ನವದೆಹಲಿ: ಪ್ರಯಾಣ ದರ ಹೆಚ್ಚಿಸುವಂತೆ ಗ್ರಾಹಕರನ್ನು ಪ್ರೇರೇಪಿಸುವ ಸಂದೇಶಗಳು ಹಾಗೂ ‘ಡಾರ್ಕ್ ಪ್ಯಾಟರ್ನ್’ ಎಂದು ಕರೆಯಲಾಗುವ ದಾರಿ ತಪ್ಪಿಸುವ ಡಿಜಿಟಲ್ ವಿನ್ಯಾಸಗಳನ್ನು ಬಳಸಿದ ಆರೋಪದ ಹಿನ್ನೆಲೆಯಲ್ಲಿ ರೈಡ್ಹೇಲಿಂಗ್ ಪ್ಲಾಟ್ಫಾರ್ಮ್ ರ್ಯಾಪಿಡೋ ನಿರ್ವಹಿಸುವ ರೋಪೆನ್ ಟ್ರಾನ್ಸ್ಪೋರ್ಟೇಶನ್ ಸರ್ವಿಸಸ್ ಪ್ರೈವೇಟ್ ಲಿಮಿಟೆಡ್ಗೆ ಕೇಂದ್ರ ಗ್ರಾಹಕ ಸಂರಕ್ಷಣಾ ಪ್ರಾಧಿಕಾರ (CCPA) ₹10 ಲಕ್ಷ ದಂಡ ವಿಧಿಸಿದೆ. ರ್ಯಾಪಿಡೋಗೆ
CCPA ಪ್ರಕಾರ, ರ್ಯಾಪಿಡೋದಲ್ಲಿ ಗ್ರಾಹಕರು ಮೊದಲು ಒಂದು ನಿರ್ದಿಷ್ಟ ದರವನ್ನು ಒಪ್ಪಿಕೊಂಡು ರೈಡ್ ಬುಕ್ ಮಾಡಿದ ನಂತರ, ಚಾಲಕರು ಆ ದರವನ್ನು ಸ್ವೀಕರಿಸುತ್ತಿಲ್ಲ ಎಂದು ತಿಳಿಸಿ ಹೆಚ್ಚುವರಿ ಹಣ ಪಾವತಿಸುವಂತೆ ಪ್ರೇರೇಪಿಸುವ ಸಂದೇಶಗಳು ಕಾಣಿಸುತ್ತಿದ್ದವು. “ಹೆಚ್ಚಿನ ದರ ನೀಡಿದರೆ ರೈಡ್ ಸಿಗುವ ಸಾಧ್ಯತೆ ಹೆಚ್ಚು” ಎಂಬ ರೀತಿಯ ಸಂದೇಶಗಳ ಜೊತೆಗೆ, ಹೆಚ್ಚುವರಿ ₹10, ₹20 ಅಥವಾ ₹30 ನೀಡುವಂತೆ ಸೂಚಿಸಲಾಗುತ್ತಿತ್ತು ಎಂದು ಪ್ರಾಧಿಕಾರ ತಿಳಿಸಿದೆ.
ಗ್ರಾಹಕರು ಈಗಾಗಲೇ ರೈಡ್ ಬುಕ್ ಮಾಡಿ ದೃಢೀಕರಣಕ್ಕಾಗಿ ಕಾಯುತ್ತಿರುವ ಸಂದರ್ಭದಲ್ಲಿ ಇಂತಹ ಸಂದೇಶಗಳನ್ನು ತೋರಿಸುವುದು, ಹೆಚ್ಚು ಹಣ ನೀಡದಿದ್ದರೆ ರೈಡ್ ಸಿಗುವುದಿಲ್ಲ ಅಥವಾ ಹೆಚ್ಚು ಸಮಯ ಕಾಯಬೇಕಾಗುತ್ತದೆ ಎಂಬ ಭಾವನೆ ಮೂಡಿಸುತ್ತದೆ ಎಂದು CCPA ಹೇಳಿದೆ. ಈ ಕ್ರಮವನ್ನು 2023ರ ಡಾರ್ಕ್ ಪ್ಯಾಟರ್ನ್ ಮಾರ್ಗಸೂಚಿಗಳ ಅಡಿಯಲ್ಲಿ ‘ಕನ್ಫರ್ಮ್ ಶೇಮಿಂಗ್’ ಎಂದು ಪ್ರಾಧಿಕಾರ ವರ್ಗೀಕರಿಸಿದೆ. ರ್ಯಾಪಿಡೋಗೆ
ಇದನ್ನೂ ಓದಿ : ಅಂಗಾಂಗ ದಾನ ಮಾಡುವ ಮೂಲಕ ಸಾವಿನಲ್ಲೂ ಸಾರ್ಥಕತೆ ಮೆರೆದ ಡಿವೈಎಫ್ಐ ಕಾರ್ಯಕರ್ತ ವರ್ಷಿತ್ ಕುಲಾಲ್
ರ್ಯಾಪಿಡೋದ ‘Set your price’ ಆಯ್ಕೆಯ ವಿನ್ಯಾಸವನ್ನೂ CCPA ಪ್ರಶ್ನಿಸಿದೆ. ದರವನ್ನು ಹೆಚ್ಚಿಸುವಾಗ ಹಸಿರು ಬಣ್ಣದಲ್ಲಿ ಹೆಚ್ಚು ಹಣ ನೀಡಿದರೆ ರೈಡ್ ಸಿಗುವ ಸಾಧ್ಯತೆ ಹೆಚ್ಚಿದೆ ಎಂಬ ಸೂಚನೆ ನೀಡಲಾಗುತ್ತಿತ್ತು. ಆದರೆ ದರ ಕಡಿಮೆ ಮಾಡಲು ಪ್ರಯತ್ನಿಸಿದಾಗ ಕೆಂಪು ಅಥವಾ ಕಿತ್ತಳೆ ಬಣ್ಣದ ಎಚ್ಚರಿಕೆಯ ವಿನ್ಯಾಸ ಕಾಣಿಸುತ್ತಿತ್ತು. ದರ ಹೆಚ್ಚಿಸಲು ಹೆಚ್ಚಿನ ಅವಕಾಶ ಮತ್ತು ಕಡಿಮೆ ಮಾಡಲು ಕಡಿಮೆ ಅವಕಾಶ ಇರುವಂತೆ ಸ್ಲೈಡರ್ ವಿನ್ಯಾಸಗೊಳಿಸಲಾಗಿತ್ತು ಎಂದು ಪ್ರಾಧಿಕಾರ ಗಮನಿಸಿದೆ. ಇದನ್ನು ‘ಇಂಟರ್ಫೇಸ್ ಇಂಟರ್ಫಿಯರೆನ್ಸ್’ ಎಂಬ ಮತ್ತೊಂದು ಡಾರ್ಕ್ ಪ್ಯಾಟರ್ನ್ ಎಂದು ಗುರುತಿಸಲಾಗಿದೆ.
ರೈಡ್ ಬುಕ್ಕಿಂಗ್ ಸಮಯದಲ್ಲೇ ಹೆಚ್ಚುವರಿ ಮೊತ್ತವನ್ನು ‘ಟಿಪ್’ ರೂಪದಲ್ಲಿ ನೀಡುವ ವ್ಯವಸ್ಥೆಯ ಬಗ್ಗೆಯೂ CCPA ಆಕ್ಷೇಪ ವ್ಯಕ್ತಪಡಿಸಿದೆ. ಟಿಪ್ ಸಾಮಾನ್ಯವಾಗಿ ಸೇವೆ ಪೂರ್ಣಗೊಂಡ ಬಳಿಕ ಗ್ರಾಹಕರು ತಮ್ಮ ಇಚ್ಛೆಯಿಂದ ನೀಡುವ ಹಣವಾಗಿದ್ದು, ರೈಡ್ ಪಡೆಯುವ ಮೊದಲು ಅದನ್ನು ಪಾವತಿಸುವಂತೆ ಒತ್ತಾಯಿಸುವ ರೀತಿಯಲ್ಲಿ ತೋರಿಸಬಾರದು ಎಂದು ಪ್ರಾಧಿಕಾರ ಹೇಳಿದೆ. 2025ರ ಮೋಟಾರ್ ವೆಹಿಕಲ್ ಅಗ್ರಿಗೇಟರ್ ಮಾರ್ಗಸೂಚಿಗಳಲ್ಲಿಯೂ ಟಿಪ್ ಆಯ್ಕೆಯನ್ನು ಪ್ರಯಾಣ ಮುಗಿದ ಬಳಿಕ ಮಾತ್ರ ನೀಡುವಂತೆ ಸೂಚಿಸಲಾಗಿದೆ ಎಂದು CCPA ಉಲ್ಲೇಖಿಸಿದೆ. ರ್ಯಾಪಿಡೋಗೆ
ರ್ಯಾಪಿಡೋ ತನ್ನ ಪ್ಲಾಟ್ಫಾರ್ಮ್ನಲ್ಲಿನ ಟಿಪ್ ಆಯ್ಕೆ ಸ್ವಯಂಪ್ರೇರಿತವಾಗಿದ್ದು, ಹೆಚ್ಚುವರಿ ಹಣ ನೀಡುವುದರಿಂದ ರೈಡ್ ಖಚಿತವಾಗುತ್ತದೆ ಎಂಬ ನಿಯಮವಿಲ್ಲ ಎಂದು ವಾದಿಸಿತ್ತು. ಚಾಲಕರು ಮತ್ತು ಪ್ರಯಾಣಿಕರ ನಡುವೆ ನಡೆಯುವ ನೈಜ-ಸಮಯದ ದರ ಮಾತುಕತೆಯಂತೆ ಈ ಸಂದೇಶಗಳನ್ನು ಅರ್ಥೈಸಬೇಕು ಎಂದೂ ಸಂಸ್ಥೆ ಹೇಳಿತ್ತು. ಆದರೆ ಹೆಚ್ಚುವರಿ ಹಣ ನೀಡುವುದರಿಂದ ರೈಡ್ ಸಿಗುವ ಸಾಧ್ಯತೆ ಹೆಚ್ಚುತ್ತದೆ ಎಂಬುದಕ್ಕೆ ರ್ಯಾಪಿಡೋ ಯಾವುದೇ ದತ್ತಾಂಶ ಒದಗಿಸಿಲ್ಲ ಎಂದು CCPA ಹೇಳಿದೆ. ರ್ಯಾಪಿಡೋಗೆ
CCPA ರ್ಯಾಪಿಡೋಗೆ ವಿವಾದಿತ ಸಂದೇಶಗಳು ಮತ್ತು ಗ್ರಾಹಕರನ್ನು ಹೆಚ್ಚು ಹಣ ಪಾವತಿಸುವತ್ತ ಪ್ರೇರೇಪಿಸುವ ಇಂತಹ ವಿನ್ಯಾಸಗಳನ್ನು ಸ್ಥಗಿತಗೊಳಿಸುವಂತೆ ಸೂಚಿಸಿದೆ. ಅಲ್ಲದೆ ಗ್ರಾಹಕ ಸಂರಕ್ಷಣಾ ಕಾಯ್ದೆ, 2019, 2023ರ ಡಾರ್ಕ್ ಪ್ಯಾಟರ್ನ್ ಮಾರ್ಗಸೂಚಿಗಳು ಹಾಗೂ ಸಂಬಂಧಿತ ಇ-ಕಾಮರ್ಸ್ ನಿಯಮಗಳನ್ನು ಪಾಲಿಸುವಂತೆ ನಿರ್ದೇಶಿಸಿದೆ. ಆದೇಶ ಸ್ವೀಕರಿಸಿದ 15 ದಿನಗಳೊಳಗೆ ಅನುಸರಣೆ ವರದಿ ಸಲ್ಲಿಸುವಂತೆಯೂ ಸೂಚಿಸಲಾಗಿದೆ.
ರ್ಯಾಪಿಡೋ ವಿರುದ್ಧದ ಕ್ರಮವು ರೈಡ್ಹೇಲಿಂಗ್ ಮತ್ತು ಬೈಕ್ ಟ್ಯಾಕ್ಸಿ ಕ್ಷೇತ್ರದಲ್ಲಿ ಗ್ರಾಹಕರಿಗೆ ತೋರಿಸಲಾಗುವ ದರ, ಟಿಪ್ ಹಾಗೂ ಡಿಜಿಟಲ್ ಇಂಟರ್ಫೇಸ್ಗಳ ಕುರಿತು CCPA ನಡೆಸುತ್ತಿರುವ ವ್ಯಾಪಕ ಪರಿಶೀಲನೆಯ ಭಾಗವಾಗಿದೆ. ಓಲಾ ಮತ್ತು ಉಬರ್ ಸೇರಿದಂತೆ ಇತರ ಪ್ಲಾಟ್ಫಾರ್ಮ್ಗಳ ವಿರುದ್ಧವೂ ಇದೇ ರೀತಿಯ ಪರಿಶೀಲನೆ ಮುಂದುವರಿದಿದೆ. ರ್ಯಾಪಿಡೋಗೆ
ಇದನ್ನೂ ನೋಡಿ : ಗಂಗಾಧರಸ್ವಾಮಿ ನುಡಿನಮನ| ಸಮರಶೀಲ ರಂಗಪಥದ ಪಯಣಿಗ Janashakthi Media
