ಮ್ಯಾಡ್ರಿಡ್: ದಕ್ಷಿಣ–ಪೂರ್ವ ಸ್ಪೇನ್ನಲ್ಲಿ ಭಾರೀ ಕಾಡ್ಗಿಚ್ಚನ್ನು ನಿಯಂತ್ರಿಸಲು ತುರ್ತು ಪಡೆಗಳು ಹೋರಾಟ ನಡೆಸುತ್ತಿದ್ದು, ದೇಶದ ಇತಿಹಾಸದಲ್ಲೇ ಅತ್ಯಂತ ಭೀಕರ ಅಗ್ನಿ ಅವಘಡಗಳಲ್ಲಿ ಒಂದಾಗಿ ಇದು ಪರಿಣಮಿಸಿದೆ. ಅಲ್ಮೆರಿಯಾ ಪ್ರಾಂತ್ಯದ ಹಲವೆಡೆ ಬೆಂಕಿ ವ್ಯಾಪಕವಾಗಿ ಹರಡುತ್ತಿದ್ದು, ಕನಿಷ್ಠ 12 ಮಂದಿ ಸಾವನ್ನಪ್ಪಿದ್ದು, 23 ಮಂದಿ ಕಾಣೆಯಾಗಿದ್ದಾರೆ.
ಬೆದಾರ್ ಗ್ರಾಮ ಸುತ್ತಮುತ್ತ ನೂರಾರು ಅಗ್ನಿಶಾಮಕ ಸಿಬ್ಬಂದಿ ಹಾಗೂ ತುರ್ತು ಸೇವಾ ಸಿಬ್ಬಂದಿಯನ್ನು ನಿಯೋಜಿಸಲಾಗಿದೆ. ಸಾವನ್ನಪ್ಪಿದವರಲ್ಲಿ ನಾಲ್ವರು ಬ್ರಿಟಿಷ್ ನಾಗರಿಕರು ಸೇರಿದ್ದಾರೆ ಎಂದು ಸ್ಪೇನ್ ಅಧಿಕಾರಿಗಳು ತಿಳಿಸಿದ್ದಾರೆ.
ಲಾಸ್ ಗಲ್ಲಾರ್ಡೋಸ್ ಪ್ರದೇಶದ ಅಧಿಕಾರಿಗಳು ಸಾವಿನ ಸಂಖ್ಯೆ ಇನ್ನಷ್ಟು ಏರಿಕೆಯಾಗುವ ಸಾಧ್ಯತೆ ಇದೆ ಎಂದು ಎಚ್ಚರಿಕೆ ನೀಡಿದ್ದಾರೆ. ಇನ್ನೂ ಕೆಲವು ವಿದೇಶಿ ನಾಗರಿಕರು, ವಿಶೇಷವಾಗಿ ಬ್ರಿಟಿಷ್ ನಾಗರಿಕರು, ಬಲಿಯಾಗಿರುವ ಭೀತಿ ವ್ಯಕ್ತವಾಗಿದೆ.
ಇದನ್ನೂ ಓದಿ: ಪಾಲಿಕೆ ಆಡಳಿತಾಧಿಕಾರಿ ಕಚೇರಿಗೆ ಮುತ್ತಿಗೆ, ಬೀದಿಬದಿ ವ್ಯಾಪಾರಿಗಳ ಧರಣಿ ಅಂತ್ಯ
ಜುಲೈ 9ರ ಮಧ್ಯಾಹ್ನ ತಾಪಮಾನ ಸುಮಾರು 40 ಡಿಗ್ರಿ ಸೆಲ್ಸಿಯಸ್ಗೆ ಏರಿಕೆಯಾಗಿದ್ದು, ಒಣ ಮಣ್ಣು ಮತ್ತು ಬಲವಾದ ಗಾಳಿಯಿಂದ ಬೆಂಕಿ ವೇಗವಾಗಿ ವ್ಯಾಪಿಸಿತು.
ಈ ಕಾಡ್ಗಿಚ್ಚು ದಕ್ಷಿಣ ಯೂರೋಪಿನಾದ್ಯಂತ ಉಷ್ಣತರಂಗದ ನಡುವೆ ಉಂಟಾಗಿದ್ದು, ಸ್ಪೇನ್, ಫ್ರಾನ್ಸ್ ಮತ್ತು ಪೋರ್ಟುಗಲ್ ದೇಶಗಳಲ್ಲಿ ಕಾಡ್ಗಿಚ್ಚುಗಳು ಹೆಚ್ಚುತ್ತಿರುವ ಹಿನ್ನೆಲೆಯಲ್ಲಿದೆ.
ನಾಲ್ಕು ಮೃತದೇಹಗಳು ಸುಟ್ಟು ಕರಕಲಾದ ಕಾರಿನಲ್ಲಿ ಪತ್ತೆಯಾಗಿವೆ. ಆಂಡಲುಸಿಯಾದ ಆರೋಗ್ಯ ಮತ್ತು ತುರ್ತು ಸೇವಾ ಸಚಿವ ಆಂಟೋನಿಯೋ ಸಾಂಜ್ ಅವರು, ಈವರು “ಬ್ರಿಟಿಷ್ ಮೂಲದವರು” ಆಗಿರಬಹುದು ಎಂದು ಹೇಳಿದ್ದಾರೆ. ಕಾರಿನ ಸ್ಟೀರಿಂಗ್ ಬಲಭಾಗದಲ್ಲಿದ್ದುದರಿಂದ ಈ ಶಂಕೆ ವ್ಯಕ್ತವಾಗಿದೆ.
ಸಂತ್ರಸ್ತರ ಗುರುತು ಕುರಿತು ಹೆಚ್ಚಿನ ಮಾಹಿತಿ ಬಿಡುಗಡೆ ಮಾಡಲಾಗಿಲ್ಲ.
ವೇಗವಾಗಿ ಹರಡುತ್ತಿರುವ ಬೆಂಕಿಯಿಂದ ಪರಿಸ್ಥಿತಿ ಅತ್ಯಂತ ಸಂಕೀರ್ಣವಾಗಿದೆ ಎಂದು ಸಾಂಜ್ ತಿಳಿಸಿದ್ದಾರೆ. ಸಾವನ್ನಪ್ಪಿದವರಲ್ಲಿ ಬಹುಪಾಲು ಅಥವಾ ಎಲ್ಲರೂ ವಿದೇಶಿ ನಾಗರಿಕರಾಗಿರುವ ಸಾಧ್ಯತೆ ಇದೆ ಎಂದು ಅವರು ಹೇಳಿದ್ದಾರೆ.
ರಜೆಗೆ ಕುಟುಂಬದೊಂದಿಗೆ ಸ್ಪೇನ್ಗೆ ಬಂದ ಲುಸಿಂಡಾ ಕೂರ್ಟ್ವಾ ಅವರು, ಬೆದಾರ್ನಿಂದ ಪಾರಾದ ಅನುಭವವನ್ನು ವಿವರಿಸಿದ್ದು, “ಅದು ಬಾಂಬ್ ಸ್ಫೋಟವಾದಂತೆ ಭಾಸವಾಯಿತು; ಆಕಾಶಕ್ಕೆ ದೊಡ್ಡ ಹೊಗೆ ಗುಡ್ಡ ಏರಿದಂತಿತ್ತು,” ಎಂದು ಹೇಳಿದ್ದಾರೆ.
ಇನ್ನೂ ಇಬ್ಬರು ಬ್ರಿಟಿಷ್ ನಾಗರಿಕರು ಕಾಲ್ನಡಿಗೆಯಲ್ಲೇ ಮನೆ ಬಿಟ್ಟು ಓಡಿಹೋಗುವ ವೇಳೆ ಸಾವನ್ನಪ್ಪಿರುವ ಶಂಕೆ ವ್ಯಕ್ತಪಡಿಸಿದ್ದಾರೆ. “ರಸ್ತೆ ಮುಚ್ಚಲ್ಪಟ್ಟಿದ್ದರಿಂದ ಅವರು ಹೀಗೆ ಓಡಿರಬಹುದು,” ಎಂದು ಅವರು ಹೇಳಿದ್ದಾರೆ.
ಕೆಲವರು ಸೂಚಿಸಿದ ತೆರವು ಮಾರ್ಗವನ್ನು ಅನುಸರಿಸದೇ ಇದ್ದ ಕಾರಣ ಹಾನಿ ಹೆಚ್ಚಿರಬಹುದು ಎಂದು ಅಧಿಕಾರಿಗಳು ತಿಳಿಸಿದ್ದಾರೆ. ಆದರೆ ಆ ಸೂಚನೆಗಳು ಎಷ್ಟು ಪರಿಣಾಮಕಾರಿಯಾಗಿ ಜನರಿಗೆ ತಲುಪಿದವು ಎಂಬುದು ಸ್ಪಷ್ಟವಾಗಿಲ್ಲ.
ಪ್ರಾಥಮಿಕ ತನಿಖೆಯಲ್ಲಿ ವಿದ್ಯುತ್ ತಂತಿ ಕುಸಿತವೇ ಬೆಂಕಿಗೆ ಕಾರಣವಾಗಿರಬಹುದು ಎಂದು ಶಂಕಿಸಲಾಗಿದೆ. ಆದರೆ ಸ್ಥಳೀಯ ವಿದ್ಯುತ್ ಕಂಪನಿಗಳು ಇದನ್ನು ತಳ್ಳಿಹಾಕಿವೆ.
ಲಾಸ್ ಗಲ್ಲಾರ್ಡೋಸ್ ಪ್ರದೇಶದಲ್ಲಿ ಅನೇಕ ವಿದೇಶಿ ನಾಗರಿಕರು ವಾಸಿಸುತ್ತಿರುವುದರಿಂದ, ಇನ್ನೂ ಹಲವರು ಸಂಪರ್ಕಕ್ಕೆ ಸಿಗದಿರುವ ಬಗ್ಗೆ ಆತಂಕ ಹೆಚ್ಚಿದೆ.
ಬೆಲ್ಜಿಯಂ ವಿದೇಶಾಂಗ ಸಚಿವ ಮ್ಯಾಕ್ಸಿಮ್ ಪ್ರೇವೋಟ್ ಅವರು, ಈ ಪ್ರದೇಶದಲ್ಲಿ ಅನೇಕ ಬೆಲ್ಜಿಯನ್ ನಾಗರಿಕರು ದ್ವಿತೀಯ ಮನೆಗಳನ್ನು ಹೊಂದಿದ್ದು, ಸಂಪರ್ಕಕ್ಕೆ ಸಿಗದವರನ್ನು ಹುಡುಕುವ ಕಾರ್ಯ ನಡೆಯುತ್ತಿದೆ ಎಂದು ತಿಳಿಸಿದ್ದಾರೆ.
ಸ್ಪೇನ್ ರಾಷ್ಟ್ರೀಯ ಹವಾಮಾನ ಇಲಾಖೆ AEMET ಪ್ರಕಾರ, ಶನಿವಾರದಿಂದ ಗಾಳಿ ಕಡಿಮೆಯಾಗುವ ಹಾಗೂ ತಾಪಮಾನ ಇಳಿಯುವ ಸಾಧ್ಯತೆ ಇರುವುದರಿಂದ ಅಗ್ನಿಶಾಮಕ ಕಾರ್ಯಾಚರಣೆಗಳಿಗೆ ಸ್ವಲ್ಪ ಅನುಕೂಲವಾಗಬಹುದು.
ಈಗಾಗಲೇ 12 ಮಂದಿ ಸಾವನ್ನಪ್ಪಿರುವುದರಿಂದ, ಈ ಕಾಡ್ಗಿಚ್ಚು ಸ್ಪೇನ್ ಇತಿಹಾಸದಲ್ಲಿನ ಅತ್ಯಂತ ಭೀಕರ ಅಗ್ನಿ ಅವಘಡಗಳಲ್ಲಿ ಒಂದಾಗಿ ದಾಖಲಾಗುತ್ತಿದೆ. 1984ರಲ್ಲಿ ಲಾ ಗೊಮೆರಾ ದ್ವೀಪದಲ್ಲಿ 20 ಮಂದಿ ಸಾವನ್ನಪ್ಪಿದ್ದರೆ, 1979ರಲ್ಲಿ ಲೊರೆಟ್ ಡೆ ಮಾರ್ ಸಮೀಪ 21 ಮಂದಿ ಮೃತಪಟ್ಟಿದ್ದರು.
ಯೂರೋಪ್ ವಿಶ್ವದಲ್ಲೇ ವೇಗವಾಗಿ ತಾಪಮಾನ ಏರಿಕೆಯಾಗುತ್ತಿರುವ ಖಂಡವಾಗಿದ್ದು, ಜಾಗತಿಕ ಸರಾಸರಿಗಿಂತ ಎರಡು ಪಟ್ಟು ಹೆಚ್ಚು ವೇಗದಲ್ಲಿ ಉಷ್ಣತೆ ಹೆಚ್ಚುತ್ತಿದೆ ಎಂದು ಕೋಪರ್ನಿಕಸ್ ಹವಾಮಾನ ಸೇವೆ ತಿಳಿಸಿ
ಇದನ್ನೂ ನೋಡಿ: ‘ಜನತಾ ಪ್ರಜಾಪ್ರಭುತ್ವಕ್ಕಾಗಿ ಬದುಕು’: ಕಾರ್ಮಿಕ ಚಳುವಳಿಯ ಹೆಜ್ಜೆಗುರುತು Janashakthi Media
