ನವದೆಹಲಿ: ಕೊರೊನಾ ಸೋಂಕನ್ನು ತಡೆಯುವ ನಿಟ್ಟಿನಲ್ಲಿ ಹಾಕಲಾಗುತ್ತಿರುವ ಲಸಿಕೆಗಳು, ಅದು ಯಾವುದೇ ಲಸಿಕೆಯಾದರೂ ಮಾನವನ ದೇಹದಲ್ಲಿ ಎಷ್ಟು ದಿನಗಳವರೆಗೆ ರಕ್ಷಣೆ ನೀಡಬಲ್ಲದೆ ಎಂಬದು ಹಲವರಲ್ಲಿ ಪ್ರಶ್ನೆಯಾಗಿಯೇ ಉಳಿದೆ. ಲಸಿಕೆ ಶಾಶ್ವತ ಪರಿಹಾರವೇ ಅಥವಾ ತಾತ್ಕಾಲಿಕ ಪರಿಹಾರವೇ ಎಂಬುದು ಹಲವರಲ್ಲಿ ಕಾಡಲಾರಂಭಿಸಿದೆ.
ಇದಕ್ಕೆ ವಿಶ್ವ ಆರೋಗ್ಯ ಸಂಸ್ಥೆಯ ವಿಜ್ಞಾನಿ ಡಾ. ಸೌಮ್ಯ ಸ್ವಾಮಿನಾಥನ್ ಪ್ರಕಾರ “ಕೋವಿಡ್ ಲಸಿಕೆ ನಮ್ಮ ದೇಹದಲ್ಲಿ ಕನಿಷ್ಠ ಒಂದು ವರ್ಷವಾದರೂ ರಕ್ಷಣೆ ಕೊಡಬಲ್ಲದು” ಎಂದು ಹೇಳುತ್ತಾರೆ.
ಸೋಮವಾರ ಸಿಎನ್‌ಬಿಸಿ-ಟಿವಿ18ಗೆ ವಿಶೇಷ ಸಂದರ್ಶನ ನೀಡಿದ ಡಾ. ಸೌಮ್ಯ ಸ್ವಾಮಿನಾಥನ್ “ಪ್ರಸಕ್ತ ಸನ್ನಿವೇಶದಲ್ಲಿ ಜಾಗತಿಕವಾಗಿ ಕೋವಿಡ್-19 ಪ್ರಕರಣಗಳು ಏರಿಕೆ ಕಂಡುಬರುತ್ತಿದೆ ಮತ್ತು ದುರ್ಬಲ ಜನಸಂಖ್ಯೆಯಲ್ಲಿ ಕೋವಿಡ್ ಲಸಿಕೆಯು ‘ಸೋಂಕುಗಳು ಮತ್ತು ಸಾವುಗಳ ನಡುವಿನ ಸಂಬಂಧವನ್ನು ಬೇರ್ಪಡಿಸಲು ಕಾರಣವಾಗಿದೆ” ಎಂದು ತಿಳಿಸಿದರು.
ಇದನ್ನು ಓದಿ: ನೂರು ಕೋಟಿ ಲಸಿಕೆ ಸಾಧನೆಯ ಹಿಂದೆಮುಂದೆ
“ಪಶ್ಚಿಮ ಯುರೋಪಿನ ಅನೇಕ ದೇಶಗಳಲ್ಲಿ ಮತ್ತೆ ಕೋವಿಡ್ ಸೋಂಕುಗಳು ಅಧಿಕ ಪ್ರಮಾಣದಲ್ಲಿ ಏರಿಕೆ ಕಾಣುತ್ತಿವೆ. ಹಲವಾರು ಕಾರಣಗಳಿಂದ ಆಸ್ಪತ್ರೆಗೆ ದಾಖಲಾಗುವ ಪ್ರಮಾಣವು ಹೆಚ್ಚಾಗುತ್ತಿದೆ. ಆದರೆ ಸಾವುಗಳ ಪ್ರಮಾಣ ಕಡಿಮೆಯಾಗುತ್ತಿದೆ. ಆದ್ದರಿಂದ, ಸೋಂಕುಗಳು ಮತ್ತು ಸಾವುಗಳ ನಡುವಿನ ಸಂಬಂಧವನ್ನು ಬೇರ್ಪಡಿಸಲು ಕೋವಿಡ್ ಲಸಿಕೆ ಹೆಚ್ಚಿನ ಪರಿಣಾಮಕಾರಿಗೆ ಕಾರಣವಾಗಿದೆʼʼ ಎಂದು ಹೇಳಿದರು.
ಸಾಮಾನ್ಯವಾಗಿ ಹೆಚ್ಚಿನ ವಯಸ್ಕರಲ್ಲಿ, ಕೋವಿಡ್ ಲಸಿಕೆ ಕನಿಷ್ಠ ಒಂದು ವರ್ಷ ಅಥವಾ ಅದಕ್ಕಿಂತ ಹೆಚ್ಚು ಕಾಲ ಸಾಕಾಗುತ್ತದೆ ಎಂದು ವಿಶ್ವ ಆರೋಗ್ಯ ಸಂಸ್ಥೆಯ ಮುಖ್ಯ ವಿಜ್ಞಾನಿ ಅವರ ಹೇಳಿಕೆಯಾಗಿದೆ.
“ಲಸಿಕೆಯನ್ನು ಹಾಕಿಸಿಕೊಂಡವರಲ್ಲಿ ಅದರಿಂದ ಸೃಷ್ಟಿಯಾಗುವ ರೋಗನಿರೋಧಕ ಶಕ್ತಿ ದೀರ್ಘಕಾಲ ಇರಬಹುದು ಎಂಬ ಸುಳಿವು ಸಿಕ್ಕಿದೆ. ನಮ್ಮ ರಕ್ತದಲ್ಲಿ ಪ್ರತಿಕಾಯಗಳ ಮಟ್ಟ ಕಡಿಮೆಯಾದರೂ ರೋಗ ನಿರೋಧಕ ಶಕ್ತಿ ಜಾಗೃತವಾಗಿರುತ್ತದೆ. ಆರೋಗ್ಯಯುತ ವಯಸ್ಕರಲ್ಲಿ ಬಹುತೇಕರಿಗೆ ಕನಿಷ್ಠ ಒಂದು ವರ್ಷವಾದರೂ, ಅಥವಾ ಇನ್ನೂ ಹೆಚ್ಚು ಕಾಲ ಲಸಿಕೆ ಒಳ್ಳೆಯ ರಕ್ಷಣೆ ಆಗಬಲ್ಲುದು,” ಎಂದು ಅಭಿಪ್ರಾಯಪಟ್ಟಿದ್ದಾರೆ.
ಇದನ್ನು ಓದಿ: ಭಾರತದಲ್ಲಿ 2ರಿಂದ 18 ವರ್ಷದೊಳಗಿನ ಮಕ್ಕಳಿಗೆ ಕೋವ್ಯಾಕ್ಸಿನ್ ಲಸಿಕೆ ನೀಡಲು ಅನುಮೋದನೆ
“ಪ್ರಸಕ್ತ ಹೊಸ ರೂಪಗಳೊಂದಿಗೆ ಹರಡುತ್ತಿರುವ ಕೋವಿಡ್ ಅಲೆಯಿಂದ ಮಾನವನ ರಕ್ತದಲ್ಲಿನ ಪ್ರತಿಕಾಯಗಳ ಮಟ್ಟವನ್ನು ಕ್ಷೀಣಿಸಲು ಪ್ರಾರಂಭಿಸಿದರೂ ಸಹ, ಲಸಿಕೆ ಪಡೆದವರಲ್ಲಿ ರೋಗನಿರೋಧಕ ಶಕ್ತಿ ದೀರ್ಘಕಾಲದವರೆಗೆ ಇರುತ್ತದೆ ಎಂದು ಸೂಚಿಸುತ್ತದೆ. ಆದರೆ ಹೆಚ್ಚಿನ ಆರೋಗ್ಯವಂತ ವಯಸ್ಕರಿಗೆ, ಲಸಿಕೆ ಪಡೆದ ಮೇಲೆ ಕನಿಷ್ಠ ಒಂದು ವರ್ಷದವರೆಗೆ ರಕ್ಷಣೆ ಉತ್ತಮವಾಗಿರಬೇಕು” ಎಂದು ತಿಳಿಸಿದ್ದಾರೆ.
“ಬೂಸ್ಟರ್ ಡೋಸ್ ಮತ್ತು ಮಿಕ್ಸ್ ಮತ್ತು ಮ್ಯಾಚ್ ಲಸಿಕೆಯ ಪ್ರಶ್ನೆಗೆ, ಇದು ಆಸಕ್ತಿದಾಯಕ ಪರಿಕಲ್ಪನೆಯಾಗಿದ್ದರೂ, ತೀರ್ಮಾನಕ್ಕೆ ಬರಲು ಡೇಟಾ ಅಗತ್ಯವಿದೆ ಎಂದು ಹೇಳಿದರು.
“ಇದು ತುಂಬಾ ಆಸಕ್ತಿದಾಯಕ ಪರಿಕಲ್ಪನೆಯಾಗಿದೆ ಮತ್ತು ಭಿನ್ನಜಾತಿಯ ಬೂಸ್ಟರ್‌ಗಳ ಪ್ರಶ್ನೆ ಅಥವಾ ಮಿಕ್ಸ್ ಮತ್ತು ಮ್ಯಾಚ್ ಎಂದು ಕರೆಯುತ್ತಾರೆ. ಆದರೆ ಈ ಡೇಟಾವನ್ನು ರಚಿಸಬೇಕಾಗಿದೆ, ಡೇಟಾವನ್ನು ನೋಡದೆ ನಾವು ತೀರ್ಮಾನಕ್ಕೆ ಬರಲು ಸಾಧ್ಯವಿಲ್ಲ,” ಎಂದು ಡಾ. ಸೌಮ್ಯ ಸ್ವಾಮಿನಾಥನ್ ಹೇಳಿದರು.
ಇದನ್ನು ಓದಿ: ಕೊವ್ಯಾಕ್ಸಿನ್‌ ಲಸಿಕೆ ತುರ್ತು ಬಳಕೆಗೆ ವಿಶ್ವ ಆರೋಗ್ಯ ಸಂಸ್ಥೆ ಅನುಮತಿ
ಭಾರತದಲ್ಲಿ ದೇಶೀಯವಾಗಿ ನಿರ್ಮಿತವಾದ ಕೋವ್ಯಾಕ್ಸಿನ್ ಲಸಿಕೆಗೆ ಡಬ್ಲ್ಯೂಎಚ್ಒ ಅನುಮೋದನೆ ನೀಡುವುದು ಸಾಕಷ್ಟು ವಿಳಂಬಮಾಡಿತು ಎಂಬ ಪ್ರಶ್ನೆಗೆ “ಸ್ವತಂತ್ರವಾದ ವೈಜ್ಞಾನಿಕ ಮತ್ತು ತಾಂತ್ರಿಕ ಪ್ರಕ್ರಿಯೆಗಳನ್ನು ಗೌರವಿಸಬೇಕು. ತುರ್ತು ಬಳಕೆ ಪಟ್ಟಿಗೆ ಸೇರಿಸುವ ಪ್ರಕ್ರಿಯೆಗೆ 45ರಿಂದ 165 ದಿನಗಳು ಬೇಕಾಗುತ್ತದೆ. ಕೋವ್ಯಾಕ್ಸಿನ್ ಲಸಿಕೆಗೆ 90 ದಿನ ಹಿಡಿದಿದೆ. ಅದು ತೀರಾ ವಿಳಂಬ ಆಯಿತೆಂದು ಅನಿಸುವುದಿಲ್ಲ” ಎಂದು ತಿಳಿಸಿದ್ದಾರೆ.
