ಚೆನ್ನೈ : ವ್ಯಾಪಕ ಪ್ರಶಂಸೆ ಗಳಿಸಿರುವ ‘ಜೈಭೀಮ್’ ಚಿತ್ರದ ನಟ ಮತ್ತು ನಿರ್ಮಾಪಕ ಸೂರಿಯ ಅವರು ಪೋಲೀಸರ ಚಿತ್ರಹಿಂಸೆಗೆ ಬಲಿಯಾದ ರಾಜಕಣ್ಣುರವರ ಪತ್ನಿ ಪಾರ್ವತಿ ಅಮ್ಮಾಳ್‍ಗೆ 15ಲಕ್ಷ ರೂ.ನ ಒಂದು ಚೆಕ್ಕನ್ನು ನವಂಬರ್ 16ರಂದು ನೀಡಿದರು. ಈ ವೇಳೆಯಲ್ಲಿ ತಮಿಳುನಾಡಿನ ಹಿರಿಯ ರಾಜಕಾರಣಿ ಮತ್ತು ಭಾರತ ಕಮ್ಯೂನಿಸ್ಟ್‌ ಪಕ್ಷ (ಮಾರ್ಕ್ಸ್‌ವಾದಿ)-ಸಿಪಿಐ(ಎಂ) ಪೊಲಿಟ್‍ ಬ್ಯುರೊ ಸದಸ್ಯರಾದ ಜಿ.ರಾಮಕೃಷ್ಣನ್ ಮತ್ತು ರಾಜ್ಯ ಕಾರ್ಯದರ್ಶಿ ಕೆ.ಬಾಲಕೃಷ್ಣನ್ ಹಾಜರಿದ್ದರು. ಅವರು ಪಕ್ಷದ ತಮಿಳುನಾಡು ರಾಜ್ಯಸಮಿತಿಯ ಪರವಾಗಿ ಸೂರಿಯ ಅವರಿಗೆ ಧನ್ಯವಾದ ಅರ್ಪಿಸಿದರು. ಈ ಚಿತ್ರದಲ್ಲಿನ ಅಂಶಗಳನ್ನೆತ್ತಿ ಜಾತ್ಯಂಧರು ಮತ್ತು ಬಲಪಂಥೀಯರ ದಾಳಿಗಳ ವಿರುದ್ಧ ಪಕ್ಷ ಅವರ ಬೆಂಬಲಕ್ಕೆ ನಿಲ್ಲುತ್ತದೆ ಎಂದು ಅವರು ಹೇಳಿದರು.
ತಮಿಳುನಾಡು ರಾಜ್ಯ ಸರಕಾರ, ಪಿಎಂಕೆ ಮತ್ತು ಬಲಪಂಥೀಯ ಗುಂಪುಗಳ ಬೆದರಿಕೆಯ ನಂತರ, ಸೂರಿಯ ರವರ ನಿವಾಸಕ್ಕೆ ಭದ್ರತೆ ಒದಗಿಸಿದ್ದಾರೆ ಎಂದು ವರದಿಯಾಗಿದೆ.
