ಕೋಲ್ಕತ್ತಾ: ಫೆಬ್ರವರಿ 20ರಂದು ಕೋಲ್ಕತ್ತಾದ ಸಾಲ್ಟ್ ಲೇಕ್‌ನಲ್ಲಿರುವ ಪ್ರೀಸ್ಕೂಲ್‌ನಲ್ಲಿ ಶಿಕ್ಷೆ ಎಂದು ಕತ್ತಲಿನಿಂದ ತುಂಬಿದ ಕಬೋರ್ಡ್‌ನಲ್ಲಿ ಮೂರೂವರೆ ವರ್ಷದ ಬಾಲಕಿಯನ್ನು ಕೂಡಿ ಹಾಕಿದ ಘಟನೆ ನಡೆದಿದೆ. ಈ ಘಟನೆಯ ವಿರುದ್ಧ ಸಾರ್ವಜನಿಕರ ಆಕ್ರೋಶ ವ್ಯಕ್ತವಾಗಿದ್ದು, ಪೊಲೀಸರಿಗೆ ದೂರು ನೀಡಲಾಗಿದೆ. ಪಶ್ಚಿಮ ಬಂಗಾಳ ಮಕ್ಕಳ ಹಕ್ಕುಗಳ ರಕ್ಷಣಾ ಆಯೋಗ ತನಿಖೆ ಆರಂಭಿಸಿದೆ.
ಮಗುವಿನ ತಂದೆಯ ದೂರಿನ ಪ್ರಕಾರ, ಸಾಯಿತಾ ಕರ್ಮಾಕರ್ ಮತ್ತು ಇಂದಿರಾ ದಾಸ್ ಎಂಬ ಶಿಕ್ಷಕಿಯರು ಬಾಲಕಿಯನ್ನು ಕಬೋರ್ಡ್‌ನಲ್ಲಿ ಕೂಡಿ ಹಾಕಿ, ಹೊರಬರದಂತೆ ಅದರ ಮುಂದೆ ಭಾರವಾದ ಮೇಜನ್ನು ಇಟ್ಟಿದ್ದಾರೆ ಎಂದು ಆರೋಪಿಸಲಾಗಿದೆ.
ಸಿಸಿಟಿವಿ ದೃಶ್ಯಾವಳಿಯಲ್ಲಿ ಈ ಘಟನೆ ಸೆರೆಯಾಗಿದೆ. ಬಾಲಕಿಯ ತಾಯಿಗೆ ದೃಶ್ಯಾವಳಿ ವೀಕ್ಷಿಸಲು ಅವಕಾಶ ನೀಡಲಾಗಿದೆ.
ಇದನ್ನೂ ಓದಿ: ಭಾರತೀಯ ಮಧ್ಯಸ್ಥಿಕೆ ಸಂಸ್ಥೆಗಳ ಮೇಲೆ ವಿಶ್ವಾಸ ಕೊರತೆ: ಸಿಜೆಐ ಸೂರ್ಯ ಕಾಂತ್
ವಿಡಿಯೊದಲ್ಲಿ ಶಿಕ್ಷಕಿ ಬಾಲಕಿಯನ್ನು ಖಾಲಿ ತರಗತಿಗೆ ಕರೆದುಕೊಂಡು ಹೋಗಿ, ಬಳಿಕ ಕಬೋರ್ಡ್ ಒಳಗೆ ನೂಕುತ್ತಿರುವುದು ಕಂಡುಬಂದಿದೆ. ಮತ್ತೊಬ್ಬ ಶಿಕ್ಷಕಿ ಮಧ್ಯಪ್ರವೇಶ ಮಾಡದೆ ವೀಕ್ಷಿಸುತ್ತಿರುವುದು ಮತ್ತು ಬಳಿಕ ನೆರವಾಗುತ್ತಿರುವುದು ದಾಖಲಾಗಿದೆ.
ಈ ಘಟನೆಯಿಂದ ಬಾಲಕಿ ಮಾನಸಿಕವಾಗಿ ಖಿನ್ನತೆಗೆ ಒಳಗಾಗಿದ್ದಾಳೆ ಎಂದು ತಿಳಿದುಬಂದಿದೆ. ಆಯೋಗ ಶಾಲಾ ಆಡಳಿತದಿಂದ ವರದಿ ಕೋರಿದೆ.
ಆಯೋಗದ ಮುಖ್ಯಸ್ಥೆ ತುಲಿಕಾ ದಾಸ್, “ಇದು ದುರ್ಘಟನೆ. ಶಾಲೆಗಳು ಮಕ್ಕಳ ಕಲ್ಯಾಣ ನೀತಿಗೆ ಬದ್ಧವಾಗಿರಬೇಕು. ಅಗತ್ಯವಿದ್ದರೆ ತಂಡ ಶಾಲೆಗೆ ಭೇಟಿ ನೀಡಲಿದೆ,” ಎಂದು ತಿಳಿಸಿದ್ದಾರೆ.
ಶಾಲಾ ಆಡಳಿತ ಘಟನೆಯಲ್ಲಿ ಭಾಗಿಯಾದ ಶಿಕ್ಷಕಿಯರ ವಿರುದ್ಧ ಕ್ರಮ ಕೈಗೊಂಡಿರುವುದಾಗಿ ತಿಳಿಸಿದೆ.
ಇದನ್ನೂ ನೋಡಿ: ಹೂವಾಗಬೇಕಿದ್ದದ್ದು… ಕ್ಷಿಪಣಿಯಾದದ್ದು | ಬುಷ್‌ ಅಧ್ಯಕ್ಷರಾಗಿದ್ದಾಗ ಕೃಷ್ಣ ನಾಯಕ ಹಿಚ್ಕಡ ಬರೆದ ಕವಿತೆ Janashakthi
