ಕೆ.ಎಸ್.ರವಿಕುಮಾರ್
2018ರ ಸಾಟಿಯಿಲ್ಲದ ಹೆನ್ನೆರೆ ಮತ್ತು 2024ರ ವಯನಾಡ್ ನೆಲಕುಸಿತಗಳು ಕೇರಳೀಯರನ್ನು ಕಲಕಿದಷ್ಟು ಬೇರಾವ ನೈಸರ್ಗಿಕ ವಿಪತ್ತುಗಳು ಗಂಭೀರವಾಗಿ ಕಲಕಿದಂತಿಲ್ಲ. ಆರೋಗ್ಯ, ಶಿಕ್ಷಣ ಮತ್ತು ಹಲವು ಮಾನವಾಭಿವೃದ್ಧಿಯ ಸೂಚ್ಯಂಕಗಳಲ್ಲಿ ದೇಶದಲ್ಲೆ ಮುಂದಿರುವ ಕೇರಳದಲ್ಲಿ ಯಾವುದೇ ಗಂಭೀರ ವಿಚಾರ ಹೆಚ್ಚೆಚ್ಚು ಚರ್ಚೆಗೊಳಪಡುತ್ತದೆ ಮತ್ತು ಮಾತಿನ ಚಕಮಕಿಗಳಿಗೆ ಸಿಲುಕುತ್ತದೆ.
ಕೇರಳೀಯರ ಹೊಸತಿಗೆ ತುಡಿಯುವ ಎಚ್ಚೆತ್ತ ಆಲೋಚನಾಕ್ರಮ ಮತ್ತು ವಾದಸರಣಿಗಳು ಸಹಜವಾಗಿ ಅವರನ್ನು ಪ್ರತಿನಿಧಿಸುವ ಸರಕಾರಗಳಿಂದಲೂ ಗಟ್ಟಿಯಾದ ಮತ್ತು ಬಾಳಿಕೆಯ ಕ್ರಮಗಳನ್ನು ಎದುರು ನೋಡುತ್ತವೆ. ಹವಾಮಾನ ಬದಲಾವಣೆಯ ಅಡ್ಡ ಪರಿಣಾಮಗಳನ್ನು ಆಳವಾಗಿ ಅರಿತು ಅಣಿಗೊಳ್ಳಲು ಕೇರಳೀಯರಿಗೆ ಮೇಲೆ ಉಲ್ಲೇಖಿಸಿದ ಎರಡು ಗುರುತರ ನೈಸರ್ಗಿಕ ವಿಪತ್ತಿನ ಸಂದರ್ಭಗಳು ಸಾಕಾದವು ಅನಿಸುತ್ತೆ. ಹೀಗಾಗಿ ಅಲ್ಲಿನ ರಾಜ್ಯ ಸರಕಾರ ದೇಶದಲ್ಲೆ ಮೊದಲನೆಯದಾದ ಹವಾಮಾನದ ಅತಿರೇಕಗಳನ್ನು ಎದುರಿಸುವ ಯೋಜನೆಯೊಂದಕ್ಕೆ ಕಳೆದ ಜನವರಿ 21ನೇ ತಾರೀಕಿನಂದು ಮೊದಲ ಗುಂಡಿಯೊತ್ತಿತು. ಏನದು ಯೋಜನೆ?
ಅದೆಂದರೆ ‘ಕೇರಳ ಎಚ್ಚರಿಕೆ, ಬಿಕ್ಕಟ್ಟು ಮತ್ತು ವಿಪತ್ತು ನಿರ್ವಹಣೆ’ ಎಂಬ ಸಮಗ್ರ ಯೋಜನೆ. ಇಂಗ್ಲಿಷಿನಲ್ಲಿ Kerala Warnings, Crisis and Hazard Management (KaWaCHaM) ಎಂದು ಹೆಸರಿಸಲ್ಪಟ್ಟಿದ್ದನ್ನು ಮೊಟಕಾಗಿ ಮಲೆಯಾಳಮ್‌ನಲ್ಲಿ ‘ಕವಚಮ್’ ಎಂದು ಕರೆಯಲಾಗಿದೆ. ರಕ್ಷಣೆ ನೀಡುವುದು ಕವಚದ ಕೆಲಸವಲ್ಲವೆ? ಸರಿ, ಕವಚಮ್‌ನಲ್ಲೇನಿದೆ?
ಇದನ್ನೂ ಓದಿ: ಸರಕಾರದ ಯೋಜನೆಗಳ ವೈಫಲ್ಯಕ್ಕೆ ಮೈಕ್ರೋ ಫೈನಾನ್ಸ್ ಪ್ರಕರಣಗಳೇ ಸಾಕ್ಷಿ: ಹೆಚ್.ಡಿ.ಕುಮಾರಸ್ವಾಮಿ
ಒಮ್ಮೆಲೆ ‘ರಾಷ್ಟ್ರೀಯ ವಿಪತ್ತು ನಿರ್ವಹಣಾ ಪ್ರಾಧಿಕಾರ’ (ಎನ್.ಡಿ.ಎಮ್.ಎ.) ಮತ್ತು ವಿಶ್ವ ಬ್ಯಾಂಕಿನ ಹಣಕಾಸಿನ ನೆರವು ಪಡೆದು ‘ಕೇರಳ ರಾಜ್ಯ ವಿಪತ್ತು ನಿರ್ವಹಣಾ ಪ್ರಾಧಿಕಾರ’ (ಕೆ.ಎಸ್.ಡಿ.ಎಮ್.ಎ.)ದ ಮುಂದಾಳ್ತನದಲ್ಲಿ ಕವಚಮ್ ಯೋಜನೆ ಜಾರಿಗೆ ಬಂದಿದೆ. ರಾಜ್ಯದಲ್ಲಿ ಬಗೆಬಗೆಯ ನೈಸರ್ಗಿಕ ವಿಪತ್ತುಗಳು ಜರುಗುವ ತಾಣಗಳನ್ನು ಗುರುತಿಸಿ ಅಲ್ಲೆಲ್ಲ ಎಚ್ಚರಿಕೆಯನ್ನು ನೀಡುವ ಮತ್ತು ರಕ್ಷಣೆಯ ಕೆಲಸವನ್ನು ಮುಂಚಿತವಾಗಿಯೆ ಕೈಗೊಳ್ಳಲು ಕವಚಮ್ ನೆರವಾಗುತ್ತದೆ. ವಿಪತ್ತಿನ ತೀವ್ರತೆಗೆ ತಕ್ಕಂತೆ ಎಚ್ಚರಿಕೆಯನ್ನು ಸೈರೆನ್‌ಗಳ ಮೂಲಕ ನೀಡಲಾಗುತ್ತದೆ.
ಸೈರೆನ್ ಬೆಳಕು ಮತ್ತು ಸದ್ದು ಎರಡನ್ನೂ ಬಳಸಿಕೊಳ್ಳುತ್ತದೆ. ಅರಿಶಿಣ, ಕೇಸರಿ ಮತ್ತು ಕೆಂಪು ಬಣ್ಣದ ಮತ್ತೆ ಮತ್ತೆ ಹೊತ್ತಿ ಆರುವ ಹೊಳಪಿನ ಬಿರುಸು ಬೆಳಕು ಕಣ್ಣನ್ನು ಸೆಳೆದರೆ, ಎಂಟು ಲೌಡ್‌ಸ್ಪೀಕರ್‌ಗಳು ಹತ್ತಿರದ ತುರ್ತು ನೆರವಿನ ಶಿಬಿರಗಳು ಮತ್ತು ಸುರಕ್ಷತೆಯ ಕ್ರಮಗಳ ಬಗ್ಗೆ 1,200 ಮೀಟರ್ ದೂರದವರೆಗೆ ಕೇಳಿಸಿಕೊಳ್ಳಬಲ್ಲಷ್ಟು ದೊಡ್ಡ ದನಿಯಲ್ಲಿ ಮಾಹಿತಿಗಳನ್ನು ನೀಡುತ್ತದೆ. ಸೈರೆನ್‌ಗಳು ಸರಿಯಾಗಿ ಕೆಲಸ ಮಾಡುತ್ತಿವೆಯೊ ಇಲ್ಲವೊ ಎಂದು ತಿಳಿಯಲು ಕ್ಯಾಮೆರಾಗಳನ್ನೂ ಅಳವಡಿಸಲಾಗುತ್ತದೆ.
ವಿಪತ್ತಿನ ಸುಳುಹು ಮೊದಲೇ ದಕ್ಕಿದರೆ ರಕ್ಷಣೆಯ ಕ್ರಮಗಳಿಗೆಳಸಲು ಸಾಕಷ್ಟು ಸಮಯ ದೊರೆಯುತ್ತದೆ. ಕಡೆಗಳಿಗೆಯಲ್ಲಿ ಜನ ಅನಗತ್ಯ ಕಂಗೆಡುವ ಸನ್ನಿವೇಶಗಳು ಕಮ್ಮಿಯಾಗುತ್ತವೆ. ರಾಜ್ಯದ ಎಲ್ಲ 20 ಜಿಲ್ಲೆಗಳಿಗೆ ಒದಗುವಂತೆ ಒಟ್ಟು 126 ಸೈರೆನ್‌ಗಳನ್ನು ಯೋಜನೆ ಒಳಗೊಂಡಿದ್ದು ಅದಾಗಲೆ 91 ಕಡೆ ಸುಸಜ್ಜಿತ ಸೈರೆನ್ ಕಂಬಗಳನ್ನು ನಿಲ್ಲಿಸಲಾಗಿದೆ. ಮೊಬೈಲ್‌ಗಳಿಗೆ ಎಚ್ಚರಿಕೆಯ ಸಂದೇಶ ಕಳಿಸುವ ವ್ಯವಸ್ಥೆ ಹೇಗೂ ಚಾಲ್ತಿಯಲ್ಲಿ ಇದ್ದೇ ಇದೆ. ಆಸರೆಯ ಶಿಬಿರಗಳಿಗಾಗಿ ಈಗಾಗಲೆ ರಾಜ್ಯದೆಲ್ಲೆಡೆ 20,000ದಷ್ಟು ದೊಡ್ಡ ಕಟ್ಟಡಗಳನ್ನು ಗುರುತಿಸಿದ್ದು ಒಟ್ಟು 4 ಲಕ್ಷದವರೆಗೂ ಸಂತ್ರಸ್ತರನ್ನು ನೆಲೆಗೊಳಿಸುವ ವ್ಯವಸ್ಥೆಯನ್ನು ಕಲ್ಪಿಸಲಾಗಿದೆ. 17 ವಿಶೇಷ ಶಿಬಿರಗಳಿಗೂ ಅವಕಾಶ ಒದಗಿಸಲಾಗುತ್ತಿದೆ. ಕವಚಮ್‌ನಲ್ಲಿ ಯರ‍್ಯಾರು ಪಾಲ್ಗೊಳ್ಳುತ್ತಾರೆ?
ಸಾಮಾನ್ಯವಾಗಿ ಸರಕಾರಿ ಯೋಜನೆ ಎಂದರೆ ಸರಕಾರಿ ಮಂದಿಯ ಜವಾಬುದಾರಿ ಎಂದು ಪರಿಗಣಿಸಲಾಗುತ್ತದೆ. ಆದರೆ ನೈಸರ್ಗಿಕ ವಿಪತ್ತುಗಳ ಸಂದರ್ಭದಲ್ಲಿ ಪ್ರತೀಯೊಬ್ಬರ ಪಾಲ್ಗೊಳ್ಳುವಿಕೆಯಿಂದ ಕಟ್ಟಕಡೆಯ ನೋವುಂಡ ಜೀವವನ್ನೂ ಉಳಿಸಬಹುದಾಗಿದೆ. ಈ ಸಂಬಂಧ ‘ಸಾಮೂಹಿಕ ಸನ್ನದ್ಧಸೇನಾ’ಗಳನ್ನು ರಾಜ್ಯದೆಲ್ಲೆಡೆ ರೂಪಿಸಲಾಗುತ್ತಿದೆ. ಸೇವಾ ಮನೋಭಾವನೆಯಿಂದ ಮುನ್ನುಗ್ಗುವ ಒಪ್ಪಾಳುಗಳಲ್ಲದೆ ಎಲ್ಲ ಸಾಮಾಜಿಕ ಜಾಲತಾಣಗಳಲ್ಲಿ ಸಕ್ರಿಯವಾಗಿರುವ ಗುಂಪುಗಳು ಮತ್ತು ಜನರ ನಡುವೆ ಕಾರ್ಯಾಚರಿಸುವ ಸಂಘಟನೆಗಳು ಈ ಸೇನೆಯಲ್ಲಿ ಒಳಗೊಳ್ಳಬಹುದಾಗಿದೆ.
ವಿಪತ್ತಿಗೆ ತಕ್ಕ ಸಲಕರಣೆಗಳಿಂದ ಸಜ್ಜುಗೊಳ್ಳುವಿಕೆ, ರಕ್ಷಿಸುವ ಬಗೆ, ಹಂಗಾಮಿಯಾಗಿ ಆಸರೆ ಕಲ್ಪಿಸುವುದು ಹೀಗೆ ಹಲವು ವಿಚಾರದಲ್ಲಿ ತರಬೇತಿ ನೀಡಲಾಗುತ್ತದೆ. ತರಬೇತಿ ಪಡೆದವರ ನಡುವೆ ಒಬ್ಬರಿಗೊಬ್ಬರು ಸಹಕರಿಸಿಕೊಳ್ಳಲು ಮತ್ತು ಮಾಹಿತಿ ಹಂಚಿಕೊಳ್ಳಲು ದೊಡ್ಡ ಜಾಲವನ್ನೆ ಸಾಫ್ಟ್ವೇರ್‌ಗಳ ಮೂಲಕ ಆಗುಮಾಡಲಾಗುತ್ತದೆ. ಪ್ರತೀ ತಾಲ್ಲೂಕು ಮಟ್ಟದಲ್ಲಿ ಮತ್ತು ಮತ್ತೆಮತ್ತೆ ವಿಪತ್ತುಗಳಿಗೆ ತುತ್ತಾಗುವ ತಾಣಗಳಲ್ಲಿರುವವರು ಹವಾಮಾನ ಅತಿರೇಕಗಳನ್ನು ಮೊಬೈಲ್ ಅಪ್ಲಿಕೇಶನ್ ಮೂಲಕ ಕವಚಮ್‌ಗೆ ತಿಳಿಸಬಹುದಾಗಿದೆ. ವಿಪರೀತ ಮಳೆ, ನೆಲಕುಸಿತ, ಬಿಸಿಯಲೆಗಳು, ನೆರೆ, ಬಿರುಗಾಳಿಗಳು ಮುಂತಾದವಲ್ಲದೆ ಸಾಂಕ್ರಾಮಿಕ ಕಾಯಿಲೆಗಳು ಮತ್ತು ಕಡಲ ಕಡೆಯಿಂದ ದುರುಳರು ಮಾಡಬಹುದಾದ ದಾಳಿಗಳ ಬಗ್ಗೆಯೂ ಕವಚಮ್ ಎಚ್ಚರಿಸುತ್ತದೆ.
ನಾಗರೀಕ ಪೋರ್ಟಲ್‌ಗಳು ಮತ್ತು ತುರ್ತು ಕರೆಗಳ ಮೂಲಕ ಜನ ವಿಪತ್ತುಗಳ ಬಗ್ಗೆ ವರದಿ ಮಾಡಬಹುದು ಮತ್ತು ನೆರವನ್ನು ಕೋರಬಹುದು. ವಿಪತ್ತು ಪೀಡಿತ ಪ್ರದೇಶಗಳ ಜನ ನೀಡಿದ ಮಾಹಿತಿ ಮತ್ತು ನೆರವಿನ ಕೋರಿಕೆಗಳನ್ನು ಹತ್ತಿರದ ರಕ್ಷಣಾ ತಂಡಗಳಿಗೆ ರವಾನಿಸಲಾಗುತ್ತದೆ ಮತ್ತು ನಿಯಂತ್ರಣ ಕೊಟಡಿಗಳ ಮೂಲಕ ರಕ್ಷಣಾ ಚಟುವಟಿಗಳನ್ನು ಹಿಂಬಾಲಿಸಲಾಗುತ್ತದೆ (ಟ್ರ್ಯಾಕಿಂಗ್). ಕಾರ್ಯನಿರತವಾಗಿರುವ ಎಲ್ಲ ನಿಯಂತ್ರಣ ಕೊಟಡಿಗಳನ್ನು ನೆಟ್ವರ್ಕ್ ಮೂಲಕ ಬೆಸೆದಿರಲಾಗುತ್ತದೆ. ವಿಪತ್ತು ಎರಗಿದ ಪ್ರದೇಶಗಳಲ್ಲಿ ಚುರುಕು ಕಾರ್ಯಾಚರಣೆ ಮತ್ತು ಈ ಸಂಬಂಧ ಚುರುಕು ಪ್ರತಿಕ್ರಿಯೆ ನೀಡಲು ಸಾಧ್ಯವಾಗುವಂತೆ ಒತ್ತು ನೀಡಲಾಗಿದೆ. ರಕ್ಷಣಾ ಕೆಲಸಗಳಲ್ಲಿ ತೊಡಗಿದವರು ಕೂಡಲೆ ತಲುಪುವಂತೆ ಸಮೀಪದಲ್ಲಿರುವ ಸಂಪರ್ಕ ರಸ್ತೆಗಳು, ಸೇತುವೆಗಳು, ಶಾಲೆಗಳು, ದವಾಖಾನೆಗಳು ಮತ್ತಿತರ ಸೌಕರ್ಯಗಳ ಬಗ್ಗೆ ಮಾಹಿತಿಗಳನ್ನು ಕಲೆಹಾಕಿ ಒದಗಿಸಲಾಗುತ್ತದೆ.
ಕವಚಮ್ ಎಲ್ಲೆಡೆಯಿಂದಲೂ ಮಾಹಿತಿ ಒಗ್ಗೂಡಿಸುತ್ತದೆ. ಮಾಹಿತಿ ಮೂಲಗಳು ಭಾರತೀಯ ಹವಾಮಾನ ಇಲಾಖೆ, ಕಡಲುಗಳ ಮಾಹಿತಿ ಸೇವೆ ನೀಡುವ ಭಾರತೀಯ ರಾಷ್ಟ್ರೀಯ ಕೇಂದ್ರ (INCOIS), ಖಾಸಗಿ ಹಾಗೂ ಸರಕಾರಿ ಹವಾಮಾನ ಸಂಬಂಧಿ ಸಂಸ್ಥೆಗಳು, ಸಾಮಾಜಿಕ ಜಾಲತಾಣಗಳು, ಮಿಂದಾಣ ಹೀಗೆ ಯಾವುದೂ ಆಗಿರಬಹುದು. ಜಾಗತಿಕ ಮಟ್ಟದ ಹವಾಮಾನ ಸಂಬಂಧಿ ಮಾಹಿತಿಗಳನ್ನೂ ಹೆಚ್ಚುವರಿಯಾಗಿ ಪಡೆಯಲಾಗುತ್ತದೆ. ಮೊದಲೇ ಹೇಳಿದಂತೆ ಇಡೀ ರಾಜ್ಯಕ್ಕೆ ಅಳವಡುವ ಹಾಗೆ ಮೇಲಿನ ಎಲ್ಲ ಚಟುವಟಿಕೆಗಳನ್ನು ‘ಕೇರಳ ರಾಜ್ಯ ವಿಪತ್ತು ನಿರ್ವಹಣಾ ಪ್ರಾಧಿಕಾರ’ವು ನಿಯಂತ್ರಿಸುತ್ತದೆ.
ಕವಚಮ್‌ನ ಕೆಲವು ಲಕ್ಷಣಗಳು ಅಮೆರಿಕಾದಲ್ಲಿ ಜಾರಿಗೊಳಿಸಿರುವ ‘ತುರ್ತು ಎಚ್ಚರಿಸುವ ವ್ಯವಸ್ಥೆ’ (Emergency Alert System)ಯನ್ನು ಹೋಲುವಂತಿದೆಯಲ್ಲ ಎಂದು ಕೆಲವು ಭಟ್ಟಂಗಿ ಮಾಧ್ಯಮಗಳು ಒಂದೀಟು ಕೊಂಕು ತೆಗೆದಿವೆ, ಇದೇನು ಮೊದಲಲ್ಲ ಎಂದಿವೆ. ಈಗಿರುವ ತಾಂತ್ರಿಕ ಅನುಕೂಲತೆಗಳ ಹಿನ್ನೆಲೆಯಲ್ಲಿ ನೋಡುಗರನ್ನು, ಕೇಳುಗರನ್ನು ಮತ್ತು ಓದುಗರನ್ನು ಗುರಿಯಾಗಿಸಿಕೊಂಡು ಯಾರೆ ಎಚ್ಚರಿಕೆಯ ವ್ಯವಸ್ಥೆಯನ್ನು ಜಾರಿಗೊಳಿಸುತ್ತೇವೆಂದರೆ ತೀರ ಬೇರೆಯೆ ಆದ ವ್ಯವಸ್ಥೆಯನ್ನು ರೂಪಿಸಲು ಸಾಧ್ಯವಿಲ್ಲ. ಮುಖ್ಯ ವಿಚಾರ ಏನೆಂದರೆ ಎಷ್ಟು ಬೇಗ ಜಾರಿಗೊಳಿಸಬಹುದು ಎಂಬುದಾಗಿದೆ.
ನಿಜ, ಅಮೆರಿಕಾದಲ್ಲಿ ಸಾರ್ವಜನಿಕರು, ಸರಕಾರಿ ಇಲಾಖೆಗಳು, ಸಾಮಾಜಿಕ ಜಾಲತಾಣಗಳು, ಮಾಧ್ಯಮಗಳು, ಖಾಸಗಿ ಸಂಸ್ಥೆಗಳು, ಬಗೆಬಗೆಯ ಸಮಾಜಮುಖಿ ಸಂಘಟನೆಗಳು ಹೀಗೆ ಎಲ್ಲವನ್ನೂ ಒಳಗೊಂಡ ಸಮಗ್ರ ಎಚ್ಚರಿಕೆಯ ತುರ್ತು ವ್ಯವಸ್ಥೆಯನ್ನು ರೂಪಿಸಲಾಗಿದೆ. ಅಮೆರಿಕಾ ಒಂದು ದೇಶ. ಸಂಕಟಕಾಲದಲ್ಲಿ ಅದರ ತುರ್ತು ವ್ಯವಸ್ಥೆ ಕೆಲಸಮಾಡಲು ಅದಕ್ಕೆ ಹವಾಮಾನ ಮತ್ತು ದೂರಸಂಪರ್ಕ ಉಪಗ್ರಹಗಳ ನೆರವು ಹೇರಳವಾಗಿದೆ. ನಾಸಾದಂತಹ ಶಕ್ತಿಯುತ ಬಾಹ್ಯಾಕಾಶ ಸಂಸ್ಥೆಯ ನೆರವು ಕೂಡಾ ಅದಕ್ಕಿದೆ.
ಕೇರಳ ಒಂದು ದೇಶದೊಳಗಿನ ರಾಜ್ಯ. ಅದಕ್ಕೆ ಅದರದ್ದೇ ಆದ ಉಪಗ್ರಹಗಳಿಲ್ಲ. ಅದು ದೇಶವನ್ನಾಳುವ ಒಕ್ಕೂಟ ಸರಕಾರವನ್ನು ನೆಚ್ಚಿಕೊಳ್ಳಬೇಕು. ಒಪ್ಪಿಗೆ, ಹಣಕಾಸು, ಉಪಗ್ರಹಗಳ ನೆರವು ಎಲ್ಲವೂ ದೆಹಲಿಯಿಂದಲೇ ದಕ್ಕಬೇಕು. ಇಂತಹ ನಾಜೂಕಿನ ಸನ್ನಿವೇಶದಲ್ಲಿ ಪಟ್ಟು ಹಿಡಿದು ತನಗೆ ಬೇಕಾದ ಸಮಗ್ರ ಎಚ್ಚರಿಕೆಯ ವ್ಯವಸ್ಥೆಯನ್ನು ಕೇರಳ ರೂಪಿಸಿಕೊಂಡಿದ್ದಕ್ಕೆ ದೇಶ ಮೆಚ್ಚುಗೆ ಸೂಸಬೇಕು. ಅದು ಕವಚಮ್ ಜಾರಿಗೆ ಸಂಪೂರ್ಣ ತನ್ನ ಮಾನವ ಸಂಪನ್ಮೂಲವನ್ನೆ ಬಳಸಿಕೊಳ್ಳುತ್ತಿದೆ ಎಂಬುದನ್ನು ನಾವು ಮರೆಯಬಾರದು. ಹಾಗೆ ನೋಡಿದರೆ ಒಕ್ಕೂಟ ಸರಕಾರವೇ ಮುಂದೆಬಂದು ಇಡೀ ದೇಶಕ್ಕೆ ಅಳವಡುವಂತಹ ಸಮಗ್ರ ಎಚ್ಚರಿಕೆಯ ವ್ಯವಸ್ಥೆಯನ್ನು ಈಗಾಗಲೆ ರೂಪಿಸಿರಬೇಕಿತ್ತು. ಅದು ಹಾಗೆ ಮಾಡಿಲ್ಲ ಎಂಬುದನ್ನೂ ನಾವು ಮರೆಯಬಾರದು. ಕೇರಳಿಗರಿಗೆ ಸಿಕ್ಕ ಕವಚಮ್ ಅಥವಾ ಕವಚ ದೇಶದ ಉಳಿದೆಲ್ಲರಿಗೂ ಬೇಗ ಸಿಕ್ಕಬೇಡವೆ?
ಕಾಡುಪ್ರಾಣಿಗಳಿಗೆ ಸಾಮಾನ್ಯವಾಗಿ ನೈಸರ್ಗಿಕ ವಿಪತ್ತಿನ ಸುಳುಹುಗಳು ಮುಂಚಿತವಾಗಿಯೆ ದೊರೆಯುವುದರಿಂದ ಅವು ಸುರಕ್ಷಿತ ಜಾಗಗಳಿಗೆ ತಲುಪಿಬಿಡಬಹುದು. ಈ ಮಾತು ಎಲ್ಲ ಸಂದರ್ಭದಲ್ಲೂ, ಎಲ್ಲ ಜೀವಸಂಕುಲಗಳ ಮಟ್ಟಿಗೂ ದಿಟವಾಗುತ್ತೆ ಎನ್ನುವಂತಿಲ್ಲ. ಮನುಷ್ಯರ ಜೊತೆ ಕಾಡುಪ್ರಾಣಿಗಳ ಸಹಜ ಹೊಕ್ಕುಬಳಕೆ ಸಾಧ್ಯವಿಲ್ಲವಾದ್ದರಿಂದ ಅವು ತಮ್ಮ ಪಾಡನ್ನು ತಾವು ನೋಡಿಕೊಳ್ಳುತ್ತವೆ ಎಂದೇ ಅಂದುಕೊಳ್ಳೋಣ. ಆದರೆ ಸಾಕುಪ್ರಾಣಿಗಳ ಕತೆಯೇನು? ಅವುಗಳ ಕಾಳಜಿಯನ್ನು ಅವುಗಳ ಮಾಲೀಕರೆ ತೆಗೆದುಕೊಳ್ಳಬೇಕೆ? ಈ ಸಂಬಂಧ ಕವಚಮ್ ಏನು ಹೇಳುತ್ತದೆ ಎಂಬ ಮಾಹಿತಿ ನನಗಿಲ್ಲ.
ಕೇರಳ ಕೂಡಾ ಮನುಷ್ಯನಿಗೇ ಒತ್ತುಕೊಟ್ಟ ಬೆಳವಣಿಗೆಯ ಪೈಪೋಟಿಯಲ್ಲಿ ತನ್ನ ನೈಸರ್ಗಿಕ ಸಂಪತ್ತನ್ನು ಸಾಕಷ್ಟು ಕಳೆದುಕೊಂಡಿದೆ. ಗಣಿಗಾರಿಕೆ ಮತ್ತು ಕಾಡಿನ ನಾಶಕ್ಕೆ ಅಲ್ಲಿಯೂ ಬೆಟ್ಟಗುಡ್ಡಗಳು ಜರಿದು ಹೋಗಿವೆ. ಹೊಳೆ, ಹಳ್ಳಗಳು ಬತ್ತುವುದು ಸಾಮಾನ್ಯವಾಗುತ್ತಿದೆ. ನೆರೆಯ ಹೊಡೆತಕ್ಕೆ ಸಾರವತ್ತಾದ ಮೇಲ್ಮಣ್ಣು ಕೊಚ್ಚಿಹೋಗಿದೆ. ವಾತಾವರಣದ ತಾಪದಲ್ಲಿನ ಅಸಹಜ ಏರಿಕೆ new normal ಎನಿಸಿದೆ.
2025ರ ಜನವರಿ ಮುಗಿಯಲು ಇನ್ನೂ ಐದು ದಿನಗಳಿವೆ, ಆಗಲೆ ಕೇರಳದ ಕೊಟ್ಟಾಯಮ್ ಮತ್ತು ಕಣ್ಣೂರ್ ಜಿಲ್ಲೆಗಳಲ್ಲಿ ಕರಾವಳಿ ಪ್ರದೇಶದ ಬಿಸಿಯಲೆಗಳು ಕವಿದಿವೆ. ದಿನದ ಅತಿ ಹೆಚ್ಚಿನ ತಾಪವು ಕ್ರಮವಾಗಿ ಕಣ್ಣೂರಿನಲ್ಲಿ 36.6 ಮತ್ತು ಕೊಟ್ಟಾಯಮ್‌ನಲ್ಲಿ 36.5 ಡಿಗ್ರಿ ಸೆಲ್ಸಿಯಸ್ ದಾಖಲಾಗಿದೆ. ಈ ಸಂಬಂಧ ‘ಕೇರಳ ರಾಜ್ಯ ವಿಪತ್ತು ನಿರ್ವಹಣಾ ಪ್ರಾಧಿಕಾರ’ವು ಜನರಿಗೆ ಹೆಚ್ಚು ಹೊರ ಹೋಗದಂತೆ, ಸದಾ ನೀರಿನಂಶವನ್ನು ಸೇವಿಸುತ್ತಿರಲು ಸೂಚನೆ ನೀಡಿದೆ. ಸಾಮಾನ್ಯವಾಗಿ ಮಾರ್ಚ್, ಏಪ್ರಿಲ್‌ಗಳಲ್ಲಿ ಕವಿಯುತ್ತಿದ್ದ ಬಿಸಿಯಲೆಗಳು ಎರಡು ತಿಂಗಳು ಮುಂಚೆಯೆ ಬಲೆ ಬೀಸಿವೆ. ಇಂತಹ ಹವಾಮಾನ ಅತಿರೇಕಗಳ ಹಿನ್ನೆಲೆಯಲ್ಲಿ ಕಟು ವಾಸ್ತವಕ್ಕೆ ಒಂದಲ್ಲ ಒಂದು ದಿನ ನಾವು ಎದುರುಬದರಾಗಲೇಬೇಕು. ನಿಸರ್ಗ ಎಸೆಯುತ್ತಿರುವ ಸವಾಲುಗಳನ್ನು ಒಪ್ಪಿಕೊಳ್ಳಲೇಬೇಕು. ತಡವಾಗುವ ಮುನ್ನ ಕೇರಳ ಎಚ್ಚತ್ತಿದೆ. ಭಾರತ ಇಡಿಯಾಗಿ ಜೋಂಪಿನಿಂದೆದ್ದು ಮೈಮುರಿಯುವುದನ್ನು ನಾನು ಎದುರುನೋಡುತ್ತಿರುವೆ.
ಇದನ್ನೂ ನೋಡಿ: ಗಣತಂತ್ರ ದಿನ : ವೆಂಟ್ರಿಲೋಕ್ವಿಸ್ಟ್ ಜಾನು ಆವಂತಿಕಾ ಮಾತುಕತೆ Janashakthi Media
