ನವದೆಹಲಿ: ಕಳೆದ ವರ್ಷ ಸಂಭವಿಸಿದ್ದ ಏರ್ ಇಂಡಿಯಾ AI-171 ವಿಮಾನ ದುರಂತದ ತನಿಖೆಯಲ್ಲಿ ಹೊಸ ಮಾಹಿತಿಯೊಂದು ಹೊರಬಿದ್ದಿದೆ. ವಿಮಾನ ಅಪಘಾತ ತನಿಖಾ ದಳ (AAIB) ಬಿಡುಗಡೆ ಮಾಡಿರುವ ವರದಿಯಲ್ಲಿ ಸೇರಿಸದ ಕೆಲವು ಸಿಮ್ಯುಲೇಟರ್ ಪರೀಕ್ಷಾ ಮಾಹಿತಿಗಳು ಈಗ ಚರ್ಚೆಗೆ ಗ್ರಾಸವಾಗಿವೆ. ಈ ಮಾಹಿತಿಯು ದುರಂತದ ಕಾರಣಗಳ ಕುರಿತು ಹೊಸ ಪ್ರಶ್ನೆಗಳನ್ನು ಹುಟ್ಟುಹಾಕಿದೆ ಎಂದು ವರದಿಗಳು ತಿಳಿಸಿವೆ.
ದುರಂತದ ಬಳಿಕ ಏರ್ ಇಂಡಿಯಾದ ತರಬೇತಿ ಪೈಲಟ್ಗಳು ಬೋಯಿಂಗ್ 787 ಡ್ರೀಮ್ಲೈನರ್ ಸಿಮ್ಯುಲೇಟರ್ನಲ್ಲಿ ಹಲವು ಪರೀಕ್ಷೆಗಳನ್ನು ನಡೆಸಿದ್ದರು. ವಿಮಾನದ ತೂಕ, ಇಂಧನ ಪ್ರಮಾಣ ಮತ್ತು ಹಾರಾಟದ ಸಂದರ್ಭದ ಪರಿಸ್ಥಿತಿಗಳನ್ನು ಮರುಸೃಷ್ಟಿಸಿ ನಡೆಸಿದ ಈ ಪರೀಕ್ಷೆಗಳಲ್ಲಿ, ಒಂದು ಎಂಜಿನ್ ಮಾತ್ರ ಕಾರ್ಯನಿರ್ವಹಿಸುತ್ತಿದ್ದರೂ ವಿಮಾನ ಸುರಕ್ಷಿತವಾಗಿ ಮೇಲೇರಲು ಸಾಧ್ಯವಾಗುತ್ತಿತ್ತು ಎಂಬ ಅಂಶ ಬೆಳಕಿಗೆ ಬಂದಿತ್ತು. ಈ ಮಾಹಿತಿ ದುರಂತದ ಕಾರಣ ಕೇವಲ ಎಂಜಿನ್ ವೈಫಲ್ಯವೇ ಆಗಿತ್ತೇ ಎಂಬ ಪ್ರಶ್ನೆಯನ್ನು ಎತ್ತಿದೆ.
ಇದನ್ನೂ ಓದಿ : ಮೆಕೆದಾಟು ವಿರುದ್ಧ ಕಠಿಣ ನಿಲುವು, ಕೇಂದ್ರದ ಜೊತೆ ಸ್ನೇಹ! ವಿಜಯ್ ತಂತ್ರ ಏನು?
AAIBನ ಪ್ರಾಥಮಿಕ ವರದಿಯ ಪ್ರಕಾರ, ಟೇಕ್ಆಫ್ ಆದ ಕೆಲವೇ ಕ್ಷಣಗಳಲ್ಲಿ ಎರಡೂ ಎಂಜಿನ್ಗಳಿಗೆ ಇಂಧನ ಪೂರೈಕೆ ಸ್ಥಗಿತಗೊಂಡಿತ್ತು. ಇದರ ಪರಿಣಾಮ ವಿಮಾನ ಎತ್ತರ ಕಳೆದುಕೊಂಡು ಪತನಗೊಂಡಿತ್ತು. ಆದರೆ ಇಂಧನ ನಿಯಂತ್ರಣ ಸ್ವಿಚ್ಗಳು ಹೇಗೆ “ರನ್” ಸ್ಥಿತಿಯಿಂದ “ಕಟ್ಆಫ್” ಸ್ಥಿತಿಗೆ ಬದಲಾದವು ಎಂಬುದು ಇನ್ನೂ ತನಿಖೆಯ ಪ್ರಮುಖ ವಿಷಯವಾಗಿದೆ.
ಇದೇ ವೇಳೆ, ಕೆಲವು ಪೈಲಟ್ ಸಂಘಟನೆಗಳು ತನಿಖಾ ವರದಿಯಲ್ಲಿ ಪ್ರಮುಖ ಕಾಕ್ಪಿಟ್ ಮಾಹಿತಿ ಮತ್ತು ಎಚ್ಚರಿಕೆ ವ್ಯವಸ್ಥೆಗಳ ವಿವರಗಳನ್ನು ಸಂಪೂರ್ಣವಾಗಿ ಸೇರಿಸಲಾಗಿಲ್ಲ ಎಂದು ಆಕ್ಷೇಪ ವ್ಯಕ್ತಪಡಿಸಿವೆ. ತನಿಖೆ ಪಾರದರ್ಶಕವಾಗಿರಬೇಕು ಮತ್ತು ಎಲ್ಲ ತಾಂತ್ರಿಕ ಮಾಹಿತಿಗಳನ್ನು ಸಾರ್ವಜನಿಕರಿಗೆ ತಿಳಿಸಬೇಕು ಎಂದು ಅವು ಒತ್ತಾಯಿಸಿವೆ.
AI-171 ದುರಂತದಲ್ಲಿ 260ಕ್ಕೂ ಹೆಚ್ಚು ಮಂದಿ ಮೃತಪಟ್ಟಿದ್ದು, ಇದು ಭಾರತದ ನಾಗರಿಕ ವಿಮಾನಯಾನ ಇತಿಹಾಸದ ಅತ್ಯಂತ ಭೀಕರ ದುರಂತಗಳಲ್ಲಿ ಒಂದಾಗಿದೆ. ತನಿಖೆ ಈಗ ಅಂತಿಮ ವಿಶ್ಲೇಷಣೆಯ ಹಂತದಲ್ಲಿದ್ದು, ಊಹಾಪೋಹಗಳಿಗೆ ಅವಕಾಶ ನೀಡದೇ ಅಂತಿಮ ವರದಿಗಾಗಿ ಕಾಯುವಂತೆ AAIB ಮನವಿ ಮಾಡಿದೆ.
ಇದನ್ನೂ ನೋಡಿ : BLO ಕೆಲಸದ ಒತ್ತಡಕ್ಕೆ ಬೇಸತ್ತ ಅಂಗನವಾಡಿ ನೌಕರರು! ಫ್ರೀಡಂ ಪಾರ್ಕ್ನಲ್ಲಿ ಬೃಹತ್ ಪ್ರತಿಭಟನೆ Janashakthi Media
