ಬೆಂಗಳೂರು: ಐಸಿಡಿಎಸ್ ಅನ್ನು ಶಾಶ್ವತವಾಗಿಸುವುದು ಮತ್ತು ಅಂಗನವಾಡಿ ಕಾರ್ಯಕರ್ತೆ ಮತ್ತು ಸಹಾಯಕಿಯರನ್ನು ಖಾಯಂಗೊಳಿಸಬೇಕು. ಇವರನ್ನು ಕಾರ್ಮಿಕರೆಂದು ಪರಿಗಣಿಸಿ ಕನಿಷ್ಟ-ವೇತನ ಮತ್ತು ಸಾಮಾಜಿಕ ಭದ್ರತಾ ಸೌಲಭ್ಯಗಳನ್ನು ನೀಡಬೇಕೆಂಬ ಪ್ರಮುಖ ಬೇಡಿಕೆಗಲನ್ನು ಇಟ್ಟುಕೊಂಡು ಕರ್ನಾಟಕ ರಾಜ್ಯ ಅಂಗನವಾಡಿ ನೌಕರರ ಸಂಘ(ಸಿಐಟಿಯು) ವತಿಯಿಂದ ರಾಜ್ಯದ ವಿವಿಧ ಜಿಲ್ಲೆಗಳಲ್ಲಿ ಪ್ರತಿಭಟನಾ ಧರಣಿ ನಡೆದಿದೆ.
ಅಖಿಲ ಭಾರತ ಅಂಗನವಾಡಿ ಕಾರ್ಯಕರ್ತೆಯರ ಮತ್ತು ಸಹಾಯಕಿಯರ ಫೆಡರೇಷನ್ ಕರೆಯ ಮೇರೆಗೆ ಇಂದು (ಜುಲೈ 12) ಬೇಡಿಕಾ ದಿನವನ್ನು ದೇಶದಾದ್ಯಂತ ಕರೆಯ ಭಾಗವಾಗಿ ರಾಜ್ಯದಲ್ಲಿಯೂ ಪ್ರತಿಭಟನಾ ಪ್ರದರ್ಶನಗಳನ್ನು ಹಮ್ಮಿಕೊಂಡಿದ್ದರು.
ತಹಶೀಲ್ದಾರ್ / ಜಿಲ್ಲಾಧಿಕಾರಿಗಳ ಸರಕಾರಿ ಕಛೇರಿಗಳ ಮುಂಭಾಗ ಪ್ರತಿಭಟನೆ ನಡೆಸಿದ ಅಂಗನವಾಡಿ ಕಾರ್ಯಕರ್ತೆಯರು ಹಾಗೂ ಸಹಾಯಕಿಯರು ಪ್ರಧಾನಮಂತ್ರಿಗಳಿಗೆ ಬೇಡಿಕೆಗಳ ಪಟ್ಟಿಯ ಮನವಿಯನ್ನು ಸಲ್ಲಿಸಿದ್ದಾರೆ.
ಪ್ರತಿಭಟನಾಕಾರರು ʻʻನಮ್ಮ ಸಮಸ್ಯೆಗಳು, ಬೇಡಿಕೆಗಳು ಮತ್ತು ಸಲಹೆಗಳನ್ನು ನಿಮ್ಮ ಮುಂದೆ ಪ್ರಸ್ತುತಪಡಿಸುತ್ತಿದ್ದೇವೆ. ಕೂಡಲೇ 45ನೇ ಕಾರ್ಮಿಕ ಸಮ್ಮೇಳನದ ಎಲ್ಲ ಶಿಫಾರಸ್ಸಿನಂತೆ ನಮ್ಮ ನ್ಯಾಯಯೂತ ಬೇಡಿಕೆಗಳನ್ನು ಈಡೇರಿಸಬೇಕೆಂದು ಆಗ್ರಹಿಸಿದ್ದಾರೆ.
ಪ್ರತಿಭಟನೆಯು 24 ರಾಜ್ಯಗಳು ಮತ್ತು ಕೇಂದ್ರಾಡಳಿತ ಪ್ರದೇಶಗಳಲ್ಲಿ ಐದು ಲಕ್ಷಕ್ಕೂ ಹೆಚ್ಚು ಕಾರ್ಮಿಕರನ್ನು ಪ್ರತಿನಿಧಿಸುವ ಅಂಗನವಾಡಿ ಕಾರ್ಯಕರ್ತೆ ಮತ್ತು ಸಹಾಯಕಿಯರ ಟ್ರೇಡ್ ಯೂನಿಯನ್ ಒಕ್ಕೂಟವಾದ ಆಲ್ ಇಂಡಿಯಾ ಫೆಡರೇಶನ್ ಆಫ್ ಅಂಗನವಾಡಿ ವರ್ಕರ್ಸ್ ಅಂಡ್ ಹೆಲ್ಪರ್ಸ್(ಎಐಎಫ್‌ಎಡಬ್ಲ್ಯುಹೆಚ್) ನ ಸಂಯೋಜಿತವಾಗಿರುವ ಕರ್ನಾಟಕ ರಾಜ್ಯ ಅಂಗನವಾಡಿ ನೌಕರರ ಸಂಘ (ಸಿಐಟಿಯು) ಕಾರ್ಯಕರ್ತೆ ಮತ್ತು ಸಹಾಯಕಿಯರು ಎದುರಿಸುತ್ತಿರುವ ಹಲವು ಸಮಸ್ಯೆಗಳನ್ನು ಮತ್ತು ಐಸಿಡಿಎಸ್ ಮುಂದಿರುವ ಸವಾಲುಗಳು ಮತ್ತು ತಮ್ಮ ಪ್ರಮುಖ ಬೇಡಿಕೆಗಳನ್ನು ಸರಕಾರದ ಮುಂದೆ ಮಂಡಿಸಿ ಇವುಗಳ ಪರಿಹಾರಕ್ಕೆ ಆಗ್ರಹಿಸಿದ್ದಾರೆ.
- ಕೋವಿಡ್ ಸಾಂಕ್ರಾಮಿಕ ರೋಗದ ವಿರುದ್ಧ ಹೋರಾಡುವ ಸುರಕ್ಷತಾ ಗೇರ್, ಅಪಾಯ ಭತ್ಯೆ ಮತ್ತು ವಿಮಾ ರಕ್ಷಣೆಗಾಗಿ ಒತ್ತಾಯ
ಕೋವಿಡ್-19 ಸಾಂಕ್ರಾಮಿಕ ಪಿಡುಗಿನ ವಿರುದ್ಧ ಮತ್ತು ಸಾಂಕ್ರಾಮಿಕ ಮತ್ತು ಲಾಕ್ಡೌನ್ ಸಮಯದಲ್ಲಿ ಹಸಿವು ಮತ್ತು ಅಪೌಷ್ಟಿಕತೆಯ ವಿರುದ್ಧದ ಹೋರಾಟದಲ್ಲಿ ದೇಶದಲ್ಲೆಲ್ಲ ಅಂಗನವಾಡಿ ಕಾರ್ಯಕರ್ತೆ ಮತ್ತು ಸಹಾಯಕಿಯರು ಬಹಳ ನಿರ್ಣಾಯಕ ಪಾತ್ರ ವಹಿಸುತ್ತಿದ್ದಾರೆ. ಸಾಂಕ್ರಾಮಿಕ ರೋಗದ ಎರಡನೇ ಅಲೆಯಲ್ಲಿ ಅಂಗನವಾಡಿ ಕಾರ್ಯಕರ್ತೆ ಮತ್ತು ಸಹಾಯಕಿಯರನ್ನು ಸಮುದಾಯ ಜಾಗೃತಿ, ಸಮೀಕ್ಷೆಗಳು ಮತ್ತು ಪ್ರಾಥಮಿಕ ಆರೋಗ್ಯ ಸೇವೆಗಳ ಕರ್ತವ್ಯಗಳಿಗೆ ನಿಯೋಜಿಸಲಾಗಿದೆ. ಅವರು ಕೋವಿಡ್-19 ರೋಗಿಗಳ ಗುರುತಿಸುವಿಕೆ ಮತ್ತು ಚಿಕಿತ್ಸೆಯಲ್ಲಿ, ಆಶಾ ಕಾರ್ಯಕರ್ತೆಯರು ಮತ್ತು ಇತರ ಮುಂಚೂಣಿ ಯೋಧರೊಂದಿಗೆ ವಾರ್ಡ್ ಮಟ್ಟದ ಸಮಿತಿಗಳ ಭಾಗವಾಗಿದ್ದಾರೆ. ಮನೆ ಮನೆಗೆ ತೆರಳಿ ಕೋವಿಡ್ ಸಮೀಕ್ಷೆಗಳನ್ನು ನಡೆಸುವುದು, ಜನರನ್ನು ಕೋವಿಡ್ ಪರೀಕ್ಷೆಗೆ ಕರೆದೊಯ್ಯುವುದು, ರೋಗಿಗಳಿಗೆ ಪ್ರಾಥಮಿಕ ವೈದ್ಯಕೀಯ ಮಾರ್ಗದರ್ಶನ ನೀಡುವುದು, ಅವರ ತಾಪಮಾನ ಮತ್ತು ಆಮ್ಲಜನಕದ ಮಟ್ಟವನ್ನು ಮೇಲ್ವಿಚಾರಣೆ ಮಾಡುವುದು ಇತ್ಯಾದಿಗಳ ಜೊತೆಗೆ ಜಿಲ್ಲಾಡಳಿತದ ಲಸಿಕೆ ಅಭಿಯಾನ ಕರ್ತವ್ಯಗಳನ್ನು ನಿಭಾಯಿಸಬೇಕಾಗಿದೆ. ಇವರಿಗೆ ಅವಶ್ಯಕ ರಜಾಗಳನ್ನೂ ನಿರಾಕರಿಸಲಾಗುತ್ತಿದೆ ಮತ್ತು ಅವರು ದಿನಕ್ಕೆ 16 ಗಂಟೆಗಳವರೆಗೆ ಕೆಲಸ ಮಾಡಬೇಕಾಗುತ್ತಿದೆ ಎಂದು ಆಗ್ರಹಿಸಿದ್ದಾರೆ.
ಅನೇಕ ಜೀವಗಳನ್ನು ಉಳಿಸುವ ಕರ್ತವ್ಯವನ್ನು ನಿರ್ವಹಿಸುತ್ತಿರುವಾಗಲೇ, ಅಂಗನವಾಡಿ ಕಾರ್ಯಕರ್ತೆಯರಿಗೆ ಯಾವುದೇ ರಕ್ಷಣಾ-ಸಾಧನಗಳನ್ನು ಮತ್ತು ಹೆಚ್ಚಿನ ರಾಜ್ಯಗಳಲ್ಲಿನ ಮುಖಗವಸುಗಳು ಅಥವಾ ಸೆನಿಟೈಸರ್‌ಗಳನ್ನು ಸಹ ನೀಡಲಾಗುತ್ತಿಲ್ಲ. ಇದರ ಪರಿಣಾಮವಾಗಿ, ಕೋವಿಡ್-19 ನಿಂದ ನೂರಾರು ಕಾರ್ಯಕರ್ತೆಯರು ಸೋಂಕಿಗೆ ಒಳಗಾಗುತ್ತಿದ್ದಾರೆ ಮತ್ತು ಅವರಲ್ಲಿ ಕೋವಿಡ್‌ನಿಂದ ಉಂಟಾಗುವ ಸಾವುಗಳಲ್ಲಿ ವಿಶೇಷವಾಗಿ ಸಾಂಕ್ರಾಮಿಕದ ಎರಡನೇ ಅಲೆಯ ಸಮಯದಲ್ಲಿ, ಆತಂಕಕಾರಿಯಾಗಿ ಹೆಚ್ಚಳವಾಗುತ್ತಿದೆ. ಅವರ ಕುಟುಂಬಗಳ ಅನೇಕ ಸದಸ್ಯರು ಸಹ ಸೋಂಕಿಗೆ ಒಳಗಾಗುತ್ತಿದ್ದಾರೆ ಮತ್ತು ಅನೇಕರು ಸಾವನ್ನಪ್ಪುತ್ತಿರುವ ಭೀತಿಯ ಪರಿಸ್ಥಿತಿ ಇದೆ. ಏಕೆಂದರೆ ಅಂಗನವಾಡಿ ಕಾರ್ಯಕರ್ತೆಯರು ಮತ್ತು ಸಹಾಯಕಿಯರ ಮಧ್ಯೆ ಸಾವಿನ ಪ್ರಮಾಣವು ಹಠಾತ್ ಹೆಚ್ಚಳವಾಗುತ್ತಿರುವುದರಿಂದ, ತಮ್ಮ ಮತ್ತು ಕುಟುಂಬ ಸದಸ್ಯರ ಜೀವದ ಕುರಿತ ಆತಂಕ, ಅವರ ಕೆಲಸದ ಪರಿಸ್ಥಿತಿಯಲ್ಲಿನ ತೀವ್ರ ಒತ್ತಡದಿಂದ ಭಯದ ಸ್ಥಿತಿ ಉಲ್ಬಣಗೊಳ್ಳಬಹುದು. ಈ ಅವಧಿಯಲ್ಲಿ ಭಾರೀ ಸಂಖ್ಯೆಯ ಅಂಗನವಾಡಿ ಕಾರ್ಯಕರ್ತೆಯರು ಮತ್ತು ಸಹಾಯಕಿಯರು ಸಾವನ್ನಪ್ಪಿದ್ದಾರೆ. ಉದಾಹರಣೆಗೆ, ಕರ್ನಾಟಕದಲ್ಲಿ ಸಾಂಕ್ರಾಮಿಕ ರೋಗದಿಂದ ಒಟ್ಟು 28 ನೌಕರರು, ಅದೂ ಎರಡನೇ ಅಲೆಯಲ್ಲಿಯೇ 25 ಮಂದಿ ಸಾವನ್ನಪ್ಪಿದ್ದಾರೆ. ಉತ್ತರಪ್ರದೇಶದಲ್ಲಿ 74 ಮಂದಿ ಈಗಾಗಲೇ ಕೋವಿಡ್‌ಗೆ ಬಲಿಯಾಗಿದ್ದಾರೆ. ಇತರ ರಾಜ್ಯಗಳ ಪರಿಸ್ಥಿತಿಯೂ ಇದೇ ರೀತಿಯಿದೆ.
ಯಾವುದೇ ಅಪಾಯ ಭತ್ಯೆ, ಆಸ್ಪತ್ರೆಯ ವೆಚ್ಚದ ಪಾವತಿ ಅಥವಾ ಅವರಿಗೆ ಪ್ರಾಣಹಾನಿ ಪರಿಹಾರ ಲಭ್ಯವಿಲ್ಲ. ಅನೇಕ ರಾಜ್ಯಗಳಲ್ಲಿ ಅವರನ್ನು ಮುಂಚೂಣಿ ಯೋಧರೆಂದೂ ಗುರುತಿಸಲಾಗಿಲ್ಲ ಮತ್ತು ಭಾರತ ಸರ್ಕಾರವು ಘೋಷಿಸಿದ ಐವತ್ತು ಲಕ್ಷ ರೂಪಾಯಿಯ ಬದಲಿಗೆ ಕರ್ನಾಟಕದಲ್ಲಿ 30 ಲಕ್ಷ ಜೀವ ವಿಮಾ ಯೋಜನೆಯನ್ನು ಅವರಿಗೆ ಅನ್ವಯಿಸದಿರುವುದು ಆಘಾತಕಾರಿಯಾಗಿದೆ. ಘೋಷಿಸಲಾದ ಪರಿಹಾರ ಕೂಡಾ ಇನ್ನೂ ಬಹಳಷ್ಟು ಜನರಿಗೆ ಸಿಕ್ಕಿಲ್ಲ. ಮತ್ತೊಂದು ಸಮಸ್ಯೆಯೆಂದರೆ, ಸರಿಯಾದ ಚಿಕಿತ್ಸೆಯಿಲ್ಲದೆ ಅಥವಾ ಸರಿಯಾದ ಪರೀಕ್ಷೆಗಳೊಂದಿಗೆ ಸೋಂಕನ್ನು ಪತ್ತೆಹಚ್ಚದ ಕಾರಣ ಅನೇಕರು ಸಾಯುತ್ತಿದ್ದಾರೆ, ಏಕೆಂದರೆ ಎರಡನೇ ಅಲೆಯಲ್ಲಿನ ಹೆಚ್ಚಿನ ಪ್ರಕರಣಗಳು ರೋಗಲಕ್ಷಣರಹಿತವಾಗಿವೆ. ಯಾವುದೇ ಮರಣೋತ್ತರ ಪರೀಕ್ಷೆ ನಡೆಸದ ಕಾರಣ, ಈ ಸಾವುಗಳನ್ನು ಕೋವಿಡ್ ಸಾವುಗಳೆಂದು ಸಹ ಗುರುತಿಸಲಾಗುವುದಿಲ್ಲ ಮತ್ತು ಯಾವುದೇ ಪರಿಹಾರವನ್ನು ನೀಡಲಾಗುತ್ತಿಲ್ಲ.
ಮುಂಚೂಣಿ ಯೋಧರಾಗಿ ಅಂಗನವಾಡಿ ಕಾರ್ಯಕರ್ತೆಯರಿಗೆ ಮಾನ್ಯತೆ ನೀಡುವ ಅಧಿಸೂಚನೆ ಹೊರಡಿಸಲು ಮತ್ತು ಸುರಕ್ಷತಾ ಸಾಧನಗಳು, ಅಪಾಯ ಭತ್ಯೆ, ಜೀವ ವಿಮಾ ಮೊತ್ತ ಮತ್ತು ಸೋಂಕಿಗೆ ಒಳಗಾದವರಿಗೆ ಮತ್ತು ಅವರ ಕುಟುಂಬಗಳಿಗೆ ಪರಿಹಾರ ಮತ್ತು ಚಿಕಿತ್ಸಾ ವೆಚ್ಚವನ್ನು ಪೂರ್ವಾನ್ವಯ ವಾಗುವಂತೆ ಪಾವತಿ ಮಾಡುವ ಕ್ರಮಗಳನ್ನು ಕೈಗೊಳ್ಳುವುದನ್ನು ಖಚಿತಪಡಿಸಲು ತಾವು ಮಧ್ಯಪ್ರವೇಶಿಸಬೇಕೆಂದು ಆಗ್ರಹಿಸಿದ್ದಾರೆ.
- ‘ಪೋಶನ್ ಟ್ರ‍್ಯಾಕರ್’ ಮೊಬೈಲ್ ಅಪ್ಲಿಕೇಶನ್
ಕೋವಿಡ್ ಕರ್ತವ್ಯದ ಜೊತೆಗೆ, ಅಂಗನವಾಡಿ ಕಾರ್ಯಕರ್ತರು ಮತ್ತು ಸಹಾಯಕಿಯರು ಅಂಗನವಾಡಿ ಕೇಂದ್ರದ ಕರ್ತವ್ಯಗಳಾದ ಪೂರಕ ಪೌಷ್ಠಿಕಾಂಶ ವಿತರಣೆ ಇತ್ಯಾದಿಗಳನ್ನು ಮಾಡಬೇಕಾಗಿದೆ. ಸದ್ಯ ಅಂಗನವಾಡಿ ಕಾರ್ಯಕರ್ತೆಯರಿಗೆ ಮೊಬೈಲ್ ಫೋನ್ ಒದಗಿಸದೆ, ಮೊಬೈಲ್ ಡೇಟಾಕ್ಕಾಗಿ ಪಾವತಿ, ನೆಟ್‌ವರ್ಕ್ ವ್ಯಾಪ್ತಿಯನ್ನು ಖಾತರಿಪಡಿಸದೇ, ಮೊಬೈಲ್ ಅಪ್ಲಿಕೇಶನ್ `ಪೋಶನ್ ಟ್ರ‍್ಯಾಕ್’ನಲ್ಲಿ ಆನ್‌ಲೈನ್‌ನಲ್ಲಿ ವರದಿ ಮಾಡಲು ಹೇಳುತ್ತಿದ್ದಾರೆ. ನಿರ್ದೇಶನಗಳನ್ನು ಅನುಸರಿಸಲಾಗದ ಕಾರಣ, ಇದರಲ್ಲಿ ಅವರ ಯಾವುದೇ ದೋಷವಿಲ್ಲದಿದ್ದರೂ, ಈಗ ಅವರು ಡಬ್ಲ್ಯೂಸಿಡಿ ಸಚಿವಾಲಯದ ಆದೇಶದಂತೆ ಒಟ್ಟಾರೆ ವೇತನ ಕಡಿತದ ಬೆದರಿಕೆಗೆ ಒಳಗಾಗಿದ್ದಾರೆ. ಮೊಬೈಲ್ ಸಂಪರ್ಕವನ್ನು ಹೊಂದಿರದ ಫಲಾನುಭವಿಗಳಿಗೆ ಸೇವೆಯನ್ನು ಸಹ ಅಪ್ಲಿಕೇಶನ್ ನಿರಾಕರಿಸುತ್ತದೆ.
ಆದ್ದರಿಂದ, ಅಂಗನವಾಡಿ ಕಾರ್ಯಕರ್ತೆಯರ ಸಂಭಾವನೆ (‘ಗೌರವ’) ಮತ್ತು ಆಹಾರ ಧಾನ್ಯ ಫಂಡ್‌ಗ ಗಳನ್ನು ‘ಪೋಶನ್ ಟ್ರ‍್ಯಾಕರ್’ ಅಪ್ಲಿಕೇಶನ್ ಕಾರ್ಯನಿರ್ವಹಣೆಯೊಂದಿಗೆ ತಕ್ಷಣ ಜೋಡಿಸುವ ನಿರ್ಧಾರ ಮತ್ತು ವೇತನ ಕಡಿತ ಆದೇಶವನ್ನು ಹಿಂಪಡೆಯಲು ಪ್ರತಿಭಟನಾಕಾರರು ಆಗ್ರಹಿಸಿದ್ದಾರೆ.
ವೆಬ್ ಆಧಾರಿತ ವರದಿ ವ್ಯವಸ್ಥೆಗೆ ಸಂಪೂರ್ಣವಾಗಿ ಸ್ಥಳಾಂತರಗೊಳ್ಳುವ ಮೊದಲು ಫೋನ್, ಮೊಬೈಲ್ ಡೇಟಾ, ತರಬೇತಿ, ನೆಟ್‌ವರ್ಕ್‌ಗಳ ಲಭ್ಯತೆ ಇತ್ಯಾದಿಗಳ ಸಂಗ್ರಹಕ್ಕೆ ಸಾಕಷ್ಟು ಹಣಕಾಸಿನ ಹಂಚಿಕೆಯನ್ನು ಖಚಿತಪಡಿಸಲು ವಿನಂತಿಸಿಕೊಂಡಿದ್ದಾರೆ.
- ಪೋಷಕಾಂಶ ತೋಟಗಳನ್ನು ಮಾಡಲು ಇಲಾಖೆಯಿಂದ ಒತ್ತಾಯ
ಲಾಕ್ಡೌನ್ ಅವಧಿಯಲ್ಲಿಯೂ ಸಹ ಅಂಗನವಾಡಿ ಕಾರ್ಯಕರ್ತೆಯರು ಅಂಗನವಾಡಿ ಕೇಂದ್ರಗಳಲ್ಲಿ ಸಮುದಾಯ ಭೂಮಿಯಲ್ಲಿ ಮತ್ತು ಫಲಾನುಭವಿಗಳ ಮನೆಯಲ್ಲಿ ‘ಪೋಷಕಾಂಶ-ತೋಟಗಳನ್ನು’ ಮಾಡಲು ಇಲಾಖೆಯಿಂದ ಒತ್ತಾಯಿಸಲ್ಪಡುತ್ತಿದ್ದಾರೆ. ನಿಮಗೆ ತಿಳಿದಿರುವಂತೆ, ಅಂಗನವಾಡಿ ಕೇಂದ್ರಗಳಲ್ಲಿ ಹೆಚ್ಚಿನವು ಯಾವುದೇ ಭೂಮಿಯನ್ನು ಹೊಂದಿಲ್ಲ ಮತ್ತು ಐಸಿಡಿಎಸ್‌ನ ಫಲಾನುಭವಿಗಳಲ್ಲಿ ಹೆಚ್ಚಿನವರು ಭೂಹೀನ ಕಾರ್ಮಿಕ ಕುಟುಂಬಗಳು. ಮುಖ್ಯ ವಿಷಯವೆಂದರೆ, ಅಂಗನವಾಡಿ ಕಾರ್ಯಕರ್ತೆಯರು ಅಥವಾ ಸಹಾಯಕಿಯರು ತಮ್ಮ ಮೂಲ ಕರ್ತವ್ಯಗಳನ್ನು ನಿರ್ವಹಿಸಲು ಹೆಚ್ಚಿನ ಸಮಯಾವಕಾಶ ಬೇಕಿದೆ. ಮಾತ್ರವಲ್ಲದೇ ಕರ್ನಾಟಕ ಹೈಕೋರ್ಟ್ ಅಂಗನವಾಡಿ ಕೇಂದ್ರಗಳಿಗೆ ಮೂಲಭೂತ ಸೌಕರ್ಯಗಳನ್ನು ಒದಗಿಸಲು ನಿರ್ದೇಶನ ನೀಡಿರುವುದನ್ನು ಗಮನಿಸಬೇಕೆಂದು ತಿಳಿಯಪಡಿಸಿದ್ದಾರೆ.
- ಐಸಿಡಿಎಸ್‌ನಲ್ಲಿ ಸಾಕಷ್ಟು ಪೌಷ್ಠಿಕಾಂಶ ಪೂರೈಕೆ
ಇತ್ತೀಚೆಗೆ ಬಿಡುಗಡೆಯಾದ ರಾಷ್ಟ್ರೀಯ ಕುಟುಂಬ ಆರೋಗ್ಯ ಸಮೀಕ್ಷೆ (NFHS-5) ದತ್ತಾಂಶವು 2014-19ರ ಅವಧಿಯಲ್ಲಿ ಅಪೌಷ್ಟಿಕತೆಯ ಹೆಚ್ಚಳದ ಆತಂಕಕಾರಿ ಸೂಚನೆಗಳನ್ನು ತೋರಿಸುತ್ತಿದೆ. ಇದರಲ್ಲಿ ನಮ್ಮ ಮಕ್ಕಳಲ್ಲಿ ಅರ್ಧದಷ್ಟು ಮಕ್ಕಳು ರಕ್ತಹೀನತೆ, ಕುಬ್ಜ, ವ್ಯರ್ಥ ಮತ್ತು ಕಡಿಮೆ ತೂಕ ಹೊಂದಿದ್ದಾರೆ. ಸಾಂಕ್ರಾಮಿಕ ಮತ್ತು ಲಾಕ್ಡೌನ್, ಉದ್ಯೋಗ ಮತ್ತು ಆದಾಯ ನಷ್ಟ, ನಿರುದ್ಯೋಗ ಇತ್ಯಾದಿಗಳಿಂದ ಪರಿಸ್ಥಿತಿಯನ್ನು ಇನ್ನಷ್ಟು ಹದಗೆಡಿಸಿದೆ. ಬಡತನ, ಹಸಿವು ಮತ್ತು ಅಪೌಷ್ಟಿಕತೆಯ ಈ ಸಮಸ್ಯೆಗಳನ್ನು ತುರ್ತಾಗಿ ಪರಿಹರಿಸಲಾಗದಿದ್ದರೆ, ಮುಂದಿನ ಆರು ತಿಂಗಳಲ್ಲಿ ಭಾರತವು ಹೆಚ್ಚುವರಿಯಾಗಿ ಐದು ವರ್ಷದೊಳಗಿನ ಮೂರು ಲಕ್ಷ ಮಕ್ಕಳನ್ನು ಕಳೆದುಕೊಳ್ಳಲಿದೆ ಎಂದು ಯುನಿಸೆಫ್ ಎಚ್ಚರಿಸಿದೆ. ಇದು ಪ್ರತಿವರ್ಷ ಸಾಯುವ ಐದು ವರ್ಷದೊಳಗಿನ ಸುಮಾರು 8.8 ಲಕ್ಷಗಳಿಗೆ ಹೆಚ್ಚುವರಿಯಾಗಿ ಸೇರುತ್ತದೆ.
ತಾವು ಮಧ್ಯಪ್ರವೇಶಿಸಿ, ಸರಿಯಾದ ಮೂಲಸೌಕರ್ಯದೊಂದಿಗೆ ಐಸಿಡಿಎಸ್ ಅನ್ನು ಬಲಪಡಿಸಲು ಮತ್ತು ಪೂರಕ-ಪೌಷ್ಟಿಕಾಂಶವನ್ನು ಗುಣಮಟ್ಟ ಮತ್ತು ಪ್ರಮಾಣದಲ್ಲಿ ಹೆಚ್ಚಿಸಲು, ಐಸಿಡಿಎಸ್‌ಗೆ ಹೆಚ್ಚಿನ ಸಂಪನ್ಮೂಲ ಹಂಚಿಕೆಯನ್ನು ಖಾತ್ರಿಪಡಿಸಲು ನಾವು ವಿನಂತಿಸುತ್ತೇವೆ.
- ಶಾಲಾ-ಪೂರ್ವಶಿಕ್ಷಣ / ಇ.ಸಿ.ಸಿ.ಇ.
ಅನೇಕ ರಾಜ್ಯಗಳಲ್ಲಿ, ಹೊಸ ರಾಷ್ಟ್ರೀಯ ಶಿಕ್ಷಣ ನೀತಿ(ಎನ್‌ಇಪಿ-2020) ಹೆಸರಿನಲ್ಲಿ, ಶಾಲೆಗಳಲ್ಲಿ ಪೂರ್ವ ಶಾಲೆಗಳನ್ನು ತೆರೆಯಲಾಗುತ್ತಿದೆ ಮತ್ತು ಅಂಗನವಾಡಿ ಕೇಂದ್ರಗಳ ಮೂರು ವರ್ಷಕ್ಕಿಂತ ಮೇಲ್ಪಟ್ಟ ಮಕ್ಕಳನ್ನು ಶಿಕ್ಷಣ ಇಲಾಖೆಗಳು ಈ ಶಾಲೆಗಳಿಗೆ ಹೋಗಲು ತಿಳಿಸುತ್ತಿವೆ. ಅನೇಕ ಸ್ಥಳಗಳಲ್ಲಿ, ನಾಲ್ಕರಿಂದ ಐದು ಅಂಗನವಾಡಿ ಕೇಂದ್ರಗಳನ್ನು ಹತ್ತಿರದ ಶಾಲೆಗಳಿಗೆ ಸ್ಥಳಾಂತರಿಸಲಾಗುತ್ತಿದೆ ಮತ್ತು ಆರಂಭಿಕ ಬಾಲ್ಯದ ಆರೈಕೆ ಮತ್ತು ಶಿಕ್ಷಣದ (ಇಸಿಸಿಇ) ಸಂಪೂರ್ಣ ಪರಿಕಲ್ಪನೆಯನ್ನು ಶಾಲಾ-ಪೂರ್ವ/ ಶಿಶುವಿಹಾರಗಳಿಗೆ ಸೀಮಿತಗೊಳಿಸುವ ಮೂಲಕ ಅದನ್ನು ಹಾಳು ಮಾಡಲಾಗುತ್ತಿದೆ.
ನೂತನ ಶಿಕ್ಷಣ ನೀತಿ – 2020 ಮತ್ತು ರಾಷ್ಟ್ರೀಯ ಇಸಿಸಿಇ ನೀತಿ 2013 ಎರಡೂ ಐಸಿಡಿಎಸ್ / ಅಂಗನವಾಡಿ ಕೇಂದ್ರಗಳನ್ನು ಕಾರ್ಯಕರ್ತೆಯರು ಮತ್ತು ಸಹಾಯಕಿಯರಿಗೆ ಸೂಕ್ತ ತರಬೇತಿ ಇತ್ಯಾದಿ ನೀಡಿ ಪೂರ್ಣ ಸಮಯದ ಇಸಿಸಿಇ ಕೇಂದ್ರಗಳು / ಸರಿಯಾದ ಮೂಲಸೌಕರ್ಯ ಹೊಂದಿರುವ ಅಂಗನವಾಡಿ ಕಮ್ ಶಿಶುವಿಹಾರಗಳಾಗಿ ಬಲಪಡಿಸುವ ಬಗ್ಗೆ ಸ್ಪಷ್ಟವಾಗಿ ಹೇಳುತ್ತಿವೆ. ಇಸಿಸಿಇ ನೀತಿ ಅನುಷ್ಠಾನವನ್ನು ಖಚಿತಪಡಿಸಲು ಮತ್ತು ಅಂಗನವಾಡಿ ಕೇಂದ್ರಗಳನ್ನು ಬಲಪಡಿಸಲು ಮತ್ತು ಅಂಗನವಾಡಿ ಕಾರ್ಯಕರ್ತೆಯರು ಮತ್ತು ಸಹಾಯಕಿಯರಿಗೆ ಇಸಿಸಿಇ ಹಕ್ಕು ಕಾಯ್ದೆ ಜಾರಿಗೆ ಅವಶ್ಯಕ ಸೂಕ್ತ ತರಬೇತಿ ನೀಡಲು ತಕ್ಷಣದ ಮಧ್ಯಪ್ರವೇಶ ಅಗತ್ಯವಾಗಿದೆ.
ಸಮಗ್ರ ದೃಷ್ಟಿಕೋನದೊಂದಿಗೆ, ಅಂಗನವಾಡಿಗಳು ಅಥವಾ ಅಂಗನವಾಡಿ ಮಾದರಿಯ ಇಸಿಸಿಇ ಕೇಂದ್ರಗಳ ಮೂಲಕ ಮಾತ್ರವೇ ಆರಂಭಿಕ ಬಾಲ್ಯದ ಆರೈಕೆ ಮತ್ತು ಶಿಕ್ಷಣದ(ಇಸಿಸಿಇ) ನೀತಿಯನ್ನು ಜಾರಿಗೊಳಿಸಬೇಕು ಮತ್ತು ಅದು ಸಂಪೂರ್ಣವಾಗಿ ಉಚಿತ ಮತ್ತು ಕಡ್ಡಾಯವಾಗಿರಬೇಕು ಆಗ್ರಹಿಸಿದ್ದಾರೆ.
ಅಂಗನವಾಡಿ ಕೇಂದ್ರಗಳ ಬಳಿ ಯಾವುದೇ ಶಾಲಾ-ಪೂರ್ವ ಅಥವಾ ಪೌಷ್ಠಿಕಾಂಶ ಕೇಂದ್ರಗಳನ್ನು ತೆರೆಯದಂತೆ, ಎಚ್ಚರವಹಿಸಲು ಸರ್ಕಾರದ ವಿವಿಧ ಇಲಾಖೆಗಳ ನಡುವೆ, ವಿಶೇಷವಾಗಿ ಶಿಕ್ಷಣ ಇಲಾಖೆಯ ನಡುವೆ ಸರಿಯಾದ ಸಮನ್ವಯವಿರುವಂತೆ ಖಚಿತಪಡಿಸಲು ಆಗ್ರಹಿಸಿದ್ದಾರೆ.
- ಮಿನಿ ಅಂಗನವಾಡಿ ಕಾರ್ಯಕರ್ತೆಯರಿಗೆ ಪೂರ್ಣ ಪ್ರಮಾಣದ ಗೌರವಧನ ಪಾವತಿ
ಮಿನಿ ಅಂಗನವಾಡಿ ಕಾರ್ಯಕರ್ತೆಯರು ಒಬ್ಬಂಟಿಯಾಗಿ ಸಾಮಾನ್ಯ ಅಂಗನವಾಡಿ ಕಾರ್ಯಕರ್ತೆಯ ಎಲ್ಲಾ ಕರ್ತವ್ಯಗಳನ್ನು ಸಹ ನಿರ್ವಹಿಸುತ್ತಾರೆ. ಎಲ್ಲಾ ಮಿನಿ-ಅಂಗನವಾಡಿ ಕೇಂದ್ರಗಳನ್ನು ಪೂರ್ಣ ಪ್ರಮಾಣದ ಅಂಗನವಾಡಿ ಕೇಂದ್ರಗಳನ್ನಾಗಿ ಪರಿವರ್ತಿಸಿ ಮತ್ತು ಸಹಾಯಕಿಯರನ್ನು ನೇಮಿಸಬೇಕು. ಕೆಲಸ ಮಾಡುವ ಅಂಗನವಾಡಿ ಕಾರ್ಯಕರ್ತೆಯರಿಗೆ ಸಾಮಾನ್ಯ ಅಂಗನವಾಡಿ ಕಾರ್ಯಕರ್ತೆಯರಂತೆ ನೀಡಲಾಗುವ ಸಮಾನ ವೇತನ ಮತ್ತು ಸವಲತ್ತುಗಳನ್ನು ನೀಡಬೇಕೆಂದು ಆಗ್ರಹಿಸಿದ್ದಾರೆ.
- ಹೆಚ್ಚುವರಿ ಕೆಲಸ
ಕೇಂದ್ರದ ಮಾರ್ಗಸೂಚಿಗಳ ಹೊರತಾಗಿಯೂ, ಹೆಚ್ಚಿನ ರಾಜ್ಯಗಳಲ್ಲಿ, ಅಂಗನವಾಡಿ ಕಾರ್ಯಕರ್ತೆಯರು ಮತ್ತು ಸಹಾಯಕಿಯರಿಗೆ ಚುನಾವಣೆಗಳಲ್ಲಿ ಬಿಎಲ್‌ಒ ಕರ್ತವ್ಯಗಳು ಸೇರಿದಂತೆ, ಐಸಿಡಿಎಸ್‌ಗೆ ಸಂಬಂಧಿಸಿರದ ಕೆಲಸಗಳನ್ನು ನೀಡಲಾಗುತ್ತದೆ, ಇದು ಒಟ್ಟಾರೆ ಅವರ ಅಂಗನವಾಡಿ ಕೇಂದ್ರದ ಮೂಲ ಕೆಲಸದ ಮೇಲೆ ಪರಿಣಾಮ ಬೀರುತ್ತದೆ. ಐಸಿಡಿಎಸ್ ಹೊರತುಪಡಿಸಿ ಬೇರೆ ಯಾವುದೇ ಕೆಲಸವನ್ನು ಕಾರ್ಯಕರ್ತೆಯರು ಮತ್ತು ಸಹಾಯಕಿಯರಿಗೆ ಯೋಜಿಸಬಾರದು.
- ಏಕರೂಪದ ಕೆಲಸದ ಪರಿಸ್ಥಿತಿಗಳು
ಅಂಗನವಾಡಿ ಕಾರ್ಯಕರ್ತೆಯರು ಮತ್ತು ಸಹಾಯಿಕೆಯರು ದೇಶಾದ್ಯಂತ ಒಂದೇ ರೀತಿಯ ಕೆಲಸವನ್ನು ಮಾಡುತ್ತಿದ್ದರೂ, ವೇತನ ಸೇರಿದಂತೆ ಅವರ ಕೆಲಸದ ಷರತ್ತುಗಳು ರಾಜ್ಯದಿಂದ ರಾಜ್ಯಕ್ಕೆ ಭಿನ್ನವಾಗಿವೆ. ಅದೇ ರೀತಿ ವೇತನ-ಸಹಿತ ವೈದ್ಯಕೀಯ ರಜೆ, ಮೇಲ್ವಿಚಾರಕರ ಹುದ್ದೆಗೆ ವಯಸ್ಸಿನ ಮಿತಿಯಿಲ್ಲದೇ ಬಡ್ತಿ, ಸಹಾಯಕಿಗೆ, ಕಾರ್ಯಕರ್ತೆ ಹುದ್ದೆಗೆ ವಯಸ್ಸಿನ ಮಿತಿಯಿಲ್ಲದೆ ಬಡ್ತಿ, ಬೇಸಿಗೆ ಮತ್ತು ಚಳಿಗಾಲದ ರಜೆಗಳು, 10% ವಾರ್ಷಿಕ ಇನ್‌ಕ್ರೀಮೆಂಟ್, ಸಹಾಯಕಿ ಮತ್ತು ಮಿನಿ-ಅಂಗನವಾಡಿ ಕಾರ್ಯಕರ್ತೆಗೆ ಇನ್‌ಕ್ರೀಮೆಂಟ್ ಇತ್ಯಾದಿಗಳನ್ನೂ ಒಳಗೊಂಡ, ಏಕರೂಪದ ಸೇವಾ ಷರತ್ತುಗಳನ್ನು ದೇಶದ ಎಲ್ಲಾ ಅಂಗನವಾಡಿ ಕಾರ್ಯಕರ್ತೆಯರು ಮತ್ತು ಸಹಾಯಕಿಯರಿಗೆ ಅನ್ವಯಗೊಳಿಸಲು ಆಗ್ರಹಿಸಿದ್ದಾರೆ.
- ಚುನಾವಣೆಯಲ್ಲಿ ಸ್ಪರ್ಧಿಸುವ ಹಕ್ಕು: ಚುನಾವಣೆಗಳಲ್ಲಿ ಸ್ಪರ್ಧಿಸುವ ಸ್ವಾತಂತ್ರ‍್ಯ ಸೇರಿದಂತೆ ಅಂಗನವಾಡಿ ನೌಕರರ ರಾಜಕೀಯ ಚಟುವಟಿಕೆಗಳಿಗೆ ಯಾವುದೇ ನಿರ್ಬಂಧಗಳು ಇರಬಾರದು. ಸರ್ಕಾರಿ ನೌಕರರಿಗೆ ಅನ್ವಯವಾಗುವ ಸೇವಾ ಪರಿಸ್ಥಿತಿಗಳನ್ನು ಅವರಿಗೆ ಅನ್ವಯಿಸಿದಾಗ, ಅವರು ಸರ್ಕಾರಿ ನೌಕರರು ಎಂದು ಗುರುತಿಸಲ್ಪಟ್ಟ ದಿನಾಂಕದವರೆಗೆ ಯಾವುದೇ ಚುನಾವಣೆಯಲ್ಲಿ ಭಾಗವಹಿಸಲು; ಚುನಾಯಿತ ಪ್ರತಿನಿಧಿಗಳಿಗೆ ರಜೆ ತೆಗೆದುಕೊಳ್ಳಲು ಮತ್ತು ಅವರ ಅವಧಿ ಮುಗಿದ ನಂತರ ಮತ್ತೆ ಕೆಲಸಕ್ಕೆ ಸೇರಲು ಅವಕಾಶ ನೀಡಬೇಕು.
- ಪಿಂಚಣಿ ನೀಡುವ ತನಕ ಬಲವಂತದ ನಿವೃತ್ತಿ ಸಲ್ಲದು: ಅನೇಕ ರಾಜ್ಯಗಳಲ್ಲಿ, ಅಂಗನವಾಡಿ ಕಾರ್ಯಕರ್ತೆಯರು ಮತ್ತು ಸಹಾಯಕಿಯರನ್ನು ಯಾವುದೇ ಪಿಂಚಣಿ ಅಥವಾ ಕಾಣಿಕೆ-ಹಣ (ಎಕ್ಸ್-ಗ್ರೇಷಿಯಾ) ಇಲ್ಲದೆ ರಿಟ್ರೆಂಚ್ ಮಾಡಲಾಗುತ್ತಿದೆ. ಪಿಂಚಣಿ, ಕಾಣಿಕೆ-ಹಣ ಮತ್ತು ಇತರ ಸಾಮಾಜಿಕ ಭದ್ರತಾ ಕ್ರಮಗಳನ್ನು ಖಾತರಿಪಡಿಸುವವರೆಗೆ ಯಾವುದೇ ಬಲವಂತದ ನಿವೃತ್ತಿಯನ್ನು ಮಾಡಬಾರದು.
- ಅಸ್ತಿತ್ವದಲ್ಲಿರುವ ಸೌಲಭ್ಯಗಳನ್ನು ದೇಶಾದ್ಯಂತ ಅಂಗನವಾಡಿ ಕಾರ್ಯಕರ್ತೆಯರು ಮತ್ತು ಸಹಾಯಕಿಯರಿಗೆ ಅನುಷ್ಠಾನಗೊಳಿಸುವುದು: ಅಂಗನವಾಡಿ ಕಾರ್ಯಕರ್ತೆಯರು ಮತ್ತು ಸಹಾಯಕಿಯರು, ಭಾರತ ಸರ್ಕಾರದ ಕಾರ್ಯಪಡೆಯಲ್ಲೇ ತೀರಾ ಕಡಿಮೆ ಸಂಬಳ ಪಡೆಯುವ ವಿಭಾಗಗಳಲ್ಲಿ ಒಬ್ಬರು ಮತ್ತು ಅವರನ್ನು ಕಾರ್ಮಿಕರೆಂದು ಸಹ ಪರಿಗಣಿಸುತ್ತಿಲ್ಲ. ಆದರೆ, ಅತ್ಯಂತ ಆಘಾತಕಾರಿ ಸತ್ಯವೆಂದರೆ ಈಗ, ಅಸ್ತಿತ್ವದಲ್ಲಿರುವ ಕೆಲವಾದರೂ ಸೌಲಭ್ಯಗಳನ್ನು ಸಹ ಅವರಿಗೆ ದೇಶದಲ್ಲಿ ಎಲ್ಲಿಯೂ ನಿಯಮಿತವಾಗಿ ಪಾವತಿಸುತ್ತಿಲ್ಲ. ಹೆಚ್ಚಿನ ರಾಜ್ಯಗಳಲ್ಲಿ ವೇತನ, ಟಿಎ/ಡಿಎ, ಸಾದಿಲ್ವಾರು-ಖರ್ಚು, ಕೇಂದ್ರದ ಬಾಡಿಗೆ ಇತ್ಯಾದಿಗಳನ್ನು ಸಮಯಕ್ಕೆ ಸರಿಯಾಗಿ ಪಾವತಿಸಲಾಗುತ್ತಿಲ್ಲ. ಅಂಗನವಾಡಿ ಕಾರ್ಯಕರ್ತೆ ವಿಮಾ ಯೋಜನೆ ಅನುಷ್ಠಾನಗೊಳ್ಳುತ್ತಿಲ್ಲ ಮತ್ತು ಯೋಜನೆಯಲ್ಲಿ ಸೇರಿಸಲಾದ ಇಬ್ಬರು ಮಕ್ಕಳಿಗೆ ವಿದ್ಯಾರ್ಥಿ ವೇತನವನ್ನು ಅವರಿಗೆ ಪಾವತಿಸಲಾಗುತ್ತಿಲ್ಲ. ಹೆರಿಗೆ ರಜೆ ಮತ್ತು ಕ್ಯಾಶುಯಲ್ ರಜೆಯನ್ನೂ ಸಹ ಅನೇಕ ರಾಜ್ಯಗಳಲ್ಲಿನ ಕಾರ್ಯಕರ್ತೆಮತ್ತು ಸಹಾಯಕಿಯರಿಗೆ ನೀಡಲಾಗುತ್ತಿಲ್ಲ.
- ಅಂಗನವಾಡಿ ಕಾರ್ಯಕರ್ತೆಯರು ಮತ್ತು ಸಹಾಯಕಿಯರಿಗೆ ಕೇಂದ್ರವು ನೀಡಬೇಕಾದ ಅಸ್ತಿತ್ವದಲ್ಲಿರುವ ಸೌಲಭ್ಯಗಳನ್ನು ನಿಯಮಿತವಾಗಿ ಪಾವತಿಸುವ ಕುರಿತು ಹೊಸ ಆದೇಶಗಳನ್ನು ನೀಡುವಂತೆ ವಿನಂತಿಸಿಕೊಂಡಿದ್ದಾರೆ.
- ಕುಂದುಕೊರತೆ ಪರಿಹಾರ ಸಮಿತಿಗಳು: ಅಂಗನವಾಡಿ ನೌಕರರ ಸಂಘಗಳ ಪ್ರತಿನಿಧಿಗಳನ್ನು ಸೇರಿಸುವ ಮೂಲಕ ಕುಂದುಕೊರತೆ ಪರಿಹಾರ ಸಮಿತಿಗಳನ್ನು ಕೇಂದ್ರ, ಎಲ್ಲಾ ರಾಜ್ಯ ಮತ್ತು ಜಿಲ್ಲಾ ಮಟ್ಟಗಳಲ್ಲಿ ರಚಿಸಬೇಕು ಎಂದು ಪ್ರತಿಭಟನಾಕಾರರು ಆಗ್ರಹಿಸಿದ್ದಾರೆ.
