ಬಿಜೆಪಿಗೆ ಗ್ರಾಮೀಣ ಮತ್ತು ಅಲ್ಪಸಂಖ್ಯಾತ ಪ್ರದೇಶಗಳಲ್ಲಿ ಕಡಿಮೆ ಮತಗಳು

ದೆಹಲಿಯ ಗ್ರಾಮೀಣ ಪ್ರದೇಶಗಳು, ಅನಧಿಕೃತ ಕಾಲೋನಿಗಳು ಮತ್ತು ಅಲ್ಪಸಂಖ್ಯಾತರ ಪ್ರಾಬಲ್ಯವಿರುವ ಕ್ಷೇತ್ರಗಳಲ್ಲಿ ಬಿಜೆಪಿ ಅಭ್ಯರ್ಥಿಗಳು ಸಾಕಷ್ಟು ಮತಗಳನ್ನು ಕಳೆದುಕೊಂಡಿದ್ದಾರೆ. ಬಿಜೆಪಿಯ ಮತಗಳಿಕೆ ಶೇ.2.3ರಷ್ಟು ಕುಸಿದಿದೆ. 2019ರಲ್ಲಿ ಶೇ.56.7ರಷ್ಟಿದ್ದ ಬಿಜೆಪಿಯ ಮತ ಹಂಚಿಕೆ 2024ರಲ್ಲಿ ಶೇ.54.4ಕ್ಕೆ ಇಳಿಕೆಯಾಗಿದೆ.

2019 ರಲ್ಲಿ, ದೆಹಲಿಯ 70 ವಿಧಾನಸಭಾ ಕ್ಷೇತ್ರಗಳ ಪೈಕಿ 65 ರಲ್ಲಿ ಬಿಜೆಪಿ ಅಭ್ಯರ್ಥಿಗಳು ಕಾಂಗ್ರೆಸ್ ಮತ್ತು ಆಮ್ ಆದ್ಮಿ ಪಕ್ಷ (ಎಎಪಿ) ಗಿಂತ ಮುನ್ನಡೆ ಸಾಧಿಸಿದ್ದರು. ಐದು ವರ್ಷಗಳಲ್ಲಿ ಪಕ್ಷವು ಸಾಕಷ್ಟು ನೆಲ ಕಳೆದುಕೊಂಡಿತು ಮತ್ತು ಕೇವಲ 52 ವಿಧಾನಸಭಾ ಕ್ಷೇತ್ರಗಳಲ್ಲಿ ಮಾತ್ರ ಮುನ್ನಡೆ ಸಾಧಿಸಲು ಸಾಧ್ಯವಾಯಿತು.

ಓಖ್ಲಾದಲ್ಲಿ ಬಿಜೆಪಿಗೆ ಅತ್ಯಂತ ದೊಡ್ಡ ಸೋಲು: 

ಓಖ್ಲಾ ವಿಧಾನಸಭಾ ಕ್ಷೇತ್ರದಲ್ಲಿ ಬಿಜೆಪಿಯ ಮತಗಳು ಹೆಚ್ಚು ಕಡಿಮೆಯಾಗಿದೆ. ಟೈಮ್ಸ್ ಆಫ್ ಇಂಡಿಯಾ ವರದಿ ಪ್ರಕಾರ, ಓಖ್ಲಾದಲ್ಲಿ ಬಿಜೆಪಿ 68,130 ಮತಗಳನ್ನು ಕಳೆದುಕೊಂಡಿದೆ. ಈ ಬಾರಿ ಓಖ್ಲಾದಲ್ಲಿ ಮುಸ್ಲಿಮರು ಬಿಜೆಪಿ ವಿರುದ್ಧ ಸಂಪೂರ್ಣ ಮತ ಚಲಾಯಿಸಿದ್ದಾರೆ ಎಂಬುದನ್ನು ಇದು ತೋರಿಸುತ್ತದೆ.ಈ ಪ್ರದೇಶವು CAA (ಪೌರತ್ವ ತಿದ್ದುಪಡಿ ಮಸೂದೆ) ವಿರೋಧಿ ಚಳವಳಿಯ ಕೇಂದ್ರವಾಗಿತ್ತು .

ಓಖ್ಲಾ ವಿಧಾನಸಭಾ ಕ್ಷೇತ್ರವು ಪೂರ್ವ ದೆಹಲಿ ಲೋಕಸಭಾ ಕ್ಷೇತ್ರದ ಅಡಿಯಲ್ಲಿ ಬರುತ್ತದೆ. ಈ ಲೋಕಸಭೆ ಕ್ಷೇತ್ರದಲ್ಲಿ ಬಿಜೆಪಿಯ ಹರ್ಷ್ ಮಲ್ಹೋತ್ರಾ ಮತ್ತು ಎಎಪಿಯ ಕುಲದೀಪ್ ಕುಮಾರ್ (ಮೋನು) ನಡುವೆ ಸ್ಪರ್ಧೆ ಏರ್ಪಟ್ಟಿತ್ತು. ಮಲ್ಹೋತ್ರಾ ಅವರು ಒಟ್ಟು 6,64,819 ಮತಗಳನ್ನು ಪಡೆದು ಎಎಪಿ ನಾಯಕನನ್ನು 93,663 ಮತಗಳಿಂದ ಸೋಲಿಸಿದರು.

2019ರಲ್ಲಿ ಬಿಜೆಪಿ ಈ ಕ್ಷೇತ್ರದಲ್ಲಿ ಶೇಕಡಾ 55.35 ಮತಗಳನ್ನು ಪಡೆದಿತ್ತು. 2024 ರಲ್ಲಿ 52.59 ಶೇಕಡಾ ಮತಗಳನ್ನು ಪಡೆದರು.
ಅನಧಿಕೃತ ಕಾಲೋನಿ ಪ್ರದೇಶಗಳಲ್ಲಿ ಬಿಜೆಪಿಯ ಮತಗಳು ಕಡಿಮೆಯಾಗಿದೆ.ಹೆಚ್ಚಿನ ಸಂಖ್ಯೆಯ ಅನಧಿಕೃತ ಕಾಲೋನಿಗಳು ಮತ್ತು ಹಳ್ಳಿಗಳನ್ನು ಹೊಂದಿರುವ ಬಾದರ್‌ಪುರ ವಿಧಾನಸಭಾ ಕ್ಷೇತ್ರವು 2019 ರ ಲೋಕಸಭೆ ಚುನಾವಣೆಯಲ್ಲಿ ಬಿಜೆಪಿಗೆ 85,799 ಮತಗಳ ಮುನ್ನಡೆ ನೀಡಿತ್ತು. ಈ ಬಾರಿ ಬಿಜೆಪಿ ಬಾದರ್‌ಪುರದಿಂದ ಕೇವಲ 25,181 ಮತಗಳನ್ನು ಪಡೆದಿದೆ.

ಬಾದರ್‌ಪುರ ವಿಧಾನಸಭಾ ಕ್ಷೇತ್ರವು ದಕ್ಷಿಣ ದೆಹಲಿ ಲೋಕಸಭಾ ಕ್ಷೇತ್ರದ ಅಡಿಯಲ್ಲಿ ಬರುತ್ತದೆ. ಈ ಲೋಕಸಭಾ ಕ್ಷೇತ್ರದಿಂದ ಬಿಜೆಪಿಯು ತನ್ನ ವಿವಾದಾತ್ಮಕ ಹೇಳಿಕೆಗಳಿಂದ ಕುಖ್ಯಾತರಾಗಿದ್ದ ರಮೇಶ್ ಬಿಧುರಿ ಅವರ ಟಿಕೆಟ್ ಅನ್ನು ರದ್ದುಗೊಳಿಸುವ ಮೂಲಕ ದೆಹಲಿ ವಿಧಾನಸಭೆಯ ವಿರೋಧ ಪಕ್ಷದ ನಾಯಕ ರಾಮ್‌ವೀರ್ ಸಿಂಗ್ ಬಿಧುರಿ ಅವರನ್ನು ಕಣಕ್ಕಿಳಿಸಿತ್ತು. ಬಿಧುರಿಯಿಗಿಂತ ಮೊದಲು ಎಎಪಿ ಸಹಿರಾಮ್ ಪೆಹಲ್ವಾನ್‌ಗೆ ಟಿಕೆಟ್ ನೀಡಿತ್ತು. ರಾಮವೀರ್ ಸಿಂಗ್ ಬಿಧುರಿ ಅವರು ಒಟ್ಟು 6,92,832 ಮತಗಳನ್ನು ಪಡೆದಿದ್ದಾರೆ. ಸಾಹಿರಾಮ್ ಪೆಹಲ್ವಾನ್ 1,24,333 ಮತಗಳಿಂದ ಸೋತಿದ್ದಾರೆ.

ದಕ್ಷಿಣ ದೆಹಲಿಯಲ್ಲಿ ಬಿಜೆಪಿ ಒಟ್ಟು ಶೇ.53.46 ಮತಗಳನ್ನು ಪಡೆದಿದೆ. ಕಳೆದ ಬಾರಿ ಈ ಪ್ರಮಾಣ ಶೇ.56.58 ಆಗಿತ್ತು.ಹಲವು ಅನಧಿಕೃತ ಕಾಲೋನಿಗಳಿರುವ ಮತ್ತೊಂದು ವಿಧಾನಸಭಾ ಕ್ಷೇತ್ರ ವಿಕಾಸಪುರಿಯಲ್ಲಿಯೂ ಬಿಜೆಪಿಯ ಮತಗಳು ಕುಸಿದಿವೆ. 2019ರ ಲೋಕಸಭೆ ಚುನಾವಣೆಯಲ್ಲಿ ವಿಕಾಸಪುರಿ ವಿಧಾನಸಭಾ ಕ್ಷೇತ್ರದಿಂದ 83,165 ಮತಗಳನ್ನು ಪಡೆದಿದ್ದ ಬಿಜೆಪಿ ಈ ಬಾರಿ 27,511 ಮತಗಳನ್ನು ಪಡೆದಿದೆ. ಬಿಜೆಪಿ ಸುಮಾರು 56,000 ಮತಗಳನ್ನು ಕಳೆದುಕೊಂಡಿದೆ.

ಇದನ್ನು ಓದಿ : ಪಶ್ಚಿಮ ರಾಜ್ಯಗಳಲ್ಲೂ ಬಿಜೆಪಿಗೆ ಬಹಳ ನಷ್ಟ

ವಿಕಾಸಪುರಿ ವಿಧಾನಸಭಾ ಕ್ಷೇತ್ರವು ಪಶ್ಚಿಮ ದೆಹಲಿ ಲೋಕಸಭಾ ಕ್ಷೇತ್ರದ ಅಡಿಯಲ್ಲಿ ಬರುತ್ತದೆ. ಈ ಲೋಕಸಭಾ ಕ್ಷೇತ್ರದಿಂದ ಬಿಜೆಪಿ ಕಮಲಜಿತ್ ಸೆಹ್ರಾವತ್ ಮತ್ತು ಆಪ್ ಮಹಾಬಲ್ ಮಿಶ್ರಾ ಅವರನ್ನು ಕಣಕ್ಕಿಳಿಸಿತ್ತು. ಕಮಲಜೀತ್ ಸೆಹ್ರಾವತ್ 8,42,658 ಮತಗಳನ್ನು ಪಡೆಯುವ ಮೂಲಕ 1,99,013 ಮತಗಳಿಂದ ಜಯಗಳಿಸಿದ್ದಾರೆ.

ಪಶ್ಚಿಮ ದೆಹಲಿ ಲೋಕಸಭಾ ಕ್ಷೇತ್ರದಲ್ಲಿ ಬಿಜೆಪಿ ಶೇ.55.27ರಷ್ಟು ಮತಗಳನ್ನು ಪಡೆದಿದ್ದು, ಕಳೆದ ಸಾರ್ವತ್ರಿಕ ಚುನಾವಣೆಯಲ್ಲಿ ಶೇ.60.05ರಷ್ಟು ಮತಗಳನ್ನು ಪಡೆದಿತ್ತು.
ದೆಹಲಿಯ ಗ್ರಾಮಾಂತರ ಪ್ರದೇಶಗಳಲ್ಲೂ ಸೋತ ಬಿಜೆಪಿ:

ಮಟಿಯಾಲ ಮತ್ತು ಪಾಲಂನಂತಹ ಹೆಚ್ಚಿನ ಗ್ರಾಮೀಣ ಜನಸಂಖ್ಯೆಯನ್ನು ಹೊಂದಿರುವ ವಿಧಾನಸಭಾ ಕ್ಷೇತ್ರಗಳಲ್ಲಿ ಬಿಜೆಪಿ ಸುಮಾರು ಒಂದು ಲಕ್ಷ ಮತಗಳನ್ನು ಕಳೆದುಕೊಂಡಿದೆ. ಕಳೆದ ಸಾರ್ವತ್ರಿಕ ಚುನಾವಣೆಗೆ ಹೋಲಿಸಿದರೆ ಬಿಜೆಪಿ ಮಟಿಯಾಲದಲ್ಲಿ 55,101 ಕಡಿಮೆ ಮತಗಳನ್ನು ಪಡೆದಿದೆ. ಪಾಲಂನಲ್ಲಿ 48,240 ಮತಗಳು ಕಡಿಮೆಯಾಗಿದೆ.

2019 ರಲ್ಲಿ ದೆಹಲಿಯಲ್ಲಿ ಬಿಜೆಪಿ, ಎಎಪಿ ಮತ್ತು ಕಾಂಗ್ರೆಸ್ ನಡುವೆ ತ್ರಿಕೋನ ಸ್ಪರ್ಧೆ ಇತ್ತು ಎಂಬುದನ್ನು ನೆನಪಿನಲ್ಲಿಡಿ. ಆದರೆ ಈ ಬಾರಿ ಚುನಾವಣೆಗೂ ಮುನ್ನವೇ ಎಎಪಿ ಮತ್ತು ಕಾಂಗ್ರೆಸ್ ಪಕ್ಷಗಳು ಸೀಟು ಹಂಚಿಕೆ ಮಾಡಿಕೊಂಡಿದ್ದವು. ಬಿಜೆಪಿ ವಿರೋಧಿ ಮತಗಳ ವಿಭಜನೆಯನ್ನು ತಡೆಯಲು ಎಎಪಿ ನಾಲ್ಕು ಕ್ಷೇತ್ರಗಳಲ್ಲಿ ಮತ್ತು ಕಾಂಗ್ರೆಸ್ ಮೂರು ಕ್ಷೇತ್ರಗಳಲ್ಲಿ ತನ್ನ ಅಭ್ಯರ್ಥಿಗಳನ್ನು ಕಣಕ್ಕಿಳಿಸಿತ್ತು. ಆದರೆ, ಒಂದು ಸ್ಥಾನವನ್ನೂ ಗೆಲ್ಲದ ವಿಪಕ್ಷಗಳ ಮೈತ್ರಿಕೂಟ ಬಿಜೆಪಿಗೆ ಕಠಿಣ ಸವಾಲು ನೀಡುವಲ್ಲಿ ವಿಫಲವಾದರೂ ಗೆಲುವಿನ ಅಂತರವನ್ನು ತಗ್ಗಿಸುವಲ್ಲಿ ಯಶಸ್ವಿಯಾಗಿದೆ.

ಎಎಪಿ-ಕಾಂಗ್ರೆಸ್ ಮೈತ್ರಿಕೂಟಕ್ಕೆ ಬಿಜೆಪಿ ಮುನ್ನಡೆ ಕಳೆದುಕೊಂಡಿರುವ ವಿಧಾನಸಭಾ ಕ್ಷೇತ್ರಗಳಲ್ಲಿ ನವದೆಹಲಿ, ದೆಹಲಿ ಕ್ಯಾಂಟ್, ಆರ್‌ಕೆ ಪುರಂ, ಸೀಮಾಪುರಿ, ಬಾಬರ್‌ಪುರ್, ಅಂಬೇಡ್ಕರ್ ನಗರ, ಸಂಗಮ್ ವಿಹಾರ್, ತುಘಲಕಾಬಾದ್, ಸುಲ್ತಾನ್‌ಪುರ ಮಜ್ರಾ, ಜಂಗ್‌ಪುರ, ತಿಲಕ್ ನಗರ ಮತ್ತು ರಾಜೌರಿ ಗಾರ್ಡನ್ ಸೇರಿವೆ.

ಬಿಜೆಪಿಗೆ ಹೊಡೆತ ನೀಡಿದ ಗ್ರಾಮೀಣ ಭಾರತ:

ಹಣದುಬ್ಬರ, ನಿರುದ್ಯೋಗ, ಕಡಿಮೆ ಕೂಲಿ ಸಮಸ್ಯೆಗಳಿಂದ ಕಂಗೆಟ್ಟಿರುವ ಗ್ರಾಮೀಣ ಭಾರತ ಬಿಜೆಪಿಗೆ ಶಾಕ್ ನೀಡಿದೆ.

ದಿ ಮಿಂಟ್ ವರದಿಯ ಪ್ರಕಾರ, ಕಳೆದ ಸಾರ್ವತ್ರಿಕ ಚುನಾವಣೆಯಲ್ಲಿ ಬಿಜೆಪಿ 235 ಗ್ರಾಮೀಣ ಲೋಕಸಭಾ ಕ್ಷೇತ್ರಗಳನ್ನು ಗೆಲ್ಲುವಲ್ಲಿ ಯಶಸ್ವಿಯಾಗಿದೆ. ಈ ಬಾರಿ ಈ ಸಂಖ್ಯೆ 193 ಆಗಿದೆ. ಚುನಾವಣೆಗೆ ಬಹಳ ಹಿಂದೆಯೇ ಗ್ರಾಮೀಣ ಪ್ರದೇಶದ ಜನರು ಬಿಕ್ಕಟ್ಟನ್ನು ಎದುರಿಸುತ್ತಿದ್ದರು ಆದರೆ ಹೊಳೆಯುವ ಅಭಿವೃದ್ಧಿ ಅಂಕಿಅಂಶಗಳ ಹಿಂದೆ ಅವರನ್ನು ನಿರ್ಲಕ್ಷಿಸಲಾಯಿತು.
ಗ್ರಾಮೀಣ ಜನಸಂಖ್ಯೆಯ ಶೇಕಡಾವಾರು ಪ್ರದೇಶದಲ್ಲಿ ಬಿಜೆಪಿ ಎಷ್ಟು ಸ್ಥಾನಗಳನ್ನುಗೆದ್ದಿದೆ:

ಗ್ರಾಮೀಣ ಭಾರತದಿಂದ ಪಡೆದ ಆಘಾತದಿಂದ ಬಿಜೆಪಿಗೆ ಸ್ಥಾನಗಳ ಸಂಖ್ಯೆ ಕಡಿಮೆಯಾಗಿದೆ, ಹೆಚ್ಚಿನ ಸ್ಥಾನಗಳಲ್ಲಿ ಮತಗಳ ಕುಸಿತ ಕಂಡುಬಂದಿದೆ ಮತ್ತು ಗೆಲುವಿನ ಅಂತರವೂ ಕಡಿಮೆಯಾಗಿದೆ.

ಕಳೆದೆರಡು ಚುನಾವಣೆಗಳಲ್ಲಿ ಭರ್ಜರಿ ಗೆಲುವು ದಾಖಲಿಸಿರುವ ಬಿಜೆಪಿ ಈ ಬಾರಿ ಪ್ರಾದೇಶಿಕ ಪಕ್ಷಗಳ ನೆರವಿನೊಂದಿಗೆ ಸರ್ಕಾರ ರಚಿಸಲು ಸಿದ್ಧವಾಗಿದೆ. ಗ್ರಾಮೀಣ ಭಾರತದ ಹಿನ್ನಡೆಯು ಆರ್ಥಿಕ ಸಮಸ್ಯೆಗಳನ್ನು ಪರಿಹರಿಸಲು ತನ್ನ ಆರ್ಥಿಕ ಕಾರ್ಯತಂತ್ರವನ್ನು ಪುನರ್ವಿಮರ್ಶಿಸಲು.

ಇದನ್ನು ನೋಡಿ : ಮಹಾರಾಷ್ಟ್ರದಲ್ಲಿ ಪ್ರಧಾನಿ ಮೋದಿ ಪ್ರಚಾರ ನಡೆಸಿದ್ದ 18 ಕ್ಷೇತ್ರಗಳಲ್ಲಿ 15ರಲ್ಲಿ ಎನ್‌ಡಿಎ ಗೆ ಸೋಲು