ಪಾಟ್ನಾ : ಬಿಹಾರ ವಿಧಾನಸಭೆಯಲ್ಲಿ ಸಿಪಿಐ(ಎಂ) ಶಾಸಕಾಂಗ ಪಕ್ಷದ ಮುಖಂಡರೂ, ರಾಜ್ಯ ಕಾರ್ಯದರ್ಶಿ ಮಂಡಳಿಯ ಸದಸ್ಯರೂ ಅಗಿರುವ ಅಜಯ್ ಕುಮಾರ್ ಮೇಲೆ ಮೇ 29ರಂದು ಸಮಸ್ತಿಪುರದಲ್ಲಿ ಮಾರಣಾಂತಿಕ ಹಲ್ಲೆ ನಡೆದಿದೆ. ಇದನ್ನು ಸಿಪಿಐ(ಎಂ) ಪೊಲಿಟ್‍ ಬ್ಯುರೊ ಖಂಡಿಸಿದೆ. ಇದು ಕಳೆದ ಕೆಲವು ವಾರಗಳಲ್ಲಿ ಇಂತಹ ಎರಡನೇ ಹಲ್ಲೆಯಾಗಿದೆ.
ಹಲ್ಲೆಕೋರರನ್ನು ತಕ್ಷಣವೇ ಪತ್ತೆಹಚ್ಚಿ ಹಿಡಿಯಬೇಕು ಮತ್ತು ಅವರ ವಿರುದ್ಧ ಶಿಕ್ಷಾ ಕ್ರಮಗಳನ್ನು ಕೈಗೊಳ್ಳಬೇಕು ಎಂದು ಆಗ್ರಹಿಸಿರುವ ಪೊಲಿಟ್‍ ಬ್ಯುರೊ ಅಜಯ್ ಕುಮಾರ್ ಅವರಿಗೆ ಸಾಕಷ್ಟು ಭದ್ರತೆಯನ್ನು ಒದಗಿಸಬೇಕು ಮತ್ತು ಇಂತಹ ಘಟನೆಗಳು ಮತ್ತೆ-ಮತ್ತೆ ಏಕೆ ನಡೆಯುತ್ತದೆ ಎಂಬುದಕ್ಕೆ ಒಂದು ತನಿಖೆಯನ್ನು ನಡೆಸಬೇಕು ಎಂದು ಹೇಳಿದೆ.
ಸಿಪಿಐ (ಎಂ) ಶಾಸಕ ಅಜಯ್ ಕುಮಾರ್ ಅವರು ಜನಪ್ರಿಯ ಎಡ ನಾಯಕರಾಗಿದ್ದಾರೆ ಮತ್ತು ಕಳೆದ 2020 ರ ರಾಜ್ಯ ವಿಧಾನಸಭೆಯಲ್ಲಿ ಬಿಭೂತಿಪುರ ಕ್ಷೇತ್ರದಲ್ಲಿ ಜೆಡಿಯು ಶಾಸಕ ರಾಮ್ ಬಾಲಕ್ ಸಿಂಗ್ ಅವರನ್ನು ಸೋಲಿಸಿದ್ದರು. ಮೇ 29 ರಂದು ರಾತ್ರಿ 10 ಗಂಟೆ ಸುಮಾರಿಗೆ ಸಮಸ್ತಿಪುರ ರೈಲ್ವೆ ನಿಲ್ದಾಣದ ಸಮೀಪದಲ್ಲಿರುವ ಸಮಸ್ತಿಪುರದ ಪಕ್ಷದ ಕಚೇರಿಗೆ ಕೆಲವು ಅಪರಾಧಿಗಳು ಪ್ರವೇಶಿಸಲು ಪ್ರಯತ್ನಿಸಿದರು ಮತ್ತು ಬೀಗ ಮುರಿದಿದ್ದಾರೆ ಎಂದು ಹಿರಿಯ ಸಿಪಿಐ (ಎಂ) ಮುಖಂಡ ಸರ್ವೋದ್ಯಾ ಶರ್ಮಾ ಅವರು ಮಾಧ್ಯಮಗಳಿಗೆ ತಿಳಿಸಿದ್ದಾರೆ.
ದುಷ್ಕರ್ಮಿಗಳು ಕಚೇರಿಯಲ್ಲಿದ್ದ ಪಕ್ಷದ ಶಾಸಕ ಅಜಯ್ ಕುಮಾರ್ ಅವರ ಮೇಲೆ ದಾಳಿ ಮಾಡಲು ಬಂದಿದ್ದರು ಆದರೆ ಇತರ ಜನರು ಅಲ್ಲಿ ಜಮಾಯಿಸಿದ್ದರಿಂದ ಅದನ್ನು ಮಾಡಲು ಸಾಧ್ಯವಾಗಲಿಲ್ಲ. ಆದರೆ, ದಾಳಿಯಲ್ಲಿ ಭದ್ರತಾ ಸಿಬ್ಬಂದಿಯೊಬ್ಬರು ಗಾಯಗೊಂಡಿದ್ದಾರೆ. ಪಕ್ಷದ ಶಾಸಕರ ಮೇಲೆ ಒಂದು ತಿಂಗಳ ಹಿಂದೆಯೂ ದಾಳಿ ನಡೆದಿತ್ತು ”ಎಂದು ಶ್ರೀ ಶರ್ಮಾ ಹೇಳಿದ್ದಾರೆ. “ಇದು ಪಕ್ಷ ಮತ್ತು ಪಕ್ಷದ ಶಾಸಕರ ಮೇಲಿನ ದಾಳಿ ಎಂದು ತೋರುತ್ತದೆ” ಇದು ರಾಜಕೀಯ ಪಿತೂರಿಯನ್ನು ತೋರಿಸುತ್ತದೆ. ಮತ್ತು ನಮ್ಮ ದೂರಿನ ಹೊರತಾಗಿಯೂ ಪಕ್ಷದ ಶಾಸಕರ ಮೇಲೆ ಪದೇ ಪದೇ ದಾಳಿ ನಡೆಸುತ್ತಿರುವವರ ವಿರುದ್ಧ ಜಿಲ್ಲಾ ಪೊಲೀಸರು ಯಾವುದೇ ಕ್ರಮ ಕೈಗೊಳ್ಳುತ್ತಿಲ್ಲ “ಎಂದು ಅವರು ಆರೋಪಿಸಿದ್ದಾರೆ.
