ದೆಹಲಿ ವಿಧಾನಸಭಾ ಚುನಾವಣೆಯಲ್ಲಿ ಬಿಜೆಪಿ ಗೆದ್ದಿದೆ. ಅತ್ತ ಮಣಿಪುರದಲ್ಲಿ ಪ್ರಕ್ಷುಬ್ಧತೆಯ ನಡುವೆ ಅಲ್ಲಿನ ಮುಖ್ಯಮಂತ್ರಿ ಬಿರೇನ್ ಸಿಂಗ್ ರಾಜೀನಾಮೆ ನೀಡಿ ನಿರ್ಗಮಿಸಬೇಕಾಗಿ ಬಂತು. ಇನ್ನೂ ಹೇಳಬೇಕೆಂದರೆ, ಅವರನ್ನು ಅನಿವಾರ್ಯವಾಗಿ ವಜಾ ಗೊಳಿಸಲಾಯಿತು. ಮೇ 2023 ರಲ್ಲಿ, ಮಣಿಪುರದಲ್ಲಿ ಜನಾಂಗೀಯ ಕಲಹ ಪ್ರಾರಂಭವಾಗಿ, ದೇಶಾದ್ಯಂತ ಕೋಲಾಹಲವೆದ್ದರೂ, ಕೇಂದ್ರದ ಮೋದಿ ಸರ್ಕಾರವು ಮಣಿಯಲಿಲ್ಲ ಮತ್ತು ಅಲ್ಲಿ ಹಠಾತ್ ರಾಷ್ಟ್ರಪತಿ ಆಳ್ವಿಕೆಯನ್ನು ಹೇರಿತು. ನಾವು ಏನಾದರೂ ಮಾಡಿದ್ದೇವೆ ಎಂದು ಭಾವಿಸಿದರೂ ಅದು ತಾತ್ಕಾಲಿಕ ಮಾತ್ರ, ಉತ್ತಮ ಪರಿಸ್ಥಿತಿ ನೆಲೆಸಿದಾಗ ಹಿಂಪಡೆಯಲಾಗುವುದು ಎಂದು ಅವರು ಹೇಳುತ್ತಿದ್ದಾರೆ.
-ಸಿಚಿ (ಕೃಪೆ: ಪ್ರಜಾಶಕ್ತಿ)
ಮಣಿಪುರದ ಬೆಂಕಿಯ ತಿರುವುಗಳಲ್ಲಿ ಎರಡು ವಿಷಯಗಳು ಸ್ಪಷ್ಟವಾಗುತ್ತಿವೆ. ಮೊದಲನೆಯದಾಗಿ, ಎಷ್ಟೇ ಚುನಾವಣೆಗಳಲ್ಲಿ ಗೆದ್ದರೂ, ದೇಶದ ಹಲವು ರಾಜ್ಯಗಳಲ್ಲಿ ಬಿಜೆಪಿ ಗಂಭೀರ ಸವಾಲುಗಳನ್ನು ಎದುರಿಸುತ್ತಿದೆ, ದೇಶದಲ್ಲಿ ಅನೇಕ ಬಿಕ್ಕಟ್ಟುಗಳಿಗೆ ಕಾರಣವಾಗುತ್ತಿದೆ. ಎರಡನೆಯದು ತನ್ನ ಅಲ್ಪ ರಾಜಕೀಯ ಉಳಿವಿಗಾಗಿ ದೀರ್ಘಾವಧಿಯ ಹಿತಾಸಕ್ತಿಗಳನ್ನು ಬಲಿಕೊಡಲು, ದ್ವೇಷ ರಾಜಕಾರಣವನ್ನು ಅನುಸರಿಸಲು ಅಂತಿಮವಾಗಿ ಸಾಂವಿಧಾನಿಕ ತತ್ವಗಳನ್ನು ಕೂಡಾ ಬೆಂಕಿಗೆ ಹಾಕಲು ಬಿಜೆಪಿ ಹಿಂಜರಿಯುದಿಲ್ಲ. ತಾಂತ್ರಿಕ ಸಲಹೆಗಳೊಂದಿಗೆ ಸಂವಿಧಾನಕ್ಕೆ ಇಷ್ಟಾನುಸಾರ ವ್ಯಾಖ್ಯಾನಗಳನ್ನು ಹೇಳುತ್ತ ಸ್ವಾರ್ಥದಿಂದ ತುಂಬಿದ ಪ್ರವೃತ್ತಿಗಳಿಗೆ ಇಳಿಯುತ್ತದೆ ಎಂಬುದಕ್ಕೆ ಮಣಿಪುರಕ್ಕಿಂತ ಬೇರೆ ಉದಾಹರಣೆ ಬೇಕಾಗಿಲ್ಲ. ಹಿಂದೆಂದೂ ಕಾಣದ ರೀತಿಯಲ್ಲಿ ಈಶಾನ್ಯ ಭಾರತವನ್ನು ತನ್ನ ಹಿಡಿತಕ್ಕೆ ತೆಗೆದುಕೊಂಡಿದ್ದೇನೆ ಎಂದು ಹೆಮ್ಮೆಪಡುವ ಬಿಜೆಪಿ ನಾಯಕತ್ವ, ಮಣಿಪುರ ಬಿಕ್ಕಟ್ಟು ಆ ಪ್ರದೇಶದ ಮೇಲೆ ಬೀರುವ ವಿನಾಶಕಾರಿ ಪರಿಣಾಮವನ್ನು ನಿರ್ಲಕ್ಷಿಸಿ ಅವಕಾಶವಾದಿ ರಾಜಕೀಯವನ್ನು ಅನುಸರಿಸಿದೆ. ಒಂದೆಡೆ ಬುಡಕಟ್ಟು ಜನಾಂಗದವರ ವಿರುದ್ಧ, ಮತ್ತೊಂದೆಡೆ, ಧರ್ಮದ ಆಧಾರದ ಮೇಲೆ ತನ್ನ ರಾಜಕೀಯ ಅಜೆಂಡಾಕ್ಕಾಗಿ ಅದನ್ನು ಬಲಿಪೀಠವಾಗಿ ಪರಿವರ್ತಿಸಿದೆ.
ಉದ್ದೇಶಿತ ಮೀಸಲಾತಿ ವಿಷಯದಲ್ಲಿ
ಹೈಕೋರ್ಟ್ ಮಾಡಿದ ನಿಷ್ಪ್ರಯೋಜಕ ವ್ಯಾಖ್ಯಾನಗಳ ಆಧಾರದ ಮೇಲೆ ಬಿರೇನ್ ಸಿಂಗ್ ಅವರ ಸರ್ಕಾರವು ದುರುದ್ದೇಶಪೂರ್ವಕವಾಗಿ ಆಂತರಿಕ ಕಲಹದ ಜ್ವಾಲೆಗೆ ಉತ್ತೇಜನ ನೀಡಿತು. ಬುಡಕಟ್ಟು ಜನಾಂಗದವರಿಗೆ ಉದ್ದೇಶಿತ ಮೀಸಲಾತಿಯು ಮುಖ್ಯವಾಗಿ ಬಯಲು ಪ್ರದೇಶಗಳಲ್ಲಿ ನೆಲೆಸಿದ ಮೈತೇಯಿ ಜನರಿಗೆ ಅದನ್ನು ಏಕೆ ನೀಡಬಾರದು ಎಂಬುದರ ಕುರಿತು ಹೈಕೋರ್ಟ್ ನೀಡಿದ ಅಪ್ರಸ್ತುತ ಹೇಳಿಕೆ ಒಂದು ವಿಷಯವಾದರೆ, ಅವರ ಸರ್ಕಾರವು ಅದಕ್ಕೆ ಯಾವುದೇ ಆಕ್ಷೇಪಣೆ ಇಲ್ಲ ಎಂದು ಹೇಳಿದ್ದರಲ್ಲಿಯೂ ಅದೇ ದುರುದ್ದೇಶ ಇದೆ. ಕುಕಿ, ಜೋ ಮತ್ತು ಮೈತೇಯಿ ಬುಡಕಟ್ಟು ಜನಾಂಗಗಳ ನಡುವೆ ಪ್ರಾರಂಭವಾದ ಈ ಸಂಘರ್ಷದಲ್ಲಿ, ಅವರು ಬಹಿರಂಗವಾಗಿ ಎರಡನೇ ಪಕ್ಷ ವಹಿಸಿದರು. ಕುಕೀಗಳಲ್ಲಿ ಕ್ರಿಶ್ಚಿಯನ್ ಧರ್ಮದ ಬಲವಾದ ಪ್ರಭಾವ ಹೆಚ್ಚಿರುವುದು, ಈ ಬುಡಕಟ್ಟು ಸಂಘರ್ಷಗಳ ಹಿಂದೆ ಧಾರ್ಮಿಕ ರಾಜಕೀಯವೂ ಅಡಗಿರುವುದರಿಂದ ಪರಿಸ್ಥಿತಿಯನ್ನು ಮತ್ತಷ್ಟು ಜಟಿಲವಾಗಿಸಿತು. ಇದರಲ್ಲಿ ಕೆಲವು ತೀವ್ರವಾದಿ ಶಕ್ತಿಗಳ ಪ್ರಭಾವದ ನೆಪದಲ್ಲಿ ಈ ಸಮಸ್ಯೆಗೆ ಸಶಸ್ತ್ರ ಪಡೆಗಳಿಂದ ಮಾತ್ರ ಪರಿಹಾರ ಸಿಗುತ್ತದೆ ಎಂದು ಹೇಳಿ ಕೇಂದ್ರ ಗೃಹ ಸಚಿವಾಲಯ ಕ್ರಮ ಕೈಗೊಂಡಿತು.
ಇದನ್ನೂ ಓದಿ: ಕೊಪ್ಪಳ| ಉಕ್ಕಿನ ಕಾರ್ಖಾನೆ ಸ್ಥಾಪನೆ ವಿರೋಧಿಸಿ ಕೊಪ್ಪಳ ಬಂದ್‌ ಆರಂಭ
ಅವ್ಯವಸ್ಥೆ…
ಮೇ 2023 ರಿಂದ ತೀವ್ರಗೊಂಡಿರುವ ಮಣಿಪುರದಲ್ಲಿನ ಜನಾಂಗೀಯ ಘರ್ಷಣೆಯಲ್ಲಿ 250 ಕ್ಕೂ ಹೆಚ್ಚು ಜನರು ಸಾವನ್ನಪ್ಪಿದ್ದಾರೆ ಮತ್ತು ನೂರಾರು ಜನರು ಗಾಯಗೊಂಡಿದ್ದಾರೆ. 60,000 ಜನರು ಮನೆ ಕಳೆದುಕೊಂಡು ನಿರಾಶ್ರಿತರಾದರು. ಕುಕಿಗಳ ಪ್ರಾಬಲ್ಯವಿರುವ ಗುಡ್ಡಗಾಡು ಪ್ರದೇಶಗಳಿಗೆ ಮತ್ತು ಮೈತೇಯಿಗಳ ಪ್ರಾಬಲ್ಯವಿರುವ ಕಣಿವೆ ಪ್ರದೇಶಗಳ ನಡುವೆ ಒಂದು ಬಫರ್ ವಲಯವನ್ನು ಸ್ಥಾಪಿಸಲು 60,000 ಮಂದಿ ಕೇಂದ್ರ ಪೊಲೀಸ್ ಪಡೆಗಳನ್ನು ನಿಯೋಜಿಸಬೇಕಾದ ಪರಿಸ್ಥಿತಿ ಉದ್ಭವಿಸಿತು. ವಾಸ್ತವವೆಂದರೆ ಒಬ್ಬರಿಗೆ ಸಂಬಂಧಿಸಿದ ಪ್ರದೇಶಕ್ಕೆ ಮತ್ತೊಬ್ಬರು ಕಾಲಿಡುವ ಪರಿಸ್ಥಿತಿ ಇಲ್ಲದಂತಾಗಿದೆ. ಹಿಂಸಾಚಾರದ ಉಲ್ಬಣವು ಇಂಫಾಲ್ ಮತ್ತು ಇತರ ಜಿಲ್ಲೆಗಳಲ್ಲಿ ವಿದ್ಯಾರ್ಥಿಗಳ ತೀವ್ರವಾದ ಪ್ರತಿಭಟನೆಗೆ ಕಾರಣವಾಯಿತು. ಪೊಲೀಸರೊಂದಿಗಿನ ಘರ್ಷಣೆಗಳು ಇಂಫಾಲದ ಪೂರ್ವ-ಪಶ್ಚಿಮ ಜಿಲ್ಲೆಗಳಲ್ಲಿ ಕರ್ಫ್ಯೂ ಹೇರಲು ಕಾರಣವಾಯಿತು. ಇಂಟರ್ನೆಟ್ ಮತ್ತು ಮೊಬೈಲ್ ಡೇಟಾವನ್ನು ಸಹ ಸ್ಥಗಿತಗೊಳಿಸಲಾಗಿದೆ. ಎರಡೂ ಪಕ್ಷಗಳೊಂದಿಗೆ ಸಮಾಲೋಚನೆಗಳು, ಮಾತುಕತೆಗಳ ಮೂಲಕ ರಾಜಕೀಯ ಸಮಸ್ಯೆಯನ್ನು ಪರಿಹರಿಸುವಲ್ಲಿ ವಿಫಲತೆ ಒಂದೆಡೆಯಾದರೆ, ಸ್ವಾರ್ಥಕ್ಕಾಗಿ ಬಳಸುವ ಪಿತೂರಿಗಳು ಮತ್ತಷ್ಟು ಜ್ವಾಲೆಗಳು ಹರಡಲು ಕಾರಣವಾದವು.
ಕೇಂದ್ರ ಪೊಲೀಸ್ ಪಡೆಗಳು, ವಿಶೇಷವಾಗಿ ಅಸ್ಸಾಂ ರೈಫಲ್ಸ್ ಪ್ರಮುಖ ಸ್ಥಾನಕ್ಕೆ ಬಂದಿವೆ. ಮೈತೇಯಿ ರಾಜಕೀಯ ಪಕ್ಷಗಳು ಅಸ್ಸಾಂ ರೈಫಲ್ಸ್ ಅನ್ನು, ಇತರ ಕೇಂದ್ರ ಪಡೆಗಳನ್ನು ಹಿಂತೆಗೆದುಕೊಳ್ಳಬೇಕೆಂದು ಒತ್ತಾಯಿಸುತ್ತಿದ್ದರೆ, ಕುಕಿಗಳೊಂದಿಗಿನ ಒಪ್ಪಂದಗಳನ್ನು ರದ್ದುಗೊಳಿಸಬೇಕು ಎಂಬ ವಾದವು ಇನ್ನೊಂದು ಕಡೆಯಿಂದ ಬಂದಿದೆ. ಕುಕಿ ತೀವ್ರವಾಧಿಗಳು ಡ್ರೋನ್‌ ಗಳು, ರಾಕೆಟ್‌ಗಳ ಪ್ರಯೋಗ ಸೇರಿದಂತೆ ಹೊರಗಿನ ಶಕ್ತಿಗಳ ಒಳನುಗ್ಗುವಿಕೆಯ ಕುರಿತಾದ ಕಳವಳಗಳು ರಾಷ್ಟ್ರೀಯ ಭದ್ರತೆಯ ಬಗ್ಗೆ ಅನುಮಾನಗಳಿಗೆ ಕಾರಣವಾಗಿವೆ. ಮುಖ್ಯಮಂತ್ರಿಯವರ ನಿವಾಸದ ಮೇಲೂ ದಾಳಿಗಳು ಮತ್ತು ಪ್ರತಿಭಟನೆಗಳು ನಡೆದವು.
ಬಿರೇನ್ ಸಿಂಗ್ ಅವರ ಪಕ್ಷಪಾತದ ವರ್ತನೆ
ಕುಕಿ ಉಗ್ರಗಾಮಿ ಗುಂಪುಗಳೊಂದಿಗಿನ ಕಾರ್ಯಾಚರಣೆ ನಿಲುಗಡೆ ಒಪ್ಪಂದವನ್ನು ರದ್ದುಗೊಳಿಸುವ ಆಗ್ರಹವು ಮಾಜಿ ಮುಖ್ಯಮಂತ್ರಿ ಬಿರೇನ್ ಸಿಂಗ್ ಅವರಿಂದಲೂ ಬಂದ ನಂತರ ಗುಡ್ಡಗಾಡು ಪ್ರದೇಶಗಳಲ್ಲಿ ಮತ್ತೊಮ್ಮೆ ದಂಗೆಗಳು ಹೆಚ್ಚಿವೆ. ಕೆಲವು ಮೈತೇಯಿಗಳು ಭಯೋತ್ಪಾದಕ ಸಂಘಟನೆಗಳ ಕಡೆಗೆ ಸಕಾರಾತ್ಮಕ ಬೆಂಬಲ ನೀಡುವ ಪಾತ್ರವನ್ನು ವಹಿಸಿದ್ದಾರೆ. ಇತ್ತೀಚೆಗೆ ಸೋರಿಕೆಯಾದ ಆಡಿಯೋ ಫೈಲ್ ಅನ್ನು ಗಲಭೆಯ ತನಿಖೆ ನಡೆಸುವ ತನಿಖಾ ಆಯೋಗಕ್ಕೆ ಸಲ್ಲಿಸಲಾಯಿತು. ಮುಖ್ಯಮಂತ್ರಿ ತಮ್ಮ ಅಧಿಕೃತ ನಿವಾಸದಿಂದಲೇ ಭಯೋತ್ಪಾದಕ ಸಂಘಟನೆಗಳೊಂದಿಗೆ ಮಾತನಾಡುತ್ತಿರುವ ಮತ್ತು ಪೊಲೀಸ್ ಶಸ್ತ್ರಾಗಾರದಿಂದ ಸಾವಿರಾರು ಶಸ್ತ್ರಾಸ್ತ್ರಗಳನ್ನು ಲೂಟಿ ಮಾಡಿದವರ ಬಗ್ಗೆ ತಮ್ಮ ಒಲವು ತೋರಿಸುತ್ತಿರುವುದನ್ನು ತೋರಿಸುವ ಆಡಿಯೋ ಟೇಪ್‌ ಗಳು ನ್ಯಾಯಾಂಗ ತನಿಖೆಗೆ ಸಿಕ್ಕಿವೆ.
ಮುಖ್ಯಮಂತ್ರಿಯವರ ಭಾಗಶಃ ಪಾತ್ರದ ಬಗ್ಗೆ ಸಂಪೂರ್ಣವಾಗಿ ತಿಳಿದಿದ್ದರೂ ಸಹ ಮೋದಿ ಸರ್ಕಾರ ಮತ್ತು ಬಿಜೆಪಿ ಕೇಂದ್ರ ನಾಯಕತ್ವವು ಅವರನ್ನು ಅಧಿಕಾರದಲ್ಲಿ ಮುಂದುವರಿಸಲು ರಾಜಕೀಯ ತಂತ್ರಗಳು ಮತ್ತು ಆಂತರಿಕ ಸಂಘರ್ಷಗಳೇ ಕಾರಣವಾಗಿತ್ತು. ಬಿಜೆಪಿ ಮತ್ತು ಆರ್‌ಎಸ್‌ಎಸ್ ಗಳು ಮೈತೇಯಿ ತೀವ್ರವಾದ ಜನಾಂಗೀಯ ದುರಭಿಮಾನವನ್ನು ಮತ್ತಷ್ಟು ಹೆಚ್ಚಿಸಲಿಕ್ಕಾಗಿಯೇ ಈ ತೀವ್ರವಾದಿ ಸಂಘಟನೆಯ ಸ್ಥಾಪಕ ಟೆಂಗೋಲ್ ಎಲ್ ಸನಜೋಬಾ ಅವರನ್ನು ರಾಜ್ಯಸಭಾ ಸದಸ್ಯರನ್ನಾಗಿ ಮಾಡಿದ್ದಾರೆ. ಈ ದೀರ್ಘಕಾಲದ ಬಿಕ್ಕಟ್ಟು ಎಲ್ಲಾ ವರ್ಗಗಳಲ್ಲಿ ತೀವ್ರವಾದಿಗಳನ್ನು ಮತ್ತಷ್ಟು ಬಲಪಡಿಸಿದೆ. ಪ್ರಧಾನಿ ನರೇಂದ್ರ ಮೋದಿ ಮಾತ್ರ ಈ ಇಡೀ ಅವಧಿಯಲ್ಲಿ ಒಮ್ಮೆಯೂ ಮಣಿಪುರಕ್ಕೆ ಭೇಟಿ ನೀಡಲು ನಿರಾಕರಿಸಿರುವುದು ಅವರ ಆಶೀರ್ವಾದಗಳು ಏನಿವೆ ಎಂಬುದನ್ನು ಸ್ಪಷ್ಟಪಡಿಸುತ್ತದೆ.
ಅವಿಶ್ವಾಸದ ಭಯದಿಂದ . . .
ಸಮಾಜದಲ್ಲಿನ ಆಂತರಿಕ ಕಲಹಗಳಿಗೆ ಸ್ಪಂದಿಸದ ಬಿಜೆಪಿ ನಾಯಕತ್ವವು, ತನ್ನದೇ ಪಕ್ಷದೊಳಗೆ ಆಂತರಿಕ ಕಲಹ ಉಂಟಾದಾಗ ಕಣ್ಣು ತೆರೆದಿರುವಂತೆ ನಟಿಸುತ್ತಿದೆ. ಮಾಜಿ ಗೃಹ ಕಾರ್ಯದರ್ಶಿ ಅಜಯ್ ಕುಮಾರ್ ಭಲ್ಲಾ ಅವರನ್ನು ರಾಜ್ಯಪಾಲರನ್ನಾಗಿ ನೇಮಿಸಿದಾಗಲೇ ಅಮಿತ್ ಶಾ ಅವರ ಆಲೋಚನೆ ಏನೆಂಬುದು ತಿಳಿಯಿತು. 60 ಸದಸ್ಯ ಬಲದ ವಿಧಾನಸಭೆಯಲ್ಲಿ ಬಿಜೆಪಿ 32 ಸ್ಥಾನಗಳನ್ನು ಹೊಂದಿದೆ. ಏಳು ಸ್ಥಾನಗಳನ್ನು ಹೊಂದಿರುವ ನಾಗಾ ಪೀಪಲ್ಸ್ ಪಾರ್ಟಿ ಮತ್ತು ಆರು ಸ್ಥಾನಗಳನ್ನು ಹೊಂದಿರುವ ಜೆಡಿಯು ಕೂಡ ಬೆಂಬಲ ವ್ಯಕ್ತಪಡಿಸಿದವು. ಆದರೆ ಈ ಪ್ರಕ್ಷುಬ್ಧತೆಯ ನಂತರ ಎನ್‌.ಪಿ.ಪಿ. ತಾನು ಸರ್ಕಾರಕ್ಕೆ ನೀಡಿದ್ದ ಬೆಂಬಲವನ್ನು ಹಿಂತೆಗೆದುಕೊಳ್ಳುತ್ತಿರುವುದಾಗಿ ಘೋಷಿಸಿತು. ಮತ್ತೊಂದು ಹಂತದಲ್ಲಿ, ಜೆಡಿಯು ರಾಜ್ಯ ನಾಯಕತ್ವ ಕೂಡ ಇದೇ ರೀತಿಯ ಹೇಳಿಕೆ ನೀಡಿತು.
ಆದರೆ, ನಿತೀಶ್ ಕುಮಾರ್ ಮೇಲೆ ಒತ್ತಡ ತಂದು ಆ ಹೇಳಿಕೆಯನ್ನು ಹಿಂತೆಗೆದುಕೊಳ್ಳುವಂತೆ ಮಾಡಿದರು. ಆದರೆ ಅಷ್ಟರಲ್ಲಿ, ಬಿಜೆಪಿಯೊಳಗೇ ಭಿನ್ನಮತ ಹುಟ್ಟಿದ ವರದಿಗಳು ಬಂದವು. ಬಿರೇನ್ ಸಿಂಗ್ ಸರ್ಕಾರದ ವಿರುದ್ಧ ವಿರೋಧ ಪಕ್ಷಗಳು ಅವಿಶ್ವಾಸ ಗೊತ್ತುವಳಿ ಮಂಡನೆಗೆ ನೋಟಿಸ್ ನೀಡಿದವು. ಈ ಹಂತದಲ್ಲಿ ಅವರು ಶಾಸಕಾಂಗ ಸಭೆ ಕರೆದರು, ಆದರೆ ಶಾಸಕಾಂಗ ಸಭೆಯ ಅರ್ಧದಷ್ಟು ಸದಸ್ಯರು ಸಭೆಗೆ ಹಾಜರಾಗದೇ ಇರುವುದು ತನಗೆ ಬೆಂಬಲವಿಲ್ಲ ಎಂಬುದು ಬಿರೇನ್ ಸಿಂಗ್ ಅವರಿಗೆ ಸ್ಪಷ್ಟವಾಯಿತು. ರಾಜೀನಾಮೆ ನೀಡಲು ಹೋದಾಗಲೂ, ಅವರ ಜೊತೆ ಕೇವಲ ಹದಿನಾಲ್ಕು ಶಾಸಕರು ಮಾತ್ರ ಇದ್ದರು ಎಂದರೆ ಅದೇ ಸಂಕೇತವಾಗಿದೆ.
ರಾಜೀನಾಮೆ ನೀಡಿದ ನಂತರವೂ ಅವರ ತಂಡವನ್ನು ದೆಹಲಿಗೆ ಕರೆಸಿ ಕೇಂದ್ರ ನಾಯಕರು ಮಾತುಕತೆ ನಡೆಸಿದರೂ, ಮತ್ತೊಬ್ಬ ನಾಯಕನನ್ನು ಆಯ್ಕೆ ಮಾಡಿ ಸರ್ಕಾರವನ್ನು ಮುನ್ನಡೆಸಲು ಅವಕಾಶವಿರಲಿಲ್ಲ. ದೀರ್ಘಕಾಲದ ತೊಂದರೆಗೆ ಒಳಗಾಗಿರುವ ರಾಜ್ಯದ ಪರಿಸ್ಥಿತಿಯನ್ನು ಅವಲಂಬಿಸಿ ಶಾಸಕಾಂಗವನ್ನು ವಿಸರ್ಜಿಸಬಹುದು ಎಂದು ಹಲವರು ತಪ್ಪಾಗಿ ನಂಬುತ್ತಾರೆ. ಯಾವುದೇ ರೀತಿಯಲ್ಲಾದರೂ ಎಷ್ಟೇ ಚಿಕ್ಕ ರಾಜ್ಯವಾಗಿದ್ದರೂ ಅದನ್ನು ತಮ್ಮ ಹಿಡಿತದಲ್ಲಿ ಇಟ್ಟುಕೊಳ್ಳುವುದು ಬಿಜೆಪಿಯ ಸ್ವಭಾವಕ್ಕೆ ಇಂತಹ ನಂಬಿಕೆಯು ವಿರುದ್ಧವಾಗಿದೆ.
ವಿಧಾನಸಭೆ ಕಲಾಪ ನಡೆದರೆ, ಅವಿಶ್ವಾಸ ನಿರ್ಣಯದಲ್ಲಿ ಸೋಲು ಖಚಿತ. ಅದರೊಂದಿಗೆ, ರಾಜೀನಾಮೆಯನ್ನು ನೆಪವಾಗಿಟ್ಟುಕೊಂಡು ರಾಜ್ಯಪಾಲರು ಅಧಿವೇಶನವನ್ನು ರದ್ದುಗೊಳಿಸುತ್ತಿರುವುದಾಗಿ ಘೋಷಿಸಿದರು. ಒಂದೊಮ್ಮೆ ಅಧಿವೇಶನ ನಡೆದರೆ ರಾಜ್ಯಪಾಲರ ಪಾತ್ರವೇನೂ ಇರುವುದಿಲ್ಲ. ಅವರು ಮತ್ತೊಂದು ಪರ್ಯಾಯ ಸರ್ಕಾರ ರಚಿಸಲು ಪ್ರಯತ್ನಿಸಬೇಕು. ಅಥವಾ ಅವಿಶ್ವಾಸ ಗೊತ್ತುವಳಿಯ ನಂತರ ಅವರು ಮಧ್ಯಪ್ರವೇಶಿಸಬೇಕು. ಸರ್ಕಾರವಿಲ್ಲದೆ ವಿಧಾನಸಭೆಯ ಅಧಿವೇಶನ ಬೇಡವೆಂದಾದರೆ, ಪರ್ಯಾಯ ವ್ಯವಸ್ಥೆ ಮಾಡುವವರೆಗೆ ಮುಂದುವರಿಸುವಂತೆ ಮನವಿ ಮಾಡಬೇಕು. ಅಂತಹ ಯಾವುದೇ ಕ್ರಮ ಕೈಗೊಳ್ಳದೆ ಕರೆಯಲಾಗಿದ್ದ ವಿಧಾನಸಭಾ ಅಧಿವೇಶನಗಳನ್ನು ರದ್ದುಗೊಳಿಸಿದ್ದು ರಾಜಕೀಯ ಮುಜುಗರವನ್ನು ತಪ್ಪಿಸುವ ಸಲುವಾಗಿ ಮಾತ್ರ.
ಎರಡು ಅಧಿವೇಶನಗಳ ನಡುವೆ ಆರು ತಿಂಗಳಿಗಿಂತ ಹೆಚ್ಚಿನ ಅವಧಿ ಇರಬಾರದು ಎಂಬ ಸಾಂವಿಧಾನಿಕ ನಿಬಂಧನೆಯ ಪ್ರಕಾರ ಅಧಿವೇಶನಗಳನ್ನು ಮುಂದೂಡುವುದು ಸಾಧ್ಯವಿಲ್ಲ. ಆದ್ದರಿಂದಲೇ ರಾಜ್ಯಪಾಲರು ರಾಷ್ಟ್ರಪತಿ ಆಳ್ವಿಕೆಗೆ ತಡೆ ಒಡ್ಡಿದ್ದರು. ಅಷ್ಟರಲ್ಲಿ ಹೇಗಾದರೂ ರಾಜಕೀಯ ಎಳೆಗಳೊಂದಿಗೆ ಕಥೆಯನ್ನು ನಡೆಸಬೇಕೆಂದು ಬಯಸಿದರೆ, ಸದಸ್ಯರ ಮೇಲೆ ಒತ್ತಡ ಹೇರಬೇಕು. ಅದಕ್ಕಾಗಿ ಬಲೆಗಳನ್ನು ಹೊಂದಿಸಬೇಕು. ರಾಜ್ಯದಲ್ಲಿ ಪರಿಸ್ಥಿತಿಯನ್ನು ನಿಯಂತ್ರಣಕ್ಕೆ ತರಲು ಹೆಣಗಾಡುತ್ತಿದ್ದೇನೆ ಎಂದು ಕೇಂದ್ರ ಸರ್ಕಾರ ಹೇಳಿಕೊಂಡಿದ್ದರೂ, ಇದೇ ನಿಜವಾದ ತಂತ್ರ. ಯಾರನ್ನೇ ನಾಯಕರನ್ನಾಗಿ ಮಾಡಿದರೂ, ವಿಧಾನಸಭೆಯಲ್ಲಾಗಲಿ ಅಥವಾ ಆಡಳಿತದಲ್ಲಾಗಲಿ ಗೆಲ್ಲಲು ಸಾಧ್ಯವಿಲ್ಲ.
ಈಗ ಮಣಿಪುರದಲ್ಲಿ ಏನಾಗಬೇಕಿದೆ?
ಬಿಜೆಪಿಯ ನಡೆ ಏನಿದ್ದರೂ ಮಣಿಪುರಕ್ಕೆ ಬೇಕಾಗಿರುವುದು ಶಾಂತಿ ಮತ್ತು ಸೌಹಾರ್ದತೆ. ದೇಶವು ಜನಾಂಗೀಯ ಕಲಹವನ್ನು ಹತ್ತಿಕ್ಕಿ ಪ್ರಜಾಪ್ರಭುತ್ವ ಮೌಲ್ಯಗಳನ್ನು ಪುನರುಜ್ಜೀವನಗೊಳಿಸಬೇಕಾಗಿದೆ. ಸಶಸ್ತ್ರ ಪಡೆಗಳ ನೆರಳಿನಲ್ಲಿ ಕೇಂದ್ರವು ತನ್ನ ಪರೋಕ್ಷ ಆಡಳಿತವನ್ನು ದೀರ್ಘಕಾಲ ಮುಂದುವರಿಸುವುದು ಆರೋಗ್ಯಕರವಲ್ಲ. ಏಕೆಂದರೆ ಇಂದಿಗೂ ಅಲ್ಲಿನ ಪರಿಸ್ಥಿತಿ ಅಸ್ತವ್ಯಸ್ತವಾಗಿಯೇ ಇದೆ. ಅನೇಕ ಜನರು ಭಯದಲ್ಲಿ ಬದುಕುತ್ತಿದ್ದಾರೆ. ಸಮಾಜದ ವಿವಿಧ ವರ್ಗಗಳಲ್ಲಿ ಸಶಸ್ತ್ರ ಗುಂಪುಗಳ ಪ್ರಾಬಲ್ಯ ಹೆಚ್ಚಾಗಿದೆ. ಕೇಂದ್ರದ ಬೆಂಬಲದೊಂದಿಗೆ ಮಾಜಿ ಮುಖ್ಯಮಂತ್ರಿ ಅನುಸರಿಸಿದ ಪಕ್ಷಪಾತದ ನಿಲುವಿನ ಭಾಗವಾಗಿ, ಎರಡೂ ಕಡೆಯವರ ನಡುವೆ ಸಮನ್ವಯಕ್ಕಾಗಿ ಸ್ವಯಂಸೇವಕರು ಎನ್ನುವವರು ಹುಟ್ಟಿಕೊಂಡು, ಆಯುಧಗಳೊಂದಿಗೆ ಸುತ್ತಾಡುತ್ತಾ ಹೊಸ ಬೆದರಿಕೆಯಾಗಿ ಪರಿಣಮಿಸಿದ್ದಾರೆ.
ಈ ದೇಶದಲ್ಲಿ ಸಶಸ್ತ್ರ ಕೃತ್ಯಗಳನ್ನು ಮಾಡುವವರೇ ಅಲ್ಲದೆ, ಮ್ಯಾನ್ಮಾರ್‌ ನಲ್ಲಿ ಸಶಸ್ತ್ರ ಹೋರಾಟದಲ್ಲಿ ತೊಡಗಿರುವವರು ಸಹ ಈ ಪಡೆಗಳನ್ನು ಸೇರಿಕೊಂಡಿದ್ದಾರೆ ಎಂದು ಗುಪ್ತಚರ ಮೂಲಗಳು ತಿಳಿಸಿವೆ. ಕುಕೀಗಳನ್ನು ಮಾತ್ರ ನಿಶ್ಯಸ್ತ್ರಗೊಳಿಸಲು ಮಾಡಿದ ಬಿರೆನ್ ಅವರ ಹಿಂದಿನ ಪ್ರಯತ್ನಗಳು ವಿಫಲವಾಗಿವೆ. ಈಗ ನೇರವಾಗಿ ಕೇಂದ್ರವೇ ವ್ಯವಹಾರಗಳನ್ನು ಕೈಗೆ ತೆಗೆದುಕೊಂಡಿರುವುದರಿಂದ ಶಾಂತಿ ಸ್ಥಾಪಿಸುವ ಪ್ರಕ್ರಿಯೆಯು ವೇಗಗೊಳ್ಳಬೇಕಿದೆ. ಮೈತೇಯಿ, ಕುಕೀ ಮತ್ತು ಜೋ ಸಮುದಾಯಗಳು ಸೇರಿದಂತೆ ಎಲ್ಲರೂ ಇದರಲ್ಲಿ ಭಾಗಿಯಾಗುವಂತೆ ಮಾಡಬೇಕು.
ಅದೇ ರೀತಿ, ರಾಜಕೀಯ ಪಕ್ಷಗಳನ್ನು ವಿಶ್ವಾಸಕ್ಕೆ ತೆಗೆದುಕೊಳ್ಳಬೇಕು. ಶಾಂತಿ ಮತ್ತು ಸೌಹಾರ್ದತೆಯನ್ನು ಪುನಃಸ್ಥಾಪಿಸಲು ಅಗತ್ಯವಿರುವ ಎಲ್ಲಾ ಕ್ರಮಗಳನ್ನು ತೆಗೆದುಕೊಳ್ಳಬೇಕು ಮತ್ತು ನಾಗರಿಕರ ಹಕ್ಕುಗಳನ್ನು ಕಸಿದುಕೊಳ್ಳುವ ನಿರ್ಧಾರಗಳು ಮತ್ತು ನಿರ್ದೇಶನಗಳನ್ನು ಹಿಂಪಡೆಯಬೇಕು. ಸಾಮಾನ್ಯವಾಗಿ ಇಂತಹ ಸಮಯದಲ್ಲಿ, ನೇರವಾಗಿ ಚುನಾವಣೆಗೆ ಹೋಗಿ ಜನರ ತೀರ್ಪು ಕೇಳುವುದು ಸರಿಯಾದ ಪರಿಹಾರವಾಗಿರುತ್ತಿತ್ತು. ಆ ವಾತಾವರಣ ಇಲ್ಲದಿರುವುದರಿಂದ ರಾಷ್ಟ್ರಪತಿ ಆಳ್ವಿಕೆ ಹೇರಲಾಗಿದ್ದು, ನಿರ್ದಿಷ್ಟ ಅವಧಿಯೊಳಗೆ ಚುನಾವಣೆ ನಡೆಸಲು ಕ್ರಮ ಕೈಗೊಳ್ಳಬೇಕು.
ಇದನ್ನೂ ನೋಡಿ: ನಶಿಸಿಹೋಗುತ್ತಿರುವ ಕನ್ನಡ ಶಾಲೆಗಳು – ಪುರುಷೋತ್ತಮ ಬಿಳಿಮಲೆ ಕಳವಳJanashakthi Media
