ಬಿಎಂಟಿಸಿ ಚಾಲಕನಿಗೆ ಚಪ್ಪಲಿಯಿಂದ ಹೊಡೆದ ಮಹಿಳಾ ಟೆಕ್ಕಿ ಬಂಧನ

ಬೆಂಗಳೂರು: ಮಹಿಳಾ ಟೆಕ್ಕಿಯೊಬ್ಬರು ಕೇಳಿದ ಸ್ಥಳದಲ್ಲಿ ನಿಲುಗಡೆ ಕೊಡದ್ದಕ್ಕೆ ಬಿಎಂಟಿಸಿ ಚಾಲಕನಿಗೆ ಚಪ್ಪಲಿಯಿಂದ ಹೊಡೆದಿರುವ ಘಟನೆ ಬೆಳಕಿಗೆ ಬಂದಿದೆ. ಬಿಎಂಟಿಸಿ 38ನೇ ಘಟಕದ ಚಾಲಕ ಅಥರ್‌ ಹುಸೇನ್‌ ಹಲ್ಲೆಗೊಳಗಾದವರೆಂದು ಗುರಿತಿಸಲಾಗಿದೆ.

ಈ ಸಂಬಂಧ ಕಾವ್ಯಾ ಎಂಬ ಮಹಿಳಾ ಟೆಕ್ಕಿಯನ್ನು ಬಂಧಿಸಲಾಗಿದ್ದು, ಬಳಿಕ ನ್ಯಾಯಾಲಯ ಜಾಮೀನು ನೀಡಿ ಬಿಡುಗಡೆ ಮಾಡಲಾಗಿದೆ ಎಂದು ಪೊಲೀಸರು ಮಾಹಿತಿ ನೀಡಿದರು. ಜೂನ್‌ 11ರಂದು ಹುಸೇನ್‌ ಕರ್ತವ್ಯಕ್ಕೆ ಹಾಜರಾಗಿದ್ದು ಟಿನ್‌ ಫ್ಯಾಕ್ಟರಿ-ವಿಪ್ರೋಗೇಟ್‌-ಎಲೆಕ್ಟ್ರಾನಿಕ್‌ ಸಿಟಿ ಮಾರ್ಗದಲ್ಲಿ ಕಾರ್ಯಾಚರಣೆ ನಡೆಸಲಾಗಿತ್ತು. ಬೆಳಗ್ಗೆ 8.30ರ ಸುಮಾರಿಗೆ ಕೈಗೊಂಡನಹಳ್ಳಿ ಬಸ್‌ ನಿಲ್ದಾಣದಲ್ಲಿ ಹತ್ತಿದ ಕಾವ್ಯಾ, ಮಾರ್ಗ ಮಧ್ಯೆ ಇರುವ ನಮ್ಮ ಕಚೇರಿ ಮುಂಭಾಗ ಬಸ್‌ ನಿಲುಗಡೆ ಮಾಡುವಂತೆ ಕೇಳಿಕೊಂಡರು.