ಭಾರತೀಯ ರಿಸರ್ವ್ ಬ್ಯಾಂಕ್ (ಆರ್‌ಬಿಐ) ಮೇ 1, 2025 ರಿಂದ ಎಟಿಎಮ್ ನಗದು ವಿತ್‌ಡ್ರಾ ಶುಲ್ಕದಲ್ಲಿ 2 ರೂ.ಗಳ ಹೆಚ್ಚಳಕ್ಕೆ ಅನುಮತಿ ನೀಡಿದೆ. ಈ ಹೊಸ ದರಗಳ ಪ್ರಕಾರ, ಉಚಿತ ವಿತ್‌ಡ್ರಾ ಮಿತಿಯನ್ನು ಮೀರಿ ಎಟಿಎಮ್‌ನಿಂದ ಹಣ ತೆಗೆಯುವ ಪ್ರತಿಯೊಂದು ವಹಿವಾಟಿಗೆ ಗ್ರಾಹಕರು ಈಗ 23 ರೂ.ಗಳಷ್ಟು ಶುಲ್ಕವನ್ನು ಭರಿಸಬೇಕಾಗುತ್ತದೆ.
ಇದನ್ನು ಓದಿ :ಸಾರಿಗೆ ಬಸ್ ವ್ಯವಸ್ಥೆ ಇಲ್ಲದೆ ಆಟೋದಲ್ಲಿ ಪರೀಕ್ಷೆ ಬರೆಯಲು ಹೊರಟ ವಿದ್ಯಾರ್ಥಿಗಳು
ಪ್ರಸ್ತುತ, ಬೆಂಗಳೂರು, ಚೆನ್ನೈ, ಹೈದರಾಬಾದ್, ಕೋಲ್ಕತ್ತಾ, ಮುಂಬೈ ಮತ್ತು ನವದೆಹಲಿಯಂತಹ ಮೆಟ್ರೋ ನಗರಗಳಲ್ಲಿ ಖಾತೆ ಹೊಂದಿರುವ ಗ್ರಾಹಕರು ತಮ್ಮ ಬ್ಯಾಂಕಿನ ಎಟಿಎಂಗಳಲ್ಲಿ ಮಾಸಿಕ ಐದು ಉಚಿತ ವಿತ್‌ಡ್ರಾಗಳನ್ನು ಮತ್ತು ಇತರ ಬ್ಯಾಂಕುಗಳ ಎಟಿಎಂಗಳಲ್ಲಿ ಮೂರು ಉಚಿತ ವಿತ್‌ಡ್ರಾಗಳನ್ನು ಮಾಡಬಹುದು. ಈ ಮಿತಿಯನ್ನು ಮೀರಿ ವಹಿವಾಟು ಮಾಡಿದರೆ, ಹೆಚ್ಚಿದ 2 ರೂ.ಗಳ ಇಂಟರ್‌ಚೇಂಜ್ ಶುಲ್ಕವು ಗ್ರಾಹಕರಿಗೆ ಅನ್ವಯವಾಗುತ್ತದೆ.
ಇತ್ತೀಚಿನ ವರ್ಷಗಳಲ್ಲಿ ಎಟಿಎಮ್ ಬಳಕೆ ಸ್ಥಿರವಾಗಿ ಕುಸಿತ ಕಂಡಿದೆ. ಆರ್‌ಬಿಐ ಅಂಕಿಅಂಶಗಳ ಪ್ರಕಾರ, 2023ರ ಜನವರಿಯಲ್ಲಿ 57 ಕೋಟಿ ರೂ.ಗೂ ಹೆಚ್ಚು ವಹಿವಾಟು ನಡೆದಿದ್ದರೆ, 2024ರ ಜನವರಿಯಲ್ಲಿ ಇದು 52.72 ಕೋಟಿ ರೂ.ಗೆ ಮತ್ತು 2025ರ ಜನವರಿಯಲ್ಲಿ 48.83 ಕೋಟಿ ರೂ.ಗೆ ಇಳಿಕೆಯಾಗಿದೆ.
ಈ ಶುಲ್ಕ ಹೆಚ್ಚಳವು ಗ್ರಾಹಕರಿಗೆ ಹೆಚ್ಚುವರಿ ಹಣಕಾಸು ಭಾರವನ್ನು ಉಂಟುಮಾಡಬಹುದು. ಆದ್ದರಿಂದ, ಗ್ರಾಹಕರು ತಮ್ಮ ಎಟಿಎಮ್ ಬಳಕೆಯನ್ನು ಯೋಜಿತವಾಗಿ ನಿರ್ವಹಿಸಿ, ಉಚಿತ ವಿತ್‌ಡ್ರಾ ಮಿತಿಯೊಳಗೆ ವಹಿವಾಟು ನಡೆಸುವುದು ಸೂಕ್ತವಾಗಿದೆ. ಬ್ಯಾಂಕುಗಳು ಈ ಹೊಸ ದರಗಳನ್ನು ತಮ್ಮ ಗ್ರಾಹಕರಿಗೆ ತಿಳಿಸಲು ಬದ್ಧವಾಗಿದ್ದು, ಗ್ರಾಹಕರು ತಮ್ಮ ಬ್ಯಾಂಕುಗಳಿಂದ ಹೆಚ್ಚಿನ ಮಾಹಿತಿಯನ್ನು ಪಡೆಯಬಹುದು.
ಇದನ್ನು ಓದಿ :ಒಳಮೀಸಲಾತಿ ವೈಜ್ಞಾನಿಕ ಸಮೀಕ್ಷೆಯನ್ನು ತ್ವರಿತಗೊಳಿಸಲು ಮತ್ತು ಅಲ್ಲಿಯವರೆಗೆ ಪರಿಶಿಷ್ಟ ನೇಮಕಾತಿಗಳನ್ನು ತಡೆಹಿಡಿಯಲು ಸಿಪಿಐ(ಎಂ) ಆಗ್ರಹ
