-ವಸಂತರಾಜ ಎನ್.ಕೆ
ಫ್ಯಾಸಿಸಂ ವಿರುದ್ಧ ವಿಜಯದ 80ನೇ ವಾರ್ಷಿಕೋತ್ಸವವನ್ನು ಇತ್ತೀಚೆಗೆ (ಮೇ8-9) ಜಗತ್ತಿನಾದ್ಯಂತ ಸಂಭ್ರಮದಿಂದ ಆಚರಿಸಲಾಯಿತು. ಈಗಲೂ ಈ ಸಂಭ್ರಮಾಚರಣೆ ಏಕೆ? ಫ್ಯಾಸಿಸಂ ನ್ನು ಏಕೆ ವಿರೋಧಿಸಬೇಕು ? ಫ್ಯಾಸಿಸಂ ವಿರುದ್ಧ ವಿಜಯದಲ್ಲಿ ವಿವಿಧ ದೇಶಗಳ ಸರಕಾರಗಳ, ರಾಜಕೀಯ ಶಕ್ತಿಗಳ ಪಾತ್ರವೇನಿತ್ತು ? ಎರಡನೆಯ ಮಹಾಯುದ್ಧ ಏಕೆ ಫ್ಯಾಸಿಸಂ ಜತೆಗೆ ತಳುಕು ಹಾಕಿಕೊಂಡಿದೆ? ಫ್ಯಾಸಿಸಂ ವಿರುದ್ಧ ವಿಜಯದಲ್ಲಿ ಮಿತ್ರಕೂಟದ ಸೈನ್ಯಗಳ ಪಾತ್ರವೇನಿತ್ತು? ಯುರೋಪಿಯನ್ ಜನತಾ ಪ್ರತಿರೋಧ ಗೆರಿಲ್ಲಾ ಸೈನ್ಯದ ಪಾತ್ರವೇನಿತ್ತು? ಆಗಿನ ಫ್ಯಾಸಿಸಂ ವಿರುದ್ಧ ಮಿತ್ರಕೂಟದ ಪಾಶ್ಚಿಮಾತ್ಯ ದೇಶಗಳು ಮತ್ತು ಮಾಜಿ ಸೋವಿಯೆಟ್ ದೇಶಗಳು ಬೇರೆ ಬೇರೆ ದಿನದಂದು ಬೇರೆ ಬೇರೆ ರೀತಿಯಲ್ಲಿ ಬೇರೆಯಾಗಿ ಏಕೆ ಆಚರಿಸುತ್ತಾರೆ? ಈ ಕುರಿತು ಏಳುವ ಈ ಕೆಲವು ಪ್ರಶ್ನೆಗಳಿಗೆ ಉತ್ತರ ಕಂಡುಕೊಳ್ಳುವುದು -ಈ ಲೇಖನ ಸರಣಿಯ ಉದ್ದೇಶ. ಈ ಸರಣಿಯ ಭಾಗ-1ರಲ್ಲಿ ಮೊದಲ 3 ಪ್ರಶ್ನೆಗಳನ್ನು ಉತ್ತರಿಸಸಲಾಗಿದೆ. ಭಾಗ-2ರಲ್ಲಿ ಮುಂದಿನ 3 ಪ್ರಶ್ನೆಗಳಿಗೆ ಉತ್ತರ ಕೊಡಲಾಗಿದೆ. ಈ ಭಾಗ-3ರಲ್ಲಿ ಕೊನೆಯ 2 ಪ್ರಶ್ನೆಗಳಿಗೆ ಉತ್ತರಿಸಲಾಗಿದೆ.
ತಲೆಬರಹದ ಜೊತೆಗಿನ ಚಿತ್ರ : ಫ್ಯಾಸಿಸಂ ವಿರುದ್ಧ ವಿಜಯದಲ್ಲಿ \ಜನತಾ ಪ್ರತಿರೋಧ ಗೆರಿಲ್ಲಾ ಸೈನ್ಯಗಳ ಪಾತ್ರದ ಮಾಹಿತಿಯಿರುವ ಪುಸ್ತಕಗಳು
7. ಫ್ಯಾಸಿಸಂ ವಿರುದ್ಧ ಸಮರ ಮತ್ತು ಅದರ ವಿಜಯದಲ್ಲಿ ಯುರೋಪಿನ ರಾಷ್ಟ್ರೀಯ ಪ್ರತಿರೋಧ/ವಿಮೋಚನಾ ರಂಗಗಳ ಪಾತ್ರವೇನಿತ್ತು ?
ಫ್ಯಾಸಿಸಂ ಬೆಳೆದ ಮತ್ತು ಆಕ್ರಮಣಕ್ಕೆ ತುತ್ತಾದ ಹೆಚ್ಚಿನ ದೇಶಗಳಲ್ಲಿ ಫ್ಯಾಸಿಸ್ಟ್-ವಿರೋಧಿ ಶಕ್ತಿಗಳು ಎರಡನೇ ಮಹಾಯುದ್ಧದ ಅವಧಿಯಲ್ಲಿ ಫ್ಯಾಸಿಸ್ಟ್ ಸರಕಾರಕ್ಕೆ ಮತ್ತು ಅದರ ಯುದ್ಧಕ್ಕೆ ಪ್ರತಿರೋಧವೊಡ್ಡಲು ‘ರಾಷ್ಟ್ರೀಯ ವಿಮೋಚನಾ ರಂಗ” ರಚಿಸಿದವು. ಈ ರಂಗಗಳು (ಫ್ರಾನ್ಸ್ ಮತ್ತು ಇಟಲಿಯಲ್ಲಿ ಇದ್ದಂತೆ) ಸೈನ್ಯದ ಒಂದು ವಿಭಾಗದ ಜತೆ ಸೇರಿ ಮಿತ್ರ ಮತ್ತು ತಟಸ್ಥ ವಿದೇಶಗಳಿಂದ ಕೆಲಸ ಮಾಡುವ ವಿಮೋಚನಾ ಸೈನ್ಯವನ್ನೇ ಕಟ್ಟಿದವು. ಇದಲ್ಲದೆ ದೇಶದೊಳಗೆ ಪ್ರತಿರೋಧ ಒಡ್ಡುವ ಗೆರಿಲ್ಲಾ ಮತ್ತು ಗುಪ್ತ ದಳಗಳನ್ನು ರಚಿಸಿದವು. ಫ್ಯಾಸಿಸ್ಟ್ ಸರಕಾರದ ವಿರುದ್ಧ ಬುಡಮೇಲು ಕೃತ್ಯ, ಮಿಲಿಟರಿ ಸ್ಥಾವರಗಳ ಮೇಲೆ ಆಕಸ್ಮಿಕ ದಾಳಿಗಳು, ಗೆರಿಲ್ಲಾ ಯುದ್ಧ, ವಿಮೋಚಿತ ಪ್ರದೇಶಗಳ ನೆಲೆಗಳ ಸ್ಥಾಪನೆ, ಸಾಮೂಹಿಕ ಪ್ರತಿಭಟನಾ ಕಾರ್ಯಾಚರಣೆಗಳು ಇತ್ಯಾದಿಗಳನ್ನು ಸಂಘಟಿಸಿದವು.
ಇದನ್ನೂ ಓದಿ: ಸತತ ಹನ್ನೊಂದನೇ ವರ್ಷವೂ ಎಂಎಸ್‍ಪಿ ಯಲ್ಲಿ ರೈತರಿಗೆ ಒಕ್ಕೂಟ ಸರಕಾರದ ವಿಶ್ವಾಸದ್ರೋಹ: ಎಐಕೆಎಸ್‍ ಖಂಡನೆ
ಹಲವು ಕಡೆ ನಾಜಿ ಬೇಟೆ ದಮನಕ್ಕೆ ಒಳಗಾಗಿದ್ದ ಜ್ಯೂಗಳನ್ನು ರಕ್ಷಿಸುವುದರಲ್ಲಿ, ಸುರಕ್ಷಿತ ದೇಶಗಳಿಗೆ ಓಡಿ ಹೋಗಲು, ಯಾತನಾ ಶೀಬಿರಗಳಿಂದ ಬಿಡುಗಡೆ ಇತ್ಯಾಧಿಗಳಲ್ಲೂ ಈ ಗುಪ್ತದಳಗಳು ತೊಡಗಿದ್ದವು. ಇದರ ನಾಯಕತ್ವ ಮತ್ತು ಕಾರ್ಯಕರ್ತರು ಪ್ರಮುಖವಾಗಿ ಕಮ್ಯುನಿಸ್ಟ್, ಸೋಶಲಿಸ್ಟ್ ಮತ್ತು ಇತರ ದೇಶಪ್ರೇಮಿ ಪಕ್ಷಗಳಿಗೆ ಸೇರಿದವರು ಮತ್ತು ಕೆಲ ಬಿಡಿ ವ್ಯಕ್ತಿಗಳಾಗಿದ್ದರು. 1935ರಲ್ಲಿ ಕಮ್ಯುನಿಸ್ಟ್ ಅಂತರರಾಷ್ಟ್ರೀಯ ‘ವಿಶ್ವ ಫ್ಯಾಸಿಸ್ಟ್ ರಂಗ’ ಕಟ್ಟುವ ಕರೆಯ ಮೇರೆಗೆ ಎಲ್ಲೆಡೆ ಕಮ್ಯುನಿಸ್ಟ್ ಪಕ್ಷಗಳೂ ಮುಂಚೂಣಿಯಲ್ಲಿದ್ದವು. ಮುಂದೆ ಬ್ರಿಟಿಶ್-ಅಮೆರಿಕನ್ ಅಥವಾ ಸೋವಿಯೆಟ್ ಪಡೆಗಳು ಮುನ್ನಡೆ ಸಾಧಿಸಿದಾಗ ಅವುಗಳಿಗೆ ಸ್ಥಳೀಯ ಬೆಂಬಲ ಕೊಡುವುದಲ್ಲದೆ, ಜತೆಗೆ ಸೇರಿ ಕಾಳಗದಲ್ಲೂ ಭಾಗವಹಿಸಿದವು.
ಫ್ರೆಂಚ್ ಪ್ರತಿರೋಧದ ಸೈನಿಕರು ಪ್ಯಾರೀಸಿನಲ್ಲಿ ಜನವರಿ 1944
ಫ್ರಾನ್ಸ್ ನ್ನು ಜರ್ಮನಿ ವಶಪಡಿಸಿಕೊಳ್ಳುತ್ತಿದ್ದಂತೆ 8 ಸಾವಿರ ಕಮ್ಯುನಿಸ್ಟರು ಸೇರಿದಂತೆ ಸಾವಿರಾರು ವಿರೋಧಿ ರಾಜಕೀಯ ಕಾರ್ಯಕರ್ತರನ್ನು ಬಂಧಿಸಲಾಯಿತು. ಆದರೂ ಧೃತಿಗೆಡದೆ ಜುಲೈ 1941ರ ಹೊತ್ತಿಗೆ “ರಾಷ್ಟ್ರೀಯ ಪ್ರತಿರೋಧ ರಂಗ” ಮತ್ತು ಅದರಡಿಯಲ್ಲಿ ಗುಪ್ತ ‘ಜನತಾ ಪ್ರತಿರೋಧ ಸಮಿತಿ’ಗಳು ಮತ್ತು ‘ಸಶಸ್ತ್ರ ಹೋರಾಟಗಾರರ ಲಘು ದಳ’ಗಳನ್ನು ರಚಿಸಲಾಯಿತು. 1943ರ ಹೊತ್ತಿಗೆ 5 ಲಕ್ಷಕ್ಕೂ ಹೆಚ್ಚು ಸಶ್ತಸ್ರ ಹೋರಾಟಗಾರರಿದ್ದರು. ಎಪ್ರಿಲ್ 1943ರಲ್ಲಿ ದೇಶವ್ಯಾಪಿ ಸಶಸ್ತ್ರ ಬಂಡಾಯಕ್ಕೆ ಕರೆ ನೀಡಲಾಯಿತು. 1944ರ ಹೊತ್ತಿಗೆ 40 ಪ್ರದೇಶಗಳಲ್ಲಿ ಸಶಸ್ತ್ರ ಕಾರ್ಯಾಚರಣೆಗಳು ನಡೆದವು. ಜೂನ್ 1944ರಲ್ಲಿ ಅಮೆರಿಕ ಪಡೆಗಳು ಫ್ರಾನ್ಸ್ ನ ಕರಾವಳಿಯಲ್ಲಿ ಇಳಿದ ನಂತರ ಎರಡೇ ತಿಂಗಳಲ್ಲಿ (ಅಗಸ್ಟ್ ನಲ್ಲಿ) ನಾಜಿ ಪಡೆಗಳನ್ನು ಸೋಲಿಸಿ ಪ್ಯಾರಿಸ್ ವಿಮೋಚನೆ ಮಾಡುವುದರಲ್ಲಿ ಈ ಗೆರಿಲ್ಲಾ ಪಡೆಗಳ ಪಾತ್ರ ಮಹತ್ವದ್ದಾಗಿತ್ತು. ಫ್ರಾನ್ಸ್ ನಲ್ಲಿ 75 ಸಾವಿರ ಕಮ್ಯುನಿಸ್ಟರು ಸಶಸ್ತ್ರ ಕಾರ್ಯಾಚರಣೆಯಲ್ಲಿ ಮಡಿದರು ಎಂಬುದರಿಂದ ಅವರ ಪಾತ್ರದ ಮಹತ್ವ ತಿಳಿಯುತ್ತದೆ.
ಗಾರಿಬಾಲ್ದಿ ಬ್ರಿಗೇಡ್ ನ ಹೋರಾಟಗಾರರು ಇಟಲಿಯ ಪಾವಿಯ ಬಳಿ
ಇದೇ ರೀತಿ ಫ್ಯಾಸಿಸ್ಟ್ ತಾಯ್ನಾಡು ಇಟಲಿಯಲ್ಲಿ ಸಹ ಸಶಸ್ತ್ರ ‘ಗ್ಯಾರಿಬಾಲ್ಡಿ ಬ್ರಿಗೇಡ್’ (ಗ್ಯಾರಿಬಾಲ್ಡಿ ಇಟಲಿಯ ಜನಪ್ರಿಯ ದೇಶಪ್ರೇಮಿ ಚಾರಿತ್ರಿಕ ನಾಯಕ) ಸ್ಥಾಪಿಸಲಾಯಿತು. ‘ಗ್ಯಾರಿಬಾಲ್ಡಿ ಬ್ರಿಗೇಡ್’ ಗಳಲ್ಲಿ ಒಟ್ಟು 3.5 ಲಕ್ಷ ಸಶಸ್ತ್ರ ಗೆರಿಲ್ಲಾ ಸೈನಿಕರಿದ್ದರು. ಇವರಲ್ಲಿ 2.1 ಲಕ್ಷ ಕಮ್ಯುನಿಸ್ಟರು. 1943ರಲ್ಲಿ 3 ಲಕ್ಷ ಮತ್ತು 1944ರಲ್ಲಿ 10 ಲಕ್ಷ ಕಾರ್ಮಿಕರ 8 ದಿನಗಳ ಮುಷ್ಕರವನ್ನು ಸಂಘಟಿಸಲಾಯಿತು. ಈಗಾಗಲೇ ಹೇಳಿದಂತೆ ಜುಲೈ 1943ರಲ್ಲಿ ದಕ್ಷಿಣ ಇಟಲಿಯಲ್ಲಿ ಬ್ರಿಟಿಶ್-ಅಮೆರಿಕನ್ ಪಡೆಗಳ ಆಗಮನ ಮತ್ತು ದೇಶದಾದ್ಯಂತ ‘ಗ್ಯಾರಿಬಾಲ್ಡಿ ಬ್ರಿಗೇಡ್’ ಗಳ ಕಾರ್ಯಾಚರಣೆ, ಕಾರ್ಮಿಕ ಸಾರ್ವತ್ರಿಕ ಮುಷ್ಕರ ಗಳಿಂದ ಮುಸೊಲಿನಿ ಸರಕಾರ ಬೀಳುತ್ತದೆ.
ಆದರೆ ಜರ್ಮನ್ ಪಡೆಗಳು ಮತ್ತೆ ಆಕ್ರಮಿಸಿ, ಅಗಸ್ಟ್ 1944ರವರೆಗೆ ನಡೆದ ಅಂತಿಮ ಹೋರಾಟದಲ್ಲಿ ‘ಗ್ಯಾರಿಬಾಲ್ಡಿ ಬ್ರಿಗೇಡ್’ ಮಹತ್ವದ ಪಾತ್ರ ವಹಿಸುತ್ತದೆ. ಮುಸೊಲಿನಿಯನ್ನು ಮತ್ತೆ ಬಂಧಿಸಿ ಮರಣಡಂಡನೆ ಕೊಟ್ಟಿದ್ದು ಸಹ ಈ ‘ಬ್ರಿಗೇಡ್’. ಬೆಲ್ಜಿಯಂ ನಲ್ಲಿ ಕಮ್ಯುನಿಸ್ಟ್ ಪಕ್ಷ 50 ಸಾವಿರಕ್ಕೂ ಹೆಚ್ಚು ಸಶಸ್ತ್ರ ಗೆರಿಲ್ಲಾ ಪಡೆಗಳ ಜೊತೆಗೆ ಪ್ರತಿರೋಧ ಒಡ್ಡಿದಲ್ಲದೆ ಬ್ರಿಟಿಶ್-ಅಮೆರಿಕನ್ ಪಡೆಗಳ ಜತೆ ಅಂತಿಮ ವಿಮೋಚನನೆಯಲ್ಲಿ ಮುಖ್ಯ ಪಾತ್ರ ವಹಿಸಿತು. ಗ್ರೀಸ್ ನಲ್ಲೂ ಕಮ್ಯುನಿಸ್ಟರ ನೇತೃತ್ವದ ದೇಶಪ್ರೇಮಿ ಪಡೆ ಜರ್ಮನರನ್ನು ದೇಶದ ಬಹುಭಾಗಗಳಿಂದ ಓಡಿಸುವಲ್ಲಿ, ಬ್ರಿಟಿಶ್-ಅಮೆರಿಕನ್ ಪಡೆಗಳು ಬರುವ ಮೊದಲೇ ಸಫಲವಾಗಿದ್ದವು.
ಜರ್ಮನ್ ನಾಜಿ-ವಿರೋಧಿ ಗೆರಿಲ್ಲಾ ದಳ
ಯುಗೊಸ್ಲಾವಿಯದಲ್ಲಿ ಕಮ್ಯುನಿಸ್ಟರ ನಾಯಕತ್ವದಲ್ಲಿ ಸ್ಥಾಪಿಸಲಾದ 7 ಲಕ್ಷ ಹೋರಾಟಗಾರರಿದ್ದ ರಾಷ್ಟ್ರೀಯ ವಿಮೋಚನಾ ಸೈನ್ಯ 1941ರ ಹೊತ್ತಿಗ ದೇಶದ ಬಹುಭಾಗವನ್ನು ವಿಮೋಚನೆ ಮಾಡಿತ್ತು. ಬಲ್ಗೇರಿಯದಲ್ಲಿ 1942ರಲ್ಲಿ 3 ಲಕ್ಷ ಸಶ್ತಸ್ತ್ರ ಹೋರಾಟಗಾರರು, 37 ತುಕಡಿಗಳು, 11 ಬ್ರಿಗೇಡುಗಳ ಸೈನ್ಯ ಕಟ್ಟಲಾಗಿತ್ತು. ಅಗಸ್ಟ್ 1943ರಲ್ಲಿ ರಚಿತವಾದ ‘ಪಿತೃಭೂಮಿ ರಂಗ’ದ ನಾಯಕತ್ವದ ಸೈನ್ಯ, ಸೋವಿಯೆಟ್ ಕೆಂಪು ಸೈನ್ಯದ ಸಹಾಯದೊಂದಿಗೆ ಸೆಪ್ಟೆಂಬರ್ 1944ರಲ್ಲಿ ಬಲ್ಗೇರಿಯವನ್ನು ನಾಜಿಗಳಿಂದ ವಿಮೋಚನೆಗೊಳಿಸುವುದರಲ್ಲಿ ಮುಖ್ಯ ಪಾತ್ರ ವಹಿಸಿತು. ಇದೇ ರೀತಿ ಪೋಲೆಂಡ್, ಚೆಕೊಸ್ಲೊವಾಕಿಯ, ಹಂಗೇರಿ, ಅಲ್ಬೇನಿಯಗಳಲ್ಲಿ ಜನತಾ ವಿಮೋಚನಾ ಸೇನೆಗಳು ನಾಜಿಗಳಿಂದ ವಿಮೋಚನೆಯಲ್ಲಿ ಪ್ರಮುಖ ಪಾತ್ರ ವಹಿಸಿದವು.
8.ಫ್ಯಾಸಿಸಂ-ವಿರೋಧಿ ವಿಜಯ ದಿನವನ್ನು ಮಿತ್ರಕೂಟದಲ್ಲಿ ಜತೆಗಿದ್ದ ದೇಶಗಳು ಒಟ್ಟಾಗಿ ಆಚರಿಸುವುದಿಲ್ಲ. ರಶ್ಯಾ ಸಮಾಜವಾದದ ಪತನದ ನಂತರವೂ ಅದನ್ನು ದೊಡ್ಡದಾಗಿ ಆಚರಿಸುತ್ತದೆ. ಅಮೆರಿಕ-ಪಶ್ಚಿಮ ಯುರೋಪುಗಳಲ್ಲಿ ಅದು ಅಷ್ಟೇನೂ ಮಹತ್ವದ ಆಚರಣೆಯಾಗುವುದಿಲ್ಲ. ಏಕೆ?
ಯುಗೋಸ್ಲಾವ್ ಜನತಾ ಸೈನ್ಯ ತುಕಡಿ
ಹೌದು. ಫ್ಯಾಸಿಸಂ-ವಿರೋಧಿ ವಿಜಯ ದಿನವನ್ನು ಪಾಶ್ಚಿಮಾತ್ಯ ದೇಶಗಳು ಮತ್ತು ರಶ್ಯಾ ಪ್ರತ್ಯೇಕ ದಿನ (ಅನುಕ್ರಮವಾಗಿ ಮೇ 8 ಮತ್ತು 9)ಗಳಂದು ಆಚರಿಸಲಾಗುತ್ತದೆ. ಇದು ಜರ್ಮನ್ ಪಡೆಗಳು ಫೂರ್ಣವಾಗಿ ಶರಣಾಗತವಾದ ದಿನ. ಶರಣಾಗತಿ ಬರ್ಲಿನ್ ನಲ್ಲಿ ಮೇ 8ರ ತಡರಾತ್ರಿಯಲ್ಲಿ ಆಗಿದ್ದು ಸಮಯ ವ್ಯತ್ತಾಸಗಳಿಂದಾಗಿ ಮಾಸ್ಕೊದಲ್ಲಿ ಆಗಲೇ ಮೇ 9 ಬೆಳಿಗ್ಗೆ ಆಗಿತ್ತು. ಆದರೆ ಪ್ರತ್ಯೇಕ ದಿನದಂದು ಆಚರಿಸುವುದು, ಸಮಯ ವ್ಯತ್ಯಾಸದಿಂದಾಗಿ ಮಾತ್ರವಲ್ಲ. ಪಾಶ್ಚಿಮಾತ್ಯ ದೇಶಗಳು ‘ಯುರೋಪಿನಲ್ಲಿ ವಿಜಯ ದಿನ’ (ವಿಇ ಡೇ – ವಿಕ್ಟರಿ ಇನ್ ಯುರೋಪ್ ಡೇ) ಎಂದು ಕರೆದರೆ, ರಶ್ಯಾ ಸೇರಿದಂತೆ ಮಾಜಿ ಸೋವಿಯೆಟ್ ದೇಶಗಳಲ್ಲಿ “ಫ್ಯಾಸಿಸಂ ವಿರುದ್ಧ ವಿಜಯದ ದಿನ’ ವೆಂದು ಕರೆಯಲಾಗುತ್ತದೆ. ಹೀಗೆ ದಿನದ ರಾಜಕೀಯ ಮಹತ್ವದ ತಿರುಳಲ್ಲಿ ಸಹ ವ್ತ್ಯತ್ಯಾಸವಿದೆ.
ಪಾಶ್ಚಿಮಾತ್ಯ ಸಂಕಥನಗಳಲ್ಲಿ ಸೋವಿಯೆಟ್ ಒಕ್ಕೂಟದ ಸೈನ್ಯ ಮತ್ತು ಜನತೆ, ಯುರೋಪಿನಾದ್ಯಂತ ಕಮ್ಯುನಿಸ್ಟ್ ನಾಯಕತ್ವದ ಜನತಾ ವಿಮೋಚನಾ ಗೆರಿಲ್ಲಾಗಳ ಪಾತ್ರವನ್ನು ನಿರ್ಲಕ್ಷಿಸಲಾಗುತ್ತದೆ. ಸ್ಟಾಲಿನ್ ಗ್ರಾಡ್, ಲೆನಿನ್ ಗ್ರಾಢ್ ಗಳಲ್ಲಿ ಬೀದಿ ಬೀದಿಯಲ್ಲೂ ಅವುಡುಗಚ್ಚಿ ಹೋರಾಡಿದ ಕೆಂಪು ಸೈನ್ಯ ಮತ್ತು ಜನತೆಯ ಧೀರೋದಾತ್ತ ಪಾತ್ರವನ್ನು ಮರೆಮಾಚಿ, ರಶ್ಯಾದ ಕಠಿಣ ಚಳಿಗಾಲ ತಡೆಯಲಾಗದೆ ಹಿಟ್ಲರನ ಪಡೆಗಳು ಸೋತವು ಎಂಬ ನಿರೂಪಣೆಗಳನ್ನು ಹರಿಯ ಬಿಡಲಾಗುತ್ತದೆ. ಅದೇ ರೀತಿಯಲ್ಲಿ ಯುರೋಪಿಯನ್ ದೇಶಗಳಲ್ಲಿ ಕಮ್ಯುನಿಸ್ಟ್ ನಾಯಕತ್ವದ ರಾಷ್ಟ್ರೀಯ ವಿಮೋಚನಾ ರಂಗದ ಧೀರೋದಾತ್ತ ಪಾತ್ರವನ್ನು ಸಹ ನಿರ್ಲಕ್ಷಿಸಲಾಗುತ್ತದೆ, ಮರೆ ಮಾಚಲಾಗುತ್ತದೆ.
ಫೆಬ್ರುವರಿ 1943ರ ಸ್ಟಾಲಿನ್ ಗ್ರಾಡ್ ಸಮರದಲ್ಲಿ ನಾಜಿ ಪಡೆ ಸೋತು ಹಿಮ್ಮೆಟ್ಟಲು ಆರಂಭಿಸದ ಮೇಲಷ್ಟೇ, ಆ ಮೇಲೂ ಅತ್ಯಂತ ವಿಳಂಬದ ನಂತರ ಜೂನ್ 1944ರಲ್ಲಿ ಮಿತ್ರಕೂಟದ ಪಡೆಗಳು ಫ್ರಾನ್ಸಿನ ನಾರ್ಮಂಡಿಯಿಂದ ಆರಂಭಿಸಿದ ದಾಳಿಯನ್ನು ಜರ್ಮನಿಯನ್ನು ಸೋಲಿಸಿದ ಪ್ರಮುಖ ತಿರುವೆಂದು ಬಿಂಬಿಸುತ್ತವೆ. ಅದರ ಮಹತ್ವವನ್ನು ಉತ್ಪ್ರೇಕ್ಷೆ ಮಾಡುತ್ತವೆ. ಈ ವರ್ಷವೂ ಸೇರಿದಂತೆ ಪ್ರತಿ ವರ್ಷವೂ, ಎಲ್ಲ ಪಾಶ್ಚಿಮಾತ್ಯ ದೇಶಗಳೂ ಈ ‘ನಾರ್ಮಂಡಿ ಲ್ಯಾಂಡಿಂಗ್’ ದಿನವನ್ನು ‘ವಿಇ ಡೇ’ ಗಿಂತಲೂ ಜೋರಾಗಿ ಆಚರಿಸುತ್ತವೆ! ಆದರೆ ಜರ್ಮನಿ ಸೋವಿಯೆಟ್ ಒಕ್ಕೂಟದ ಮೇಲೆ ದಾಳಿ ಮಾಡಿದ ಸ್ವಲ್ಪ ಸಮಯದಲ್ಲೇ 1942ರಲ್ಲಿ ಪಶ್ಚಿಮದಿಂದಲೂ ದಾಳಿ ಆರಂಭಿಸಿದ್ದರೆ ನಾಜಿ ಪಡೆಗಳನ್ನು ಇನ್ನಷ್ಟು ಬೇಗನೆ ಬಹಳ ಕಡಿಮೆ ಸಾವು-ನೋವುಗಳಿಂದ ಸೋಲಿಸಬಹುದಾಗಿತ್ತು.
ನಾಜಿ ಪಡೆಗಳು ಸೋವಿಯೆಟ್ ಒಕ್ಕೂಟವನ್ನು ನಾಶ ಮಾಡಲಿ, ಆ ಮೇಲೆ ನೋಡೋಣ ಎಂದು ಅವು ಕಾದಿದ್ದವು ಆದರೆ ಫೆಬ್ರುವರಿ 1943ರ ಸ್ಟಾಲಿನ್ ಗ್ರಾಡ್ ಸಮರದಲ್ಲಿ ಸೋವಿಯೆಟ್ ವಿಜಯದ ನಂತರ ಇನ್ನೂ ಕಾದರೆ ಸೋವಿಯೆಟ್ ಪಡೆಗಳು ಇಡೀ ಯುರೋಪನ್ನು ಕಮ್ಯುನಿಸ್ಟ್ ನಾಯಕತ್ವದ ರಾಷ್ಟ್ರೀಯ ವಿಮೋಚನಾ ರಂಗದ ಜತೆಗೆ ವಿಮೋಚನೆ ಮಾಡಿಬಿಡುತ್ತವೆ. ಇಡೀ ಯುರೋಪ್ ಕಮ್ಯುನಿಸ್ಟ್ ಆಗುವ ಅಪಾಯವಿದೆ. ಹಾಗಾಗಿ ‘ನಾರ್ಮಂಡಿ ಲ್ಯಾಂಡಿಂಗ್’ ಯೋಜಿಸಲಾಯಿತು ಎಂಬ ವಾಸ್ತವವನ್ನೂ ಈ ಪಾಶ್ಚಿಮಾತ್ಯ ನಿರೂಪಣೆಗಳು ಮರೆ ಮಾಚುತ್ತವೆ.
ಎರಡನೇ ಮಹಾಯುದ್ಧದ ನಂತರದ ಶೀತ ಸಮರದ ಅವಧಿಯಲ್ಲಿ ಇನ್ನೊಂದು ರೀತಿಯ ಹುಸಿ ನಿರೂಪಣೆಯನ್ನೂ ಪಾಶ್ಚಿಮಾತ್ಯ ಸರಕಾರಗಳು ಪ್ರಚಾರ ಮಾಡುತ್ತಿವೆ. ಫ್ಯಾಸಿಸಂ ಮತ್ತು ಕಮ್ಯುನಿಸಂ ಗಳನ್ನು ಸೈದ್ಧಾಂತಿಕವಾಗಿ ಒಂದೇ ಎಂಬ ಅಪಪ್ರಚಾರವನ್ನು ವ್ಯವಸ್ಥಿತವಾಗಿ ಮಾಡಲಾಗುತ್ತಿದೆ. ಸೋವಿಯೆಟ್ ಒಕ್ಕೂಟದ ಪತನದ ನಂತರವಂತೂ ಹಲವು ಯುರೋಪಿಯನ್ ದೇಶಗಳಲ್ಲಿ ಫ್ಯಾಸಿಸಂ ಮತ್ತು ಅದರ ಪ್ರತೀಕಗಳು, ಪ್ರಚಾರದ ಮೇಲೆ ಇದ್ದ ನಿಷೇಧವನ್ನು ಕಮ್ಯುನಿಸಂ ಗೆ ವಿಸ್ತರಿಸಲಾಗಿದೆ. ಸಮಾಜವಾದಿ ಸರಕಾರಗಳ ಪತನದ ನಂತರ ಪೂರ್ವ ಯುರೋಪಿನಲ್ಲಿ ನಡೆದ ಯು.ಎಸ್ ಪ್ರಾಯೋಜಿತ ‘ಬಣ್ಣದ ಕ್ರಾಂತಿ’ಗಳಲ್ಲಿ ಹಲವು ಮಾಜಿ ಫ್ಯಾಸಿಸ್ಟ್ ಸಂಘಟನೆಗಳು, ಶಕ್ತಿಗಳು, ವ್ಯಕ್ತಿಗಳನ್ನು ಬಳಸಿಕೊಳ್ಳಲಾಯಿತು.
ವಿಯೇಟ್ನಾಂ ಪಡೆಗಳು ಮೊದಲ ಬಾರಿಗೆ ಮಾಸ್ಕೊ ಫ್ಯಾಸಿಸ್ಟ್ ವಿರುದ್ಧ ವಿಜಯದ ವಾರ್ಷಿಕೋತ್ಸವದ ಮಿಲಿಟರಿ ಪರೇಡ್ ನಲ್ಲಿ ಪಾಲುಗೊಂಡವು
ಈಗ ಯುರೋಪಿನಲ್ಲಿ ಉಂಟಾಗಿರುವ ಆರ್ಥಿಕ ರಾಜಕೀಯ ಬಿಕ್ಕಟ್ಟಿನ ಫಲವಾಗಿ ಮತ್ತೆ ಕಮ್ಯುನಿಸ್ಟ್ ನಾಯಕತ್ವದ ಎಡ ಪ್ರಗತಿಪರ ರಾಜಕೀಯ ಶಕ್ತಿಗಳು ಬಲಗೊಳ್ಳದಂತೆ, ಅಲ್ಲಿನ ಆಳುವ ವರ್ಗಗಳು, ಅದರ ಪ್ರಭುತ್ವ ಮತ್ತು ರಾಜಕೀಯ ಪಕ್ಷಗಳು ನವ-ಫ್ಯಾಸಿಸ್ಟ್ ಪಕ್ಷಗಳಿಗೆ ಪರೋಕ್ಷ ಬೆಂಬಲ ನೀಡುತ್ತಿವೆ. ಫ್ರಾನ್ಸಿನ ಇತ್ತೀಚಿನ ಚುನಾವಣೆಗಳ ನಂತರ ಇದು ಸ್ಪಷ್ಟವಾಗಿ ಕಂಡು ಬಂದಿದೆ. ಆಸ್ಟ್ರಿಯ, ಇಟಲಿ ಗಳಲ್ಲಿ ನವ-ಫ್ಯಾಸಿಸ್ಟ್ ಪಕ್ಷಗಳು ಅಧಿಕಾರ ಹಿಡಿದಿವೆ. ಜರ್ಮನಿಯಲ್ಲಿ ಅತಿ ದೊಡ್ಡ ಪಕ್ಷವಾಗಿ ಹೊಮ್ಮಿದೆ. ಟ್ರಂಪ್ ನಾಯಕತ್ವದ ರಿಪಬ್ಲಿಕನ್ನರು ಜರ್ಮನಿ, ಇಂಗ್ಲೆಂಡ್, ಇಟಲಿ ಮುಂತಾದ ನವ-ಫ್ಯಾಸಿಸ್ಟ್ ಪಕ್ಷಗಳನ್ನು ಈಗಾಗಲೇ ಬಹಿರಂಗವಾಗಿ ಬೆಂಬಲಿಸಿದ್ದಾರೆ. ಟ್ರಂಪ್ ಉದ್ಘಾಟನಾ ಸಮಾರಂಭದಲ್ಲಿ ಎಲೊನ್ ಮಸ್ಕ್ ಮತ್ತು ಉಪಾಧ್ಯಕ್ಷ ವಾನ್ಸ್ ನಾಜಿ ಸೆಲ್ಯೂಟ್ ಗಳನ್ನು ಸಹ ಹೊಡೆದರು.
ಈ ಹಿನ್ನೆಲೆಯಲ್ಲಿ ಮಾಸ್ಕೋದಲ್ಲಿ ನಡೆದ ಈ ವರ್ಷದ ಮೇ 9ರ ‘ಫ್ಯಾಸಿಸಂ-ವಿರುದ್ಧ ವಿಜಯ’ ಸಂಭ್ರಮಾಚರಣೆ ಮಹತ್ವದ್ದಾಗಿತ್ತು. ಒಂದು ಕಡೆ ಯುರೋಪಿನ ನಾಯಕರು ಈ ಸಂಭ್ರಮಾಚರಣೆಯನ್ನು ಬಷಿಷ್ಕರಿಸಿದರು. ಈ ಬಹಿಷ್ಕಾರ ಲೆಕ್ಕಿಸದೆ ಭಾಗವಹಿಸಿದ ಸ್ಲೊವಾಕಿಯ ಮತ್ತು ಸರ್ಬಿಯ ಮುಖ್ಯಸ್ಥರು ‘ಇತಿಹಾಸದ ತಪ್ಪು ಪಕ್ಷ;ದಲ್ಲಿದ್ದಾರೆ (ಆನ್ ದಿ ರಾಮಗ್ ಸೈಡ್ ಆಫ್ ಹಿಸ್ಟರಿ) ಎಂದು ಯುರೋಕೂಟ ವಕ್ತಾರರು ಟೀಕಿಸಿದರು. ಅವರ ವಿಮಾನಕ್ಕೆ ಕೆಲವು ಯುರೋಕೂಟದ ದೇಶಗಳು ಅನುಮತಿ ನಿರಾಕರಿಸಿದವು. ಅವರು ಸುತ್ತಿ ಬಳಸಿ ಮಾಸ್ಕೊಗೆ ಬರಬೇಕಾಯಿತು.
ಇನ್ನೊಂದು ಕಡೆ ಜಾಗತಿಕ ದಕ್ಷಿಣ ಎನ್ನಬಹುದಾದ 29 ದೇಶಗಳ ಮುಖ್ಯಸ್ಥರು ಅಥವಾ ಪ್ರತಿನಿಧಿಗಳು ಬಾಗವಹಿಸಿದರು. ಚೀನಾ, ಬ್ರೆಜಿಲ್, ಉತ್ತರ ಕೊರಿಯಾ, ವೆನೆಜುವೇಲಾ, ವಿಯೇಟ್ನಾಂ, ಜಿಂಬಾಬ್ವೆ, ಈಜಿಪ್ಟ್. ಮಂಗೋಲಿಯ, ಮತ್ತು ಮಾಜಿ ಸೋವಿಯೆಟ್ ಒಕ್ಕೂಟದ ದೇಶಗಳ ಮುಖ್ಯಸ್ಥರು ಭಾಗವಹಿಸಿದ್ದರು. ಭಾರತ ಸೇರಿದಂತೆ ಏಶ್ಯಾ, ಆಪ್ರಿಕಾ, ಲ್ಯಾಟಿನ್ ಅಮೆರಿಕದ ಹಲವು ದೇಶಗಳ ಪ್ರತಿನಿಧಿಗಳು ಭಾಗವಹಿಸಿದ್ದರು. ವಿಯೇಟ್ನಾಂ, ಲಾವೋಸ್, ಮ್ಯಾನ್ಮಾರ್, ಈಜಿಪ್ಟ್ ಮತ್ತು ಕೆಲವು ಮಾಜಿ ಸೋವಿಯೆಟ್ ದೇಶಗಳು ಸೇರಿದಂತೆ 13 ದೇಶಗಳ ಸೇನಾ ತುಕಡಿಗಳು ಮಿಲಿಟರಿ ಪೆರೇಡ್ ನಲ್ಲಿ ಭಾಗವಹಿಸಿದ್ದು ವಿಶೇಷವಾಗಿತ್ತು. ‘ಫ್ಯಾಸಿಸಂ-ವಿರುದ್ಧ ವಿಜಯ’ ಆಚರಣೆಯಲ್ಲಿ ಪಾಶ್ಚಿಮಾತ್ಯ ದೇಶಗಳು ಬಹುಶಃ ‘ಇತಿಹಾಸದ ತಪ್ಪು ಪಕ್ಷ’ ದಲ್ಲಿರುವಂತೆ ಕಾಣುತ್ತದೆ.
ಇದನ್ನೂ ನೋಡಿ: ಫ್ಯಾಸಿಸಂ ಹುಟ್ಟು ಹೇಗಾಯಿತು ಮತ್ತು ಅದನ್ನು ಮೊದಲಿನಿಂದಲೂ ವಿರೋಧಿಸಿದ ರಾಜಕೀಯ ಶಕ್ತಿಗಳು ಯಾವುವು? Janashakthi
