸೂಲಿ, ರಸೀದಿ ಇಲ್ಲ: ರೈಲ್ವೆ ಸಿಬ್ಬಂದಿ ವಿರುದ್ಧ ದೂರು
ಬೆಂಗಳೂರು: ರಾಜಧಾನಿ ಎಕ್ಸ್‌ಪ್ರೆಸ್ ರೈಲಿನಲ್ಲಿ ಪ್ರಯಾಣಿಸಿದ 40 ವರ್ಷದ ವ್ಯಕ್ತಿಯೊಬ್ಬರು, ದಂಡ ಹಾಗೂ ಟಿಕೆಟ್ ಶುಲ್ಕ ಪಾವತಿಸಿದ ನಂತರವೂ ಆಹಾರ, ನೀರು ಮತ್ತು ಹಾಸಿಗೆಗಾಗಿ ಹೆಚ್ಚುವರಿ ಹಣ ವಸೂಲಿ ಮಾಡಲಾಗಿದೆ ಎಂದು ಆರೋಪಿಸಿದ್ದಾರೆ. ರಾಜಧಾನಿ
ಮಹಾರಾಷ್ಟ್ರದ ನಿವಾಸಿ ಹಾಗೂ ಕಲಬುರಗಿಯಲ್ಲಿ ಭದ್ರತಾ ಸಿಬ್ಬಂದಿಯಾಗಿ ಕೆಲಸ ಮಾಡುವ ಓಂಕಾರ್ ಎಸ್. ಗೋಂಡಹಳ್ಳಿ ಅವರು ಜೂನ್ 16ರಂದು ನಾಗಪುರದಿಂದ ಬೆಂಗಳೂರಿಗೆ ಹಜ್ರತ್ ನಿಜಾಮುದ್ದೀನ್–ಕೆಎಸ್‌ಆರ್ ಬೆಂಗಳೂರು ರಾಜಧಾನಿ ಎಕ್ಸ್‌ಪ್ರೆಸ್‌ನಲ್ಲಿ ಪ್ರಯಾಣಿಸಲು ಯತ್ನಿಸಿದರು. ದೃಢೀಕೃತ ಟಿಕೆಟ್ ಇಲ್ಲದೆ ರೈಲೇರಿದ ಅವರು, ನಿಯಮಾನುಸಾರ ದಂಡ ಮತ್ತು ಟಿಕೆಟ್ ಶುಲ್ಕ ಪಾವತಿಸಲು ಸಿದ್ಧರಾಗಿದ್ದರು ಎಂದು ತಿಳಿಸಿದ್ದಾರೆ.
ಟಿಟಿಇ (TTE) ಅವರನ್ನು ಹುಡುಕುತ್ತಿದ್ದಾಗ ಕೋಚ್ ಅಟೆಂಡೆಂಟ್ ಒಬ್ಬರು ಟಿಕೆಟ್ ಬಗ್ಗೆ ವಿಚಾರಿಸಿ, ನಂತರ ಟಿಟಿಇಯನ್ನು ಕರೆಸಿಕೊಂಡರು. “ಟಿಟಿಇ ಕೆಲವು ನಿಮಿಷಗಳಲ್ಲಿ ಬಂದರು, ಆದರೆ ಅವರು ಸರಿಯಾದ ಯೂನಿಫಾರ್ಮ್ ಅಥವಾ ಹೆಸರು ಫಲಕ ಧರಿಸಿರಲಿಲ್ಲ,” ಎಂದು ಓಂಕಾರ್ ತಿಳಿಸಿದ್ದಾರೆ.
ಇದನ್ನೂ ಓದಿ: ಕರ್ನಾಟಕದಲ್ಲಿ ಟೋಲ್ ಆದಾಯ ಐದು ವರ್ಷಗಳಲ್ಲಿ ದ್ವಿಗುಣ: ₹4,779 ಕೋಟಿ ಸಂಗ್ರಹ
ದೀರ್ಘ ಚರ್ಚೆಯ ಬಳಿಕ, ಟಿಟಿಇ ಒಟ್ಟು ₹2,500 (ಟಿಕೆಟ್ ಶುಲ್ಕ ಮತ್ತು ದಂಡ ಸೇರಿ) ಕೇಳಿದರೆಂದು ಅವರು ಆರೋಪಿಸಿದ್ದಾರೆ. ಆ ಹಣವನ್ನು ಯುಪಿಐ ಮೂಲಕ ಅಟೆಂಡೆಂಟ್‌ನ ವೈಯಕ್ತಿಕ ಖಾತೆಗೆ ಪಾವತಿಸಲು ಹೇಳಲಾಗಿದೆ. “ಹಣ ಪಾವತಿಸಿದ ನಂತರ B7 ಕೋಚ್‌ನಲ್ಲಿ ಸೀಟ್ ನೀಡಲಾಯಿತು. ರಸೀದಿ ನಂತರ ಕೊಡುತ್ತೇವೆ ಎಂದು ಟಿಟಿಇ ಹೇಳಿದ್ದಾರೆ,” ಎಂದು ಅವರು ತಿಳಿಸಿದ್ದಾರೆ.
ನಿಯಮ ಪ್ರಕಾರ, ಹೆಚ್ಚುವರಿ ಶುಲ್ಕ ವಸೂಲಿ ಮಾಡಿದ ತಕ್ಷಣ ಟಿಟಿಇ Excess Fare Ticket (EFT) ನೀಡಬೇಕು. ಆದರೆ ಈ ಪ್ರಕರಣದಲ್ಲಿ ಹಣ ಪಾವತಿಸಿದ ಬಳಿಕ ಟಿಟಿಇ ಮತ್ತೆ ಕಾಣಿಸಿಕೊಂಡಿಲ್ಲ ಎಂದು ಆರೋಪಿಸಲಾಗಿದೆ.
ಸೀಟ್ ಸಿಕ್ಕಿದ್ದರೂ, ದಂಡ ಪಾವತಿಸಿದುದಕ್ಕೆ ಯಾವುದೇ ಸಾಕ್ಷಿ ಇರಲಿಲ್ಲ ಎಂದು ಓಂಕಾರ್ ಹೇಳಿದ್ದಾರೆ. ಈ ಪರಿಸ್ಥಿತಿಯನ್ನು ಬಳಸಿಕೊಂಡು ಕ್ಯಾಟರಿಂಗ್ ಸಿಬ್ಬಂದಿ ಆಹಾರಕ್ಕಾಗಿ ಮತ್ತೆ ಹಣ ಕೇಳಿದರೆಂದು ಅವರು ಆರೋಪಿಸಿದ್ದಾರೆ. “ಇತರ ಪ್ರಯಾಣಿಕರಂತೆ ಹಣ ಪಾವತಿಸಿದ್ದರೂ, ಆಹಾರ, ಕುಡಿಯುವ ನೀರು ಮತ್ತು ಹಾಸಿಗೆಗಾಗಿ ಮತ್ತೆ ಹಣ ಕೊಡಬೇಕಾಯಿತು,” ಎಂದು ತಿಳಿಸಿದ್ದಾರೆ.
ನಿಯಮ ಉಲ್ಲಂಘನೆ ನಡೆದಿದೆ ಎಂದು ಆರೋಪಿಸಿ, ಅವರು ವಹಿವಾಟಿನ ವಿವರಗಳು ಹಾಗೂ ಸಿಬ್ಬಂದಿಯ ಚಿತ್ರಗಳೊಂದಿಗೆ ಮುಂದಿನ ದಿನವೇ ಬೆಂಗಳೂರು ವಿಭಾಗೀಯ ರೈಲ್ವೆ ವ್ಯವಸ್ಥಾಪಕರಿಗೆ ದೂರು ಸಲ್ಲಿಸಿದ್ದಾರೆ.
ಈ ಬಗ್ಗೆ ದಕ್ಷಿಣ ಪಶ್ಚಿಮ ರೈಲ್ವೆಯ (SWR) ಬೆಂಗಳೂರು ವಿಭಾಗ ಜುಲೈ 29ರಂದು ಆಂತರಿಕ ತನಿಖೆ ಆದೇಶಿಸಿದೆ. “ತನಿಖೆ ಆಧಾರದಲ್ಲಿ ಸೂಕ್ತ ಕ್ರಮ ಕೈಗೊಳ್ಳಲಾಗುವುದು,” ಎಂದು ಹಿರಿಯ ಅಧಿಕಾರಿಯೊಬ್ಬರು ತಿಳಿಸಿದ್ದಾರೆ.
ಇದನ್ನೂ ನೋಡಿ: “ಮುತ್ತು ಬಂದಿದೆ ಕೇರಿಗೆ” — ಕನಕದಾಸರ ಕುರಿತ ನೃತ್ಯ ರೂಪಕ Janashakthi Media
