ನವದೆಹಲಿ: ಕೇರಳದ ಎರಡು ಪ್ರಮುಖ ನಗರಗಳಾದ ಕೊಚ್ಚಿ ಮತ್ತು ತಿರುವನಂತಪುರಂ ಭಾರತದ ಯುವಜನರು ಕೆಲಸ ಮಾಡಲು ಹೆಚ್ಚು ಇಷ್ಟ ಪಡುವ ಸ್ಥಳಗಳಾಗಿ ಹೊರಹೊಮ್ಮಿವೆ ಎಂದು ಇತ್ತೀಚೆಗೆ ಪ್ರಕಟವಾದ ‘ಇಂಡಿಯಾ ಸ್ಕಿಲ್ಸ್ ರಿಪೋರ್ಟ್ – 2024’ ವರದಿ ಹೇಳಿದೆ. ಆಲ್ ಇಂಡಿಯಾ ಕೌನ್ಸಿಲ್ ಫಾರ್ ಟೆಕ್ನಿಕಲ್ ಎಜುಕೇಶನ್ (ಎಐಸಿಟಿಇ), ಕಾನ್ಫೆಡರೇಶನ್ ಆಫ್ ಇಂಡಿಯನ್ ಇಂಡಸ್ಟ್ರಿ (ಸಿಐಐ), ಭಾರತೀಯ ವಿಶ್ವವಿದ್ಯಾಲಯಗಳ ಅಸೋಸಿಯೇಷನ್‌(AIU), ಗೂಗಲ್ ಮತ್ತು Taggd ಸಹಯೋಗದೊಂದಿಗೆ ಪ್ರತಿಭಾ ಮೌಲ್ಯಮಾಪನ ಸಂಸ್ಥೆಯಾದ ವೀಬಾಕ್ಸ್ ಈ ವರದಿಯನ್ನು ಪ್ರಕಟಿಸಿದೆ.
ವರದಿಯ ಪ್ರಕಾರ, 18-21 ವಯೋಮಾನದವರಲ್ಲಿ ಹೆಚ್ಚು ಉದ್ಯೋಗಾವಕಾಶಗಳನ್ನು ಹೊಂದಿರುವ ಎರಡನೇ ರಾಜ್ಯವಾಗಿ ಕೇರಳ ಹೊರಹೊಮ್ಮಿದೆ. ಭಾರತದಾದ್ಯಂತ ನಡೆಸಿದ ರಾಷ್ಟ್ರೀಯ ಉದ್ಯೋಗ ಪರೀಕ್ಷೆಯ ಮೂಲಕ 3.88 ಲಕ್ಷ ಯುವಕರನ್ನು ಸಮೀಕ್ಷೆ ನಡೆಸಲಾಗಿದೆ.
ಇದನ್ನೂ ಓದಿ: ಮಾಜಿ ಶಾಸಕ ಮಾಡಾಳ್ ವಿರುಪಾಕ್ಷಪ್ಪ ವಿರುದ್ಧದ ಲಂಚ ಪ್ರಕರಣ ರದ್ದುಗೊಳಿಸಿದ ಹೈಕೋರ್ಟ್!
ಪುರುಷರು ಮತ್ತು ಮಹಿಳೆಯರು ವಯಸ್ಸಿನ ಹೊರತಾಗಿಯೂ ಸಮಾನವಾಗಿ ಕೆಲಸ ಮಾಡಲು ಆದ್ಯತೆ ನೀಡುವ ನಗರಗಳಲ್ಲಿ, ಕೊಚ್ಚಿ ಎರಡನೇ ಸ್ಥಾನದಲ್ಲಿದ್ದು, ತಿರುವನಂತಪುರಂ ದೇಶದಲ್ಲಿ ನಾಲ್ಕನೇ ಸ್ಥಾನದಲ್ಲಿದೆ. ಹೆಚ್ಚಿನ ಮಹಿಳೆಯರು ಕೆಲಸ ಮಾಡಲು ಇಷ್ಟಪಡುವ ಭಾರತದ ಟಾಪ್ 10 ನಗರಗಳಲ್ಲಿ ಕೊಚ್ಚಿ ಮೊದಲನೆಯ ಸ್ಥಾನದಲ್ಲಿದ್ದು, ತಿರುವನಂತಪುರಂ 18-21 ವಯೋಮಾನದವರ ಉದ್ಯೋಗಾವಕಾಶದಲ್ಲಿ ಮೂರನೇ ಶ್ರೇಯಾಂಕವನ್ನು ಕಾಯ್ದುಕೊಂಡಿದೆ.
ಶಿಕ್ಷಣ ಮತ್ತು ಕೌಶಲಾಭಿವೃದ್ಧಿಗೆ ಒತ್ತು ನೀಡುವಲ್ಲಿ ಹೆಸರುವಾಸಿಯಾಗಿರುವ ಕೇರಳ, 18-21 ವಯೋಮಾನದವರಲ್ಲಿ ಒಟ್ಟಾರೆ ಉದ್ಯೋಗಾವಕಾಶದಲ್ಲಿ ಎರಡನೇ ಸ್ಥಾನವನ್ನು ಪಡೆದುಕೊಂಡಿದ್ದು, ದೇಶದಲ್ಲಿ ದೃಢವಾದ ಪ್ರತಿಭಾ ಪೂಲ್ ಎಂಬ ಸ್ಥಾನಮಾನವನ್ನು ಮತ್ತೆ ಪಡೆದುಕೊಂಡಿದೆ. ಕಂಪ್ಯೂಟರ್ ಕೌಶಲ್ಯಗಳನ್ನು ಪೋಷಿಸುವಲ್ಲಿ ಕೇರಳದ ತನ್ನ ಸ್ಥಾನವನ್ನು ಉಳಿಸಿಕೊಂಡಿದೆ ಎಂದು ವರದಿಯು ಒತ್ತಿಹೇಳಿದೆ.
ಇದನ್ನೂ ಓದಿ: ಅಮಾನತಾದ 97 ಸಂಸದರ ಅನುಪಸ್ಥಿತಿಯಲ್ಲಿ 3 ಕ್ರಿಮಿನಲ್ ಕಾನೂನು ಮಸೂದೆ ಲೋಕಸಭೆಯಲ್ಲಿ ಅಂಗೀಕಾರ!
“ಕೇರಳವು ಶಿಕ್ಷಣಕ್ಕೆ ಸಮತೋಲಿತ ವಿಧಾನಕ್ಕಾಗಿ ಎದ್ದು ಕಾಣುತ್ತದೆ. ಭವಿಷ್ಯದ ಕೌಶಲ್ಯಗಳು, ಸಾಮಾನ್ಯ ಜ್ಞಾನ ಮತ್ತು ಪ್ರಾಯೋಗಿಕ ಕಲಿಕೆಯನ್ನು ಕೇರಳ ಒಳಗೊಂಡಿದೆ ಒಳಗೊಂಡಿರುತ್ತದೆ” ಎಂದು ಸಂಶೋಧನೆಯು ಹೇಳಿದೆ. ಉನ್ನತ ಶಿಕ್ಷಣ ಇಲಾಖೆಯ “ಅಡಿಷನಲ್ ಸ್ಕಿಲ್ ಅಕ್ವಿಶಿಷನ್ ಪ್ರೋಗ್ರಾಂ ಆಫ್ ಕೇರಳ” (ಎಎಸ್‌ಎಪಿ ಕೇರಳ) ವಿಶೇಷವಾಗಿ ಅಭಿವೃದ್ಧಿಪಡಿಸಿದ ಸಮಗ್ರ ಪಠ್ಯಕ್ರಮವು ರಾಜ್ಯದ ಯುವಜನರಲ್ಲಿ ಉದ್ಯೋಗ ಮತ್ತು ಕೌಶಲ್ಯ ಅಭಿವೃದ್ಧಿಯನ್ನು ಹೆಚ್ಚಿಸಿದೆ ಎಂದು ವರದಿ ಹೇಳಿದೆ.
ಮಾಹಿತಿ ತಂತ್ರಜ್ಞಾನ, ಕಂಪ್ಯೂಟರ್ ಸೈನ್ಸ್ ಮತ್ತು ಎಂಜಿನಿಯರಿಂಗ್ ಉದ್ಯೋಗ ಕೌಶಲ್ಯಗಳಲ್ಲಿ ಕೇರಳ ಪ್ರಾಬಲ್ಯ ಹೊಂದಿದೆ ಎಂದು ವರದಿ ಎತ್ತಿ ತೋರಿಸಿದೆ. ಇದಲ್ಲದೆ, ರಾಜ್ಯದ 18-29 ವಯೋಮಾನದವರು ಇಂಗ್ಲಿಷ್ ಭಾಷಾ ಪ್ರಾವೀಣ್ಯತೆ, ಕಂಪ್ಯೂಟರ್ ಸಾಕ್ಷರತೆ, ಸಂಖ್ಯಾಶಾಸ್ತ್ರ ಮತ್ತು ವಿಮರ್ಶಾತ್ಮಕ ಚಿಂತನೆಯ ಕೌಶಲ್ಯಗಳಲ್ಲಿ ರಾಷ್ಟ್ರವ್ಯಾಪಿ ಅತ್ಯುನ್ನತ ಶ್ರೇಣಿಯನ್ನು ಹೊಂದಿದ್ದಾರೆ ಎಂದು ವರದಿ ಹೇಳಿದ್ದು, “ಇದು ವಿವಿಧ ಕೈಗಾರಿಕಾ ವಲಯಗಳ ವೈವಿಧ್ಯಮಯ ಅಗತ್ಯಗಳನ್ನು ಪೂರೈಸುವಲ್ಲಿ ನಿಪುಣರಾದ ಕಾರ್ಯಪಡೆಯನ್ನು ಸೂಚಿಸುತ್ತದೆ” ಎಂದು ತಿಳಿಸಿದೆ.
ವಿಡಿಯೊ ನೋಡಿ: ಪೂಜಾ ಸ್ಥಳ ಕಾಯ್ದೆ ಜಾರಿಯಾಗಿದ್ದರೂ ಸಹ ಗ್ಯಾನವಾಪಿ,ಶಾಹಿ ಮಸೀದಿಯ ಸಮೀಕ್ಷೆಗೆ ಅನುಮತಿ ಕೊಟ್ಟಿದ್ದು ನ್ಯಾಯಬದ್ಧವೇ?
