ಸಂಪುಟಲ್ಲಿ ಶೈಲಜಾ ಟೀಚರ್ ಇಲ್ಲದಿರುವುದಕ್ಕೆ ಸಾಮಾಜಿಕ ಜಾಲತಾಣದಲ್ಲಿ ವ್ಯಾಪಕ ಚರ್ಚೆ
ತಿರುವನಂತಪುರಂ: ಸತತ ಎರಡನೇ ಬಾರಿಗೆ ಅಧಿಕಾರಕ್ಕೆ ಬಂದಿರುವ ಎಲ್.ಡಿ.ಎಫ್. ನ ಮಂತ್ರಿಮಂಡಲ ಮೇ 20ರಂದು ಪ್ರಮಾಣ ವಚನ ಸ್ವೀಕರಿಸಲಿದೆ. ಮುಖ್ಯಮಂತ್ರಿ ಪಿಣರಾಯಿ ವಿಜಯನ್ ಸೇರಿದಂತೆ 21 ಸದಸ್ಯರಿರುವ ಈ ಮಂತ್ರಿಮಂಡಲದಲ್ಲಿ 17 ಹೊಸ ಮುಖಗಳಿವೆ ಎಂಬುದು ಈ ಸಂಪುಟದ ವೈಶಿಷ್ಟ್ಯ.
ಮೊತ್ತ ಮೊದಲ ಬಾರಿಗೆ ಮೂರು ಮಹಿಳಾ ಮಂತ್ರಿಗಳನ್ನು ಹೊಂದಿರುವುದು ಈ ಸಂಪುಟದ ಇನ್ನೊಂದು ವೈಶಿಷ್ಟ್ಯ. ಹಿಂದಿನ ಎಲ್‌ಡಿಎಫ್ ಸಂಪುಟದಲ್ಲಿ ಇಬ್ಬರು ಮಹಿಳಾ ಸದಸ್ಯರಿದ್ದರು. ಈ ಬಾರಿ ಇರುವ ಮೂವರು ಮಹಿಳೆಯರಲ್ಲಿ ಇಬ್ಬರು, ಪ್ರೊ..ಆರ್.ಬಿಂದು ಮತ್ತು ವೀಣಾ ಜಾರ್ಜ್ ಸಿಪಿಐ(ಎಂ)ನಿಂದ ಹಾಗೂ ಜೆ. ಚಿಂಚು ರಾಣಿ ಸಿಪಿಐ ನಿಂದ ಆರಿಸಿ ಬಂದವರು.
ಈಗಾಗಲೇ ವರದಿಯಾಗಿರುವಂತೆ ಈ ಸಂಪುಟದ ಸಿಪಿಐ(ಎಂ)ನ 12 ಸದಸ್ಯರಲ್ಲಿ ಮುಖ್ಯಮಂತ್ರಿಗಳನ್ನು ಬಿಟ್ಟು ಉಳಿದವರೆಲ್ಲರೂ ಹೊಸಬರು. ಹೊಸಬರಿಗೆ ಹೊಣೆಗಾರಿಕೆಗಳನ್ನು ಕೊಡಲಿಕ್ಕಾಗಿ ಮುಖ್ಯಮಂತ್ರಿಗಳನ್ನು ಬಿಟ್ಟು ಹಿಂದಿನ ಸಂಪುಟದಲ್ಲಿದ್ದ ಇತರ ಎಲ್ಲ ಸಿಪಿಐ(ಎಂ) ಮಂತ್ರಿಗಳನ್ನು ಈ ಸಂಪುಟದಲ್ಲಿ ಕೈಬಿಡಲು, ಸಿಪಿಐ(ಎಂ) ರಾಜ್ಯ ಸಮಿತಿ ಒಮ್ಮತದಿಂದ ನಿರ್ಧರಿಸಿರುವುದಾಗಿ ವರದಿಯಾಗಿದೆ. ಈ ಮೊದಲು, ಚುನಾವಣೆಗಳಿಗೆ ಅಭ್ಯರ್ಥಿಗಳನ್ನು ಆರಿಸುವಲ್ಲಿಯೂ ರಾಜ್ಯ ಸಮಿತಿ ಹೊಸಬರಿಗೆ ಹೆಚ್ಚಿನ ಅವಕಾಶ ಕೊಡುವ ಸೂತ್ರವನ್ನು ಅವಲಂಬಿಸಿತ್ತು ಎಂಬುದನ್ನು ನೆನಪಿಸಿಕೊಳ್ಳಬಹುದು. ಸಿಪಿಐ(ಎಂ) ಕೈಬಿಡಲು ನಿರ್ಧರಿಸಿದವರಲ್ಲಿ, ಕೊವಿಡ್ ವಿರುದ್ಧ ಸಮರದಲ್ಲಿ ಆರೋಗ್ಯ ಮಂತ್ರಿಯಾಗಿ ಬಹುಮುಖ್ಯ ಪಾತ್ರ ವಹಿಸಿ ದೇಶ-ವಿದೇಶಗಳಲ್ಲೂ ಪ್ರಶಂಸೆ ಗಳಿಸಿರುವ ಕೆ.ಕೆ.ಶೈಲಜಾ ಟೀಚರ್ ಹೆಸರು ಕೂಡ ಸೇರಿರುವುದಕ್ಕೆ ದೇಶಾದ್ಯಂತ ವಿವಿಧ ಪ್ರತಿಕ್ರಿಯೆಗಳು ಬಂದಿವೆ.
ಈ ಬಗ್ಗೆ ಪತ್ರಕರ್ತರ ಪ್ರಶ್ನೆಗಳಿಗೆ ಉತ್ತರಿಸುತ್ತ “ನಾನು ಮಾತ್ರವಲ್ಲ, ಹಿಂದಿನ ಸಂಪುಟದ ಬಹುತೇಕ ಸದಸ್ಯರು ಈಗ ಮಂತ್ರಿಗಳಲ್ಲ. ಇವರೆಲ್ಲರೂ ಉತ್ತಮವಾಗಿ ಕಾರ್ಯ ನಿರ್ವಹಿಸಿದವರೇ” ಎಂದು ಶೈಲಜಾ ಟೀಚರ್ ಹೇಳಿದರು.
ಸಂಪುಟದಲ್ಲಿ ಅವರ ಅನುಪಸ್ಥಿತಿ ರಾಜ್ಯದಲ್ಲಿ ಕೊವಿಡ್ ವಿರುದ್ಧ ಸಮರಕ್ಕೆ ಅಡ್ಡಿಯಾಗಬಹುದು ಎಂಬುದು ಹಲವರ ಆತಂಕ. ಆದರೆ ಹಾಗೇನೂ ಆಗವುದಿಲ್ಲ ಎನ್ನುತ್ತಾರೆ ಶೈಲಜಾ ಟೀಚರ್. “ಈ ಭಯಾನಕ ಸಾಂಕ್ರಾಮಿಕದ ವಿರುದ್ಧ ಹೋರಾಟದ ಮುಂಚೂಣಿಯಲ್ಲಿ ಇರುವವರು ಆರೋಗ್ಯ ಮಂತ್ರಿ ಮಾತ್ರವೇ ಅಲ್ಲ. ಎಲ್ಲ ಇಲಾಖೆಗಳು, ಮುಖ್ಯಮಂತ್ರಿಗಳ ನೇತೃತ್ವದಲ್ಲಿ ಒಟ್ಟಿಗೇ ಪರಿಣಾಮಕಾರಿಯಾಗಿ ಕೆಲಸ ಮಾಡಿದವು. ನಾನು ನನ್ನ ಪಾತ್ರವನ್ನು ವಹಿಸಿದ್ದೇನಷ್ಟೇ. ಇದು ಒಬ್ಬ ವ್ಯಕ್ತಿಯ ಪ್ರಶ್ನೆಯಲ್ಲ. ಒಂದು ಗಹನವಾದ ವ್ಯವಸ್ಥೆ ಕೆಲಸ ಮಾಡಿತು. ಪರದೆಯ ಹಿಂದೆ ಒಂದು ದೊಡ್ಡ ತಂಡವೇ ಕೆಲಸ ಮಾಡಿದೆ. ನಾನು ಆರೋಗ್ಯಮಂತ್ರಿಯಾಗಿ ನನ್ನ ಪಾತ್ರ ವಸಿಸಿದೆ, ಅಷ್ಟೇ” ಎಂದು ಟೀಚರ್ ಹೇಳಿದ್ದಾರೆ.
ಶೈಲಜಾ ಟೀಚರ್ ಕೈ ಬಿಟ್ಟದಕ್ಕೆ ಸಾಮಾಜಿಕ ಜಾಲತಾಣದಲ್ಲಿ ಚರ್ಚೆ : ಶೈಲಜಾ ಟೀಚರ್ ರವರನ್ನು ಹೊ ಸಂಪುಟದಲ್ಲಿ ಸೇರಿಸಿಕೊಳ್ಳದಿರುವುದು ಸರಿಯಾದ ಕ್ರಮವಲ್ಲ ಎಂದು ಕೆಲವರು ಹೇಳಿದರು. ಹೊಸಬರಿಗೆ ಅವಕಾಶ ನೀಡಿದ್ದು ಸರಿಯಾದ ಕ್ರಮ ಎಂಬ ಚರ್ಚೆಗಳು ಎದ್ದಿವೆ.
ಆದರೆ ಎಲ್ಲರಿಗೂ ಅವರ ಈ ಉತ್ತರದಿಂದ ಸಮಾಧಾನವಾದಂತಿಲ್ಲ. ಎಡಪಕ್ಷಗಳ ವಿರೋಧಿಗಳಂತೂ ಟೀಕೆಗಾಗಿಯಷ್ಟೇ ಟೀಕೆ ಮಾಡಿದ್ದಾರೆ. ಅದರೆ ಎಡಪಕ್ಷಗಳ ಮುಖಂಡರಿಗೂ ಕೇರಳ ಸಿಪಿಐ(ಎಂ) ರಾಜ್ಯಸಮಿತಿಯ ಈ ನಿರ್ಧಾರ ಒಪ್ಪತಕ್ಕದ್ದು ಎಂದನಿಸಿದಂತಿಲ್ಲ. ಸಿಪಿಐ(ಎಂಎಲ್) ಪೊಲಿಟ್ ಬ್ಯುರೊ ಸದಸ್ಯರಾದ ಕವಿತಾ ಕೃಷ್ಣನ್ “ಸಾಂಕ್ರಾಮಿಕದ ನಡುವೆಯೇ ಒಬ್ಬ ಸಮರ್ಥ ಆರೋಗ್ಯಮಂತ್ರಿಯನ್ನು ಬದಲಿಸುವುದಾದರೂ ಏಕೆ?” ಎಂದು ಪ್ರಶ್ನಿಸಿದ್ದಾರೆ. ಎನ್.ಎಫ್.ಐ.ಡಬ್ಲ್ಯು ಪ್ರಧಾನ ಕಾರ್ಯದರ್ಶಿ ಆನಿ ರಾಜ ಪ್ರತಿಕ್ರಿಯಿಸುತ್ತ, “ಮೊದಲನೆಯದಾಗಿ, ಎಲ್ಲ ಮಂತ್ರಿಗಳನ್ನೂ ಬದಲಿಸಲಾಗಿದೆ ಎಂಬ ತರ್ಕ ಒಡ್ಡುವುದು ಸರಿಯಲ್ಲ, ಇಲ್ಲಿ ಲಿಂಗ ನ್ಯಾಯದ ಪ್ರಶ್ನೆಯೂ ಇದೆ. ಎರಡನೆಯದಾಗಿ, ಸಿಪಿಐ(ಎಂ) ಸಂಪುಟದಲ್ಲಿ ಮಹಿಳಾ ಸದಸ್ಯರ ಸಂಖ್ಯೆಯನ್ನೇನೂ ಹೆಚ್ಚಿಸಿಲ್ಲ, ಕಳೆದ ಬಾರಿಯಂತೆ ಈಗಲೂ ಇಬ್ಬರೇ ಇದ್ದಾರೆ” ಎಂದು ಹೇಳಿದ್ದಾರೆ.
ಸಿಪಿಐ(ಎಂ) ಪ್ರಧಾನ ಕಾರ್ಯದರ್ಶಿ ಸೀತಾರಾಂ ಯೆಚುರಿ “ ಚುನಾಯಿತ ಸಿಪಿಐ(ಎಂ) ಶಾಸಕರು ಮತ್ತು ಸಂಪುಟ ರಚನೆಯ ವಿಷಯಗಳನ್ನು ಪಕ್ಷದ ರಾಜ್ಯ ಸಮಿತಿ ನಿರ್ಧರಿಸುತ್ತದೆ. ರಾಜ್ಯಸಮಿತಿ ಈ ಬಗ್ಗೆ ಚರ್ಚಿಸಿ ಒಂದು ಒಮ್ಮತದ ನಿರ್ಧಾರಕ್ಕೆ ಬಂದಿದೆ” ಎಂದು ಈ ಬಗ್ಗೆ ಪ್ರತಿಕ್ರಿಯಿಸುತ್ತ ಹೇಳಿದ್ದಾರೆ, ಮತ್ತು ಇನ್ನೊಬ್ಬ ಹಿರಿಯ ಮುಖಂಡರಾಗಿರುವ ಬೃಂದಾ ಕಾರಟ್ ಕೂಡ ಇದೇ ನಿಲುವನ್ನು ವ್ಯಕ್ತಪಡಿಸಿದ್ದಾರೆ, “ನಮ್ಮ ಪಕ್ಷದಲ್ಲಿ ಮಂತ್ರಿಗಳನ್ನು ಆರಿಸುವ ನಿರ್ಧಾರವನ್ನು ಕೈಗೊಳ್ಳುವುದು ರಾಜ್ಯಸಮಿತಿಯ ವ್ಯಾಪ್ತಿಗೆ ಬರುತ್ತದೆ. ಅವರ ನಿರ್ಧಾರದ ಬಗ್ಗೆ ಏಳುವ ಪ್ರಶ್ನೆಗಳಿಗೆ ವಿವರಣೆ ಮತ್ತು ಉತ್ತರವನ್ನು ಅವರೇ ಕೊಡಬೇಕು” ಎಂದು ಅವರು ಹೇಳಿರುವುದಾಗಿ ವರದಿಯಾಗಿದೆ.
