ದೊಡ್ಡ ಖಾಸಗಿ ಕಂಪನಿಗಳಿಗೆ ತಮ್ಮದೇ ಬ್ಯಾಂಕ್‌ಗಳನ್ನು ತೆರೆಯಲು ಲೈಸೆನ್ಸ್‌ ಕೊಡುವುದು ಎಂದರೆ ಹಣಕಾಸು ವ್ಯವಸ್ಥೆಗೆ ಬಾಂಬ್‌ ಎಸೆದಂತೆ…!ಇದೊಂದು ಕೆಟ್ಟ ಪರಿಕಲ್ಪನೆ,” ಎಂದು ಆರ್‌ಬಿಐನ ಮಾಜಿ ಗವರ್ನರ್‌ ರಘುರಾಮ್‌ ರಾಜನ್‌ ಮತ್ತು ಮಾಜಿ ಡೆಪ್ಯುಟಿ ಗವರ್ನರ್‌ ವಿರಳ್‌ ಆಚಾರ್ಯ ಎಚ್ಚರಿಸಿದ್ದಾರೆ.
ಇಂಟ್ರೊ ಖಾಸಗಿ ವಲಯದ ದೊಡ್ಡ ಕಂಪನಿಗಳಿಗೆ ದೇಶದಲ್ಲಿ ಪೂರ್ಣ ಪ್ರಮಾಣದ ಬ್ಯಾಂಕ್‌ಗಳನ್ನು ಸ್ಥಾಪಿಸಲು ಅನುಮತಿ ನೀಡುವ ಬಗ್ಗೆ ಆರ್‌ಬಿಐನ ಆಂತರಿಕ ಸಮಿತಿ ಶಿಫಾರಸು ಸಲ್ಲಿಸಿದೆ. ಆದರೆ ಇದಕ್ಕೆ ಸ್ವತಃ ಸಮಿತಿಯ ಬಹುತೇಕ ಸದಸ್ಯರು ಸೇರಿದಂತೆ ಹಲವರು ವಿರೋಧವನ್ನೂ ವ್ಯಕ್ತಪಡಿಸಿದ್ದಾರೆ! ಹಾಗಾದರೆ ಏನಿದು ವಿವಾದ? ಇಲ್ಲಿದೆ ವಿವರ.
”ದೊಡ್ಡ ಖಾಸಗಿ ಕಂಪನಿಗಳಿಗೆ ತಮ್ಮದೇ ಬ್ಯಾಂಕ್‌ಗಳನ್ನು ತೆರೆಯಲು ಲೈಸೆನ್ಸ್‌ ಕೊಡುವುದು ಎಂದರೆ ಹಣಕಾಸು ವ್ಯವಸ್ಥೆಗೆ ಬಾಂಬ್‌ ಎಸೆದಂತೆ…! ದೊಡ್ಡ ಸಾಲಗಾರನ ಕೈಯಲ್ಲೇ ಸ್ವಂತ ಬ್ಯಾಂಕ್‌ ಕೂಡ ಇದ್ದರೆ, ಅಂಥ ಬ್ಯಾಂಕ್‌ ಒಳ್ಳೆಯ ರೀತಿಯಲ್ಲಿ ಸಾಲ ನೀಡೀತೆ? ಇದೊಂದು ಕೆಟ್ಟ ಪರಿಕಲ್ಪನೆ,” ಎಂದು ಆರ್‌ಬಿಐನ ಮಾಜಿ ಗವರ್ನರ್‌ ರಘುರಾಮ್‌ ರಾಜನ್‌ ಹಾಗೂ ಮಾಜಿ ಡೆಪ್ಯುಟಿ ಗವರ್ನರ್‌ ವಿರಳ್‌ ಆಚಾರ್ಯ ಎಚ್ಚರಿಸಿದ್ದಾರೆ.
ಆರ್‌ಬಿಐನ ಆಂತರಿಕ ಸಮಿತಿ ಅಥವಾ ಇಂಟರ್ನಲ್‌ ವರ್ಕಿಂಗ್‌ ಗ್ರೂಪ್‌, ಕಾರ್ಪೊರೇಟ್‌ ಕಂಪನಿಗಳಿಗೆ ಬ್ಯಾಂಕ್‌ ಲೈಸೆನ್ಸ್‌ ನೀಡುವ ಬಗ್ಗೆ ಸಲ್ಲಿಸಿರುವ ಪ್ರಸ್ತಾಪವನ್ನು ಇಬ್ಬರೂ ಖಡಾಖಂಡಿತವಾಗಿ ವಿರೋಧಿಸಿದ್ದಾರೆ.
ಖಾಸಗಿ ಕಂಪನಿಗಳಿಗೆ ಬ್ಯಾಂಕಿಂಗ್‌ ಲೈಸೆನ್ಸ್‌
ಬ್ಯಾಂಕಿಂಗ್‌ನಲ್ಲಿ ಖಾಸಗೀಕರಣಕ್ಕೆ ಉತ್ತೇಜನ ನೀಡುವ ನಿಟ್ಟಿನಲ್ಲಿ ಎರಡು ಮುಖ್ಯ ಬೆಳವಣಿಗೆಯನ್ನು ಗಮನಿಸಬಹುದು. ಸಾರ್ವಜನಿಕ ವಲಯದ, ಸಂಕಷ್ಟದಲ್ಲಿರುವ, ವಸೂಲಾಗದ ಸಾಲದ ಹೊರೆಯಿಂದ ಬಳಲುತ್ತಿರುವ ಬ್ಯಾಂಕ್‌ಗಳನ್ನು ಖಾಸಗೀಕರಣಗೊಳಿಸಲು ಸರಕಾರ ಈಗಾಗಲೇ ಮುಂದಾಗಿದೆ.
ಐಡಿಬಿಐ, ಪಂಜಾಬ್‌ ಆ್ಯಂಡ್‌ ಸಿಂಧ್‌ ಬ್ಯಾಂಕ್‌, ಬ್ಯಾಂಕ್‌ ಆಫ್‌ ಮಹಾರಾಷ್ಟ್ರ, ಯುಕೊ ಬ್ಯಾಂಕ್‌ ಅನ್ನು ಶೀಘ್ರ ಖಾಸಗೀಕರಣಗೊಳಿಸಲು ಸರಕಾರ ಮುಂದಾಗಿದೆ. ಎರಡನೆಯದಾಗಿ ಖಾಸಗಿ ಬ್ಯಾಂಕ್‌ ಸ್ಥಾಪನೆಗೆ ಕಾರ್ಪೊರೇಟ್‌ ಕಂಪನಿಗಳಿಗೆ ಲೈಸೆನ್ಸ್‌ ವಿತರಿಸಲು ಪರಿಶೀಲಿಸುತ್ತಿದೆ.
ಆರ್‌ಬಿಐ ಸಮಿತಿಯ ಶಿಫಾರಸುಗಳು
- ದೊಡ್ಡ ಕಾರ್ಪೊರೇಟ್‌ ಅಥವಾ ಕೈಗಾರಿಕಾ ಸಮೂಹಗಳಿಗೆ ಬ್ಯಾಂಕ್‌ಗಳನ್ನು ಸ್ಥಾಪಿಸಲು ಅನುಮತಿ ನೀಡಬಹುದು. ಆದರೆ ಅದಕ್ಕೂ ಮನ್ನ ಬ್ಯಾಂಕಿಂಗ್‌ ನಿಯಂತ್ರಕ ಕಾಯಿದೆ-1949 ಅನ್ನು ತಿದ್ದುಪಡಿ ಮಾಡಲೇಬೇಕು. ಬ್ಯಾಂಕ್‌ ತೆರೆಯುವ ಖಾಸಗಿ ಸಮೂಹಕ್ಕೇ ಸೇರಿದ ಇತರ ಕಂಪನಿಗಳು ಮತ್ತು ಹಣಕಾಸು ಸಂಸ್ಥೆಗಳಿಗೆ ಈ ಬ್ಯಾಂಕಿನ ಸಾಲ ವಿತರಣೆಯನ್ನು ತಡೆಯಲು ಕಾಯಿದೆಗೆ ತಿದ್ದುಪಡಿ ಅಗತ್ಯ.
- ಖಾಸಗಿ ಬ್ಯಾಂಕ್‌ಗಳಲ್ಲಿ ಪ್ರವರ್ತಕರ ಷೇರುಗಳನ್ನು (15 ವರ್ಷಗಳಲ್ಲಿ) ಶೇ.15ರಿಂದ ಶೇ.26ಕ್ಕೆ ಏರಿಸಬಹುದು.
- ಬ್ಯಾಂಕೇತರ ಹಣಕಾಸು ಸಂಸ್ಥೆಯನ್ನು (ಎನ್‌ಬಿಎಫ್‌ಸಿ) ಬ್ಯಾಂಕ್‌ ಆಗಿ ಪರಿವರ್ತಿಸಬೇಕಿದ್ದರೆ, ಅದರ ಆಸ್ತಿಯ ಗಾತ್ರ ಕನಿಷ್ಠ 50,000 ಕೋಟಿ ರೂ. ಆಗಿರಬೇಕು. 10 ವರ್ಷಗಳ ಅನುಭವ ಇರಬೇಕು.
- ಪೇಮೆಂಟ್ಸ್‌ ಬ್ಯಾಂಕ್‌ಗಳನ್ನು ಸಣ್ಣ ಹಣಕಾಸು ಬ್ಯಾಂಕ್‌ ಆಗಿ ಪರಿವರ್ತಿಸಬೇಕಿದ್ದರೆ, ಅಂಥ ಬ್ಯಾಂಕಿಗೆ 3 ವರ್ಷಗಳ ಅನುಭವ ಇರಬೇಕು.
- ಹೊಸ ಸಾರ್ವತ್ರಿಕ ಬ್ಯಾಂಕ್‌ ಸ್ಥಾಪನೆಗೆ ಕನಿಷ್ಠ ಬಂಡವಾಳದ ಮಿತಿಯನ್ನು ಈಗಿನ 500 ಕೋಟಿ ರೂ.ಗಳಿಂದ 1,000 ಕೋಟಿ ರೂ.ಗೆ ಏರಿಸಬೇಕು. ಸಣ್ಣ ಹಣಕಾಸು ಬ್ಯಾಂಕ್‌ ಸ್ಥಾಪನೆಗೆ ಕನಿಷ್ಠ ಬಂಡವಾಳ ಮಿತಿಯನ್ನು ಈಗಿನ 200 ಕೋಟಿ ರೂ.ಗಳಿಂದ 300 ಕೋಟಿ ರೂ.ಗೆ ಏರಿಸಬೇಕು.
- ಪೂರ್ಣ ಪ್ರಮಾಣದ ಎಲ್ಲ ಹೊಸ ಬ್ಯಾಂಕ್‌ಗಳ ಸ್ವರೂಪವು ಆರ್‌ಬಿಐ ವ್ಯಾಪ್ತಿಯಲ್ಲಿರುವ ‘ನಾನ್‌-ಆಪರೇಟಿವ್‌ ಫೈನಾನ್ಷಿಯಲ್‌ ಹೋಲ್ಡಿಂಗ್‌ ಕಂಪನಿ’ (ಎನ್‌ಒಎಫ್‌ಎಚ್‌ಸಿ) ಪದ್ಧತಿಯಲ್ಲಿಯೇ ಮುಂದುವರಿಯಬೇಕು. ಹೀಗಿದ್ದರೂ, ಇದು ಬ್ಯಾಂಕಿನ ಪ್ರವರ್ತಕ ಕಾರ್ಪೊರೇಟ್‌ ಕಂಪನಿಯು, ಇತರ ಕಂಪನಿಗಳನ್ನೂ ಹೊಂದಿದ್ದರೆ ಮಾತ್ರ ಕಡ್ಡಾಯವಾಗಿರುತ್ತದೆ.
- ಭಾರತದಲ್ಲಿ ಬ್ಯಾಂಕಿಂಗ್‌ ವಲಯ ಬೆಳೆದಿದ್ದರೂ, ಬ್ಯಾಂಕ್‌ಗಳ ಒಟ್ಟು ಬ್ಯಾಲೆನ್ಸ್‌, ಜಿಡಿಪಿಯ ಶೇ.70ಕ್ಕಿಂತಲೂ ಕಡಿಮೆ. ಜಗತ್ತಿನ ಇತರ ಪ್ರಮುಖ ದೇಶಗಳಿಗೆ ಹೋಲಿಸಿದರೆ ಇದು ಕಡಿಮೆ. ಟಾಪ್‌ 100 ಬ್ಯಾಂಕ್‌ಗಳಲ್ಲಿ ಭಾರತದ್ದು ಒಂದೇ.
- ಖಾಸಗಿ ಬ್ಯಾಂಕ್‌ಗಳು ಠೇವಣಿ ಸಂಗ್ರಹ ಮತ್ತು ಸಾಲ ವಿತರಣೆಯಲ್ಲಿ ಪ್ರತಿ ವರ್ಷ ವಿಸ್ತರಿಸುತ್ತಿದ್ದು, 2020ರಲ್ಲಿ ಅನುಕ್ರಮವಾಗಿ ಶೇ.30.35 ಮತ್ತು 36.04ರಷ್ಟು ವೃದ್ಧಿಸಿವೆ.
- ಭಾರತದಲ್ಲಿ ಸಾರ್ವಜನಿಕ ಬ್ಯಾಂಕ್‌ ಹಾಗೂ ಖಾಸಗಿ ಬ್ಯಾಂಕ್‌ ಎರಡೂ ವಲಯದ ಬೆಳವಣಿಗೆಗೆ ಅವಕಾಶ ಇದೆ.
ಆರ್‌ಬಿಐ ಸಮಿತಿಯ ಬಹುತೇಕ ಸದಸ್ಯರ ವಿರೋಧ!
ಕಾರ್ಪೊರೇಟ್‌ ಕಂಪನಿಗಳಿಗೆ ಬ್ಯಾಂಕ್‌ ಲೈಸೆನ್ಸ್‌ ನೀಡುವುದಕ್ಕೆ ಸಂಬಂಧಿಸಿ ಸಲಹೆ ನೀಡಲು ರಿಸರ್ವ್‌ ಬ್ಯಾಂಕ್‌ ರಚಿಸಿದ್ದ ಆಂತರಿಕ ತಜ್ಞರ ಸಮಿತಿಯಲ್ಲಿ (ಐಡಬ್ಲ್ಯುಜಿ) ಐವರು ಸದಸ್ಯರಿದ್ದಾರೆ. ಗಮನಾರ್ಹ ಅಂಶವೆಂದರೆ ಈ ಪೈಕಿ ಒಬ್ಬರು ಬಿಟ್ಟರೆ, ಉಳಿದ ಎಲ್ಲರೂ, ಭಾರಿ ಕಾರ್ಪೊರೇಟ್‌, ಕೈಗಾರಿಕಾ ಉದ್ದಿಮೆಗಳಿಗೆ ಪೂರ್ಣ ಪ್ರಮಾಣದ ಬ್ಯಾಂಕ್‌ಗಳನ್ನು ಸ್ಥಾಪಿಸಲು ಅನುಮತಿ ನೀಡಬಾರದು ಎಂದು ಅಭಿಪ್ರಾಯ ಪಟ್ಟಿದ್ದಾರೆ. ಕಾರಣ ಕಾರ್ಪೊರೇಟ್‌ ಸಮೂಹಗಳಲ್ಲಿನ ಆಡಳಿತ ವ್ಯವಸ್ಥೆಗಳು ಅಂತಾರಾಷ್ಟ್ರೀಯ ದರ್ಜೆಯನ್ನು ಇನ್ನೂ ಮುಟ್ಟದಿರುವುದು.
ಕಾರ್ಪೊರೇಟ್‌ ಕಂಪನಿಗಳ ನಿಯಂತ್ರಣ ಕಷ್ಟ
ಒಂದು ವೇಳೆ ಖಾಸಗಿ ವಲಯದ ದೊಡ್ಡ ಕಂಪನಿಗಳಿಗೆ ಸ್ವಂತ ಬ್ಯಾಂಕ್‌ ಸ್ಥಾಪನೆಗೆ ಅನುಮತಿ ಕೊಟ್ಟರೆ, ಅವುಗಳ ಹಣಕಾಸು ಚಟುವಟಿಕೆಗಳ ಮೇಲೆ ಕೂಲಂಕಷ ನಿಗಾ ವಹಿಸುವುದು ಕಷ್ಟಕರವಾಗಲಿದೆ. ಅಂಥ ಸಮೂಹದ ಇತರ ಬಿಸಿನೆಸ್‌ಗಳಲ್ಲಿನ ಒತ್ತಡಗಳು ಬ್ಯಾಂಕಿನ ಮೇಲೆ ಪ್ರಭಾವ ಬೀರುವ ಅಪಾಯ ಇರುತ್ತದೆ.
ಈ ಕಾರ್ಪೊರೇಟ್‌ ಗ್ರೂಪ್‌ಗಳು ತಮ್ಮದೇ ಅಧೀನದಲ್ಲಿರುವ ಇತರ ಕಂಪನಿಗಳಿಗೆ ಸಾಲ ವಿತರಿಸುವಂತೆ ಬ್ಯಾಂಕ್‌ನ ಮೇಲೆ ಒತ್ತಡ ಹೇರುವ ಸಾಧ್ಯತೆ ಇದೆ. ತಮಗೆ ಬೇಕಾದವರಿಗೆ ಮಾತ್ರ ಸಾಲ ವಿತರಣೆ ಇತ್ಯಾದಿ ದುರ್ಬಳಕೆಯಾಗುವ ಅಪಾಯ ಇದೆ.
ಇಂಥ ಬ್ಯಾಂಕ್‌ಗಳ ಆಡಳಿತ ಮಂಡಳಿಯಲ್ಲಿ ಕಾರ್ಪೊರೇಟ್‌ ಸಮೂಹದ ಪ್ರಭಾವವನ್ನು ತಡೆಯುವುದು ಕಷ್ಟ. ಗ್ರೂಪ್‌ಗಳಲ್ಲಿ ಭಿನ್ನ ಬಂಡವಾಳ ವ್ಯವಸ್ಥೆ ಇದ್ದಾಗ, ಫಂಡ್‌ಗಳ ವರ್ಗಾವಣೆಗಳನ್ನು ಪರಿಶೀಲಿಸುವುದೂ ಕಷ್ಟಕರ. ಉತ್ತಮ ಆಡಳಿತ ವ್ಯವಸ್ಥೆ ಇರುವ ಬ್ಯಾಂಕಿಗೆ ಬಂಡವಾಳ ತರಿಸಿಕೊಳ್ಳಲು ಕಾರ್ಪೊರೇಟ್‌ ಕಂಪನಿಗಳಿಗಿಂತಲೂ ಭಿನ್ನ ಮೂಲಗಳು ಇವೆ. ಉದಾಹರಣೆಗೆ ಈಕ್ವಿಟಿ ಮಾರುಕಟ್ಟೆ ನಮ್ಮಲ್ಲಿ ಚೆನ್ನಾಗಿ ಅಭಿವೃದ್ಧಿಯಾಗಿದೆ. ಅದನ್ನು ಬಳಸಿಕೊಳ್ಳಬಹುದು.
ಆದ್ದರಿಂದ ಕಾರ್ಪೊರೇಟ್‌, ಕೈಗಾರಿಕಾ ಗ್ರೂಪ್‌ಗಳಿಗೆ ಬ್ಯಾಂಕ್‌ ಲೈಸೆನ್ಸ್‌ ನೀಡುವ ಮುನ್ನ, ಅವುಗಳನ್ನು ನಿಯಂತ್ರಿಸಲು ಮತ್ತು ಮೇಲುಸ್ತುವಾರಿ ವ್ಯವಸ್ಥೆಯನ್ನು ಗಣನೀಯವಾಗಿ ಬಲಪಡಿಸಬೇಕು ಎಂದು ಬಹುತೇಕ ತಜ್ಞರು ಅಭಿಪ್ರಾಯ ತಿಳಿಸಿದ್ದಾರೆ. ಹೀಗಿದ್ದರೂ, ದೊಡ್ಡ ಗಾತ್ರದ ಎನ್‌ಬಿಎಫ್‌ಸಿಗಳನ್ನು, ಅವುಗಳು ಉತ್ತಮ ಸ್ಥಿತಿಯಲ್ಲಿದ್ದರೆ ಪೂರ್ಣ ಪ್ರಮಾಣದ ಬ್ಯಾಂಕ್‌ಗಳಾಗಿ ಪರಿವರ್ತಿಸಬಹುದು ಎಂದು ತಜ್ಞರು ಹೇಳಿದ್ದಾರೆ.
ಆರ್‌ಬಿಐ ಮಾಜಿ ಗವರ್ನರ್‌ ರಘುರಾಮ್‌ ರಾಜನ್‌ ವಿರೋಧ ಏಕೆ?
ಕೈಗಾರಿಕಾ ಸಮೂಹಗಳಿಗೆ ತಮ್ಮದೇ ಬ್ಯಾಂಕ್‌ ಸ್ಥಾಪನೆಗೆ ಅವಕಾಶ ಕೊಟ್ಟರೆ, ಅವುಗಳಿಗೆ ಹಣಕಾಸು ವ್ಯವಸ್ಥೆ ಮಾಡಿಕೊಳ್ಳುವುದು ಸುಲಭವಾಗುತ್ತದೆಯೇ, ವಿನಾಃ ಇತರರಿಗೆ ಒಳ್ಳೆಯ ರೀತಿಯಲ್ಲಿ ಸಾಲ ಸಿಗುವುದು ದುರ್ಲಭ.
ಸ್ವತಂತ್ರ ನಿಯಂತ್ರಕ ಇದ್ದರೂ, ಲೋಪ ದೋಷಗಳನ್ನು ಪತ್ತೆ ಹಚ್ಚುವುದು ಕಷ್ಟ. ಯೆಸ್‌ ಬ್ಯಾಂಕ್‌ ತನ್ನ ಪ್ರಮಾದಗಳನ್ನು ಬಹುಕಾಲ ಗೌಪ್ಯವಾಗಿರಿಸಿತ್ತು.
ಆರ್‌ಬಿಐ 2016ರಲ್ಲೇ ಕೈಗಾರಿಕಾ ಸಮೂಹಗಳ ಜತೆಗಿನ ಬ್ಯಾಂಕ್‌ ವ್ಯವಹಾರಗಳ ಅಪಾಯಗಳನ್ನು ಪರಿಗಣಿಸಿತ್ತು.
ಇದರಿಂದ ಕೆಲವೇ ಕಾರ್ಪೊರೇಟ್‌ ಸಮೂಹಗಳ ಕೈಯಲ್ಲಿಆರ್ಥಿಕ-ರಾಜಕೀಯ ಶಕ್ತಿ ಕೇಂದ್ರೀಕೃತವಾಗುವ ಅಪಾಯ ಇದೆ. ಈಗಾಗಲೇ ಬ್ಯಾಂಕ್‌ ಸ್ಥಾಪನೆಗೆ ಬೇಕಾದ ಬಂಡವಾಳ ಇರುವ ಕಂಪನಿಗಳು ಭವಿಷ್ಯದಲ್ಲಿ ತಮ್ಮದೇ ಬ್ಯಾಂಕ್‌ನ ನಿಧಿಯ ದುರ್ಲಾಭ ಪಡೆಯುವ ಸಾಧ್ಯತೆ ಇದೆ.
ಒಂದು ಸಲ ಲೈಸೆನ್ಸ್‌ ಕೊಟ್ಟರೆ, ಅಂಥ ಕಂಪನಿಗೆ ತಾನೇ ಸಾಲ ವಿತರಿಸುವ ಅವಕಾಶ ಸಿಗುವುದರಿಂದ, ಅದರ ದುರ್ಬಳಕೆಗೆ ಪ್ರಚೋದನೆ ಸಿಕ್ಕಂತಾಗಲಿದೆ.
ಭಾರತಕ್ಕೆ ಬ್ಯಾಂಕಿಂಗ್‌ ಸೇವೆಯ ವಿಸ್ತರಣೆ ಅಗತ್ಯ. ಆದರೆ ಸೀಮಿತ ಸಾಲ ವಿತರಣೆಯ ನಡುವೆಯೂ ಬ್ಯಾಂಕ್‌ಗಳು ಅಪಾರ ನಷ್ಟ ದಾಖಲಿಸುತ್ತಿರುವುದೂ ಸತ್ಯ. ಆಗ ಕುಸಿತಕ್ಕೀಡಾಗುವ ಬ್ಯಾಂಕ್‌ಗಳ ರಕ್ಷಣೆಗೆ ಸರಕಾರ ಒದಗಬೇಕಾಗುತ್ತದೆ. ಅಂತಿಮವಾಗಿ ತೆರಿಗೆದಾರರ ಹಣ ಅದಕ್ಕೆ ವೆಚ್ಚವಾಗುತ್ತದೆ.
ಬ್ಯಾಂಕಿಂಗ್‌ ನಿಯಂತ್ರಣ ಕಾಯಿದೆ-1949ಕ್ಕೆ ತಿದ್ದುಪಡಿ ಮಾಡಬೇಕು ಎಂದು ಆರ್‌ಬಿಐ ಸಮಿತಿ ನೀಡಿರುವ ಸಲಹೆ ಮಾತ್ರ ಸೂಕ್ತ. ಇದು ಆರ್‌ಬಿಐನ ಅಧಿಕಾರವನ್ನು ಬಲಪಡಿಸಲಿದೆ. ನಿಯಂತ್ರಣ ವ್ಯವಸ್ಥೆ ಬಲವಾಗಿದ್ದರೆ, ಮೇಲುಸ್ತುವಾರಿ ಸಮಗ್ರವಾಗಿದ್ದರೆ ಬ್ಯಾಂಕಿಂಗ್‌ನಲ್ಲಿ ವಸೂಲಾಗದ ಸಾಲದ ಸಮಸ್ಯೆ ಇರುತ್ತಿರಲಿಲ್ಲ.
