ಬೆಂಗಳೂರು: ಪ್ರಧಾನಿ ನರೇಂದ್ರ ಮೋದಿ ವಿರುದ್ಧ ನಡೆಯುತ್ತಿದ್ದ ತನಿಖೆಯನ್ನು ಕಾಂಗ್ರೆಸ್ ನೇತೃತ್ವದ ಸರ್ಕಾರದ ಅವಧಿಯಲ್ಲೇ ಪಕ್ಷದ ಕೆಲವು ನಾಯಕರು ತಡೆದಿದ್ದರು. ಈಗ ಕಾಂಗ್ರೆಸ್ ಅದಕ್ಕೆ ಬೆಲೆ ತೆರುತ್ತಿದೆ ಎಂದು ಮಾಜಿ ಮುಖ್ಯಮಂತ್ರಿ ಹಾಗೂ ಮಾಜಿ ಕೇಂದ್ರ ಕಾನೂನು ಸಚಿವ ವೀರಪ್ಪ ಮೊಯ್ಲಿ ಸ್ಫೋಟಕ ಹೇಳಿಕೆ ನೀಡಿದ್ದಾರೆ. ವೀರಪ್ಪ ಮೊಯ್ಲಿ
ಈ ಕುರಿತು ಮಾತನಾಡಿರುವ ಮೊಯ್ಲಿ, ತಾವು ಕೇಂದ್ರ ಕಾನೂನು ಸಚಿವರಾಗಿದ್ದ ಅವಧಿಯಲ್ಲಿ ನಡೆದಿದ್ದ ತನಿಖೆಯ ಬೆಳವಣಿಗೆಗಳನ್ನು ಪ್ರಸ್ತಾಪಿಸಿದ್ದಾರೆ. ಆಗ ನರೇಂದ್ರ ಮೋದಿ ಅವರ ಆಪ್ತರಾಗಿದ್ದ ಅಮಿತ್ ಶಾ ಕೂಡ ಪ್ರಕರಣದಲ್ಲಿ ಭಾಗಿಯಾಗಿದ್ದರು. ಸದ್ಯ ಅವರು ಕೇಂದ್ರ ಗೃಹ ಸಚಿವರಾಗಿದ್ದಾರೆ. ಆ ಪ್ರಕರಣದಲ್ಲಿ ಮೊದಲು ಜೈಲು ಸೇರಿದ್ದು ಅಮಿತ್ ಶಾ. ಬಳಿಕ ನರೇಂದ್ರ ಮೋದಿ ಅವರ ಸರದಿ ಇತ್ತು. ಅವರಿಗೂ ಜೈಲು ಶಿಕ್ಷೆ ಹಾಗೂ ರಾಜ್ಯದಿಂದ ಗಡಿಪಾರು ಆಗುವ ಪರಿಸ್ಥಿತಿ ಎದುರಾಗುತ್ತಿತ್ತು ಎಂದು ಮೊಯ್ಲಿ ಹೇಳಿದ್ದಾರೆ.
“ನ್ಯಾಯಾಲಯ ಅಮಿತ್ ಶಾ ಅವರನ್ನು ಅವರ ತವರು ರಾಜ್ಯದಿಂದ ಗಡಿಪಾರು ಮಾಡಿತ್ತು. ಪ್ರಕರಣವನ್ನು ಬೇರೆ ರಾಜ್ಯಕ್ಕೆ ವರ್ಗಾಯಿಸಲಾಗಿತ್ತು. ಈ ಪ್ರಕರಣದಲ್ಲಿ ಮೊದಲು ಜೈಲಿಗೆ ಹೋದವರು ಅಮಿತ್ ಶಾ. ನಂತರ ನರೇಂದ್ರ ಮೋದಿ ಅವರ ಸರದಿ ಇತ್ತು. ಅವರೂ ಜೈಲಿಗೆ ಹೋಗಬೇಕಾಗಿತ್ತು ಮತ್ತು ರಾಜ್ಯದಿಂದ ಗಡಿಪಾರು ಆಗಬೇಕಾಗಿತ್ತು” ಎಂದು ಮೊಯ್ಲಿ ಹೇಳಿದ್ದಾರೆ. ಆದರೆ, ಸದ್ಯ ಈ ವಿಚಾರದ ಹೆಚ್ಚಿನ ವಿವರಗಳಿಗೆ ಹೋಗಲು ತಾನು ಬಯಸುವುದಿಲ್ಲ ಎಂದೂ ಅವರು ತಿಳಿಸಿದ್ದಾರೆ.
ಇದನ್ನೂ ಓದಿ : ಆಂಧ್ರ ಕರಾವಳಿಗೆ ಅಪ್ಪಳಿಸಲಿದೆಯೇ ‘ಅಕ್ವಾನ್’ ಚಂಡಮಾರುತ? ಶ್ರೀಕಾಕುಳಂ ಬಳಿ ಭೂಕುಸಿತ ಸಾಧ್ಯತೆ, 5 ಜಿಲ್ಲೆಗಳಿಗೆ ಅಲರ್ಟ್!
ಕಾಂಗ್ರೆಸ್ ನಾಯಕರ ವಿರುದ್ಧವೇ ಮೊಯ್ಲಿ ಆರೋಪ
ಪ್ರಧಾನಿ ಮೋದಿ ವಿರುದ್ಧದ ತನಿಖೆ ನಿಂತಿದ್ದಕ್ಕೆ ಕಾಂಗ್ರೆಸ್ನೊಳಗಿನ ನಾಯಕರೇ ಕಾರಣ ಎಂದು ಮೊಯ್ಲಿ ನೇರವಾಗಿ ಆರೋಪಿಸಿದ್ದಾರೆ. “ಇದೆಲ್ಲ ನಮ್ಮ ಪಕ್ಷದ ದುರಂತ. ನಮ್ಮದೇ ಪಕ್ಷದೊಳಗೆ ಮೋದಿ ವಿರುದ್ಧದ ತನಿಖೆಯನ್ನು ನಿಲ್ಲಿಸಲಾಯಿತು. ಇದು ನಮ್ಮದೇ ಸರ್ಕಾರದ ಅವಧಿಯಲ್ಲಿ ನಡೆದಿತ್ತು. ಇದಕ್ಕೆ ಮನಮೋಹನ್ ಸಿಂಗ್ ಕಾರಣರಲ್ಲ, ಬದಲಿಗೆ ಇತರ ನಾಯಕರು ಕಾರಣ. ಇದರ ಪರಿಣಾಮವನ್ನು ಇಂದು ನಾವು ಅನುಭವಿಸುತ್ತಿದ್ದೇವೆ” ಎಂದು ಮೊಯ್ಲಿ ಹೇಳಿದ್ದಾರೆ.
ಆದರೆ, ತನಿಖೆ ನಿಲ್ಲಿಸಲು ಕಾರಣರಾದ ಕಾಂಗ್ರೆಸ್ ನಾಯಕರ ಹೆಸರನ್ನು ಅವರು ಬಹಿರಂಗಪಡಿಸಿಲ್ಲ. ಕಾಂಗ್ರೆಸ್ ನೇತೃತ್ವದ ಯುಪಿಎ ಸರ್ಕಾರ ಅಧಿಕಾರದಲ್ಲಿದ್ದಾಗಲೇ ಈ ನಿರ್ಧಾರ ತೆಗೆದುಕೊಳ್ಳಲಾಗಿತ್ತು ಎಂಬುದು ಮೊಯ್ಲಿ ಆರೋಪದ ಪ್ರಮುಖ ಅಂಶವಾಗಿದೆ.
ಯಾರು ಈ ವೀರಪ್ಪ ಮೊಯ್ಲಿ?
ವೀರಪ್ಪ ಮೊಯ್ಲಿ ಕರ್ನಾಟಕದ ಮಾಜಿ ಮುಖ್ಯಮಂತ್ರಿಯಾಗಿದ್ದು, ನವೆಂಬರ್ 1992ರಿಂದ ಡಿಸೆಂಬರ್ 1994ರವರೆಗೆ ರಾಜ್ಯದ ಮುಖ್ಯಮಂತ್ರಿಯಾಗಿ ಸೇವೆ ಸಲ್ಲಿಸಿದ್ದಾರೆ. ಕಾರ್ಕಳ ವಿಧಾನಸಭಾ ಕ್ಷೇತ್ರದಿಂದ ಆರು ಬಾರಿ ಶಾಸಕರಾಗಿ ಆಯ್ಕೆಯಾಗಿದ್ದರು. ಮಾಜಿ ಪ್ರಧಾನಿ ಮನಮೋಹನ್ ಸಿಂಗ್ ನೇತೃತ್ವದ ಯುಪಿಎ-2 ಸರ್ಕಾರದಲ್ಲಿ ಮೊಯ್ಲಿ ಹಲವು ಪ್ರಮುಖ ಸಚಿವ ಸ್ಥಾನಗಳನ್ನು ನಿರ್ವಹಿಸಿದ್ದಾರೆ.
- 2009ರಿಂದ 2011ರವರೆಗೆ ಕೇಂದ್ರ ಕಾನೂನು ಮತ್ತು ನ್ಯಾಯ ಸಚಿವರು.
- 2011ರಿಂದ 2012ರವರೆಗೆ ಕೇಂದ್ರ ಕಾರ್ಪೊರೇಟ್ ವ್ಯವಹಾರಗಳ ಸಚಿವರು.
- 2012ರಲ್ಲಿ ಕೇಂದ್ರ ವಿದ್ಯುತ್ ಸಚಿವರು.
- 2012ರಿಂದ 2014ರವರೆಗೆ ಕೇಂದ್ರ ಪೆಟ್ರೋಲಿಯಂ ಮತ್ತು ನೈಸರ್ಗಿಕ ಅನಿಲ ಸಚಿವರು.
- 2013ರಿಂದ 2014ರವರೆಗೆ ಕೇಂದ್ರ ಪರಿಸರ ಮತ್ತು ಅರಣ್ಯ ಸಚಿವರು.
ಪ್ರಧಾನಿ ಮೋದಿ ವಿರುದ್ಧದ ತನಿಖೆಯನ್ನು ಕಾಂಗ್ರೆಸ್ನ ಕೆಲವು ನಾಯಕರೇ ತಡೆದಿದ್ದರು ಎಂಬ ಮೊಯ್ಲಿ ಅವರ ಹೇಳಿಕೆ ಇದೀಗ ರಾಜಕೀಯ ವಲಯದಲ್ಲಿ ಚರ್ಚೆಗೆ ಕಾರಣವಾಗುವ ಸಾಧ್ಯತೆಯಿದೆ.
ಇದನ್ನೂ ನೋಡಿ : AIKS ಸಮ್ಮೇಳನ | ಕೃಷಿ ಮತ್ತು ರೈತರ ಬದುಕಿನ ರಕ್ಷಣೆಗಾಗಿ ಚಳವಳಿ ಬಲಪಡಿಸುವ ಸಂಕಲ್ಪ Janashakthi Media
