ನವದೆಹಲಿ: ಗ್ಲೋಬಲ್ ಪಾಸ್ಪೋರ್ಟ್ ಇಂಡೆಕ್ಸ್ 2026ರಲ್ಲಿ ಭಾರತ ಒಂದು ಸ್ಥಾನ ಕುಸಿದು 125ನೇ ಸ್ಥಾನಕ್ಕೆ ತಲುಪಿದ್ದು, ಜಾಗತಿಕ ಸಂಚಾರ ಸೌಲಭ್ಯಗಳಲ್ಲಿ ದೇಶ ಇನ್ನೂ ಹಿನ್ನಡೆಯಲ್ಲಿರುವುದನ್ನು ವರದಿ ಸೂಚಿಸಿದೆ.
ಗ್ಲೋಬಲ್ ಸಿಟಿಜನ್ ಸೊಲ್ಯೂಷನ್ಸ್ (GCS) ಪ್ರಕಟಿಸಿದ ಈ ಸೂಚ್ಯಂಕವು 197 ದೇಶಗಳು ಮತ್ತು ಪ್ರದೇಶಗಳನ್ನು ಮೌಲ್ಯಮಾಪನ ಮಾಡುತ್ತದೆ. ಪ್ರಸ್ತುತ ಭಾರತೀಯ ಪಾಸ್ಪೋರ್ಟ್ ಹೊಂದಿರುವವರಿಗೆ 26 ದೇಶಗಳಿಗೆ ವೀಸಾ ಮುಕ್ತ ಅಥವಾ ವೀಸಾ-ಆನ್-ಅರೈವಲ್ ಪ್ರವೇಶ ಸೌಲಭ್ಯ ಲಭ್ಯವಿದೆ.
ಕಳೆದ ವರ್ಷಕ್ಕೆ ಹೋಲಿಸಿದರೆ ಭಾರತದ ಒಟ್ಟು ಅಂಕಗಳಲ್ಲಿ ಸ್ವಲ್ಪ ಸುಧಾರಣೆ ಕಂಡುಬಂದರೂ, ಇತರ ದೇಶಗಳು ವೇಗವಾಗಿ ಮುನ್ನಡೆದ ಕಾರಣ 2025ರ 124ನೇ ಸ್ಥಾನದಿಂದ 2026ರಲ್ಲಿ 125ನೇ ಸ್ಥಾನಕ್ಕೆ ಕುಸಿತವಾಗಿದೆ. 2021ರಿಂದ ಭಾರತ ಕೇವಲ ಎರಡು ಸ್ಥಾನಗಳಷ್ಟೇ ಏರಿಕೆಯಾಗಿದೆ.
ಇದನ್ನೂ ಓದಿ: ಮಳೆ ಸುರಿದರೂ ನೀರಿನ ಬರ ತಪ್ಪಿಲ್ಲ: ಮಹಾರಾಷ್ಟ್ರದ 1,279 ಗ್ರಾಮಗಳಿಗೆ ಟ್ಯಾಂಕರ್ ನೀರೇ ಆಧಾರ
ಈ ಸೂಚ್ಯಂಕವು ಕೇವಲ ವೀಸಾ ಮುಕ್ತ ಪ್ರವೇಶವನ್ನು ಮಾತ್ರ ಪರಿಗಣಿಸುವುದಿಲ್ಲ. ‘ಎನ್ಹಾನ್ಸ್ಡ್ ಮೊಬೈಲಿಟಿ’, ಹೂಡಿಕೆ ಅವಕಾಶಗಳು ಮತ್ತು ಜೀವನಮಟ್ಟ ಎಂಬ ಮೂರು ಪ್ರಮುಖ ಅಂಶಗಳ ಆಧಾರದ ಮೇಲೆ ಪಾಸ್ಪೋರ್ಟ್ ಶಕ್ತಿಯನ್ನು ಅಳೆಯುತ್ತದೆ.
ಈ ವರ್ಷವೂ ಯುರೋಪಿಯನ್ ದೇಶಗಳು ಮೇಲುಗೈ ಸಾಧಿಸಿದ್ದು, ಟಾಪ್ 10ರಲ್ಲಿ ಒಂಬತ್ತು ಸ್ಥಾನಗಳನ್ನು ಪಡೆದುಕೊಂಡಿವೆ. ಸ್ವೀಡನ್ ಮೊದಲ ಸ್ಥಾನದಲ್ಲಿದ್ದು, ಸ್ವಿಟ್ಜರ್ಲ್ಯಾಂಡ್ ಮತ್ತು ಫಿನ್ಲ್ಯಾಂಡ್ ನಂತರದ ಸ್ಥಾನಗಳಲ್ಲಿ ಇದ್ದರೆ, ಸಿಂಗಾಪುರ ಮಾತ್ರ ಯುರೋಪ್ ಹೊರಗಿನ ದೇಶವಾಗಿ ಟಾಪ್ 10ರಲ್ಲಿ ಸ್ಥಾನ ಪಡೆದಿದೆ.
ಇನ್ನು ಐರ್ಲೆಂಡ್ ಎರಡನೇ ವರ್ಷವೂ ಯುಕೆಯನ್ನು ಮೀರಿಸಿ ಏಳನೇ ಸ್ಥಾನದಲ್ಲಿದ್ದು, ಬ್ರೆಕ್ಸಿಟ್ ನಂತರದ ಪರಿಣಾಮಗಳು ಇದಕ್ಕೆ ಕಾರಣವೆಂದು ವಿಶ್ಲೇಷಿಸಲಾಗಿದೆ.
ಅಮೆರಿಕ, ಕೆನಡಾ, ಆಸ್ಟ್ರೇಲಿಯಾ ಮತ್ತು ನ್ಯೂಜಿಲೆಂಡ್ ದೇಶಗಳು ಕೂಡ ಇತ್ತೀಚಿನ ವರ್ಷಗಳಲ್ಲಿ ತಮ್ಮ ಸ್ಥಾನಗಳನ್ನು ಕಳೆದುಕೊಂಡಿವೆ. ಕಠಿಣ ವಲಸೆ ನೀತಿಗಳು ಮತ್ತು ಪರಸ್ಪರ ವೀಸಾ ನಿಯಮಗಳು ಇದರ ಪ್ರಮುಖ ಕಾರಣಗಳಾಗಿವೆ.
ಒಟ್ಟಾರೆ, ಭಾರತದ ಸ್ಥಾನದಲ್ಲಿ ಸ್ವಲ್ಪ ಸುಧಾರಣೆ ಕಂಡುಬಂದಿದ್ದರೂ, ಜಾಗತಿಕ ಮಟ್ಟದಲ್ಲಿ ಉತ್ತಮ ಸಂಚಾರ ಸೌಲಭ್ಯ ಮತ್ತು ಆರ್ಥಿಕ ಅವಕಾಶಗಳನ್ನು ಹೆಚ್ಚಿಸುವುದು ಇನ್ನೂ ಸವಾಲಾಗಿಯೇ ಉಳಿದಿದೆ ಎಂದು ವರದಿ ಸೂಚಿಸುತ್ತದೆ.
ಇದನ್ನೂ ನೋಡಿ: SIR ಕರ್ನಾಟಕ | ಕೆಲಸದ ಒತ್ತಡ, ಅಪಪ್ರಚಾರ: ಎಸ್ಐಆರ್ ಕೆಲಸದ ನೋವು ಬಿಚ್ಚಿಟ್ಟ ಬಿಎಲ್ಒ Janashakthi Media
