ಬೆಂಗಳೂರು: ನಗರದ ಕೃತಕ ಬುದ್ಧಿಮತ್ತೆ ಆಧಾರಿತ ಸಂಚಾರ ಕ್ಯಾಮೆರಾ ಮಾಡಿದ ವಿಚಿತ್ರ ಎಡವಟ್ಟಿನಿಂದ ಗಿಟಾರ್ ಹೊತ್ತುಕೊಂಡು ಸ್ಕೂಟರ್ನಲ್ಲಿ ತೆರಳುತ್ತಿದ್ದ ವ್ಯಕ್ತಿಯೊಬ್ಬರಿಗೆ ₹500 ದಂಡ ವಿಧಿಸಲಾಗಿದೆ. ಹಿಂಬದಿ ಸವಾರ ಹೆಲ್ಮೆಟ್ ಧರಿಸಿಲ್ಲ ಎಂದು ಕ್ಯಾಮೆರಾ ತಪ್ಪಾಗಿ ಗುರುತಿಸಿದ್ದು, ವಾಸ್ತವದಲ್ಲಿ ಸ್ಕೂಟರ್ನ ಹಿಂಭಾಗದಲ್ಲಿದ್ದದ್ದು ವ್ಯಕ್ತಿಯಲ್ಲ, ಗಿಟಾರ್ ಆಗಿತ್ತು. ಗಿಟಾರ್ಗೆ
ಹೆಬ್ಬಾಳ ನಿವಾಸಿ ಸೌವಿಕ್ ದತ್ತ ಅವರು ಸೆಪ್ಟೆಂಬರ್ 15ರಂದು ತಮ್ಮ ಪತ್ನಿಯ ದ್ವಿಚಕ್ರ ವಾಹನದಲ್ಲಿ ಒಬ್ಬರೇ ಸಂಚರಿಸುತ್ತಿದ್ದರು. ತಲೆಗೆ ಹೆಲ್ಮೆಟ್ ಧರಿಸಿದ್ದ ಅವರು ಬೆನ್ನಿಗೆ ಗಿಟಾರ್ ಕಟ್ಟಿಕೊಂಡಿದ್ದರು. ಹೆಬ್ಬಾಳದಿಂದ ಟಿನ್ ಫ್ಯಾಕ್ಟರಿ ಕಡೆಗೆ ತೆರಳುತ್ತಿದ್ದ ವೇಳೆ ಮಾರ್ಗದಲ್ಲಿದ್ದ ಎಐ ಕ್ಯಾಮೆರಾ ಗಿಟಾರ್ ಅನ್ನು ಹಿಂಬದಿ ಸವಾರ ಎಂದು ತಪ್ಪಾಗಿ ಗ್ರಹಿಸಿದೆ. ಬಳಿಕ ಹೆಲ್ಮೆಟ್ ಇಲ್ಲದ ಹಿಂಬದಿ ಸವಾರನಿದ್ದಾನೆಂದು ಗುರುತಿಸಿ ₹500ರ ಇ-ಚಲನ್ ಜಾರಿಯಾಗಿದೆ. ಗಿಟಾರ್ಗೆ
ಇದನ್ನೂ ಓದಿ : 10 ವರ್ಷ ಮನವಿ, ಇನ್ನೂ ಗುಂಡಿಗಳ ರಸ್ತೆ! ಬೆಂಗಳೂರಿನ ದೊಡ್ಡಮರ ರಸ್ತೆಯ ದುಸ್ಥಿತಿ
ಚಲನ್ ಬಂದ ಬಳಿಕ ಸೌವಿಕ್ ದತ್ತ ಅವರು ಅದರಲ್ಲಿದ್ದ ಚಿತ್ರವನ್ನು ಪರಿಶೀಲಿಸಿದಾಗ ಎಡವಟ್ಟು ಬೆಳಕಿಗೆ ಬಂದಿದೆ. ಚಿತ್ರದಲ್ಲಿ ಅವರು ಹೆಲ್ಮೆಟ್ ಧರಿಸಿ ಒಬ್ಬರೇ ವಾಹನ ಚಲಾಯಿಸುತ್ತಿರುವುದು ಸ್ಪಷ್ಟವಾಗಿತ್ತು. ಬೆನ್ನಿನಲ್ಲಿದ್ದ ಗಿಟಾರ್ ಅನ್ನು ಕ್ಯಾಮೆರಾ ಎರಡನೇ ಸವಾರ ಎಂದು ಗುರುತಿಸಿರುವುದು ಕಂಡುಬಂದಿದೆ. ಚಲನ್ ಅವರ ಪತ್ನಿಯ ಹೆಸರಿನಲ್ಲಿದ್ದ ದ್ವಿಚಕ್ರ ವಾಹನಕ್ಕೆ ಸಂಬಂಧಿಸಿದ್ದರಿಂದ, ಅದೇ ಖಾತೆಗೆ ದಂಡದ ನೋಟಿಸ್ ತಲುಪಿತ್ತು.
ಈ ಕುರಿತು ಸೌವಿಕ್ ದತ್ತ ಅವರು ಸಾಮಾಜಿಕ ಜಾಲತಾಣದಲ್ಲಿ ಚಲನ್ ಮತ್ತು ವಾಹನದ ಚಿತ್ರವನ್ನು ಹಂಚಿಕೊಂಡು, ತಾವು ಒಬ್ಬರೇ ಸಂಚರಿಸುತ್ತಿದ್ದರೂ ಹಿಂಬದಿ ಸವಾರ ಹೆಲ್ಮೆಟ್ ಧರಿಸಿಲ್ಲ ಎಂಬ ಕಾರಣಕ್ಕೆ ದಂಡ ವಿಧಿಸಿರುವುದನ್ನು ಪ್ರಶ್ನಿಸಿದರು. ಎಐ ಆಧಾರಿತ ಸಂಚಾರ ನಿಯಮ ಜಾರಿ ವ್ಯವಸ್ಥೆಯ ನಿಖರತೆಯ ಬಗ್ಗೆಯೂ ಅವರು ಪ್ರಶ್ನೆ ಎತ್ತಿ, ಚಲನ್ ರದ್ದುಪಡಿಸುವಂತೆ ಬೆಂಗಳೂರು ಸಂಚಾರ ಪೊಲೀಸರನ್ನು ಕೋರಿದರು. ಈ ಪೋಸ್ಟ್ ಬಳಿಕ ಸಾಮಾಜಿಕ ಜಾಲತಾಣಗಳಲ್ಲಿ ವ್ಯಾಪಕವಾಗಿ ಚರ್ಚೆಗೆ ಗ್ರಾಸವಾಯಿತು.ಗಿಟಾರ್ಗೆ
ವಿಷಯ ಗಮನಕ್ಕೆ ಬಂದ ಬಳಿಕ ಬೆಂಗಳೂರು ಸಂಚಾರ ಪೊಲೀಸರು ಸೌವಿಕ್ ದತ್ತ ಅವರನ್ನು ಸಂಪರ್ಕಿಸಿ ಚಲನ್ ಸರಿಪಡಿಸುವಂತೆ ಕ್ರಮ ಕೈಗೊಂಡಿದ್ದಾರೆ. ನಂತರ ಚಲನ್ ರದ್ದುಗೊಂಡಿದೆ ಎಂದು ದತ್ತ ಸಾಮಾಜಿಕ ಜಾಲತಾಣದಲ್ಲಿ ತಿಳಿಸಿದ್ದಾರೆ.
ನಗರದಲ್ಲಿ ಎಐ ಆಧಾರಿತ ಸಂಚಾರ ನಿಯಮ ಉಲ್ಲಂಘನೆ ಪತ್ತೆ ವ್ಯವಸ್ಥೆ ಬಳಸಲಾಗುತ್ತಿದ್ದು, ಇಂತಹ ತಾಂತ್ರಿಕ ವ್ಯವಸ್ಥೆಗಳು ಕೆಲವೊಮ್ಮೆ ತಪ್ಪು ಗುರುತಿಸುವಿಕೆ ಮಾಡಬಹುದು ಎಂದು ಸಂಚಾರ ಪೊಲೀಸ್ ಅಧಿಕಾರಿಯೊಬ್ಬರು ತಿಳಿಸಿದ್ದಾರೆ. ತಪ್ಪಾಗಿ ಗುರುತಿಸಲ್ಪಟ್ಟ ಪ್ರಕರಣಗಳನ್ನು ಪರಿಶೀಲಿಸಿ ತಿದ್ದುಪಡಿ ಮಾಡಲು ವ್ಯವಸ್ಥೆ ಇದೆ; ನಿರಂತರವಾಗಿ ಹೊಸ ದತ್ತಾಂಶ ಒದಗಿಸುವ ಮೂಲಕ ವ್ಯವಸ್ಥೆಯ ನಿಖರತೆಯನ್ನು ಸುಧಾರಿಸಲಾಗುತ್ತಿದೆ ಎಂದು ಅಧಿಕಾರಿಗಳು ಹೇಳಿದ್ದಾರೆ. ಗಿಟಾರ್ಗೆ
ಇದನ್ನೂ ನೋಡಿ : ನೂರರ ನಮನ – ಇಂದಿಗೆ ಋತ್ವಿಕ್ ಘಟಕ್ | ಉಪನ್ಯಾಸ : ಶ್ರೀಪಾದ ಭಟ್, ಫಿಲಂ ಪರಿಣಿತರು
