ಬೆಳಗಾವಿ: ಸೈನಿಕರಾಗಬೇಕು ಎಂಬ ಕನಸು ಹೊತ್ತು ನಗರಕ್ಕೆ ಬಂದಿದ್ದ ಸಾವಿರಾರು ಯುವಕರು, ಆಶ್ರಯಕ್ಕಾಗಿ ವ್ಯವಸ್ಥೆ ಇಲ್ಲದೆ ರಸ್ತೆಬದಿಯೇ ನಿದ್ರೆಗೆ ಜಾರಿಗೆ ಜಾರಿದರು. ಮೈಕೊರೆಯುವ ಚಳಿಯಲ್ಲೂ ಪಾದಚಾರಿ ಮಾರ್ಗದ ಮೇಲೆಯೇ ಮಲಗಿರುವ ದೃಶ್ಯಗಳು ಸಾಮಾಜಿಕ ಜಾಲತಾಣದಲ್ಲಿ ಹರಿದಾಡುತ್ತಿವೆ. ಆಶ್ರಯ
ಭಾನುವಾರ ನಡೆದ ಟೆರಿಟೋರಿಯಲ್ ಆರ್ಮಿಯಲ್ಲಿನ ಸೈನಿಕರ ಹುದ್ದೆಗಳ ನೇಮಕಾತಿ ರ್ಯಾಲಿಯಲ್ಲಿ ಪಾಲ್ಗೊಳ್ಳಲು 16 ಜಿಲ್ಲೆಗಳಿಂದ ಸಾವಿರಾರು ಯುವಕರ ದಂಡು ಇಲ್ಲಿಗೆ ಬಂದಿತ್ತು. ಇಲ್ಲಿನ ಸಿಪಿಎಡ್ ಮೈದಾನ ಮುಂಭಾಗದ ರಸ್ತೆಯಲ್ಲೇ ಅವರು ಇಡೀ ರಾತ್ರಿ ಕಳೆದರು. ಕೆಲವರು ಪಾದಚಾರಿ ಮಾರ್ಗದ ಮೇಲೆ ಚಾಪೆ, ಹಾಸಿಗೆ ಹಾಸಿ ಮಲಗಿದರೆ, ಇನ್ನೂ ಕೆಲವರು ನೆಲದ ಮೇಲೆಯೇ ಮಲಗಿದ್ದು ಕಂಡುಬಂತು. ಮೂಲಸೌಕರ್ಯ ಕೊರತೆಯಿಂದಾಗಿ ಅವರು ಪರದಾಡಿದರು. ದೇಶ ಕಾಯಬೇಕೆಂಬ ಅವರ ಕನಸು ಕಮರಿದವು.
ಇದನ್ನೂ ಓದಿ: ವಕ್ಫ್ ಆಸ್ತಿ ವಿವಾದ: ಯಾಕಿಷ್ಟು ಗದ್ದಲ?
‘ಇಂಥ ರ್ಯಾಲಿ ಬೆಳಿಗ್ಗೆ ಬೇಗ ಆರಂಭವಾಗುತ್ತವೆ. ಹಾಗಾಗಿ ನಮ್ಮೂರಿನಿಂದ ಅದೇ ದಿನ ಪ್ರಯಾಣಿಸುವುದು ಕಷ್ಟ. ಹೋಟೆಲ್ ಅಥವಾ ಲಾಡ್ಜ್‌ನಲ್ಲಿ ಇರಬೇಕೆಂದರೆ ಆರ್ಥಿಕ ಸಂಕಷ್ಟ, ಆದರೆ, ಸೈನಿಕರಾಗುವ ಹಂಬಲದಿಂದ ಇಂದ ತೊಂದರೆಯನ್ನೆಲ್ಲ ಸಹಿಸಿಕೊಳ್ಳುತ್ತೇವೆ’ ಎನ್ನುತ್ತಿದ್ದ ಆ ಯುವಕರ ಚಿತ್ತ ದೈಹಿಕ ಸಾಮರ್ಥ್ಯ ಪರೀಕ್ಷೆಯತ್ತ ಹರಿಯುತ್ತಿತ್ತು.
ಫುಟ್‌ ಪಾಥ್ ಮ್ಯಾಗ ಮಲಗೇವ್ರಿ
“ನಾನು ಪದವಿ ಓದಾತೇನ್ರಿ. ಸೈನಿಕನಾಗೋ ಆಸೆಯಿಂದ ಶನಿವಾರ ರಾತ್ರಿನೇ ಇಲ್ಲಿಗೆ ಬಂದೇನ್ರಿ, ಇಲ್ಲಿಗೆ ಬಂದಾವ್ರಲ್ಲಿ ಹೆಚ್ಚಿನಾವ್ರ ಬಡವರ ಮಕ್ಕಳ ಅದೇವ್ರಿ, ಹಂಗಾಗಿ ಎಲ್ಲಿ ರೂಮ್ ಮಾಡೋದಂತ ಫುಟ್‌ಪಾತ್ ಮ್ಯಾಗ ಮಲಗೇವ್ರಿ” ಎಂದು ಯುವಕ ಆದಿತ್ಯ ಗುರವ ಹೇಳಿದರು.
ಇದಕ್ಕೆ ಧ್ವವಿಗೂಡಿಸಿದ ವಿಪ್ಪಾಣಿ ತಾಲ್ಲೂಕಿನ ಕಾರದಗಾ ಗ್ರಾಮದ ಯುವಕ ಪೃಥ್ವಿರಾಜ್ ನಾಯಕವಾಡಿ, ‘ಸೇನಾ ರಾಲಿಗಾಗಿ ನಾನು ಮತ್ತು ನನ್ನ ಗೆಳಯರು ಬಂದಿದ್ದೇವೆ. ವಸತಿಗೆ ವ್ಯವಸ್ಥೆ ಇಲ್ಲದ್ದರಿಂದ ರಸ್ತೆಬದಿ ಮಲಗಿದ್ದೇವೆ’ ಎಂದರು.
‘ನಾನು ಬೀದರ್, ಕೊಪ್ಪಳ, ಬೆಂಗಳೂರಿನಲ್ಲಿ ನಡೆದ ಸೈನಿಕರ ರಾಲಿಗಳಿಗೆ ಹೋಗಿದ್ದೆ. ಸೈನಿಕನಾಗಬೇಕು ಎನ್ನುವ ಉತ್ಕಟ ಹಂಬಲದಿಂದ ಈಗ ಬೆಳಗಾವಿ ರಾಲಿಗೂ ಬಂದಿದ್ದೇನೆ. ಏನೇ ಸಮಸ್ಯೆಗಳಿರಲಿ, ಈ ರಾಲಿಯಲ್ಲಿ ಪಾಲ್ಗೊಂಡು, ಸೈನಿಕನಾಗಿ ಆಯ್ಕೆಯಾಗುವುದೇ ನನ್ನ ಗುರಿ’ ಎಂದು ಯೋಗೇಶ ಉಗಳ ಹೇಳಿದರು.
‘ಯಾವುದೇ ರಾಲಿಗೆ ಇಷ್ಟೊಂದು ಯುವಕರು ಬರಬಹುದೆಂದು ನಿರೀಕ್ಷಿಸಲಾಗಿರುತ್ತದೆ. ಅದಕ್ಕೆ ತಕ್ಕಂತೆ ನೇಮಕಾತಿ ವಿಭಾಗದವರು ಅಥವಾ ಜಿಲ್ಲಾಡಳಿತದವರು, ಒಂದುಕಡೆ ಸಾಮೂಹಿಕವಾಗಿ ವಸತಿ ವ್ಯವಸ್ಥೆ ಮಾಡಿದರೆ ಅನುಕೂಲವಾಗುತ್ತದೆ’ ಎಂಬ ಅಭಿಪ್ರಾಯ ಯುವಕರಿಂದ ಕೇಳಿಬಂತು.
ಯಾವ್ಯಾವ ಜಿಲ್ಲೆಯವರು ಭಾಗಿ?
ಬೆಳಗಾವಿಯಲ್ಲಿ ನವೆಂಬರ್ 4 ರಿಂದ ಆರಂಭಗೊಂಡ ರ್ಯಾಲಿ ನವೆಂಬರ್ 12 ರವರೆಗೆ ನಡೆಯಲಿದೆ. ಪ್ರತಿದಿನ ಬೇರೆ ಬೇರೆ ರಾಜ್ಯಗಳ ಯುವಕರು ಪಾಲ್ಗೊಳ್ಳುತ್ತಿದ್ದಾರೆ. ನ.7ರಂದು ಕರ್ನಾಟಕದ 15 ಜಿಲ್ಲೆಗಳ ಯುವಕರಿಗೆ ಅವಕಾಶ ಕಲ್ಪಿಸಲಾಗಿತ್ತು.
ಭಾನುವಾರದ ರ್ಯಾಲಿಯಲ್ಲಿ ಬೆಳಗಾವಿ ಬಾಗಲಕೋಟೆ ಧಾರವಾಡ ಕಲಬುರಗಿ ಕೊಪ್ಪಳ ರಾಯಚೂರು ಗದಗ ಹಾವೇರಿ ಬಳ್ಳಾರಿ ಬೀದರ್ ವಿಜಯಪುರ ವಿಜಯನಗರ ದಕ್ಷಿಣ ಕನ್ನಡ ಉತ್ತರ ಕನ್ನಡ ಉಡುಪಿ ಯಾದಗಿರಿ ಸೇರಿ 16 ಜಿಲ್ಲೆಗಳ ಯುವಕರು ಪಾಲ್ಗೊಂಡರು. ನಸುಕಿನ ಜಾವದಿಂದಲೇ ಪ್ರಕ್ರಿಯೆ ಆರಂಭವಾದವು. ಹಾಗಾಗಿ ಹಿಂದಿನ ದಿನ ರಾತ್ರಿಯೇ ಯುವಕರ ದಂಡು ಇಲ್ಲಿಗೆ ಬಂದು ತಂಗಿತ್ತು.
ಇದನ್ನೂ ನೋಡಿ: ಎಲ್‌ಐಸಿ ಖಾಸಗೀಕರಣದ ವಿರುದ್ಧ ಹೋರಾಟ ಬಲಗೊಳ್ಳಲಿದೆ – ಎಸ್‌.ಕೆ ಗೀತಾ Janashakthi Media
