ಪಾಟ್ನಾ: ನೇಪಾಳದ ಗಂಡಕ್ ನದಿ ಜಲಾನಯನ ಪ್ರದೇಶದಲ್ಲಿ ಸುರಿದ ಭಾರಿ ಮಳೆಯಿಂದ ಬಿಹಾರದಲ್ಲಿ ಪ್ರವಾಹ ಪರಿಸ್ಥಿತಿ ಮತ್ತಷ್ಟು ಬಿಗಡಾಯಿಸಿದೆ. ಗಂಡಕ್ ನದಿಯಲ್ಲಿ ನೀರಿನ ಮಟ್ಟ ತೀವ್ರವಾಗಿ ಏರಿಕೆಯಾಗಿದ್ದು, ಹಲವು ಕಡೆ ತಟಬಂಧಗಳು ಒಡೆದ ಪರಿಣಾಮ ಆರು ಜಿಲ್ಲೆಗಳ ಸುಮಾರು 2.03 ಲಕ್ಷ ಜನರು ಪ್ರವಾಹದಿಂದ ಬಾಧಿತರಾಗಿದ್ದಾರೆ. ಪಶ್ಚಿಮ ಚಂಪಾರಣ, ಸಾರಣ್, ಗೋಪಾಲಗಂಜ್ ಮತ್ತು ಮುಜಫರ್‌ಪುರ ಜಿಲ್ಲೆಗಳು ಹೆಚ್ಚು ಹಾನಿಗೊಳಗಾಗಿವೆ. ಬಿಹಾರದಲ್ಲಿ
ಗಂಡಕ್ ನದಿ ಉಕ್ಕಿ ಹರಿದ ಪರಿಣಾಮ ಹಲವು ಗ್ರಾಮಗಳು ಜಲಾವೃತವಾಗಿವೆ. ರಸ್ತೆ ಸಂಪರ್ಕ ಕಡಿತಗೊಂಡಿದ್ದು, ಜನರು ಸುರಕ್ಷಿತ ಸ್ಥಳಗಳಿಗೆ, ಎತ್ತರದ ಪ್ರದೇಶಗಳಿಗೆ, ತಟಬಂಧಗಳ ಮೇಲ್ಭಾಗಕ್ಕೆ ಹಾಗೂ ಕಟ್ಟಡಗಳ ಮೇಲ್ಚಾವಣಿಗಳಿಗೆ ಸ್ಥಳಾಂತರಗೊಳ್ಳುತ್ತಿದ್ದಾರೆ. ಪ್ರವಾಹ ಪರಿಸ್ಥಿತಿ ಮತ್ತಷ್ಟು ಹದಗೆಡುವ ಸಾಧ್ಯತೆ ಹಿನ್ನೆಲೆಯಲ್ಲಿ ಆಡಳಿತ ಮತ್ತು ರಕ್ಷಣಾ ತಂಡಗಳು ಮುನ್ನೆಚ್ಚರಿಕೆ ಕ್ರಮಗಳನ್ನು ಕೈಗೊಂಡಿವೆ.
ಬಿಹಾರ ಜಲ ಸಂಪನ್ಮೂಲ ಇಲಾಖೆಯ ಪ್ರಕಾರ, ವಾಲ್ಮೀಕಿನಗರದ ಗಂಡಕ್ ಬ್ಯಾರೇಜ್‌ನಲ್ಲಿ ನೀರಿನ ಹರಿವು 5.435 ಲಕ್ಷ ಕ್ಯೂಸೆಕ್‌ಗೆ ತಲುಪಿದ್ದು, ಹಲವು ಗಂಟೆಗಳ ಕಾಲ 5 ಲಕ್ಷ ಕ್ಯೂಸೆಕ್‌ಗಿಂತಲೂ ಅಧಿಕವಾಗಿತ್ತು. ಭಾರಿ ನೀರಿನ ಒತ್ತಡದಿಂದ ತಟಬಂಧಗಳಲ್ಲಿ ಸೋರಿಕೆ ಹಾಗೂ ಹಾನಿಯ ಪ್ರಕರಣಗಳೂ ವರದಿಯಾಗಿವೆ. ಬಿಹಾರದಲ್ಲಿ
ಇದನ್ನೂ ಓದಿ : ನಮೂನೆ-7ರ ಅಕ್ರಮದ ಆರೋಪ: ತನಿಖೆಗೆ ಸಿಎಂ ಭರವಸೆ
ದಾಖಲೆಯ ಮಟ್ಟಕ್ಕೆ ಏರಿದ ಗಂಡಕ್
ಗಂಡಕ್ ನದಿ ಬಗಹಾದಲ್ಲಿ 91.25 ಮೀಟರ್ ಮಟ್ಟಕ್ಕೆ ಏರಿದ್ದು, ಇದುವರೆಗಿನ ದಾಖಲೆಯ ಮಟ್ಟವನ್ನು ತಲುಪಿದೆ ಎಂದು ವರದಿಯಾಗಿದೆ. ನದಿಯ ನೀರಿನ ಮಟ್ಟ ಏರಿಕೆಯಿಂದ ಪಶ್ಚಿಮ ಚಂಪಾರಣ ಸೇರಿದಂತೆ ಹಲವು ಪ್ರದೇಶಗಳಲ್ಲಿ ಪ್ರವಾಹದ ಆತಂಕ ಹೆಚ್ಚಿದೆ. ಬಿಹಾರದ ಅಧಿಕೃತ ಪ್ರವಾಹ ಮುನ್ಸೂಚನೆ ಮಾಹಿತಿಯಲ್ಲಿಯೂ ಗಂಡಕ್ ಸೇರಿದಂತೆ ಗಂಗಾ, ಕೋಸಿ, ಬಾಗ್ಮತಿ ಮತ್ತು ಇತರ ನದಿಗಳ ಹಲವು ಮಾಪನ ಕೇಂದ್ರಗಳಲ್ಲಿ ಅಪಾಯ ಅಥವಾ ಎಚ್ಚರಿಕೆ ಮಟ್ಟಕ್ಕಿಂತ ಹೆಚ್ಚಿನ ನೀರು ದಾಖಲಾಗಿದೆ.
ಇನ್ನಷ್ಟು ಜಿಲ್ಲೆಗಳಿಗೆ ಪ್ರವಾಹದ ಆತಂಕ
ಪಶ್ಚಿಮ ಚಂಪಾರಣ, ಪೂರ್ವ ಚಂಪಾರಣ, ಗೋಪಾಲಗಂಜ್, ಸಾರಣ್, ಮುಜಫರ್‌ಪುರ ಮತ್ತು ವೈಶಾಲಿ ಜಿಲ್ಲೆಗಳಲ್ಲೂ ಪ್ರವಾಹದ ಪರಿಣಾಮ ಕಂಡುಬಂದಿದೆ. ನೇಪಾಳದ ಗಂಡಕ್ ಜಲಾನಯನ ಪ್ರದೇಶದಲ್ಲಿ ಸುರಿದ ಭಾರಿ ಮಳೆಯೇ ನದಿಯಲ್ಲಿ ಏಕಾಏಕಿ ನೀರಿನ ಹರಿವು ಹೆಚ್ಚಲು ಪ್ರಮುಖ ಕಾರಣವಾಗಿದೆ ಎಂದು ವರದಿಗಳು ತಿಳಿಸಿವೆ.
ತಟಬಂಧಗಳ ಮೇಲೆ ನಿರಂತರ ಒತ್ತಡ ಮುಂದುವರಿದಿರುವುದರಿಂದ ಮುಂದಿನ ಅವಧಿಯಲ್ಲೂ ಪರಿಸ್ಥಿತಿ ಸೂಕ್ಷ್ಮವಾಗಿರಲಿದೆ ಎಂದು ಅಧಿಕಾರಿಗಳು ಎಚ್ಚರಿಸಿದ್ದಾರೆ. ಸದ್ಯ ಪ್ರವಾಹಪೀಡಿತ ಪ್ರದೇಶಗಳಲ್ಲಿ ರಕ್ಷಣಾ ಹಾಗೂ ಪರಿಹಾರ ಕಾರ್ಯಾಚರಣೆಗಳನ್ನು ತೀವ್ರಗೊಳಿಸಲಾಗಿದ್ದು, ಜನರನ್ನು ಸುರಕ್ಷಿತ ಪ್ರದೇಶಗಳಿಗೆ ಸ್ಥಳಾಂತರಿಸುವ ಕಾರ್ಯವೂ ನಡೆಯುತ್ತಿದೆ.
ಇದನ್ನೂ ನೋಡಿ : LIVE : SIR ಕುರಿತು ಮುಖ್ಯಮಂತ್ರಿ ಡಿ ಕೆ ಶಿವಕುಮಾರ್‌ ಪತ್ರಿಕಾಗೋಷ್ಠಿ
