ಆರ್‌ಬಿಐ ನಿಯಮಗಳ ಸಡಲಿಕೆಯಿಂದ ಮೈಕ್ರೋ ಫೈನಾನ್ಸಿಂಗ್ ಕಂಪನಿಗಳು ಗ್ರಾಮೀಣ ಭಾರತದಲ್ಲಿ ನಾಯಿ ಕೊಡೆಗಳಂತೆ ತಲೆ ಎತ್ತುತ್ತಿವೆ. ಸಾಲದ ಮೇಲೆ 70-80 ಪ್ರತಿಶತದಷ್ಟು ಬಡ್ಡಿ ವಿಧಿಸುತ್ತಿವೆ. ಸಾಲ ವಸೂಲಿ ಮಾಡಲು ಹೊರಗುತ್ತಿಗೆ ನೀಡಿ, ವಸೂಲಿ ಏಜೆಂಟ್ ಗಳ ಮೂಲಕ ದೈಹಿಕ ಹಾಗೂ ಮಾನಸಿಕ ದೌರ್ಜನ್ಯ ಎಸಗಿರುವ ಪ್ರಕರಣಗಳು ಬೆಳಕಿಗೆ ಬರುತ್ತಿವೆ. ಇದರ ವಿರುದ್ದ ಪೋಲೀಸರ ಬಳಿ ದೂರು ದಾಖಲಿಸಲು ಗ್ರಾಹಕರು ಹಕ್ಕು ಹೊಂದಿರುತ್ತಾರೆ. ಇಂತಹ ಅಪರಾಧಗಳಿಗೆ 5 ವರ್ಷಗಳವರೆಗೆ ಶಿಕ್ಷೆ ಅಥವಾ ದಂಡ ವಿಧಿಸಬಹುದಾಗಿದೆ. ಗ್ರಾಮೀಣ ಭಾಗದ ಬಡ ಮತ್ತು ಮಧ್ಯಮ ವರ್ಗದ ಮಹಿಳೆಯರಿಗೆ ಸ್ವ ಸಹಾಯ ಸಂಘಗಳ ಮೂಲಕ ಅತಿ ಕಡಿಮೆ ಬಡ್ಡಿ ದರದಲ್ಲಿ ಪರ್ಯಾಯ ಅರ್ಥಿಕ ಸೌಲಭ್ಯಗಳನ್ನು ಒದಗಿಸಿ ಸ್ತ್ರೀ ಸಬಲೀಕರಣಕ್ಕೆ ಮುಂದಾಗಬೇಕೆ ವಿನಃ ಖಾಸಗಿ ಬಂಡವಾಳಗಾರರ ಪರ ನಿಲ್ಲಬಾರದು.
– ಭೀಮನಗೌಡ ಸುಂಕೇಶ್ವರಹಾಳ
ಆರ್ಥಿಕವಾಗಿ ಹಿಂದುಳಿದವರು ವಿಶೇಷವಾಗಿ ಗ್ರಾಮೀಣ ಪ್ರದೇಶದ ಜನರಿಗೆ ನೆರವು ನೀಡಲು ಮೈಕ್ರೋ ಫೈನಾನ್ಸ್ (ಕಿರು ಸಾಲಗಳು) ವ್ಯವಸ್ಥೆಯನ್ನು ಪ್ರಾರಂಭಿಸಲಾಯಿತು. ಯಾವುದೇ ಒಂದು ಗ್ರಾಮೀಣ ಕುಟುಂಬದ ಒಟ್ಟು ವಾರ್ಷಿಕ ಆದಾಯ ಗರಿಷ್ಟ 1,25,000 ರೂ. ಹಾಗೂ ನಗರ ಮತ್ತು ಅರೆ ನಗರ ಪ್ರದೇಶಗಳಲ್ಲಿನ ಕುಟುಂಬದ ವಾರ್ಷಿಕ ಆದಾಯ 2 ಲಕ್ಷ ರೂಗಳಿಗೆ ಮೀರಿರಬಾರದು ಎಂಬ ನಿಯಮವಿದೆ.
ಭಾರತದ ಪ್ರಮುಖ ಖಾಸಗಿ ಬ್ಯಾಂಕುಗಳನ್ನು 1969 ಇಸ್ವಿಯಲ್ಲಿ ರಾಷ್ಟ್ರೀಕರಣ ಗೊಳಿಸಲಾಯಿತು. 1976ರಲ್ಲಿ ಗ್ರಾಮೀಣ ಬ್ಯಾಂಕ್ ಅಧಿನಿಯಮ ಅಂಗೀಕರಿಸಿ, ಗ್ರಾಮೀಣ ಪ್ರದೇಶಗಳಲ್ಲಿ ಬ್ಯಾಂಕಿಂಗ್ ಸೇವೆಗಳನ್ನು ಬಲಪಡಿಸಲು ಮತ್ತು ವಿಸ್ತರಿಸಲು ಸಹಕಾರಿಯಾಯಿತಾದರೂ, ನಂತರದಲ್ಲಿ 1990ರಲ್ಲಿ ತಂದಂತಹ ಉದಾರಿಕರಣ ನೀತಿಗಳು ಖಾಸಗಿ ಮೈಕ್ರೋ ಫೈನಾನ್ಸ್ ಕಂಪನಿಗಳು ಗ್ರಾಮೀಣ ಪ್ರದೇಶಕ್ಕೆ ಲಗ್ಗೆ ಇಡಲು ಕಾರಣವಾಯಿತು.
ಅತಿ ಹೆಚ್ಚು ಬಡ್ಡಿ
ಸಾಮಾನ್ಯವಾಗಿ ಮೈಕ್ರೋ ಫೈನಾನ್ಸ್ ಕಂಪನಿಗಳು ಸಾರ್ವಜನಿಕ ಹಾಗೂ ಖಾಸಗಿ ಬ್ಯಾಂಕುಗಳಿಂದ ಸಾಲಗಳನ್ನು ಪಡೆದು, ಅವರು ಪಡೆದ ಬಡ್ಡಿಯ ಸಾಲದ ಬಡ್ಡಿ ದರಕ್ಕಿಂತ ಪ್ರತಿಶತ 10ರಿಂದ 15ರಷ್ಟು ಹೆಚ್ಚುವರಿ ಬಡ್ಡಿಯನ್ನು ವಿಧಿಸಿ ಮೈಕ್ರೋ ಫೈನಾನ್ಸಿಂಗ್ ಮೂಲಕ ಗ್ರಾಮೀಣ ಭಾಗದ ಜನರಿಗೆ ಸಾಲವನ್ನು ಒದಗಿಸುತ್ತಿದ್ದವು.
ಇದನ್ನೂ ಓದಿ: ಸುಣಕಲ್ಲಬಿದರಿ ವಸತಿ ನಿಲಯದ ವಿದ್ಯಾರ್ಥಿಗಳಿಗೆ ಮೂಲಭೂತ ಸೌಕರ್ಯಗಳಿಂದ ವಂಚನೆ: ಸೂಕ್ತ ಕ್ರಮಕ್ಕಾಗಿ ಎಸ್ಎಫ್ಐ ಆಗ್ರಹ
ಮೈಕ್ರೋ ಫೈನಾನ್ಸ್ ಸಂಸ್ಥೆಗಳು ಕಿರು ಸಾಲಗಳನ್ನು ನೀಡುವ ಮೂಲಕ ಗ್ರಾಮೀಣ ಭಾಗದ ಜನರಿಗೆ ಸ್ವಾವಲಂಬನೆ ಬದುಕನ್ನು ಕಟ್ಟಿಕೊಳ್ಳಲು, ಅದರಲ್ಲೂ ಮುಖ್ಯವಾಗಿ ಮಹಿಳೆಯರ ಸಬಲೀಕರಣಕ್ಕೆ ಹೆಚ್ಚು ಅನುಕೂಲವಾಗಲಿ ಎನ್ನುವ ಕಾರಣಕ್ಕೆ ಹುಟ್ಟಿಕೊಂಡಿದ್ದಾದರೂ, ವಾಸ್ತವದಲ್ಲಿ ಈ ಸಾಲಗಳು ಅತಿ ಹೆಚ್ಚು ಬಡ್ಡಿಯನ್ನು ಹೊಂದಿಸಿ ಮತ್ತು ಕಠಿಣ ನಿರ್ಬಂಧನೆಗಳನ್ನು ಹೇರಿ ಮರುಪಾವತಿ ಪಡೆಯುತ್ತಿದ್ದಾರೆ.
ಚೆಕ್ ಗಳನ್ನು ಬೌನ್ಸ್ ಮಾಡಿ ಕೇಸು ದಾಖಲಿಸುತ್ತಿವೆ
ಅಡಮಾನವಿಡಲು ಯಾವುದೇ ದಾಖಲೆಗಳು ಇಲ್ಲವೆನ್ನುವ ಕಾರಣಕ್ಕೆ ರಾಷ್ಟ್ರೀಯ ಬ್ಯಾಂಕುಗಳು ಸಾಲ ನೀಡುವದಿಲ್ಲ ಎಂಬ ಕಾರಣಕ್ಕೆ ಮೈಕ್ರೋ ಫೈನಾನ್ಸ್ ನಂತಹ ಕಂಪನಿಗಳು ಬಂದಿವೆಯಾದರೂ, ಈ ಮೈಕ್ರೋ ಫೈನಾನ್ಸ್ ಕಂಪನಿಗಳು ಗ್ರಾಹಕರ ಅನಿವಾರ್ಯತೆಯನ್ನು ಆಯುಧವಾಗಿ ಮಾಡಿಕೊಂಡಿವೆ. ಗ್ರಾಹಕರಿಂದ ಖಾಲಿ ಚೆಕ್ಕುಗಳಲ್ಲಿ ಸಹಿ ಪಡೆದು ಅವುಗಳನ್ನು ಇಟ್ಟುಕೊಳ್ಳುತ್ತಿವೆ. ಸಾಲ ಮರುಪಾವತಿ ವಿಳಂಬವಾದಲ್ಲಿ ಚೆಕ್ ಗಳನ್ನು ಬೌನ್ಸ್ ಮಾಡಿ, ಬೆಂಗಳೂರಿನಲ್ಲಿ ಕೇಸು ದಾಖಲಿಸಿ, ಅವರನ್ನು ಪೊಲೀಸರ ಸಹಾಯದಿಂದ ಬಂಧಿಸಿ ಜೈಲಿಗೆ ಹಾಕುತ್ತಿದ್ದಾರೆ. ಜೈಲಿಗೆ ಹೋದ ಗ್ರಾಹಕರು ಶ್ಯೂರಿಟಿ ನೀಡಿ ಹೊರಬರಲು ಯಾವುದೇ ಆಸ್ತಿ ಇಲ್ಲದೆ 10-13 ದಿನಗಳು ಜೈಲಿನಲ್ಲಿದ್ದು, ಕೊನೆಗೆ ಜೈಲಾಧಿಕಾರಿಗಳು ನೀಡುವ ಬಾಂಡ್ ಗಳಿಗೆ ಸಹಿ ಹಾಕಿ ಹೊರಬಂದು, ಅವರು ವಾಸಿಸುವ ದೂರದ ಹಳ್ಳಿಗಳಿಂದ ಬೆಂಗಳೂರಿನ ಕೋರ್ಟ್ ಗಳಿಗೆ ಅಲೆದಾಡುವ ಸ್ಥಿತಿ ನಿರ್ಮಾಣವಾಗುತ್ತಿದೆ.
ಆಂಧ್ರ ಪ್ರದೇಶದಲ್ಲಿ ‘ಮಳೆಗಾಂ ಸಮಿತಿ’ ಶಿಫಾರಸ್ಸುಗಳು
ಇತ್ತೀಚಿನ ದಿನಗಳಲ್ಲಿ ಸುದ್ದಿಯಾಗುತ್ತಿರುವ ಮೈಕ್ರೋ ಫೈನಾನ್ಸ್ ಕಂಪನಿಗಳ ಕ್ರೌರ್ಯದಿಂದ ನಿರಂತರವಾಗಿ ನಡೆಯುತ್ತಿರುವ ಆತ್ಮಹತ್ಯೆಗಳಂತ ಪ್ರಕರಣಗಳು ಕರ್ನಾಟಕ ರಾಜ್ಯದಲ್ಲಿ ಹೊಸದಿರಬಹುದು. ಆದರೆ ಇಂತಹ ಘಟನೆಗಳು ಪಕ್ಕದ ರಾಜ್ಯಗಳಾದ ಮಹರಾಷ್ಟ್ರ, ತೆಲಂಗಾಣ, ಆಂದ್ರಪ್ರದೇಶ ಸೇರಿದಂತೆ ಹಲವು ರಾಜ್ಯಗಳಲ್ಲಿ ಸಂಭವಿಸಿವೆ. ಮೈಕ್ರೋ ಫೈನಾನ್ಸಿಂಗ್ ಕಂಪನಿಗಳ ಒತ್ತಡ ಹಾಗೂ ಬಲವಂತದ ವಸೂಲಿ ಕ್ರಮಗಳಿಂದ ಹಿಂದೆ ಆಂಧ್ರ ಪ್ರದೇಶದಲ್ಲಿ ನಿರಂತರವಾಗಿ ಆತ್ಮಹತ್ಯೆಗಳು ನಡೆದಾಗ, ಆರ್‌ಬಿಐ ಕೂಡಲೇ ಮಧ್ಯಪ್ರವೇಶಿಸಿ ಮೈಕ್ರೋ ಫೈನಾನ್ಸ್ ಕಂಪನಿಗಳ ಬಗ್ಗೆ ಅಧ್ಯಯನ ಮಾಡಲು ಹಾಗೂ ಜನರ ಮೇಲೆ ವಿಧಿಸುವ ಬಡ್ಡಿದರ ಹಾಗೂ ಅದರ ಕಾರ್ಯವೈಖರಿಯ ಬಗ್ಗೆ ಅಧ್ಯಯನ ಮಾಡಲೆಂದು 2010ರಲ್ಲಿ ವೈ.ಹೆಚ್. ಮಳೆಗಾಂ ಅವರ ಅಧ್ಯಕ್ಷತೆಯಲ್ಲಿ ‘ಮಳೆಗಾಂ ಸಮಿತಿ’ ಯನ್ನು ರಚನೆಮಾಡಿತು.
ಈ ಸಮಿತಿಯು ಮೈಕ್ರೋ ಫೈನಾನ್ಸ್ ಸಂಸ್ಥೆಗಳ ಬಗ್ಗೆ ಅಧ್ಯಯನ ಮಾಡಿ, ಮೈಕ್ರೋ ಫೈನಾನ್ಸ್ ಸಂಸ್ಥೆಗಳು ರಿಸರ್ವ್ ಬ್ಯಾಂಕ್ ಆಫ್ ಇಂಡಿಯಾ ನಿಯಂತ್ರಣಕ್ಕೆ ಒಳಪಡಬೇಕು, ಗ್ರಾಹಕರ ಮೇಲೆ ಅತಿಯಾದ ಬಡ್ಡಿದರ ಹೇರಕೂಡದು, ಒಬ್ಬ ವ್ಯಕ್ತಿಗೆ ಹಲವಾರು ಮೈಕ್ರೋ ಫೈನಾನ್ಸ್ ಸಂಸ್ಥೆಗಳು ಸಾಲವನ್ನು ನೀಡಕೂಡದು, ಒಂದು ಕುಟುಂಬಕ್ಕೆ ಏಕಕಾಲದಲ್ಲಿ ಗರಿಷ್ಠ 50 ಸಾವಿರ ರೂಪಾಯಿಗೆ ಸಾಲವನ್ನು ಮಿತಿಗೊಳಿಸಬೇಕು, ಸಾಲದ ವಸೂಲಾತಿ ಸಮಯದಲ್ಲಿ ಬೆದರಿಕೆಗಳನ್ನು ಹಾಕಕೂಡದು, ಅವಾಚ್ಯ ಶಬ್ದಗಳಿಂದ ನಿಂದಿಸಬಾರದು ಹಾಗೂ ಗ್ರಾಹಕರಿಗೆ ಪಾರದರ್ಶಕ ಮತ್ತು ಗೌರವಯುತ ವಹಿವಾಟು ಮಾಡಲು ಕ್ರಮ ಕೈಗೊಳ್ಳಬೇಕು, ಸಾಲವನ್ನು ಪಡೆಯುವ ಗ್ರಾಹಕರಿಗೆ ಹಣಕಾಸಿನ ಶಿಸ್ತಿನ ಬಗ್ಗೆ ಜಾಗೃತಿ ಕಾರ್ಯಕ್ರಮಗಳನ್ನು ಹಮ್ಮಿಕೊಳ್ಳಬೇಕು ಹಾಗೂ ವ್ಯವಹಾರದಲ್ಲಿ ಪಾರದರ್ಶಕತೆಯನ್ನು ಪ್ರದರ್ಶಿಸಬೇಕು, ಸಾಲ ನೀಡುವ ಉದ್ದೇಶವೂ ಅವರ ಸ್ವಾವಲಂಬನೆಯ ಬದುಕಿಗೆ ಸಹಕಾರಿಯಾಗುವಂತೆ ಇರಬೇಕು ಎಂಬಿತ್ಯಾದಿ ಶಿಫಾರಸ್ಸುಗಳನ್ನು ಮಾಡಿತು.
ಸಡಿಲಗೊಂಡ ಆರ್‌ಬಿಐ ನಿಯಮಗಳು
‘ಮಳೆಗಾಂ ಸಮಿತಿಯ ಈ ಶಿಫಾರಸ್ಸುಗಳನ್ನು ಆರ್‌ಬಿಐ ಆರಂಭದಲ್ಲಿ ಅನುಸರಿಸಿತ್ತಾದರೂ, 2022ರಲ್ಲಿ ರಿಸರ್ವ್ ಬ್ಯಾಂಕ್ ಮೇಲೆ ಒತ್ತಡಗಳನ್ನು ತಂದು ಈ ನಿಯಮಗಳನ್ನು ಸಡಿಲಗೊಳಿಸಲಾಗಿದೆ. ನಿಯಮಗಳ ಸಡಲಿಕೆಗಳಿಂದ ಮೈಕ್ರೋ ಫೈನಾನ್ಸಿಂಗ್ ಕಂಪನಿಗಳು ಗ್ರಾಮೀಣ ಭಾರತದಲ್ಲಿ ನಾಯಿ ಕೊಡೆಗಳಂತೆ ತಲೆ ಎತ್ತುತ್ತಿವೆ. ಹಾಗೆಯೇ 70-80 ಪ್ರತಿಶತದಷ್ಟು ಬಡ್ಡಿಯನ್ನು ವಿಧಿಸಿ ಜನರಿಗೆ ಮದುವೆ, ಗೃಹಪ್ರವೇಶದಂತಹ ಕಾರ್ಯಕ್ರಮಗಳಿಗೂ ಸಾಲ ಪಡೆದುಕೊಳ್ಳುವಂತೆ ಆಕರ್ಷಿಸುತ್ತಿವೆ.
ಹಾಗೆಯೇ 2022 ಕ್ಕಿಂತ ಮುಂಚಿತವಾಗಿ ಮೈಕ್ರೋ ಫೈನಾನ್ಸ್ ಕಂಪನಿಯನ್ನು ಆರಂಭಿಸಲು ಎರಡು ಕೋಟಿ ಬಂಡವಾಳ ಅವಶ್ಯಕತೆಯಾಗಿತ್ತು. ಈಗ ಅದು 5 ಕೋಟಿಗೆ ಏರಿಸಲಾಗಿದೆ. ಮುಂದಿನ ವರ್ಷಗಳಲ್ಲಿ ಬಂಡವಾಳದ ಪ್ರಮಾಣ ಇನ್ನಷ್ಟು ಹೆಚ್ಚಾಗುವ ಸಾಧ್ಯತೆ ಇದೆ. ವರ್ಷದಿಂದ ವರ್ಷಕ್ಕೆ ಮೈಕ್ರೋ ಫೈನಾನ್ಸ್ ಕಂಪನಿಗಳು ದೊಡ್ಡ ದೊಡ್ಡ ಬಂಡವಾಳದಾರರ ಹಿಡಿತದಲ್ಲಿ ಸಿಲುಕುತ್ತಿವೆ.
ನಿಯಮ ಉಲ್ಲಂಘಿಸಿ ವಸೂಲಿ ಏಜೆಂಟ್ ಗಳ ನೇಮಕ
ಸಾಲ ವಸೂಲಿಗೆ ಸಂಬಂಧಿಸಿದಂತೆ ಮಳೆಗಾಂ ಸಮಿತಿ ಹಾಗೂ ಆರ್‌ಬಿಐನ ಹೊಸ ನಿಯಮಗಳ ಪ್ರಕಾರ ಗ್ರಾಹಕರ ಮೇಲೆ ಯಾವುದೇ ರೀತಿಯ ಬೆದರಿಕೆ ಹುಟ್ಟುಹಾಕುವ, ಮಾನಸಿಕ ಹಿಂಸೆ ನೀಡುವ ಮೂಲಕ ಬಲವಂತ ಮಾಡದೆ ಸಾಲ ವಸೂಲಿ ಪ್ರಕ್ರಿಯೆ ನಡೆಸಬೇಕು. ಬೆಳಗ್ಗೆ 8 ಗಂಟೆ ನಂತರ ಮತ್ತು ಸಂಜೆ 7 ಮುಂಚೆ ಗ್ರಾಹಕರನ್ನು ಸಂಪರ್ಕಿಸಬೇಕು, ಗ್ರಾಹಕರ ಗೌರವವನ್ನು ಕಾಪಾಡಬೇಕು ಹಾಗೂ ಗ್ರಾಹಕರ ಆರ್ಥಿಕ ಪರಿಸ್ಥಿತಿಯನ್ನು ಪರಿಗಣಿಸಬೇಕು. ಗ್ರಾಹಕರನ್ನು ಅವಾಚ್ಯ ಶಬ್ದಗಳಿಂದ ನಿಂದಿಸುವುದು, ಅವಹೇಳನ, ಅಪಮಾನ ಮಾಡದೇ ಸಾಲ ವಸೂಲಿ ಪ್ರಕ್ರಿಯೆಯು ಮಾನವೀಯ ಮೌಲ್ಯಗಳಿಂದ ಕೂಡಿರಬೇಕು ಎಂಬಂತಹ ಹಲವಾರು ನಿಯಮಗಳಿದ್ದರೂ, ಅವೆಲ್ಲವುಗಳನ್ನು ಗಾಳಿಗೆ ತೂರಿ ಮೈಕ್ರೋ ಫೈನಾನ್ಸ್ ಕಂಪನಿಗಳು ಸಾಲ ವಸೂಲಿ ಮಾಡಲು ಹೊರಗುತ್ತಿಗೆ ನೀಡಿ, ವಸೂಲಿ ಏಜೆಂಟ್ ಗಳನ್ನು ನೇಮಕ ಮಾಡಿಕೊಳ್ಳುತ್ತಾರೆ.
ಆ ಏಜೆಂಟರು ಗ್ರಾಮೀಣ ಭಾಗದ ಮಹಿಳೆಯರನ್ನು ಅಮಾನವೀಯವಾಗಿ ನಡೆಸಿಕೊಂಡು, ಅವಾಚ್ಯ ಶಬ್ದಗಳಿಂದ ನಿಂದಿಸಿ, ಅವರ ಮೇಲೆ ದೈಹಿಕ ಹಾಗೂ ಮಾನಸಿಕ ದೌರ್ಜನ್ಯ ಎಸಗಿರುವ ಎಷ್ಟೋ ಪ್ರಕರಣಗಳು ಬೆಳಕಿಗೆ ಬರುತ್ತಿವೆ. ಹಾಗೆಯೇ ರಾಮನಗರ ಜಿಲ್ಲೆಯಲ್ಲಿ, ಚಾಮರಾಜನಗರದಲ್ಲಿ, ಚಿತ್ರದುರ್ಗದ ತಿಪಟೂರಿನ ಮಹಿಳೆಯರ ಆತ್ಮಹತ್ಯೆ, ರಾಯಚೂರಿನಲ್ಲಿ ರೈತನ ಆತ್ಮಹತ್ಯೆ ಇವುಗಳು ರಾಜ್ಯದಾದ್ಯಂತ ಸುದ್ದಿಯಾಗಿವೆ. ರಾಜ್ಯದ ಹಲವು ಜಿಲ್ಲೆಗಳಲ್ಲಿ ಜನರು ಬೇಸತ್ತು ಅವಮಾನಕ್ಕೆ ಅಂಜಿ ಊರುಗಳನ್ನು ತೊರೆಯುತ್ತಿದ್ದಾರೆ.
ಸ್ಥಳೀಯ ಪೊಲೀಸ್ ಠಾಣೆಗಳಿಂದ ಅನುಮತಿ ಪಡೆಯಬೇಕು
ಮೈಕ್ರೋ ಫೈನಾನ್ಸ್ ಗಳಿಂದ ಹೊರಗುತ್ತಿಗೆ ಪಡೆದ ಸಾಲ ವಸೂಲಾತಿ ಏಜೆಂಟ್ ಗಳು ತಮ್ಮ ಕಾರ್ಯಚರಣೆಯನ್ನು ಮಾಡುವ ಮುಂಚೆ ಕಡ್ಡಾಯವಾಗಿ ಸ್ಥಳೀಯ ಪೊಲೀಸ್ ಠಾಣೆಗಳಿಂದ ಅನುಮತಿ ಪಡೆಯಬೇಕು. ವಸೂಲಿ ಮಾಡುವ ಏಜೆಂಟರು ತಮ್ಮ ವೈಯಕ್ತಿಕ ಮಾಹಿತಿಯನ್ನು ಪೊಲೀಸ್ ಠಾಣೆಗಳಿಗೆ ನೀಡಿ, ತಮಗೆ ಯಾವುದೇ ಅಪರಾಧ ಹಿನ್ನೆಲೆ ಇಲ್ಲವೆಂದು ಖಚಿತಪಡಿಸಿಕೊಳ್ಳಬೇಕು ಹಾಗೂ ಪೊಲೀಸ್ ಠಾಣೆಗಳಿಂದ ಅನುಮತಿ ಪತ್ರ ಪಡೆದ ನಂತರವೇ ಗ್ರಾಹಕರ ಮನೆಗೆ ಅಥವಾ ಸ್ಥಳಗಳಿಗೆ ಭೇಟಿ ನೀಡಬೇಕು ಆದರೆ ಏಜೆಂಟರು ಈ ಎಲ್ಲಾ ನಿಯಮಗಳನ್ನು ಗಾಳಿಗೆ ತೂರಿ ಮನಸ್ಸೋ ಇಚ್ಚೆ ವರ್ತಿಸುತ್ತಿದ್ದಾರೆ.
ಮಹಿಳಾ ಗ್ರಾಹಕರು ತಮ್ಮ ಮೇಲಾಗುತ್ತಿರುವ ಹಿಂಸೆ ಹಾಗೂ ದೌರ್ಜನ್ಯಗಳನ್ನು ಸ್ಥಳೀಯ ಪೊಲೀಸ್ ಠಾಣೆಗೆ ತಿಳಿಸಿದರೂ ಎಷ್ಟೋ ಪೊಲೀಸರು ಪೈನಾನ್ಸ್ ಸಂಸ್ಥೆಗಳ ಏಜೆಂಟರ ಬೆಂಬಲಿಗರಂತೆ ವರ್ತಿಸುತ್ತಿದ್ದಾರೆ ಎಂಬ ಆರೋಪಗಳು ಕೇಳಿಬಂದಿವೆ.
ಸಾಲ ತೀರಿಸಲು ಮತ್ತೊಂದು ಸಾಲ
ಗ್ರಾಹಕರು ಒಂದು ಮೈಕ್ರೋ ಫೈನಾನ್ಸ್ ಕಂಪನಿಯ ಸಾಲ ತೀರಿಸಲು ದಿನವೆಲ್ಲ ದುಡಿದರೂ ಬಡ್ಡಿ ಕಟ್ಟಲು ಸಾಕಾಗದೇ ಇರುವಾಗ, ಆ ಸಾಲ ತೀರಿಸಲು ಮತ್ತೊಂದು ಮೈಕ್ರೋ ಫೈನಾನ್ಸ್ ಕಂಪನಿಗಳು ನೀಡುವ ಸಾಲಗಳಿಗೆ ಮುಖ ಮಾಡುತ್ತಿದ್ದಾರೆ. ಯಾವುದೇ ಕಂಪನಿಗಳು ಸಾಲ ನೀಡುವ ಸಂದರ್ಭದಲ್ಲಿ 8 ರಿಂದ 10 ಜನ ಮಹಿಳೆಯರ ಗುಂಪುಗಳನ್ನು ಮಾಡಿ, ಆ ಗುಂಪಿನ ಯಾವುದೇ ಸದಸ್ಯರಿಗೆ ಸಾಲ ಕೊಡಬೇಕಾದರೂ ಇಡೀ ಗುಂಪಿನ ಒಪ್ಪಿಗೆಯನ್ನು ಪಡೆಯುತ್ತವೆ. ಆ ಗುಂಪಿನ ಯಾರಾದರೂ ಮಹಿಳೆ ಸಾಲ ವಾಪಸ್ಸಾತಿ ಮಾಡದೇ ಇದ್ದರೆ, ಆ ಸಾಲದ ಒಟ್ಟು ಹಣವನ್ನು ಆ ಗುಂಪಿನ ಪ್ರತಿ ಸದಸ್ಯರು ನೀಡಬೇಕೆಂದು ಮುಂಗಡವಾಗಿ ಒಪ್ಪಿಗೆ ಪಡೆದಿರುತ್ತವೆ. ಹಾಗೆಯೇ ತೆಗೆದುಕೊಂಡ ಸಾಲವನ್ನು ವಾಪಸ್ಸು ನೀಡದ ಮಹಿಳೆಯರ ಮನೆ ಬಾಗಿಲಿಗೆ ನೋಟೀಸ್ ಗಳನ್ನು ಹಾಕುವುದು, ಎಲ್ಲರ ಮುಂದೆ ಅವಾಚ್ಯ ಶಬ್ದಗಳಿಂದ ಬೈದು ಅವಮಾನಿಸುವುದು, ವೇಶ್ಯಾವಾಟಿಕೆಗೆ ಪ್ರಚೋದಿಸುವುದು ಸರ್ವೇಸಾಮಾನ್ಯ ಎನಿಸಿದೆ. ಇವೆಲ್ಲವುಗಳಿಂದ ಬೇಸತ್ತು ಅವಮಾನ ತಾಳಲಾರದೆ ಮನೆಯ ಹಸು ಕರುಗಳನ್ನು, ಪಾತ್ರೆಗಳು, ಮಾಂಗಲ್ಯವನ್ನು ಮಾರಿಕೊಳ್ಳುವ ಹಾಗೂ ಊರುಗಳನ್ನು ಬಿಡುವ ಸ್ಥಿತಿಗೆ ಬಂದಿದ್ದಾರೆ.
ಪೋಲೀಸರ ಬಳಿ ದೂರು ದಾಖಲಿಸಲು ಹಕ್ಕು
ಯಾವುದೇ ಮೈಕ್ರೋ ಫೈನಾನ್ಸಿಂಗ್ ಸಂಸ್ಥೆಗಳು ಕಾನೂನು ಬಾಹಿರವಾಗಿ ಕಾರ್ಯನಿರ್ವಹಿಸಿದಾಗ, ಹಿಂಸಾತ್ಮಕ ವಸೂಲಿ ಮತ್ತು ಬೆದರಿಕೆ ಪ್ರಕರಣವನ್ನು ಪೋಲೀಸರ ಬಳಿ ದೂರು ದಾಖಲಿಸಲು ಗ್ರಾಹಕರು ಹಕ್ಕು ಹೊಂದಿರುತ್ತಾರೆ. ಪೋಲೀಸರು ಭಾರತೀಯ ನ್ಯಾಯ ಸಂಹಿತೆ ಕಲಂ 308(1) ಬಲಾದ್ಗ್ರಹಣ, ಕಲಂ 351(1) ಅಪರಾಧಿಕ ಭಯೋತ್ಪಾದನೆ, ಕಲಂ 316 ಅಪರಾಧಿಕ ನಂಬಿಕೆ ದ್ರೋಹ, ಕಲಂ 120(1) & 120(2) ಬಲವಂತ ಮಾಡಿ ತಪ್ಪೊಪ್ಪಿಗೆಯನ್ನು ಪಡೆಯಲು ಅಥವಾ ಸ್ವತ್ತನ್ನು ಹಿಂದಕ್ಕೆ ಕೊಡುವಂತೆ ಒತ್ತಾಯಿಸಲು ಗಾಯವನ್ನು ಉಂಟುಮಾಡುವುದು ಮತ್ತು ತೀವ್ರಗಾಯವನ್ನು ಉಂಟುಮಾಡುವುದು ಹಾಗೂ ಅಕ್ರಮವಾಗಿ ಬಂಧಿಸಿದ್ದರೆ ಕಲಂ 127 ರ ಅಡಿಯಲ್ಲಿ ಪ್ರಕರಣವನ್ನು ದಾಖಲಿಸಬೇಕು. ಹಾಗೆಯೇ ಅತಿಯಾದ ಬಡ್ಡಿದರ ಹಾಗೂ ಅನಧಿಕೃತವಾಗಿ ಸಾಲ ವಿತರಣೆಗೆ ಸಂಬಂಧಿಸಿದ್ದರೆ ‘ಅರ್ಥಿಕ ಅಪರಾಧಗಳ’ ಅಡಿಯಲ್ಲಿ ಕ್ರಮ ಕೈಗೊಳ್ಳಬೇಕು. ಇಂತಹ ಅಪರಾಧಗಳಿಗೆ 5 ವರ್ಷಗಳವರೆಗೆ ಶಿಕ್ಷೆ ಅಥವಾ ದಂಡ ವಿಧಿಸಬಹುದಾಗಿದೆ.
ಸರ್ಕಾರ ಕೂಡಲೇ ಮಧ್ಯಪ್ರವೇಶಿಸಬೇಕು
ಮೈಕ್ರೋ ಫೈನಾನ್ಸಿಂಗ್ ಸಂಸ್ಥೆಗಳ ಕಿರುಕುಳಗಳು ಸರ್ಕಾರದ ಗಮನಕ್ಕೆ ಇದ್ದರೂ ಸರ್ಕಾರ ಇದರಿಂದ ಹಿಂದೆ ಸರಿಯದೇ, ಕೂಡಲೇ ಮಧ್ಯಪ್ರವೇಶಿಸಿ ಹಿಂಸೆ ಮತ್ತು ಬಲವಂತದ ವಸೂಲಿಯ ವಿರುದ್ದ ಸ್ಥಳೀಯ ಪೋಲೀಸ್ ಸಹಕಾರವನ್ನು ಪಡೆದು, ವಿಶೇಷ ತನಿಖಾ ತಂಡವನ್ನು ರಚಿಸಿ ತನಿಖೆ ಪ್ರಾರಂಭಿಸಬೇಕು. ಗ್ರಾಹಕರ ಹಕ್ಕುಗಳ ಉಲ್ಲಂಘನೆ ಮಾಡುವ ಸಂಸ್ಥೆಗಳ ಲೈಸೆನ್ಸ್ ಗಳನ್ನು ರದ್ದುಪಡಿಸಿ, ತೀವ್ರ ಆರ್ಥಿಕ ಸಂಕಷ್ಟಕ್ಕೆ ಒಳಗಾದ ಗ್ರಾಹಕರಿಗೆ ಕೌನ್ಸೆಲಿಂಗ್ ಸೆಂಟರ್ ಗಳನ್ನು ತೆರೆದು, ಆರ್ಥಿಕ ನೆರವಿಗಾಗಿ ಸಹಾಯ ಕೇಂದ್ರಗಳನ್ನು ತೆರೆಯಬೇಕು. ಹಾಗೆಯೇ ಸರ್ಕಾರಗಳೇ ಮುತುವರ್ಜಿ ವಹಿಸಿ ಗ್ರಾಮೀಣ ಭಾಗದ ಬಡ ಮತ್ತು ಮಧ್ಯಮ ವರ್ಗದ ಮಹಿಳೆಯರಿಗೆ ಸ್ವ ಸಹಾಯ ಸಂಘಗಳ ಮೂಲಕ ಅತಿ ಕಡಿಮೆ ಬಡ್ಡಿ ದರದಲ್ಲಿ ಪರ್ಯಾಯ ಅರ್ಥಿಕ ಸೌಲಭ್ಯಗಳನ್ನು ಒದಗಿಸಿ ಸ್ತ್ರೀ ಸಬಲೀಕರಣಕ್ಕೆ ಮುಂದಾಗ ಬೇಕೆ ವಿನಃ ಖಾಸಗಿ ಬಂಡವಾಳಗಾರರ ಪರ ನಿಲ್ಲಬಾರದು.
ಇದನ್ನೂ ನೋಡಿ: ಸುಣ್ಣಕಲ್ಲಬಿದರಿ : ಹಾಸ್ಟೆಲ್ ಅವ್ಯವಸ್ಥೆ- ವಿದ್ಯಾರ್ಥಿಗಳ ಪರದಾಟ Janashakthi Media
