ಮತದಾನಕ್ಕೆ ಕ್ಷಣಗಣನೆ : ಮತದಾರರು ಎಷ್ಟು ಜನ? ಎಷ್ಟು ಮತಗಟ್ಟೆಗಳಿವೆ? ಇಲ್ಲಿದೆ ವಿವರ

ಬೆಂಗಳೂರು: ಕರ್ನಾಟಕ ವಿಧಾನಸಭೆ ಚುನಾವಣೆಗೆ ಇನ್ನು ಒಂದೇ ದಿನ ಬಾಕಿ ಇದೆ. ಮೇ 10 ರಂದು ಬೆಳಗ್ಗೆ 7 ಗಂಟೆಯಿಂದ ಸಂಜೆ 6 ಗಂಟೆಯವರೆಗೆ ಮತದಾನ ನಡೆಯಲಿದ್ದು, ಚುನಾವಣಾ ಆಯೋಗ ಅಂತಮ ಹಂತದ ಸಿದ್ಧತೆಗಳನ್ನು ಮಾಡಿಕೊಂಡಿದೆ. ಬುಧವಾರ ರಾಜ್ಯದ 2615 ಮಂದಿ ಅಭ್ಯರ್ಥಿಗಳ ಭವಿಷ್ಯ ನಿರ್ಧಾರ ಆಗಲಿದೆ. ಈ ಕುರಿತಾದ ಸಂಪೂರ್ಣವಾದ ವಿವರ ಇಲ್ಲಿದೆ.

ಚುನಾವಣೆಗೆ ಅಂತಿಮ ಹಂತದ ಸಿದ್ಧತೆ : ವಿಧಾನಸಭೆ ಚುನಾವಣೆಗೆ ಅಂತಿಮ ಹಂತದ ಸಿದ್ಧತೆ ನಡೆಯುತ್ತಿದೆ. ಸಿಬ್ಬಂದಿ ನಿಯೋಜನೆ ಮತಗಟ್ಟೆಗಳಲ್ಲಿ ಸಿದ್ಧತೆಗಳು, ಭದ್ರತಾ ನಿಯೋಜನೆ ಕಾರ್ಯಗಳು ಭರದಿಂದ ಸಾಗುತ್ತಿದೆ. ಕರ್ನಾಟಕ ಚುನಾವಣಾ ಕಣದಲ್ಲಿ 2615 ಅಭ್ಯರ್ಥಿಗಳು ಇದ್ದು, ಈ ಪೈಕಿ ಪುರುಷರು 2430 ಹಾಗೂ ಮಹಿಳಾ ಅಭ್ಯರ್ಥಿಗಳು 184 ಮಂದಿ ಇದ್ದಾರೆ. ಓರ್ವ ತೃತಿಯ ಲಿಂಗಿ ಕೂಡಾ ಕಣದಲ್ಲಿದ್ದಾರೆ.

ಮತದಾರರ ವಿವರ : ರಾಜ್ಯದಲ್ಲಿ ಒಟ್ಟು 5, 31,33,054 ಕೋಟಿ ಮತದಾರರಿದ್ದಾರೆ. ಈ ಪೈಕಿ 2,67,28,053 ಕೋಟಿ ಪುರುಷ ಹಾಗೂ 2,64,00,074 ಕೋಟಿ ಮಹಿಳಾ ಮತದಾರರಿದ್ದಾರೆ. ಜೊತೆಗೆ 11, 71,558 ಯುವ ಮತದಾರರು ಇದ್ದಾರೆ. ಒಟ್ಟು ಮತದಾರರ ಪೈಕಿ 4,92,85,247 ಮತದಾರರಿಗೆ ಮತದಾರರ ಚೀಟಿ ವಿತರಿಸಲಾಗಿದೆ.

ಮತಗಟ್ಟೆಗಳೆಷ್ಟು : ರಾಜ್ಯದಲ್ಲಿ ಸಕ್ರಿಯ ಮತಗಟ್ಟೆ ಕೇಂದ್ರಗಳು- 58,282, ಹೆಚ್ಚುವರಿ ಮತಗಟ್ಟೆ ಕೇಂದ್ರಗಳು- 263 ಒಳಗೊಂಡು ಒಟ್ಟು – 58,545 ಮತಗಟ್ಟೆಗಳು ಇವೆ. ಈ ಮತಗಟ್ಟೆಗಳಲ್ಲಿ ಮತದಾನಕ್ಕೆ ಎಲ್ಲಾ ರೀತಿಯ ಸಿದ್ಧತೆಗಳನ್ನು ಮಾಡಿಕೊಳ್ಳಲಾಗಿದೆ. ಶೌಚಾಲಯ, ವಿಶ್ರಾಂತಿ ಕೊಠಡಿ, ಕುಡಿಯುವ ನೀರಿನ ವ್ಯವಸ್ಥೆಯನ್ನು ಕಲ್ಪಿಸಲಾಗಿದೆ.

ಇದನ್ನೂ ಓದಿ : ಟ್ವಿಟರ್‌ನಲ್ಲಿ ಟ್ರೆಂಡ್‌ ಆದ ʼಬೈಬೈ ಬಿಜೆಪಿʼ

ನಮ್ಮ ವಿವರ ಪಡೆಯೋದು ಹೇಗೆ? ಮೊದಲು ವೋಟರ್ ಹೆಲ್ಪ್‌ಲೈನ್‌ ಆಪ್‌ ಅನ್ನು ಡೌನ್ಲೋಡ್ ಮಾಡಿಕೊಳ್ಳಿ,  ನಂತರ https://voterportal.eci.gov.in ಪೋರ್ಟಲ್‌ ಅನ್ನು ತೆರೆಯಿರಿ ಆ ಬಳಿಕ ECIPSspace>EPIC Number/space> (ಹೇಳಿದಂತೆ) ಟೈಪ್ ಮಾಡಿ 1950 ಸಂಖ್ಯೆಗೆ ನಾರ್ಮಲ್‌ ಎಸ್ಎಂಎಸ್ ಕಳುಹಿಸಿ. ಆಗ ನಿಮ್ಮ ಮೊಬೈಲ್‌ಗೆ ನಿಮ್ಮ ಮತಗಟ್ಟೆ ಸೇರಿದಂತೆ ಎಲ್ಲಾ ವಿವರಗಳು ಬರುತ್ತದೆ.

ಮತ ಚಲಾಯಿಸಲು ಅಗತ್ಯ ದಾಖಲೆಗಳು ಏನೇನು ಬೇಕು? : ಮತದಾರರ ಭಾವಚಿತ್ರ ಚೀಟಿ ಮತದಾನ ಮಾಡಲು ಅಗತ್ಯ ದಾಖಲೆಯಾಗಿದೆ. ಇದು ಇಲ್ಲದೆ ಇದ್ದರೆ, ಆಧಾರ್‌ ಕಾರ್ಡ್, ನರೇಗಾ ಉದ್ಯೋಗ ಗುರುತಿನ ಚೀಟಿ, ಅಂಚೆ ಕಚೇರಿ ಮತ್ತು ಬ್ಯಾಂಕ್‌ಗಳಲ್ಲಿ ನೀಡಿರುವ ಭಾವಚಿತ್ರ ಉಳ್ಳ ಪಾಸ್ ಪುಸ್ತಕ, ಕಾರ್ಮಿಕ ಇಲಾಖೆಯಿಂದ ನೀಡಿರುವ ಆರೋಗ್ಯ ವಿಮಾ ಸ್ಮಾರ್ಟ್ ಕಾರ್ಡ್, ಡ್ರೈವಿಂಗ್ ಲೈಸೆನ್ಸ್, ಪ್ಯಾನ್ ಕಾರ್ಡ್, ಆರ್‌ ಜಿ ಐ ಮತ್ತು ಎನ್‌ಪಿಆರ್‌ ಮೂಲ ನೀಡಿರುವ ಸ್ಮಾರ್ಟ್ ಕಾರ್ಡ್, ಭಾರತದ ಪಾಸ್‌ಪೋರ್ಟ್, ಭಾವಚಿತ್ರ ಇರುವ ಪಿಂಚಣಿ ಕಾರ್ಡ್, ವಿಶಿಷ್ಠ ಅಂಗವೈಕಲ್ಯ ಪಾಸ್ ಇದ್ದರೂ ಸಾಕಾಗುತ್ತದೆ.

ಎರಡು ಗಂಟೆಗೊಮ್ಮೆ ಕ್ಷೇತ್ರವಾರು ಮತದಾನದ ಮಾಹಿತಿ : ಎರಡು ಗಂಟೆಗೆ ಒಮ್ಮೆ ಚುನಾವಣಾ ಆಯೋಗ ಕ್ಷೇತ್ರವಾರು ಮತದಾನ ಪ್ರಮಾಣದ ಮಾಹಿತಿಯನ್ನು ನೀಡಲಿದೆ. ಈ ಮೂಲಕ ಎಷ್ಟು ಶೇಕಡಾವಾರು ಮತದಾನ ಆಗಿದೆ ಎಂಬುವುದರ ವಿವರ ಸಿಗಲಿದೆ.

ಮದ್ಯ ಮಾರಾಟ ನಿಷೇಧ :  ಮೇ 8ರ ಸಂಜೆ 6ರಿಂದ ಮೇ 10 ರ ಮಧ್ಯರಾತ್ರಿ 12 ಗಂಟೆವರೆಗೆ ಎಲ್ಲ ಕ್ಷೇತ್ರಗಳಲ್ಲಿ ಮದ್ಯ ಮಾರಾಟ ಮಳಿಗೆಗಳಲ್ಲಿ ಮದ್ಯ ಮಾರಾಟ ಮತ್ತು ಪೂರೈಕೆ ನಿಷೇಧಿಸಲಾಗಿದೆ. ಈ ಕುರಿತು ಆಯಾ ಜಿಲ್ಲಾಧಿಕಾರಿಗಳು ಪ್ರತ್ಯೇಕ ಆದೇಶ ಹೊರಡಿಸಿದ್ದಾರೆ. ಅದೇ ರೀತಿ, ಮತ ಎಣಿಕೆ ದಿನವೂ ಮದ್ಯ ಮಾರಾಟಕ್ಕೆ ನಿರ್ಬಂಧ ಹೇರಲಾಗಿದೆ. ಮೇ 13ರಂದು ಬೆಳಗ್ಗೆ 6ರಿಂದ ಮಧ್ಯರಾತ್ರಿ 12 ಗಂಟೆವರೆಗೆ ಮದ್ಯದಂಗಡಿಗಳು ಬಂದ್‌ ಆಗಲಿವೆ.

ಜಿದ್ದಾಜಿದ್ದಿನ ಅಖಾಡದಲ್ಲಿ ಕಳೆದ 15 ದಿನಗಳಿಂದ ಬಿರುಸಿನಿಂದ ನಡೆದ ಪ್ರಚಾರಕ್ಕೆ ಮತದಾರ ಶಾಂತವಾಗಿ ನಾಳೆ ಉತ್ತರ ನೀಡಲಿದ್ದಾನೆ.  ಬಿಜೆಪಿ ಆಡಳಿತ ವಿರೋಧಿ ಅಲೆಯನ್ನು ಎದುರಿಸುತ್ತಿದೆ. ಮತದಾರ ಯಾವ ಪಕ್ಷಕ್ಕೆ ಜೈ ಅನ್ನಬಹುದು, ಮೇ 13 ರ ವರೆಗೆ ಕಾಯ್ದು ನೋಡಬೇಕಿದೆ.