ಏನೆಂದು ಹಾಡಲೇ . . .

ಕವನ – ಹುರುಕಡ್ಲಿ ಶಿವಕುಮಾರ

ಸಂಪುಟ 9 ಸಂಚಿಕೆ 22 – 31 ಮೇ 2015

ಅವ್ವಾ . . . ತಾಯೀ . . .

ಭಾರತ ಮಾತೇ . . .

ಎಂಥ ದುರ್ದೈವವೇ ತಾಯೀ

ನಿನ್ನದೆಂಥ ದುರ್ದೈವ ?!

ನದಿವನಗಳ ನಾಡೇ . . .

ರಸಋಷಿಗಳ ಬೀಡೇ . . .

ಎಂದೇ ಹಾಡುತ್ತಾ ಬಂದೆವು ತಾಯೀ

ನಾವು ಹಾಡುತ್ತಲೇ ಬಂದೆವು.

ಇಂದು ನದಿಯೂ ಇಲ್ಲ

ವನಾಂತರವೂ ಇಲ್ಲ

ಬರೀ ತೋಳಗಳೇ ತಾಯೀ

ಬರೀ ತೋಳಗಳೇ ಎಲ್ಲೆಲ್ಲಾ !

ಧರ್ಮಾಚಾರಿಗಳೆಲ್ಲ ಕೇಕೆ ಹಾಕಿ

ಯಕ್ಷಗಾನದ ರಕ್ಕಸರಂತೆ

ಕುಣಿಯುತ್ತಿದ್ದಾರಲ್ಲಾ ತಾಯೀ

ಕುಣಿಯುತ್ತಲೇ ಇದ್ದಾರೆ !

ಎಂಥ ಮತಿಯೇ? ತಾಯೀ

ಇದೆಂಥ ಮತಿಯೇ ?

ಕುಡಿಯಲು ನೀರಿಲ್ಲ

ಓದಲು ಶಾಲೆಯೂ ಇಲ್ಲ

ಅಪಾಪೋಲಿಗಳೆಲ್ಲ ಗದ್ದುಗೆ ಏರಿ

ನೀನ್ಯಾರವನು ? ನೀನೆಲ್ಲಿಯವನು ?

ತಗೀ . . . ಪೈಸಾ . . . !

ಎಂದೇ ಕೇಳುತ್ತರಲ್ಲಾ ತಾಯೀ

ಕೈಹಿಡಿದು ಕೇಳುತ್ತಲೇ ಇದ್ದಾರೆ !

ಎಂಥ ಗತಿಯೇ ತಾಯೀ

ಇದೆಂಥ ಗತಿಯೇ ?

ಇತ್ತ ರೈತನನ್ನೂ ನೇಣಿಗೆಹಾಕಿ

ಅತ್ತ ಕಾರ್ಮಿಕನನ್ನೂ  ಹೊರಹಾಕಿ

ಬರೀ ಹೇಕರಿಸುತ್ತಾರಲ್ಲ ತಾಯೀ

ಬರೀ ಹೇಕರಿಸುತ್ತಾರಲ್ಲ !

ಅವ್ವಾ . . . ತಾಯೀ . . .

ಭಾರತ ಮಾತೇ . . .

ಏನೆಂದು ಹಾಡಲೇ . . . ನಿನ್ನ ಹಾಡ ? !

ಹೇಗೆಂದು ಹಾಡಲೇ . . . ನನ್ನ ಹಾಡ ? !