ಫಾಲ್ತಾ: ಏಪ್ರಿಲ್ 29ರಂದು ನಡೆದ ಮತದಾನದಲ್ಲಿ ಇವಿಎಂ ತೊಂದರೆ ಆರೋಪದ ಹಿನ್ನೆಲೆಯಲ್ಲಿ ರದ್ದುಗೊಂಡಿದ್ದ ಫಾಲ್ತಾ ಕ್ಷೇತ್ರದಲ್ಲಿ ಮರುಮತದಾನಕ್ಕೆ ಚುನಾವಣಾ ಆಯೋಗ ಕಟ್ಟುನಿಟ್ಟಿನ ಭದ್ರತಾ ಕ್ರಮಗಳನ್ನು ಕೈಗೊಂಡಿದೆ.
ಒಟ್ಟು 285 ಮತಗಟ್ಟೆಗಳಲ್ಲಿ ಸುವ್ಯವಸ್ಥಿತ ಮತದಾನಕ್ಕಾಗಿ ಕೇಂದ್ರ ಪಡೆಗಳ ಸುಮಾರು 35 ಕಂಪನಿಗಳನ್ನು ನಿಯೋಜಿಸಲಾಗಿದೆ. ಯಾವುದೇ ಅಹಿತಕರ ಘಟನೆಗೆ ತಕ್ಷಣ ಸ್ಪಂದಿಸಲು 30 ಕ್ವಿಕ್ ರೆಸ್ಪಾನ್ಸ್ ತಂಡಗಳನ್ನು ಸಿದ್ಧ ಸ್ಥಿತಿಯಲ್ಲಿ ಇರಿಸಲಾಗಿದೆ.
“ಈ ಬಾರಿ ಮತದಾನ ಶಾಂತಿಯುತವಾಗಿ ನಡೆಯುತ್ತಿದೆ. ಯಾವುದೇ ಅಹಿತಕರ ಘಟನೆ ವರದಿಯಾಗಿಲ್ಲ. ಬೆಳಗ್ಗಿನಿಂದಲೇ ಮತಗಟ್ಟೆಗಳಲ್ಲಿ ಮತದಾರರ ದೀರ್ಘ ಸಾಲುಗಳು ಕಂಡುಬಂದಿವೆ. ಬೆಳಿಗ್ಗೆ 11 ಗಂಟೆಯವರೆಗೆ 42.83 ಶೇಕಡಾ ಮತದಾನ ದಾಖಲಾಗಿದೆ,” ಎಂದು ಚುನಾವಣಾ ಆಯೋಗದ ಅಧಿಕಾರಿ ಪಿಟಿಐಗೆ ತಿಳಿಸಿದ್ದಾರೆ.
ಇದನ್ನೂ ಓದಿ: “ಯೋಜನೆಗೆ 80% ಬೆಂಬಲ ಎನ್ನುವುದು ಸುಳ್ಳು; ರೈತರ ವೇಷದಲ್ಲಿ ಡಿಕೆಶಿ ಬೆಂಬಲಿಗರು” – ಟಿ. ಯಶವಂತ್
ಬೆಳಗ್ಗೆಯಿಂದಲೇ ಮತದಾರರು 285 ಮತಗಟ್ಟೆಗಳ ಹೊರಗೆ ಸಾಲಿನಲ್ಲಿ ನಿಂತು ಮತಚಲಾಯಿಸುತ್ತಿರುವುದು ಕಂಡುಬಂತು.
ಅಧಿಕೃತವಾಗಿ ಆರು ಅಭ್ಯರ್ಥಿಗಳು ಕಣದಲ್ಲಿದ್ದರೂ, ತೃಣಮೂಲ ಕಾಂಗ್ರೆಸ್ ಅಭ್ಯರ್ಥಿ ಜಹಾಂಗೀರ್ ಖಾನ್ ಅವರು ಕೆಲ ದಿನಗಳ ಹಿಂದೆ ಸ್ಪರ್ಧೆಯಿಂದ ಹಿಂದೆ ಸರಿಯುವುದಾಗಿ ಘೋಷಿಸಿದ್ದಾರೆ. ಇದನ್ನು ಪಕ್ಷವು ಅವರ ವೈಯಕ್ತಿಕ ನಿರ್ಧಾರವೆಂದು ತಿಳಿಸಿದೆ.
ಏಪ್ರಿಲ್ 29ರಂದು ನಡೆದ ಮತದಾನದ ವೇಳೆ ಹಲವು ಮತಗಟ್ಟೆಗಳಿಂದ ಇವಿಎಂ ಯಂತ್ರಗಳಿಗೆ ಪರಿಮಳದ ದ್ರವ್ಯ ಹಾಗೂ ಅಂಟುಪಟ್ಟಿ ಬಳಕೆ ಮಾಡಲಾಗಿದೆ ಎಂಬ ಆರೋಪಗಳು ಕೇಳಿಬಂದ ಹಿನ್ನೆಲೆಯಲ್ಲಿ ಮತದಾನ ರದ್ದುಗೊಂಡಿತ್ತು. ಇದರಿಂದ ಕ್ಷೇತ್ರದಲ್ಲಿ ರಾಜಕೀಯ ಉದ್ವಿಗ್ನತೆ ಮುಂದುವರಿದಿತ್ತು.
ಇದನ್ನೂ ನೋಡಿ: ಯುವಜನರನ್ನು “ಕಾಕ್ರೋಚ್” ಎಂದವರ ವಿರುದ್ಧ ಡಿಜಿಟಲ್ ಚಳವಳಿ! – ಕಾಕ್ರೋಚ್ ಜನತಾ ಪಾರ್ಟಿ Janashakthi Media
