ಅಟ್ಲಾಂಟಾ: ಫುಟ್ಬಾಲ್ ವಿಶ್ವಕಪ್ ಇತಿಹಾಸದಲ್ಲೇ ಅತ್ಯಂತ ರೋಚಕ ಸೆಮಿಫೈನಲ್ ಹಂತಕ್ಕೆ ವೇದಿಕೆ ಸಜ್ಜಾಗಿದೆ. ಹಿಂದಿನ ನಾಲ್ಕು ವಿಶ್ವಚಾಂಪಿಯನ್ ತಂಡಗಳು ಹಾಗೂ ಫಿಫಾ ಶ್ರೇಯಾಂಕದ ಅಗ್ರ ನಾಲ್ಕು ತಂಡಗಳು ಪ್ರಶಸ್ತಿಗಾಗಿ ಕಣದಲ್ಲಿವೆ.
ಅರ್ಜೆಂಟೀನಾ, ಸ್ಪೇನ್, ಫ್ರಾನ್ಸ್ ಮತ್ತು ಇಂಗ್ಲೆಂಡ್ ತಂಡಗಳು ಟೂರ್ನಿಗೆ ವಿಶ್ವ ಶ್ರೇಯಾಂಕದಲ್ಲಿ ಮೊದಲ ನಾಲ್ಕು ಸ್ಥಾನಗಳೊಂದಿಗೆ ಪ್ರವೇಶಿಸಿದ್ದವು. ಇದೀಗ ಮತ್ತೊಮ್ಮೆ ವಿಶ್ವ ಚಾಂಪಿಯನ್ ಪಟ್ಟ ಅಲಂಕರಿಸಲು ಈ ನಾಲ್ಕು ತಂಡಗಳು ಕೇವಲ ಎರಡು ಗೆಲುವಿನ ಅಂತರದಲ್ಲಿವೆ.
ಮೊದಲ ಸೆಮಿಫೈನಲ್ನಲ್ಲಿ ಜುಲೈ 14ರಂದು ಟೆಕ್ಸಾಸ್ನ ಆರ್ಲಿಂಗ್ಟನ್ನಲ್ಲಿ ಫ್ರಾನ್ಸ್ ಹಾಗೂ ಸ್ಪೇನ್ ಮುಖಾಮುಖಿಯಾಗಲಿವೆ. ಜುಲೈ 15ರಂದು ಅಟ್ಲಾಂಟಾದಲ್ಲಿ ಇಂಗ್ಲೆಂಡ್ ಮತ್ತು ಅರ್ಜೆಂಟೀನಾ ನಡುವಿನ ಐತಿಹಾಸಿಕ ಕದನ ನಡೆಯಲಿದೆ.
ಇದನ್ನೂ ಓದಿ: ವೆನೆಜುವೆಲಾ ಭೂಕಂಪ ದುರಂತ: ಮೃತರ ಸಂಖ್ಯೆ 4,490ಕ್ಕೆ ಏರಿಕೆ
1990ರ ಬಳಿಕ ಇದೇ ಮೊದಲ ಬಾರಿಗೆ ವಿಶ್ವಕಪ್ನ ಅಂತಿಮ ನಾಲ್ಕರ ಹಂತದಲ್ಲಿ ಹಿಂದಿನ ಎಲ್ಲ ಚಾಂಪಿಯನ್ ತಂಡಗಳು ಸ್ಥಾನ ಪಡೆದಿವೆ. 1990ರಲ್ಲೂ ಇಂಗ್ಲೆಂಡ್ ಮತ್ತು ಅರ್ಜೆಂಟೀನಾ ಸೆಮಿಫೈನಲ್ ಹಂತ ತಲುಪಿದ್ದವು. ಆದರೆ ಆ ಬಾರಿ ಈ ಎರಡು ತಂಡಗಳು ಪರಸ್ಪರ ಎದುರಾಗಿರಲಿಲ್ಲ.
ಈ ಬಾರಿ ಫ್ರಾನ್ಸ್ ಮತ್ತು ಅರ್ಜೆಂಟೀನಾ ಸೆಮಿಫೈನಲ್ ಗೆದ್ದರೆ, 2022ರ ವಿಶ್ವಕಪ್ ಫೈನಲ್ನ ಮರುಕದನವೂ ನಡೆಯುವ ಸಾಧ್ಯತೆ ಇದೆ.
ಇಂಗ್ಲೆಂಡ್ vs ಅರ್ಜೆಂಟೀನಾ: ಹಳೆಯ ವೈಷಮ್ಯದ ಹೊಸ ಅಧ್ಯಾಯ
ಅರ್ಜೆಂಟೀನಾ ಮತ್ತು ಇಂಗ್ಲೆಂಡ್ ನಡುವಿನ ಸೆಮಿಫೈನಲ್ ಕೇವಲ ಫುಟ್ಬಾಲ್ ಪಂದ್ಯವಲ್ಲ, ಹಲವು ದಶಕಗಳ ಇತಿಹಾಸ ಮತ್ತು ಪೈಪೋಟಿಯ ಮುಂದುವರಿದ ಭಾಗವಾಗಿದೆ.
1982ರ ಫಾಕ್ಲ್ಯಾಂಡ್ ದ್ವೀಪಗಳ ಸಂಘರ್ಷದಿಂದ ಎರಡೂ ದೇಶಗಳ ನಡುವಿನ ರಾಜಕೀಯ ಉದ್ವಿಗ್ನತೆಯೂ ಈ ಪೈಪೋಟಿಗೆ ಹಿನ್ನೆಲೆಯಾಗಿದೆ. ವಿಶ್ವಕಪ್ ವೇದಿಕೆಯಲ್ಲಿ ಎರಡೂ ತಂಡಗಳ ನಡುವಿನ ಹಲವು ವಿವಾದಾತ್ಮಕ ಘಟನೆಗಳು ನಡೆದಿವೆ.
1966ರ ವಿಶ್ವಕಪ್ನಲ್ಲಿ ಇಂಗ್ಲೆಂಡ್ ವಿರುದ್ಧದ ಕ್ವಾರ್ಟರ್ಫೈನಲ್ ಪಂದ್ಯದಲ್ಲಿ ಅರ್ಜೆಂಟೀನಾ ನಾಯಕ ಆಂಟೋನಿಯೊ ರಾಟಿನ್ ಕೆಂಪು ಕಾರ್ಡ್ ಪಡೆದು ಹೊರಹಾಕಲ್ಪಟ್ಟಿದ್ದರು. ಆ ಪಂದ್ಯವನ್ನು ಇಂಗ್ಲೆಂಡ್ ಗೆದ್ದು ಪ್ರಶಸ್ತಿ ಎತ್ತಿಹಿಡಿದಿತ್ತು.
1986ರ ವಿಶ್ವಕಪ್ನಲ್ಲಿ ಡಿಯಾಗೋ ಮರಡೋನಾರ “ಹ್ಯಾಂಡ್ ಆಫ್ ಗಾಡ್” ಗೋಲ್ ಫುಟ್ಬಾಲ್ ಇತಿಹಾಸದ ಅತ್ಯಂತ ವಿವಾದಾತ್ಮಕ ಕ್ಷಣಗಳಲ್ಲಿ ಒಂದಾಯಿತು. ಆ ಪಂದ್ಯದಲ್ಲಿ ಅರ್ಜೆಂಟೀನಾ 2-1ರಿಂದ ಇಂಗ್ಲೆಂಡ್ನ್ನು ಸೋಲಿಸಿತ್ತು.
1998ರ ವಿಶ್ವಕಪ್ನಲ್ಲಿ ಡೇವಿಡ್ ಬೆಕ್ಹ್ಯಾಮ್ ಅರ್ಜೆಂಟೀನಾ ಆಟಗಾರ ಡಿಯಾಗೋ ಸಿಮಿಯೋನೆ ವಿರುದ್ಧದ ಪ್ರತಿಕ್ರಿಯೆಗೆ ಕೆಂಪು ಕಾರ್ಡ್ ಪಡೆದಿದ್ದರು. ಆ ಪಂದ್ಯದಲ್ಲಿ ಅರ್ಜೆಂಟೀನಾ ಪೆನಾಲ್ಟಿ ಶೂಟೌಟ್ ಮೂಲಕ ಜಯಿಸಿತ್ತು.
ಆದರೆ 2002ರ ವಿಶ್ವಕಪ್ನಲ್ಲಿ ಬೆಕ್ಹ್ಯಾಮ್ ಪೆನಾಲ್ಟಿ ಗೋಲ್ ಮೂಲಕ ಇಂಗ್ಲೆಂಡ್ಗೆ ಜಯ ತಂದು ಅರ್ಜೆಂಟೀನಾವನ್ನು ಟೂರ್ನಿಯಿಂದ ಹೊರಹಾಕಿತ್ತು.
ಫ್ರಾನ್ಸ್ vs ಸ್ಪೇನ್: ಸೇಡು ತೀರಿಸಿಕೊಳ್ಳಲು ಫ್ರಾನ್ಸ್ಗೆ ಅವಕಾಶ
ಮತ್ತೊಂದು ಸೆಮಿಫೈನಲ್ನಲ್ಲಿ ಫ್ರಾನ್ಸ್ ಮತ್ತು ಸ್ಪೇನ್ ಮತ್ತೊಮ್ಮೆ ಪ್ರಮುಖ ಟೂರ್ನಿಯಲ್ಲಿ ಮುಖಾಮುಖಿಯಾಗುತ್ತಿವೆ.
ಎರಡು ವರ್ಷಗಳ ಹಿಂದೆ ನಡೆದ ಯುರೋಪಿಯನ್ ಚಾಂಪಿಯನ್ಶಿಪ್ನಲ್ಲಿ ಸ್ಪೇನ್ ಫ್ರಾನ್ಸ್ನ್ನು 2-1ರಿಂದ ಸೋಲಿಸಿತ್ತು. ಆ ಪಂದ್ಯದಲ್ಲಿ 16 ವರ್ಷದ ಲಮಿನ್ ಯಮಾಲ್ ಗೋಲು ಗಳಿಸಿದ್ದರು. ಬಳಿಕ ಸ್ಪೇನ್ ಫೈನಲ್ನಲ್ಲಿ ಇಂಗ್ಲೆಂಡ್ನ್ನು ಸೋಲಿಸಿ ಯುರೋ ಕಪ್ ಗೆದ್ದಿತ್ತು.
ಆ ಪಂದ್ಯದಲ್ಲಿ ಮೂಗಿನ ಗಾಯದಿಂದ ಕಿಲಿಯನ್ ಎಂಬಾಪೆ ಸಂಪೂರ್ಣ ಸಾಮರ್ಥ್ಯ ಪ್ರದರ್ಶಿಸಲು ಸಾಧ್ಯವಾಗಿರಲಿಲ್ಲ.
ಆದರೆ ಎರಡು ವರ್ಷಗಳ ಬಳಿಕ ಫ್ರಾನ್ಸ್ ಈ ವಿಶ್ವಕಪ್ನ ಅತ್ಯಂತ ಬಲಿಷ್ಠ ತಂಡಗಳಲ್ಲಿ ಒಂದಾಗಿ ಕಾಣಿಸಿಕೊಂಡಿದೆ. ತಂಡದಲ್ಲಿ ಆಕ್ರಮಣಕಾರಿ ಆಟಗಾರರ ದೊಡ್ಡ ಬಳಗವಿದ್ದು, ಎಂಬಾಪೆ ಗೋಲ್ಡನ್ ಬೂಟ್ ಸ್ಪರ್ಧೆಯಲ್ಲಿ ಮುಂಚೂಣಿಯಲ್ಲಿದ್ದಾರೆ.
ಇತ್ತ ಸ್ಪೇನ್ ತಂಡ ಲಮಿನ್ ಯಮಾಲ್ ಮತ್ತು ನಿಕೊ ವಿಲಿಯಮ್ಸ್ ಗಾಯದ ಸಮಸ್ಯೆ ಎದುರಿಸಿದರೂ, ಬದಲಿ ಆಟಗಾರನಾಗಿ ಬಂದ ಮಿಕೇಲ್ ಮೆರಿನೊ ಅವರ ನಿರ್ಣಾಯಕ ಗೋಲುಗಳ ನೆರವಿನಿಂದ ಪೋರ್ಚುಗಲ್ ಮತ್ತು ಬೆಲ್ಜಿಯಂ ವಿರುದ್ಧ ಜಯ ಸಾಧಿಸಿ ಸೆಮಿಫೈನಲ್ ತಲುಪಿದೆ.
ಗೋಲ್ಡನ್ ಬೂಟ್ ರೇಸ್ನಲ್ಲಿ ಮೆಸ್ಸಿ-ಎಂಬಾಪೆ ಪೈಪೋಟಿ
ವಿಶ್ವಕಪ್ನ ಮತ್ತೊಂದು ಕುತೂಹಲಕಾರಿ ಸ್ಪರ್ಧೆ ಗೋಲ್ಡನ್ ಬೂಟ್ ಪ್ರಶಸ್ತಿಗಾಗಿ ನಡೆಯುತ್ತಿದೆ. ಟೂರ್ನಿಯ ಅಗ್ರ ಆರು ಗೋಲ್ ಸ್ಕೋರರ್ಗಳಲ್ಲಿ ಐವರು ಇನ್ನೂ ಕಣದಲ್ಲಿದ್ದಾರೆ.
ಅರ್ಜೆಂಟೀನಾ ನಾಯಕ ಲಿಯೋನೆಲ್ ಮೆಸ್ಸಿ ಮತ್ತು ಫ್ರಾನ್ಸ್ನ ಕಿಲಿಯನ್ ಎಂಬಾಪೆ ತಲಾ 8 ಗೋಲುಗಳೊಂದಿಗೆ ಮುಂಚೂಣಿಯಲ್ಲಿದ್ದಾರೆ. ನಾರ್ವೆಯ ಎರ್ಲಿಂಗ್ ಹಾಲಂಡ್ 7 ಗೋಲುಗಳೊಂದಿಗೆ ಇದ್ದರೂ, ಇಂಗ್ಲೆಂಡ್ ವಿರುದ್ಧ ಕ್ವಾರ್ಟರ್ಫೈನಲ್ ಸೋಲಿನ ಬಳಿಕ ಅವರ ಸ್ಪರ್ಧೆ ಅಂತ್ಯಗೊಂಡಿದೆ.
ಇಂಗ್ಲೆಂಡ್ನ ಜೂಡ್ ಬೆಲ್ಲಿಂಗ್ಹ್ಯಾಮ್ ಮತ್ತು ಹ್ಯಾರಿ ಕೇನ್ ತಲಾ 6 ಗೋಲು ಗಳಿಸಿದ್ದಾರೆ. ಫ್ರಾನ್ಸ್ನ ಒಸ್ಮಾನ್ ಡೆಂಬೆಲೆ 5 ಗೋಲುಗಳೊಂದಿಗೆ ಹಿಂಬಾಲಿಸುತ್ತಿದ್ದಾರೆ. ಸ್ಪೇನ್ನ ಮಿಕೇಲ್ ಒಯಾರ್ಸಬಲ್ 4 ಗೋಲುಗಳೊಂದಿಗೆ ಇನ್ನೂ ಸ್ಪರ್ಧೆಯಲ್ಲಿದ್ದಾರೆ.
39ರ ಮೆಸ್ಸಿಯ ಕೊನೆಯ ವಿಶ್ವಕಪ್ ಕನಸು
ಫುಟ್ಬಾಲ್ ಇತಿಹಾಸದ ಶ್ರೇಷ್ಠ ಆಟಗಾರರಲ್ಲಿ ಒಬ್ಬರೆಂದು ಪರಿಗಣಿಸಲ್ಪಡುವ ಲಿಯೋನೆಲ್ ಮೆಸ್ಸಿ, ತಮ್ಮ ಕೊನೆಯ ವಿಶ್ವಕಪ್ನಲ್ಲಿ ಅದ್ಭುತ ಪ್ರದರ್ಶನ ನೀಡುತ್ತಿದ್ದಾರೆ.
39 ವರ್ಷದ ಮೆಸ್ಸಿ ಈ ಬಾರಿ ಅರ್ಜೆಂಟೀನಾವನ್ನು ಮತ್ತೊಂದು ಪ್ರಶಸ್ತಿಯತ್ತ ಮುನ್ನಡೆಸುವ ಪ್ರಯತ್ನದಲ್ಲಿದ್ದಾರೆ. ಅರ್ಜೆಂಟೀನಾ ವಿಶ್ವಕಪ್ ಗೆದ್ದರೆ, ಎರಡು ಬಾರಿ ವಿಶ್ವಕಪ್ ಗೆದ್ದ ಮರಡೋನಾರ ಸಾಧನೆಯನ್ನು ಮೆಸ್ಸಿ ಸರಿಗಟ್ಟಲಿದ್ದಾರೆ.
ಅಲ್ಲದೆ, 1958 ಮತ್ತು 1962ರಲ್ಲಿ ಬ್ರೆಜಿಲ್ ಬಳಿಕ ಸತತ ಎರಡು ವಿಶ್ವಕಪ್ ಗೆದ್ದ ಮೊದಲ ತಂಡ ಎಂಬ ಗೌರವಕ್ಕೂ ಅರ್ಜೆಂಟೀನಾ ಪಾತ್ರವಾಗಲಿದೆ. ಫುಟ್ಬಾಲ್ ದಿಗ್ಗಜ ಪೆಲೆ ಆ ಬ್ರೆಜಿಲ್ ತಂಡದ ಭಾಗವಾಗಿದ್ದು, 1970ರಲ್ಲಿ ಮೂರನೇ ವಿಶ್ವಕಪ್ ಪ್ರಶಸ್ತಿಯನ್ನೂ ಗೆದ್ದಿದ್ದರು.
ಇದನ್ನೂ ನೋಡಿ: ಎಸ್ಐಆರ್ ವಿರುದ್ಧ ರಾಜ್ಯವ್ಯಾಪಿ ಕಾವಲು ಸಮಿತಿ | ಮತದಾರರ ಹಕ್ಕು ರಕ್ಷಣೆಗೆ ಹೋರಾಟJanashakthi Media
