ಕೇರಳದ ವಿಝಿಂಜಂ ಅಂತರರಾಷ್ಟ್ರೀಯ ಬಂದರನ್ನು ಮೇ 2 ರಂದು ಅಧಿಕೃತವಾಗಿ ಉದ್ಘಾಟಿಸಲಾಯಿತು. ಪ್ರಧಾನಿ ನರೇಂದ್ರ ಮೋದಿಯವರು ಈ ಕಾರ್ಯಕ್ರಮದಲ್ಲಿ ಭಾಗವಹಿಸಿದ್ದರು. ಈ ಯೋಜನೆಯಲ್ಲಿ ಕೇರಳ ಸರ್ಕಾರ ಶೇ. 61.5ರಷ್ಟು ಪಾಲು ಹೊಂದಿದ್ದರೆ, ಕೇಂದ್ರ ಸರ್ಕಾರ ಶೇ.9.6 ಮತ್ತು ಅದಾನಿ ಸಂಸ್ಥೆ ಶೇ. 28.9ರಷ್ಟು ಪಾಲು ಹೊಂದಿದೆ. ಕೇರಳ ಸರ್ಕಾರದ ಒಡೆತನದಲ್ಲಿರುವ ಈ ಬಂದರನ್ನು ಅದಾನಿ ಗ್ರೂಪ್ 40 ವರ್ಷಗಳ ಕಾಲ ನಿರ್ವಹಿಸುತ್ತದೆ. ಕೇರಳದ ಕೈಗಾರಿಕೀಕರಣ ಪ್ರಯತ್ನಗಳಲ್ಲಿ ಎಡ ಪ್ರಜಾಸತ್ತಾತ್ಮಕ ರಂಗ (ಎಲ್‌ಡಿಎಫ್) ಸರ್ಕಾರದ ದೊಡ್ಡ ಸಾಧನೆ ಇದಾಗಿದೆ. ಪಿಣರಾಯಿ ವಿಜಯನ್ ಸರ್ಕಾರ ಉದ್ಯಮಶೀಲತೆಯನ್ನು ಉತ್ತೇಜಿಸಲು ಬಹಳ ಗಂಭೀರ ಪ್ರಯತ್ನಗಳನ್ನು ಮಾಡುತ್ತಿದೆ. ಈ ಬಂದರು ಮಾತ್ರವಲ್ಲದೆ ಹೊಸ ಕೈಗಾರಿಕೆಗಳನ್ನು, ಸಾಫ್ಟ್ ವೇರ್ ಕಂಪನಿಗಳನ್ನು ಸ್ಥಾಪಿಸಲು ಹಲವು ಉಪಕ್ರಮಗಳನ್ನು ತೆಗೆದುಕೊಂಡಿದೆ. ವಿಝಿಂಜಂ
-ಕೃಪೆ: ತೀಕದಿರ್
-ಕನ್ನಡಕ್ಕೆ: ಸಿ ಸಿದ್ದಯ್ಯ
ವಿಝಿಂಜಂ ಬಂದರಿನ ಮಹತ್ವ
ವಿಝಿಂಜಂ ಬಂದರು ಯೋಜನೆಯು ಪಿಣರಾಯಿ ವಿಜಯನ್ ಸರ್ಕಾರದ ಕೈಗಾರಿಕೀಕರಣ ಪ್ರಯತ್ನಗಳ ವಿಸ್ತರಣೆಯಾಗಿದೆ. ವಿಝಿಂಜಂ ಬಂದರು ಅನೇಕ ನೈಸರ್ಗಿಕ ಅನುಕೂಲಗಳನ್ನು ಹೊಂದಿದೆ. ಇದರ ನೈಸರ್ಗಿಕ ಆಳ ತುಂಬಾ ಅದ್ಭುತವಾಗಿದೆ. ಪೂರ್ವ-ಪಶ್ಚಿಮ ಸಮುದ್ರ ಮಾರ್ಗವನ್ನು ಸಂಪರ್ಕಿಸುವ ಅಂತರರಾಷ್ಟ್ರೀಯ ಮಾರ್ಗದಿಂದ ಇದು ಬಹಳ ಕಡಿಮೆ ದೂರದಲ್ಲಿದೆ. ವಿಝಿಂಜಂ ಬಂದರು ದುಬೈ, ಶಾಂಘೈ, ಹಾಂಗ್ ಕಾಂಗ್, ಕೊಲಂಬೊ, ಸಿಂಗಾಪುರದಂತಹ ಅಂತರರಾಷ್ಟ್ರೀಯ ಬಂದರುಗಳಿಗೆ ಕಠಿಣ ಸ್ಪರ್ಧೆಯನ್ನು ನೀಡುತ್ತದೆ ಎಂಬುದು ಸ್ಪಷ್ಟವಾಗಿದೆ. ವಿಝಿಂಜಂ
15 ವರ್ಷಗಳ ಹಿಂದೆ ಸಂಪೂರ್ಣ ಸರ್ಕಾರಿ ಸಂಸ್ಥೆಯಾಗಿ
ಇ.ಕೆ. ನಾಯನಾರ್ ಮುಖ್ಯಮಂತ್ರಿಯಾಗಿದ್ದಾಗ ಈ ಯೋಜನೆ ರೂಪುಗೊಂಡಿತು. ನಂತರ, ಎಡ ಪ್ರಜಾಸತ್ತಾತ್ಮಕ ರಂಗ ಸರ್ಕಾರದ ಅವಧಿಯಲ್ಲಿ, ಈ ಯೋಜನೆಯನ್ನು ಬಲವಾಗಿ ಪ್ರಚಾರ ಮಾಡಲಾಯಿತು ಮತ್ತು 2010 ಆಗಸ್ಟ್ 11ರಂದು, ಮುಖ್ಯಮಂತ್ರಿ ವಿ.ಎಸ್. ಅಚ್ಯುತಾನಂದನ್ ಅವರು ಈ ಕಾಮಗಾರಿಯನ್ನು ಅಧಿಕೃತವಾಗಿ ಉದ್ಘಾಟಿಸಿದರು. ಅಂದಿನ ಉದ್ಘಾಟನಾ ಕಾರ್ಯಕ್ರಮದಲ್ಲಿ ವಿರೋಧ ಪಕ್ಷದ ನಾಯಕರಾಗಿದ್ದ ಉಮ್ಮನ್ ಚಾಂಡಿ ಕೂಡ ಭಾಗವಹಿಸಿದ್ದರು. ಆ ಸಮಯದಲ್ಲಿ, ಈ ಯೋಜನೆಯ ಮೊದಲ ಭಾಗವನ್ನು ಸಂಪೂರ್ಣವಾಗಿ ಸರ್ಕಾರಿ ಸಂಸ್ಥೆಯಾಗಿ ರಚಿಸಲಾಯಿತು.
ಇದನ್ನೂ ಓದಿ: ವರ್ಗಾವಣೆ ದಂಧೆಗೆ ಕಡಿವಾಣ ಹಾಕಬೇಕಿದೆ: ಬಸವರಾಜ ರಾಯರಡ್ಡಿ
ನಿರ್ಮಾಣ ಕಾರ್ಯಕ್ಕಾಗಿ ನೀಡಲಾದ ಟೆಂಡರ್ ಮೂಲಕ ಎರಡು ಚೀನಾ ಕಂಪನಿಗಳನ್ನು ಆಯ್ಕೆ ಮಾಡಲಾಯಿತು. ಆದರೆ ರಾಷ್ಟ್ರೀಯ ಭದ್ರತಾ ಕಾರಣಗಳನ್ನು ಉಲ್ಲೇಖಿಸಿ ಒಕ್ಕೂಟ ಸರ್ಕಾರ ಅದನ್ನು ತಿರಸ್ಕರಿಸಿತು. ಆದ್ದರಿಂದ, ಮರು-ಟೆಂಡರ್ ನಲ್ಲಿ ಆಂಧ್ರ ಪ್ರದೇಶದ ದೇಶೀಯ ಕಂಪನಿಯನ್ನು ಆಯ್ಕೆ ಮಾಡಲಾಯಿತು. ಟೆಂಡರ್ ಕಳೆದುಕೊಂಡ ಸಣ್ಣ ಕಂಪನಿಯೊಂದು ಇದರ ವಿರುದ್ಧ ನ್ಯಾಯಾಲಯದಲ್ಲಿ ಮೊಕದ್ದಮೆ ಹೂಡಿತು. ಆದರೆ, ವಿಝಿಂಜಂ ಬಂದರಿನಿಂದ ಪ್ರಭಾವಿತರಾದ ಕೆಲವು ವಿದೇಶಿ ಶಕ್ತಿಗಳು ಈ ಪ್ರಕರಣದ ಹಿಂದೆ ಇದ್ದಾರೆ ಎಂಬ ಸುದ್ದಿ ನಂತರ ಹೊರಬಿತ್ತು.
ಪಿಪಿಪಿ ಮಾದರಿಯಾಗಿ ಬದಲಾಯಿಸಿದ ಉಮ್ಮನ್ ಚಾಂಡಿ ಸರ್ಕಾರ
2011 ರಲ್ಲಿ ಅಧಿಕಾರ ವಹಿಸಿಕೊಂಡ ಉಮ್ಮನ್ ಚಾಂಡಿ ಸರ್ಕಾರ, ನ್ಯಾಯಾಲಯದ ಪ್ರಕರಣವನ್ನು ಮುಕ್ತಾಯಗೊಳಿಸಲು ಮತ್ತು ಈ ಯೋಜನೆಯನ್ನು ಮೂರು ವರ್ಷಗಳ ಕಾಲ ಕಾರ್ಯಗತಗೊಳಿಸಲು ಯಾವುದೇ ಆಸಕ್ತಿ ತೋರಿಸಲಿಲ್ಲ. ಒಂದೆಡೆ, ವಿಝಿಂಜಂ ಬಂದರು ನಿರ್ಮಾಣಕ್ಕೆ ಒತ್ತಾಯಿಸಿ ಜನ ಚಳುವಳಿಗಳು ನಡೆಯುತ್ತಿದ್ದವು. ಮತ್ತೊಂದೆಡೆ, 2014 ರಲ್ಲಿ ಕೇಂದ್ರದಲ್ಲಿ ಮೋದಿ ಸರ್ಕಾರ ರಚನೆಯಾದ ಹಿನ್ನೆಲೆಯಲ್ಲಿ, ಅದಾನಿ ಗ್ರೂಪ್ ಬಂದರುಗಳನ್ನು ಸ್ವಾಧೀನಪಡಿಸಿಕೊಳ್ಳುವಲ್ಲಿ ಉಪಕ್ರಮವನ್ನು ತೆಗೆದುಕೊಂಡಿತು.
ಜನಾಂದೋಲನದ ಒತ್ತಡದಿಂದಾಗಿ, ಉಮ್ಮನ್ ಚಾಂಡಿ ಸರ್ಕಾರವು 2015 ರಲ್ಲಿ ಟೆಂಡರ್ ಅನ್ನು ಮರು-ನೀಡಿತು. ಆದರೆ ಉಮ್ಮನ್ ಚಾಂಡಿ ಸರ್ಕಾರವು ಯೋಜನೆಯನ್ನು ಸರ್ಕಾರಿ ಸ್ವಾಮ್ಯದಿಂದ ಪಿಪಿಪಿ (ಸಾರ್ವಜನಿಕ ಖಾಸಗಿ ಯೋಜನೆ)ಗೆ ಬದಲಾಯಿಸಿತು ಮತ್ತು 2015 ರಲ್ಲಿ ಅದಾನಿ ಗ್ರೂಪ್ ಅನ್ನು ಪಾಲುದಾರರನ್ನಾಗಿ ಆಯ್ಕೆ ಮಾಡಿತು. ಉಮ್ಮನ್ ಚಾಂಡಿ ಸರ್ಕಾರವು ಇತರ ಹಲವು ನಕಾರಾತ್ಮಕ ಅಂಶಗಳನ್ನು ಒಪ್ಪಿಕೊಂಡಿರುವುದು ಇನ್ನೂ ಕ್ರೂರವಾಗಿದೆ.
2016 ರಲ್ಲಿ ಎಡ ಪ್ರಜಾಸತ್ತಾತ್ಮಕ ರಂಗ ಸರ್ಕಾರ ರಚನೆಯಾದಾಗ, ಈ ಯೋಜನೆಯ ಒಪ್ಪಂದಕ್ಕೆ ಸಹಿ ಹಾಕಲಾಯಿತು ಮತ್ತು ಆರಂಭಿಕ ಕೆಲಸಗಳು ಪ್ರಾರಂಭವಾಗಿದ್ದವು. ಆದ್ದರಿಂದ, ಬೇರೆ ಯಾವುದೇ ಆಯ್ಕೆಯಿಲ್ಲದೆ ಅದಾನಿ ಗ್ರೂಪ್ ಅನ್ನು ನಡೆಸಿಕೊಂಡು ಹೋಗುವ ಅಗತ್ಯವು ಈ ಕೆಳಗಿನ ಕಾರಣಗಳಿಂದ ಉದ್ಭವಿಸಿತು:
ಮೋದಿ ಸರ್ಕಾರವು ತನ್ನ ಪಾಲುದಾರ (ಅದಾನಿ) ನಷ್ಟವನ್ನು ಅನುಭವಿಸಲು ಬಿಡುವುದಿಲ್ಲ. ಅದಾನಿ ಗ್ರೂಪ್ ನ್ಯಾಯಾಲಯಕ್ಕೆ ಹೋದರೆ, ನ್ಯಾಯಾಲಯದ ವಿಚಾರಣೆಯಿಂದಾಗಿ ಯೋಜನೆ ಮತ್ತಷ್ಟು ವಿಳಂಬವಾಗುತ್ತದೆ. ಕೇರಳದ ಜನರು ವಿಝಿಂಜಂ ಬಂದರು ಯೋಜನೆಯನ್ನು ತಮ್ಮ ಕನಸಿನ ಯೋಜನೆಯಾಗಿ ನನಸಾಗಿಸಲು ಪ್ರಾರಂಭಿಸಿದರು. ಯಾವುದೇ ವಿಳಂಬವು ಜನರಲ್ಲಿ ಅಸಮಾಧಾನವನ್ನು ಉಂಟುಮಾಡುತ್ತದೆ. ಆದ್ದರಿಂದ, ಎಡ ಪ್ರಜಾಸತ್ತಾತ್ಮಕ ರಂಗ ಸರ್ಕಾರವು ಅದಾನಿ ಗ್ರೂಪ್ ನ ಭಾಗವಹಿಸುವಿಕೆಯೊಂದಿಗೆ ಈ ಯೋಜನೆಯನ್ನು ಮುಂದುವರಿಸಿತು.
ಕೇರಳ ಸರ್ಕಾರದ ಪಾಲು ಶೇ.63
ಈ ಯೋಜನೆಯ ಪ್ರಸ್ತುತ ಮೌಲ್ಯ ರೂ. 8867 ಕೋಟಿ. ಕೇರಳ ಸರ್ಕಾರ ಶೇ. 63 (5,370 ಕೋಟಿ); ಕೇಂದ್ರ ಸರ್ಕಾರ ಶೇ. 9 ಮತ್ತು ಅದಾನಿ ಗ್ರೂಪ್ ಶೇ.28 ಷೇರು ಪಾಲನ್ನು ಹೊಂದಿದೆ. ಕೆಲವು ಚರ್ಚುಗಳ ನೇತೃತ್ವದಲ್ಲಿ ಮೀನುಗಾರರ ಒಂದು ಭಾಗವು ಈ ಯೋಜನೆಯನ್ನು ವಿರೋಧಿಸಿತು. ಸಂಘ ಪರಿವಾರದ ಸದಸ್ಯರು ದೇವಾಲಯಗಳ ಹೆಸರಿನಲ್ಲಿ ಪ್ರತಿಭಟನೆ ನಡೆಸಿದರು. ಮುಖ್ಯಮಂತ್ರಿ ಪಿಣರಾಯಿ ವಿಜಯನ್ ನೇರವಾಗಿ ಮಧ್ಯಪ್ರವೇಶಿಸಿ ಶಾಂತಿ ಮಾತುಕತೆ ನಡೆಸಿ, ಮೀನುಗಾರರ ಪ್ರತಿಭಟನೆಯನ್ನು ಅಂತ್ಯಗೊಳಿಸಿದರು. 2018ರಲ್ಲಿ ಪೂರ್ಣಗೊಳ್ಳಬೇಕಿದ್ದ ಈ ಯೋಜನೆಯನ್ನು ಅದಾನಿ ಗ್ರೂಪ್ ‘ಫೋರ್ಸ್ ಮಜೂರ್’ ವರ್ಗದಲ್ಲಿ ವಿಳಂಬ ಮಾಡಿತು. ಇದಕ್ಕೆ ಭಾರೀ ಮಳೆ ಮತ್ತು ಕೋವಿಡ್ ಕಾರಣ ಎಂದು ಹೇಳಿತು.
ಆದ್ದರಿಂದ, ಎಡ ಪ್ರಜಾಸತ್ತಾತ್ಮಕ ರಂಗ ಸರ್ಕಾರವು ನ್ಯಾಯಾಲಯದಲ್ಲಿ ಪ್ರಕರಣ ದಾಖಲಿಸಿತು. ಒಂದು ಹಂತದಲ್ಲಿ, ಪಿಣರಾಯಿ ಸರ್ಕಾರ ಅದಾನಿ ಗ್ರೂಪ್‌ಗೆ ನಿಧಿ ಹಂಚಿಕೆ ಮಾಡುವುದನ್ನು ನಿಲ್ಲಿಸಿತು. ಅದಾದ ನಂತರವೇ ಕೆಲಸ ವೇಗವಾಗಿ ನಡೆಯಿತು. ಯೋಜನೆಗಳನ್ನು ಸಮಯಕ್ಕೆ ಸರಿಯಾಗಿ ಪೂರ್ಣಗೊಳಿಸುವಲ್ಲಿ ಪರಿಣಿತ ಎಂದು ಪರಿಗಣಿಸಲ್ಪಟ್ಟ ವಿ.ಎನ್. ವಾಸವನ್ ಅವರನ್ನು ಬಂದರು ಸಚಿವರನ್ನಾಗಿ ನೇಮಿಸಲಾಯಿತು. ಮೊದಲ ಮದರ್ ಶಿಪ್ ಜುಲೈ 2024ರಲ್ಲಿ ವಿಝಿಂಜಂ ಬಂದರಿಗೆ ಆಗಮಿಸಿತು. ಸೆಪ್ಟೆಂಬರ್ ನಲ್ಲಿ ಬಂದರು ಪೂರ್ಣ ಕಾರ್ಯಾಚರಣೆಯನ್ನು ಪ್ರಾರಂಭಿಸುತ್ತದೆ. ಈ ಬಂದರು ಕೇರಳದ ಜನರ ಕನಸಿನ ಯೋಜನೆ ಮಾತ್ರವಲ್ಲ; ಇದು ರಾಜ್ಯದ ಕೈಗಾರಿಕೀಕರಣದಲ್ಲಿ ಒಂದು ಪ್ರಮುಖ ತಿರುವು ಎಂದು ಅಂದಾಜಿಸಲಾಗಿದೆ.
ಕೈಗಾರಿಕಾ ಅಭಿವೃದ್ಧಿಯಲ್ಲಿ ಕೇರಳಕ್ಕೆ ವಂಚನೆ
ತಮಿಳುನಾಡು, ತೆಲಂಗಾಣ, ಆಂಧ್ರಪ್ರದೇಶ ಮತ್ತು ಕರ್ನಾಟಕಕ್ಕೆ ಹೋಲಿಸಿದರೆ ಕೇರಳ ಕೈಗಾರಿಕಾ ಅಭಿವೃದ್ಧಿಯಲ್ಲಿ ಹಿಂದುಳಿದ ರಾಜ್ಯವಾಗಿದೆ. ಶಿಕ್ಷಣ, ವೈದ್ಯಕೀಯ, ಆರೋಗ್ಯ ಸೇರಿದಂತೆ ಹಲವು ಸಾಮಾಜಿಕ ಸೂಚಕಗಳಲ್ಲಿ ಕೇರಳವು ದೊಡ್ಡ ಸಾಧನೆಗಳನ್ನು ಸಾಧಿಸಿದ್ದರೂ, ಕೈಗಾರಿಕಾ ಅಭಿವೃದ್ಧಿಯಲ್ಲಿ ಅಂತಹ ಸಾಧನೆಗಳನ್ನು ಸಾಧಿಸಲಾಗಿಲ್ಲ. ಇದಕ್ಕೆ ಪ್ರಮುಖ ಕಾರಣವೆಂದರೆ ಹಿಂದಿನ ಮತ್ತು ಈಗಿನ ಒಕ್ಕೂಟ ಸರ್ಕಾರಗಳ ಪಕ್ಷಪಾತದ ಧೋರಣೆ ಮತ್ತು ಖಾಸಗಿ ವಲಯದ ಉದಾಸೀನತೆ, ತಪ್ಪು ಕಾರಣಗಳಿಗಾಗಿ ಅದನ್ನು ನಿರ್ಲಕ್ಷಿಸುವಂತೆ ನಿರ್ದೇಶಿಸಲಾಗಿದೆ.
ಇಎಂಎಸ್ ಅವರು ಚೆನ್ನೈನಲ್ಲಿ ತಮಿಳುನಾಡಿನ ಉದ್ಯಮಿಗಳನ್ನು ಭೇಟಿಯಾಗಿ, ಕೇರಳದಲ್ಲಿ ರಬ್ಬರ್ ಉತ್ಪನ್ನಗಳ ಕಾರ್ಖಾನೆ ಸ್ಥಾಪಿಸಬೇಕು ಮತ್ತು ಕೇರಳ ಸರ್ಕಾರ ಸಂಪೂರ್ಣ ಸಹಕಾರ ನೀಡಲಿದೆ ಎಂದು ಹೇಳಿದರು. ಆದರೆ ಯಾವೊಬ್ಬ ಉದ್ಯಮಿಯೂ ಮುಂದೆ ಬರಲಿಲ್ಲ. 1950 ರ ದಶಕದ ಉತ್ತರಾರ್ಧದಲ್ಲಿ, ನೆಹರೂ ಸರ್ಕಾರವು ಬಿಎಚ್‌ಇಎಲ್ ಹೆಸರಿನಲ್ಲಿ ವಿದ್ಯುತ್ ಉತ್ಪಾದನಾ ಉಪಕರಣಗಳನ್ನು ತಯಾರಿಸಲು ಸ್ಥಾವರಗಳನ್ನು ಸ್ಥಾಪಿಸಲು ಯೋಜಿಸಿತು. ಈ ಉದ್ಯಮವನ್ನು ಪಡೆಯಲು ತಮಿಳುನಾಡು, ಆಂಧ್ರಪ್ರದೇಶ, ಕೇರಳ, ಕರ್ನಾಟಕ ಸ್ಪರ್ಧಿಸಿದವು. ಮೊದಲ ಹಂತದಲ್ಲಿ ಕೇರಳವನ್ನು ಈ ಪಟ್ಟಿಯಿಂದ ತೆಗೆದುಹಾಕಲಾಯಿತು. ಏಕೆಂದರೆ ಕೇರಳದಲ್ಲಿ ಕಮ್ಯುನಿಸ್ಟ್ ಚಳುವಳಿ ಪ್ರಬಲವಾಗಿದೆ ಮತ್ತು ಕಮ್ಯುನಿಸ್ಟರು ಅಲ್ಲಿನ ಪ್ರತಿಭಟನೆಗಳು ವ್ಯವಹಾರಗಳನ್ನು ನಡೆಸಲು ಬಿಡುವುದಿಲ್ಲ ಎಂಬ ಸುಳ್ಳು ಸಿದ್ಧಾಂತವನ್ನು ಹರಡಲಾಯಿತು.
ಇಂದು, ತಮಿಳುನಾಡಿನಲ್ಲಿ ಮೂರು ‘ಬಿಇಎಲ್’ ಸ್ಥಾವರಗಳಿವೆ, ಕರ್ನಾಟಕದಲ್ಲಿ ಎರಡು ‘ಬಿಇಎಲ್’ ಸ್ಥಾವರಗಳಿವೆ, ಆಂಧ್ರಪ್ರದೇಶದಲ್ಲಿ ಒಂದು ‘ಬಿಇಎಲ್’ ಸ್ಥಾವರ ಮತ್ತು ದೊಡ್ಡ ಸಂಶೋಧನಾ ಘಟಕವಿದೆ. ನಂತರ, ಝಾನ್ಸಿ, ಜಗದೀಶ್ ಪುರ, ರುದ್ರಪುರ, ಗೋವಿಂದವಾಲ್ ಮುಂತಾದ ಅನೇಕ ಕಡೆಗಳಲ್ಲಿ ಬಿಇಎಲ್ ಕಾರ್ಖಾನೆಗಳು ಆರಂಭವಾದವು. ಆದರೆ ಕೇರಳಕ್ಕೆ ಒಂದೇ ಒಂದು ಸ್ಥಾವರವನ್ನು ಹಂಚಿಕೆ ಮಾಡಿಲ್ಲ. ಯುನೈಟೆಡ್ ಪ್ರೋಗ್ರೆಸ್ಸಿವ್ ಅಲೈಯನ್ಸ್ (ಯುಪಿಎ) ಸರ್ಕಾರದ ಅವಧಿಯಲ್ಲಿ, ಪಾಲಕ್ಕಾಡ್ ರೈಲ್ವೆ ವಿಭಾಗವನ್ನು ವಿಭಜಿಸಿ ಸೇಲಂ ವಿಭಾಗವನ್ನು ರಚಿಸಲು ಪ್ರಯತ್ನಗಳು ನಡೆದವು. ಆಗಿನ ಕೈಗಾರಿಕಾ ಬೆಳವಣಿಗೆ ಅದಾಗಲೇ ಕಡಿಮೆ ಇದ್ದ ಕಾರಣ ವಿ.ಎಸ್.ಅಚ್ಯುತಾನಂದನ್ ಸರ್ಕಾರ ಇದಕ್ಕೆ ಆಕ್ಷೇಪ ವ್ಯಕ್ತಪಡಿಸಿತು. ನಂತರ, ರಾಜಿಯಾಗಿ, ಸೇಲಂ ವಿಭಾಗವನ್ನು ರಚಿಸಲು ಮತ್ತು ಕೇರಳಕ್ಕೆ ರೈಲ್ವೆ ಕೋಚ್ ಕಾರ್ಖಾನೆಯನ್ನು ಹಂಚಿಕೆ ಮಾಡಲು ನಿರ್ಧರಿಸಲಾಯಿತು. ಆದರೆ, ಇಲ್ಲಿಯವರೆಗೆ ರೈಲು ಕೋಚ್ ಕಾರ್ಖಾನೆ ಕೇರಳಕ್ಕೆ ಬಂದಿಲ್ಲ. ಮೋದಿ ಸರ್ಕಾರ ಪಾಲಕ್ಕಾಡ್ ರೈಲ್ವೆ ವಿಭಾಗವನ್ನು ಮರುವಿಂಗಡಿಸಲು ಮತ್ತು ಅದರ ಒಂದು ಭಾಗವನ್ನು ಮಂಗಳೂರು ವಿಭಾಗವಾಗಿ ಪರಿವರ್ತಿಸಲು ಪ್ರಯತ್ನಿಸುತ್ತಿದೆ. ಇವೆಲ್ಲವೂ ಕೇರಳ ಕೈಗಾರಿಕಾ ಅಭಿವೃದ್ಧಿಯಲ್ಲಿ ಎದುರಿಸುತ್ತಿರುವ ಸವಾಲುಗಳನ್ನು ಬಹಿರಂಗಪಡಿಸುವ ಸಂಗತಿಗಳು.
ಕೇರಳವು 4ನೇ ಕೈಗಾರಿಕಾ ಕ್ರಾಂತಿಯ ಕೇಂದ್ರವಾಗಿದೆ
ಈ ಸಂದರ್ಭದಲ್ಲಿ 2016 ರಲ್ಲಿ ಅಧಿಕಾರಕ್ಕೆ ಬಂದ ಪಿಣರಾಯಿ ವಿಜಯನ್ ಸರ್ಕಾರವು ಕೇರಳದ ಕೈಗಾರಿಕಾ ಅಭಿವೃದ್ಧಿಗೆ ಕೆಲವು ಪ್ರಮುಖ ಉಪಕ್ರಮಗಳನ್ನು ಕೈಗೊಂಡಿತು. ಕೇರಳದ ಕೇಂದ್ರ ಸಾರ್ವಜನಿಕ ವಲಯದ ಉದ್ಯಮವಾದ ಹಿಂದೂಸ್ತಾನ್ ನ್ಯೂಸ್ ಪ್ರಿಂಟ್, ಇನ್ ಸ್ಟ್ರುಮೆಂಟೇಶನ್ ಲಿಮಿಟೆಡ್ ಅನ್ನು ಮುಚ್ಚದಂತೆ ತಡೆಯಲು ಎಡ ಪ್ರಜಾಸತ್ತಾತ್ಮಕ ರಂಗ ಸರ್ಕಾರವೇ ಅದನ್ನು ಒಪ್ಪಿಕೊಂಡು ಪುನರ್ ರಚಿಸಿತು. ಮುಚ್ಚುವ ಹಂತದಲ್ಲಿದ್ದ ಕೇಂದ್ರ ಸರ್ಕಾರದ ರಸಗೊಬ್ಬರ ತಯಾರಿಕಾ ಕಂಪನಿ ಫ್ಯಾಕ್ಟ್ (FACT) ಪಿಣರಾಯಿ ವಿಜಯನ್ ಸರ್ಕಾರದ ನಿರಂತರ ಪ್ರಯತ್ನಗಳಿಂದಾಗಿ ಮತ್ತೆ ಕಾರ್ಯಾಚರಣೆ ಆರಂಭಿಸಿದೆ. ನಷ್ಟದಲ್ಲಿ ಕಾರ್ಯನಿರ್ವಹಿಸುತ್ತಿದ್ದ 20 ಕ್ಕೂ ಹೆಚ್ಚು ರಾಜ್ಯ ಸಾರ್ವಜನಿಕ ವಲಯಗಳನ್ನು ಕಾರ್ಮಿಕರ ಸಹಕಾರದೊಂದಿಗೆ ಲಾಭದಾಯಕವಾಗಿಸುವಲ್ಲಿ ಎಡ ಸರ್ಕಾರ ಯಶಸ್ವಿಯಾಗಿದೆ. ಕೇಂದ್ರ ಸರ್ಕಾರ ಮತ್ತು ಅನೇಕ ರಾಜ್ಯ ಸರ್ಕಾರಗಳು ಖಾಸಗೀಕರಣದ ದಿಕ್ಕಿನಲ್ಲಿ ಸಾಗುತ್ತಿದ್ದರೆ, ಕೇರಳದ ಎಡ ಪ್ರಜಾಸತ್ತಾತ್ಮಕ ರಂಗ ಸರ್ಕಾರವು ಸಾರ್ವಜನಿಕ ವಲಯವನ್ನು ಬಲಪಡಿಸಿತು.
ಈಗಾಗಲೇ ಕೊಚ್ಚಿ ವಿಮಾನ ನಿಲ್ದಾಣವನ್ನು ನಿರ್ವಹಿಸುತ್ತಿರುವ ರಾಜ್ಯ ಸರ್ಕಾರವು ಹೆಚ್ಚುವರಿಯಾಗಿ ಕಣ್ಣೂರು ವಿಮಾನ ನಿಲ್ದಾಣವನ್ನು ಕಾರ್ಯಗತಗೊಳಿಸಿದೆ. ದುಬೈ ಮೂಲದ `Zettfly’ ಎಂಬ ಕಂಪನಿಯ “ಏರ್ ಕೇರಳ” ಎಂಬ ವಿಮಾನ ಸೇವೆಯೂ ಶೀಘ್ರದಲ್ಲೇ ಪ್ರಾರಂಭವಾಗಲಿದೆ. ಖಾಸಗಿ ವಲಯದಲ್ಲಿ ಮುಚ್ಚಲ್ಪಟ್ಟಿದ್ದ ಅನೇಕ ಗೋಡಂಬಿ ಕಾರ್ಖಾನೆಗಳನ್ನು ಮತ್ತೆ ತೆರೆಯುವಲ್ಲಿ ಪಿಣರಾಯಿ ಸರ್ಕಾರ ಯಶಸ್ವಿಯಾಗಿದೆ. ಕಳೆದ 5 ವರ್ಷಗಳಲ್ಲಿ, ರೂ. 91,575 ಕೋಟಿ ರೂಪಾಯಿಗಳ ಹೂಡಿಕೆ ಮಾಡಲಾಗಿದೆ. ಅದರ ಪರಿಣಾಮವಾಗಿ 5 ಲಕ್ಷ ಉದ್ಯೋಗಾವಕಾಶಗಳು ಸೃಷ್ಟಿಯಾಗಿವೆ. ದೊಡ್ಡ ಕಂಪನಿಗಳು ಹೂಡಿಕೆ ಮಾಡಲು ಹಿಂಜರಿಯುತ್ತಿರುವ ವಾತಾವರಣದಲ್ಲಿ, ಕೇರಳ ಸರ್ಕಾರವು ಸಣ್ಣ, ಮಧ್ಯಮ ಕೈಗಾರಿಕೆಗಳನ್ನು ಸೃಷ್ಟಿಸಲು ಹೆಚ್ಚುವರಿ ಗಮನ ಹರಿಸುತ್ತಿದೆ. ಇದಲ್ಲದೆ, 72,000 ಕೋಟಿ ರೂಪಾಯಿ ಮೌಲ್ಯದ ಹಸಿರು ಹೈಡ್ರೋಜನ್ ಮತ್ತು ಅಮೋನಿಯಾ ಸ್ಥಾವರಗಳ ಯೋಜನೆಗಳನ್ನು ಸಹ ಜಾರಿಗೆ ತರಲಾಗುವುದು. ಹೊಸ ಕೈಗಾರಿಕೆಗಳಿಗೆ ಹೆಚ್ಚಿನ ಗಮನ ನೀಡುತ್ತಾ ಕೈಗಾರಿಕೆಗಳಿಗೆ ಪ್ರಾಮುಖ್ಯತೆ ನೀಡಲು ನಿರ್ಧರಿಸಲಾಗಿದೆ.
ವಾಟರ್ ಮೆಟ್ರೋ
ಉದಾಹರಣೆಗೆ, ಕೇರಳದಲ್ಲಿ “ವಾಟರ್ ಮೆಟ್ರೋ” ಯೋಜನೆಯನ್ನು ಜಾರಿಗೆ ತರಲಾಯಿತು, ಉದ್ದದ ಕರಾವಳಿ ಮತ್ತು ನೀರಿನ ಮಟ್ಟವನ್ನು ಗಣನೆಗೆ ತೆಗೆದುಕೊಳ್ಳಲಾಯಿತು. ಭಾರತದಲ್ಲಿಯೇ ಮೊದಲನೆಯದಾಗಿದ್ದ ಈ ಯೋಜನೆಗೆ ಸಾರ್ವಜನಿಕರಿಂದ ಉತ್ತಮ ಪ್ರತಿಕ್ರಿಯೆ ವ್ಯಕ್ತವಾಗಿದೆ. ದೊಡ್ಡ ಕಾರ್ಪೊರೇಟ್ ಗಳು ಕಾರ್ಖಾನೆಗಳನ್ನು ಸ್ಥಾಪಿಸಲು ಹಿಂಜರಿಯುತ್ತಿದ್ದ ಪರಿಸ್ಥಿತಿಯಲ್ಲಿ, ಕೇರಳ ಸರ್ಕಾರ ಮಾಹಿತಿ ತಂತ್ರಜ್ಞಾನದ ಮೇಲೆ ಹೆಚ್ಚು ಗಮನಹರಿಸಿತು. ನವೀನ ಸ್ಟಾರ್ಟ್ ಅಪ್ ಗಳಲ್ಲಿ ಕೇರಳ ಭಾರತದಲ್ಲಿ ಮೊದಲ ಸ್ಥಾನದಲ್ಲಿದೆ. ಐಬಿಎಂ ಸಂಸ್ಥೆಯ ಸಹಯೋಗದೊಂದಿಗೆ ಕೇರಳ ಸರ್ಕಾರವು ಕೊಚ್ಚಿಯಲ್ಲಿ ಕೃತಕ ಬುದ್ಧಿಮತ್ತೆಯ ಕುರಿತು ಸಮ್ಮೇಳನವನ್ನು ಆಯೋಜಿಸಿದೆ. ತಿರುವನಂತಪುರಂನಲ್ಲಿ ರೊಬೊಟಿಕ್ಸ್ ಸಮ್ಮೇಳನವನ್ನೂ ನಡೆಸಲಾಗಿದೆ.
ಜನರ ಬೆಂಬಲದೊಂದಿಗೆ ಸವಾಲನ್ನು ಜಯಿಸುತ್ತದೆ
ಕೇರಳವನ್ನು 4 ನೇ ಕೈಗಾರಿಕಾ ಕ್ರಾಂತಿಯ ರಾಷ್ಟ್ರೀಯ ಕೇಂದ್ರವನ್ನಾಗಿ ಮಾಡುವುದು ಕೇರಳ ಎಡ ಪ್ರಜಾಸತ್ತಾತ್ಮಕ ರಂಗ ಸರ್ಕಾರದ ಗುರಿಯಾಗಿದೆ. ಇತ್ತೀಚೆಗೆ ನಡೆದ ಸಿಪಿಐ(ಎಂ)ನ ರಾಜ್ಯ ಸಮ್ಮೇಳನದಲ್ಲಿ ಕೇರಳದ ಕೈಗಾರಿಕೀಕರಣ ಪ್ರಯತ್ನಗಳನ್ನು ವಿವರವಾಗಿ ಚರ್ಚಿಸಲಾಯಿತು. ರಾಜ್ಯ ಸರ್ಕಾರವನ್ನು ಶತ್ರುವೆಂದು ಪರಿಗಣಿಸುವ ಕೇಂದ್ರ ಸರ್ಕಾರದ ಅಡಿಯಲ್ಲಿ ಕನಿಷ್ಠ ಅಧಿಕಾರ ಹೊಂದಿರುವ ಎಡಪಂಥೀಯ ರಾಜ್ಯ ಸರ್ಕಾರವು ಎದುರಿಸುತ್ತಿರುವ ತೊಂದರೆಗಳು ಮತ್ತು ಸವಾಲುಗಳಿಗೆ ಕೇರಳ ಎಡ ಪ್ರಜಾಸತ್ತಾತ್ಮಕ ರಂಗ ಸರ್ಕಾರದ ಅನುಭವವು ಒಂದು ಉದಾಹರಣೆಯಾಗಿದೆ. ಜನರ ಬೆಂಬಲದೊಂದಿಗೆ ಪಿಣರಾಯಿ ವಿಜಯನ್ ನೇತೃತ್ವದ ಸರ್ಕಾರ ಈ ಸವಾಲನ್ನು ಜಯಿಸುತ್ತದೆ ಎಂಬುದರಲ್ಲಿ ಸಂದೇಹವಿಲ್ಲ.
ಇದನ್ನೂ ಓದಿ: ಪ್ರೀತಿಪದಗಳ ಸಹಯಾನಿ ಡಾ. ವಿಠ್ಠಲ ಭಂಡಾರಿ ನೆನಪು Janashakthi Media
