ಲಾಸ್ ಏಂಜಲೀಸ್‌: 2026ರ ಫಿಫಾ ವಿಶ್ವಕಪ್‌ನಲ್ಲಿ ಜೂನ್‌ 16ರಂದು ಅಪರೂಪದ ದಾಖಲೆ ನಿರ್ಮಾಣವಾಗಿದೆ. 68 ವರ್ಷಗಳ ಬಳಿಕ ಇದೇ ಮೊದಲ ಬಾರಿಗೆ ಒಂದೇ ದಿನ ನಡೆದ ಎಲ್ಲಾ ಪಂದ್ಯಗಳು ಡ್ರಾನಲ್ಲಿ ಅಂತ್ಯಗೊಂಡಿವೆ.
ಲಾಸ್ ಏಂಜಲೀಸ್‌ನಲ್ಲಿ ನಡೆದ ಗ್ರೂಪ್ ಜಿ ಪಂದ್ಯದಲ್ಲಿ ಇರಾನ್ ಮತ್ತು ನ್ಯೂಜಿಲೆಂಡ್ ತಂಡಗಳು 2-2 ಗೋಲುಗಳಿಂದ ಸಮಬಲ ಸಾಧಿಸಿದವು. ಈ ಫಲಿತಾಂಶದೊಂದಿಗೆ ದಿನದ ನಾಲ್ಕನೇ ಡ್ರಾ ಕೂಡ ದಾಖಲಾಗಿದ್ದು, 1958ರ ಬಳಿಕ ಇದೇ ಮೊದಲ ಬಾರಿ ಇಂತಹ ಘಟನೆ ನಡೆದಿದೆ. ಫಿಫಾ
ದಿನದ ಮೊದಲ ಪಂದ್ಯದಲ್ಲಿ ಸ್ಪೇನ್ ಮತ್ತು ಕೇಪ್ ವರ್ಡೆ ಗೋಲುರಹಿತ ಡ್ರಾ ಸಾಧಿಸಿದವು. ನಂತರ ಬೆಲ್ಜಿಯಂ-ಈಜಿಪ್ಟ್ ಪಂದ್ಯ 1-1 ಅಂತರದಲ್ಲಿ ಸಮಬಲಗೊಂಡಿತು. ಉರುಗ್ವೆ ಮತ್ತು ಸೌದಿ ಅರೇಬಿಯಾ ನಡುವಿನ ಕಾದಾಟವೂ 1-1 ಡ್ರಾದಲ್ಲಿ ಅಂತ್ಯಗೊಂಡಿತು. ಕೊನೆಗೆ ಇರಾನ್-ನ್ಯೂಜಿಲೆಂಡ್ ಪಂದ್ಯ 2-2 ಡ್ರಾ ಆಗುವುದರೊಂದಿಗೆ ದಿನದ ಎಲ್ಲಾ ನಾಲ್ಕು ಪಂದ್ಯಗಳು ಸಮಬಲದಲ್ಲಿ ಮುಗಿದವು. ಫಿಫಾ
ಇದನ್ನೂ ಓದಿ: ಮಹಿಳಾ ಮೀಸಲಾತಿ ಮಸೂದೆ ಜಾರಿಗೆ ಬಿಜೆಪಿ ಅಡ್ಡಿ: ಬೃಂದಾ ಕಾರಟ್
ರೋಚಕ ಕಾದಾಟ
ಪಂದ್ಯದಲ್ಲಿ ನ್ಯೂಜಿಲೆಂಡ್ ಭರ್ಜರಿ ಆರಂಭ ಕಂಡಿತು. 7ನೇ ನಿಮಿಷದಲ್ಲಿ ನಾಯಕ ಕ್ರಿಸ್ ವುಡ್ ನೀಡಿದ ಪಾಸ್ ಅನ್ನು ಎಲಿಜಾ ಜಸ್ಟ್ ಗೋಲಾಗಿ ಪರಿವರ್ತಿಸಿ ತಂಡಕ್ಕೆ ಮುನ್ನಡೆ ನೀಡಿದರು.
ಇರಾನ್ ನಂತರ ತೀವ್ರವಾಗಿ ಪ್ರತಿದಾಳಿ ನಡೆಸಿ 32ನೇ ನಿಮಿಷದಲ್ಲಿ ರಾಮಿನ್ ರೆಜೈಯನ್ ಗೋಲು ಗಳಿಸಿ 1-1 ಸಮಬಲ ತಂದರು.
ದ್ವಿತೀಯಾರ್ಧದಲ್ಲಿ ಮತ್ತೆ ನ್ಯೂಜಿಲೆಂಡ್ ಮೇಲುಗೈ ಸಾಧಿಸಿತು. 54ನೇ ನಿಮಿಷದಲ್ಲಿ ಎಲಿಜಾ ಜಸ್ಟ್ ಎರಡನೇ ಗೋಲು ಹೊಡೆದು ತಂಡಕ್ಕೆ 2-1 ಮುನ್ನಡೆ ನೀಡಿದರು. ಆದರೆ ಇರಾನ್ ಮತ್ತೆ ಹಿಂತಿರುಗಿ 64ನೇ ನಿಮಿಷದಲ್ಲಿ ಮೊಹಮ್ಮದ್ ಮೊಹೆಬ್ಬಿ ಗೋಲು ದಾಖಲಿಸಿ ಸ್ಕೋರ್ 2-2ಗೆ ಸಮಬಲಗೊಳಿಸಿದರು.
ಇದರ ನಂತರ ಎರಡೂ ತಂಡಗಳು ಗೆಲುವಿಗಾಗಿ ಹೋರಾಡಿದರೂ ನಿರ್ಣಾಯಕ ಗೋಲು ಬರಲಿಲ್ಲ.
ಗ್ರೂಪ್ ಜಿ ಸ್ಥಿತಿ
ಈ ಡ್ರಾ ಫಲಿತಾಂಶಗಳಿಂದ ಗ್ರೂಪ್ ಜಿ ಇನ್ನಷ್ಟು ಕುತೂಹಲಕರವಾಗಿದೆ. ಇರಾನ್, ನ್ಯೂಜಿಲೆಂಡ್, ಬೆಲ್ಜಿಯಂ ಮತ್ತು ಈಜಿಪ್ಟ್—ನಾಲ್ಕೂ ತಂಡಗಳು ತಲಾ ಒಂದು ಅಂಕ ಹೊಂದಿದ್ದು, ಮುಂದಿನ ಪಂದ್ಯಗಳು ನಾಕೌಟ್ ಹಂತಕ್ಕೆ ಯಾರು ಹೋಗುತ್ತಾರೆ ಎಂಬುದನ್ನು ನಿರ್ಧರಿಸಲಿವೆ.
ಇದನ್ನೂ ನೋಡಿ: ಹೋರ್ಮುಜ್ ಜಲಸಂಧಿ | 107 ದಿನಗಳಿಂದ ಸಮುದ್ರದಲ್ಲೇ ಸಿಲುಕಿರುವ 562 ಭಾರತೀಯ ನಾವಿಕರು Janashakthi Media
